நீங்கள் தேடியது "slug 94446"

கரூர் மாவட்டம் கிருஷ்ண ராயபுரம் அருகே உள்ளது சின்னசேங்கல் கிராமம். இந்த கிராமத்தில் உள்ள ஊராட்சி ஒன்றிய தொடக்கப்பள்ளியில் 1 முதல் 5-ம் வகுப்பு வரை கற்றுத்தரப்படுகிறது. இந்த பள்ளியின் தலைமை ஆசிரியர் அன்புச்செல்வன்.

இவர்தான், பஸ் வசதி இல்லாத கிராமங்களில் இருந்து மாணவ-மாணவிகளை தனது சொந்த காரிலேயே வீட்டில் இருந்து பள்ளிக்கு அழைத்து வருவதும், மாலை பள்ளி முடிந்ததும் மீண்டும் அதே காரில் வீடுகளில் விட்டு விடுவதையும் வழக்கமாக கொண்டிருக்கிறார்.

தினமும் 4 முறை காரில் பள்ளிக்கு மாணவர்களை அழைத்து வருவதற்காக தனியாக டிரைவர் யாரையும் அமர்த்தி கொள்ளவில்லை. தலைமை ஆசிரியர் அன்புச்செல்வனே டிரைவராக செயல்படுகிறார். இதற்காக வாரந்தோறும் டீசல் செலவு ரூ.3 ஆயிரத்துக்கும் மேல் ஆனது. அத்தனைக்கும் அவரே பொறுப்பேற்றுக்கொண்டார்.

கடந்த 2012-ம் ஆண்டு சின்னசேங்கல் ஊராட்சி ஒன்றிய தொடக்கப்பள்ளியில் அன்புச்செல்வன் தலைமை ஆசிரியராக பணியில் சேர்ந்தார். அப்போது பள்ளியில் வெறும் 58 மாணவர்களே படித்து வந்தனர். பள்ளி தொடர்ந்து செயல்பட வேண்டுமானால், அரசு விதிப்படி குறைந்தது 61 மாணவ-மாணவிகளாவது படிக்க வேண்டும்.

பஸ் வசதி இல்லாத கிராமங்களில் குழந்தைகள் பலரை பெற்றோர் பள்ளிக்கு அனுப்பாமல் வைத்திருந்தனர். மேலும் தனியார் பள்ளிகளுக்கு செல்ல கிராமங்களுக்கு வாகன வசதி செய்து செய்யப்பட்டிருந்ததால், பலர் தனியார் பள்ளிக்கு தங்களது குழந்தைகளை அனுப்பி வைத்து கொண்டிருந்தனர். எப்படியும் அரசு பள்ளியில் கூடுதல் மாணவர்களை சேர்த்தே ஆக வேண்டும் என லட்சியத்தில் இருந்த அவர், ஒரே மாதத்தில் மாணவ-மாணவிகளின் எண்ணிக்கையை 63 ஆக உயர்த்தினார்.

மேலும் சின்னசேங்கல் கிராமம் அருகில் உள்ள மேலதோட்டம், குட்டிக்காரன் புதூர் மற்றும் இதர கிராமங்களுக்கு சென்று, தானே தனக்கு சொந்தமான பழைய காரில் குழந்தைகளை பள்ளிக்கு அழைத்து சென்று விட்டு, மாலையில் வீட்டில் விட்டு விடுகிறேன் என பெற்றோரிடம் ஒரு உறுதியை தந்தார். சொன்னபடி செய்தும் காண்பித்தார்.

தலைமை ஆசிரியர் அன்புச்செல்வனின் கரிசனத்தை கண்ட பெற்றோர், கடந்த 2014-ம் ஆண்டு முதல் தங்களது குழந்தைகளை தனியார் பள்ளிகளுக்கு அனுப்புவதற்கு பதிலாக ஆர்வமுடன் அரசு பள்ளிக்கு அனுப்பி வைக்க தொடங்கினர். இதனால், மாணவ-மாணவிகளும் பள்ளிக்கு விடுப்பு எடுக்காமல் காரில் பள்ளிக்கு சென்று வரும் உற்சாகத்தில் திளைத்தனர்.

தற்போது இந்த பள்ளியில் 120 பேர் படித்து வருகிறார்கள். இவர்களில் 70 மாணவ-மாணவிகளை தலைமை ஆசிரியர் தனது சொந்த காரிலேயே பள்ளிக்கு அழைத்து வருவது குறிப்பிடத்தக்கது. 

அனைத்து குழந்தைகளும் பள்ளிக்கூடங்களுக்கு செல்வதை உறுதிசெய்யவேண்டும் என்ற சீரியநோக்கில் தமிழக அரசு பல்வேறு நடவடிக்கைகளை முனைப்புடன் எடுத்து வருகிறது. ஆண்டுதோறும் பட்ஜெட்டில் பள்ளிக்கூட கல்வித்துறைக்காக ஒதுக்கப்படும் தொகை உயர்ந்துகொண்டே போகிறது. 2018-19-ம் ஆண்டுக்கான பட்ஜெட்டில் பள்ளிக்கூட கல்வித்துறைக்காக மட்டும் ரூ.27 ஆயிரத்து 205 கோடியே 88 லட்சம் ஒதுக்கப்பட்டுள்ளது.

என்றாலும், தமிழக அரசு நடத்தும் அரசு பள்ளிக்கூடங்களில் 3,100 பள்ளிக்கூடங்களில் இந்த ஆண்டு மாணவர் சேர்க்கை மிகவும் குறைவாக இருக்கிறது. 812 பள்ளிக்கூடங்களில் 15 மாணவர்களுக்கும் குறைவான மாணவர்களே படித்து வருகிறார்கள் என்ற அதிர்ச்சியான தகவல் கிடைத்துள்ளது. 2014-15-ல் அரசு பள்ளிக்கூடங்களிலுள்ள மாணவர்களின் சேர்க்கை 56 லட்சத்து 55 ஆயிரத்து 628 ஆக இருந்தநிலையில், 2018-19-ல் 46 லட்சத்து 60 ஆயிரத்து 965 ஆக குறைந்துள்ளது.

தற்போது ஏறத்தாழ 59 ஆயிரம் அரசு பள்ளிக்கூடங்கள் இருக்கின்றன. இது ஒரு அதிர்ச்சி என்றால், அடுத்த அதிர்ச்சி 10-ம் வகுப்புவரை மாநில கல்வித்திட்டத்தின்கீழ் படிக்கும் மாணவர்கள், 11-ம் வகுப்பில் சி.பி.எஸ்.இ. பள்ளிக்கூடங்களில் சேருவதற்குத்தான் ஆர்வம் காட்டுகிறார்கள். இதற்குகாரணம், ‘நீட்’ தேர்வுதான். ‘நீட்’ தேர்வு அமலுக்கு முன்பு 10-ம் வகுப்புவரை சி.பி.எஸ்.இ. கல்வித்திட்டத்தில் படிக்கும் மாணவர்கள், பிளஸ்-2-வில் அதிக மார்க் பெறவேண்டும் என்ற எண்ணத்தில், 11-ம் வகுப்பில் சி.பி.எஸ்.இ. பள்ளிகளை விட்டுவிட்டு, மாநில கல்வித்திட்டத்தின் கீழ் நடக்கும் பள்ளிக்கூடங்களில் சேர்வார்கள்.

ஆனால், இப்போது நிலைமை தலைகீழாக மாறிவிட்டது. ‘நீட்’ தேர்வில் வெற்றி பெறவேண்டுமென்றால், மாநில கல்வித்திட்டத்தில் 11, 12-ம் வகுப்பில் படித்தால் போதாது. சி.பி.எஸ்.இ. பள்ளியில் சேர்ந்தால்தான் ‘நீட்’ தேர்வை எதிர்கொள்ள முடியும் என்ற மனோபாவம் மாணவர்களிடம் வந்துவிட்டது. இதன்காரணமாக, இந்த ஆண்டு 61 ஆயிரம் மாணவர்கள் 10-ம் வகுப்புவரை மாநில கல்வித்திட்டத்தில் படித்துவிட்டு, சி.பி.எஸ்.இ. பள்ளிக்கூடங்களில் போய் சேர்ந்திருக்கிறார்கள். வரும் ஆண்டுகளில் இந்த எண்ணிக்கை இன்னும் அதிகரிக்கும் என்று அஞ்சப்படுகிறது.

இதுமட்டுமல்லாமல், பல பள்ளிக்கூடங்களில் பிளஸ்-1 வகுப்பில் பயோலஜி பாடத்தை தேர்வு செய்து படிக்கும் மாணவர்களின் எண்ணிக்கை பெருமளவில் குறைந்துள்ளது. வணிகவியல் பிரிவில் சேரும் மாணவர்களின் எண்ணிக்கை அதிகமாக இருக்கிறது. இதற்கு காரணம், மாணவர்கள் மத்தியில் மருத்துவம் போன்ற உயர்கல்வியில் சேர வேண்டுமென்றால், தனியாக ‘கோச்சிங்’ வகுப்பில் சேர தங்களால் முடியுமா?, அதற்கு நிறைய பணம் செலவாகும்.

அந்தளவு நமக்கு பணவசதி இல்லை என்ற தயக்கத்தால், வணிகவியல் பிரிவில் படித்து கலைக்கல்லூரியில் சேர்ந்தால்போதும் என்ற எண்ணத்தில் வந்திருக்கிறார்கள். இந்தநிலை தொடர்வது நல்லதல்ல. இதற்கு காரணம், அரசு பள்ளிக்கூடங்களில் கல்வித்தகுதி சி.பி.எஸ்.இ. பள்ளிக்கூடங்களுக்கு இணையாக இல்லை என்ற எண்ணம் பரவலாக இருக்கிறது.

இதுமட்டுமல்லாமல், அரசு பள்ளிக்கூடங்களைவிட, தனியார் பள்ளிக்கூடங்களில்தான் கல்வித்தரம் நன்றாக இருக்கிறது என்ற எண்ணம் பரவலாக இருப்பதால்தான், அரசு பள்ளிக்கூடங்களில் மாணவர்கள் சேர்க்கை வீதமும் குறைந்துகொண்டே வருகிறது. இந்த நிலைமையை தவிர்க்க வேண்டுமென்றால், தமிழக அரசின் பள்ளிக்கல்வித்துறை மற்ற சீர்த்திருத்தங்களை எல்லாம் செய்வதில் முனைப்பு காட்டுவதுபோல, கல்வித்தரத்தை உயர்த்துவதில் அதிக முனைப்பு காட்டவேண்டும்.

வேதாரண்யம் :

நாகை மாவட்டம் வேதாரண்யம் அருகே உள்ள நல்லத்தன்காடு கிராமத்தை சேர்ந்தவர் சுரேஷ். இவர் வேதாரண்யத்தில் உள்ள ஒரு அச்சகத்தில் வேலை பார்த்து வருகிறார். இவரது மனைவி சுகன்யா. இந்த தம்பதிக்கு கடந்த 7 ஆண்டுகளுக்கு முன்பு முதன் முதலில் ஆண் குழந்தை பிறந்தது. முதல் குழந்தை ஆணாக பிறந்த மகிழ்ச்சியில் இந்த தம்பதியினர் அளவிலா மகிழ்ச்சி அடைந்தனர். இந்த மகிழ்ச்சி அவர்களுக்கு நீடிக்கவில்லை.

காரணம், இந்த குழந்தையின் இரண்டு கைகளும் முழங்கை வரையில் பாதி அளவே இருந்தன. விரல்கள் இல்லை. இதனால் முதலில் அதிர்ச்சி அடைந்த இந்த தம்பதியினர், தங்களுக்கு ஆண்டவன் கொடுத்த பாக்கியம் இவ்வளவுதான் என்று மனதை தேற்றிக்கொண்டனர். தங்கள் மகனுக்கு துர்கேஸ்வரன் என்று பெயர் சூட்டினர். பிறவி ஊனம் தங்கள் மகனை எந்தவிதத்திலும் பாதித்து விடாத வகையில் துர்கேஸ் வரனை சுரேஷ்-சுகன்யா தம்பதியினர் வளர்த்து வருகிறார்கள்.

தற்போது துர்கேஸ்வரனுக்கு 7 வயதாகிறது. இவன் வடமழை ரஸ்தா பகுதியில் உள்ள ஒரு அரசு தொடக்க பள்ளியில் இரண்டாம் வகுப்பு படித்து வருகிறான். மற்ற குழந்தைகளைப்போல் தனக்கு இரண்டு கைகளும் முழுமையாக இல்லையே என்று துர்கேஸ்வரன் கவலைப்பட்டதே இல்லை. உள்ளதைக்கொண்டு நல்லதை செய்வோம் என்றபடி தனக்கு இருக்கும் கைகளை வைத்துக்கொண்டு பள்ளியில் கற்பிக்கப்படும் கராத்தே, நடனம், கணினி உள்ளிட்டவற்றை கற்று வருகிறான் துர்கேஸ்வரன்.

மற்றவர்களுக்கு தான் எந்தவிதத்திலும் சளைத்தவன் அல்ல என்ற ரீதியில் தனது ஊனத்தை சிறிதளவும் பொருட்படுத்தாமல் வகுப்புஅறையில் ஆசிரியர் சொல்லிக் கொடுக்கும் பாடங்களை கவனித்து படித்து வருகிறான். விரல்கள் இல்லாத நிலையில், ஆசிரியர், கரும்பலகையில் எழுதி போடுவதை தனது முழங்கைகளுக்கு நடுவில் எழுதுகோலை பிடித்து நோட்டில் எழுதுகிறான். சக மாணவர்களுடன் உற்சாகமாக கற்று தேர்ச்சி அடைந்து, விரைவாக முன்னேறி வரும் துர்கேஸ்வரனுக்கு அவனது பள்ளியின் தலைமை ஆசிரியர் சிங்கார வடிவேலும், ஆசிரியை கஜலட்சுமியும் ஊக்கம் அளித்து வருகிறார்கள்.


இதுகுறித்து துர்கேஸ்வரன் கூறியதாவது:-

எங்கள் பள்ளியில் தமிழ் மட்டுமின்றி ஆங்கிலம், இந்தி ஆகியவையும் பயிற்சி அளிக்கப்படுகிறது. எனக்கு முன்னங்கைகள் இல்லை. கல்வி மற்றும் விளையாட்டில் எனக்கு உள்ள ஆர்வத்தை பார்த்த ஆசிரியை கஜலட்சுமி, தலைமை ஆசிரியர் ஆகியோர் எனக்கு பாடம் மட்டுமின்றி அனைத்து துறைகளிலும் சாதனை படைக்க உறுதுணையாக இருந்து வருகின்றனர்.

இதனால் நான் தன்னம்பிக்கையுடன் பயின்று வருகிறேன். என்னுடைய ஊனத்தை நான் ஒரு போதும் தடையாக நினைத்து பார்த்தது கிடையாது. என்னால் முடிந்தவரை மற்றவர்களை எதிர்பார்க்காமல் எனக்கு தேவையானவற்றை செய்து வருகிறேன். சாதிப்பதற்கு ஊனம் ஒரு தடையில்லை.

மேட்டுப்பாளையம் ரோட்டரி சங்கத்தின் மூலமாக எனக்கு செயற்கை முன் கைகளை பொருத்துவதற்கான ஏற்பாடுகளை செய்து வருகின்றனர். கண்டிப்பாக நான் கல்வி மட்டுமின்றி அனைத்து துறைகளிலும் சாதனை படைப்பேன்.

இவ்வாறு அவன் கூறினான்.

கைகள் முழுமையாக உள்ளவர்களே உழைப்பதற்கு யோசிக்கும் இந்த காலத்தில் பாதி அளவே உள்ள கைககளை வைத்துக்கொண்டு சாதனை படைப்பேன் என்று கூறும் மாணவன் துர்கேஸ்வரனுக்கு அப்பகுதி மக்கள் பெரிதும் ஊக்கம் அளித்து வருகிறார்கள். நாமும் அவருக்கு ஒரு சபாஷ் போடலாமே!

கற்றல் குறைபாடு என்பது மூளையில் உள்ள செல்களின் பிணைப்பில் உண்டாகும் பிரச்சினை. கற்றல் குறைபாடு நோய் கிடையாது, ஆகையால் குணப்படுத்த முடியாது ஆனால் இதனை கையாள முடியும்.

தொடர்ச்சியான சிறப்பு பயிற்சிகள் மூலம் மட்டுமே இதனை கையாள முடியும். அதிக நேரம் டியூஷன் சென்று படிப்பதாலோ அல்லது 20 முறை எழுதி பார்ப்பதாலோ கல்வி கற்றுக்கொள்ள இயலாது.

தங்கள் குழந்தை வாழ்க்கையில் வெற்றி பெற கல்விதான் முக்கியமான காரணம் என்று பெற்றோர்கள் ஆனித்தரமாக நம்புகிறார்கள். ஆனால் புள்ளிவிவரங்கள் வேறு மாதிரி தெரிவிக்கிறது. பத்தில் நான்கு குழந்தைகள் கல்வியில் ஏதோ ஒரு வகையில் பின்தங்கியுள்ளனர்.

இந்த குழந்தைகள் பள்ளியிலும் சரி, வீட்டிலும் சரி ,சமூகத்திலும் சரி ஏதோ ஒரு வகையில் அவமானத்திற்கு உள்ளாகிறார்கள் என்பது வேதனைக்குரிய விஷயம். மேலும் ஒரு உண்மை என்னவென்றால் பத்தில் ஏழு சிறார் குற்றவாளிகள் கற்றல் குறைபாடு உள்ளவர்கள். அவர்கள் மன அழுத்தத்திற்கு ஆளாகி தன்னை யாரும் அங்கீகரிக்காத நிலையால் இறுதியில் குற்றச் செயல்களில் ஈடுபடுகிறார்கள்.

“நீ புத்திசாலியான பையன் தானே, இன்னும் கொஞ்சம் முயற்சி செய்து படித்தால் நன்றாக மதிப்பெண் பெறலாமே” என்று சொல்வதை கேட்டிருப்போம். ஆனால் அந்தக் குழந்தையின் மனதில் தன் மேல் தான் தவறு இருக்கிறது என்று தாழ்வு மனப்பான்மை உண்டாகும். இதனால் அவனின் சுய மதிப்பு குறையத்தொடங்கும்.

டீசல் வண்டியில் பெட்ரோல் நிரப்பினால் என்ஜின் ஸ்டார்ட் ஆக முடியாதல்லவா, அதேமாதிரி தான் சாதாரண பள்ளிகளில் கற்பித்தால் கற்றல் குறைபாடுள்ள குழந்தையின் மூளைக்குள் சென்றடையாது. சிறப்பு பயிற்சி மேற்கொள்வதினால் அவர்கள் வாழ்க்கை பிரகாசமாக மாறும் !!

அவர்களுக்கு சிறப்பு கல்வியாளர்கள் மூலம் ஒரு குழந்தைக்கு ஒரு சிறப்பு கல்வியாளர் என்ற விகிதாச்சாரத்தின் மூலம் தனியாக பயிற்சி அளிக்க வேண்டும். அதில் முக்கியமாக ஐம்புலன்கள் வழிமூலமாக கற்றுக் கொடுக்கப்படும் பயிற்சி சிறந்த பயிற்சி முறையாகும்.

பெற்றோர்கள் அணுக வேண்டியவர்கள்:

குழந்தைக்கு கற்றல் குறைபாடுக்கான அறிகுறிகள் இருக்கிறது என்றால், பெற்றோர்கள் பள்ளி ஆசிரியரை பார்த்து குழந்தையின் படிப்பு மற்றும் நடத்தையை பற்றி கேட்டறிதல் வேண்டும். பின்பு குழந்தை நல மருத்துவரை அணுக வேண்டும். கற்றல் குறைபாடு உள்ள குழந்தைகளின் பெற்றோர்களிடம் சந்தேகங்களை கேட்டு தெரிந்து கொள்ளலாம்., மனநல ஆலோசகரை அனுகி குழந்தையின் மனநிலை தொடர்பான அறிக்கை பெறுவது அவசியம்.

ஆய்வு அறிக்கை :

1. ஐ கியூ டெஸ்ட் (அறிவு திறன்)

2. குடும்பத்தில் யாருக்காவது கற்றல் குறைபாடு இருக்கிறதா, சொந்தத்தில் திருமணமா ? தாய் கர்பமாக இருக்கும் பொழுது உடல் மற்றும் மன நலன், பிரசவத்தின் பொழுது ஏதாவது சிக்கல், பிறந்தவுடன் அழுகை மற்றும் எடை, ஒவ்வொரு
மைல்கல்லின் வளர்ச்சி, உதாரணமாக கழுத்து நின்றது, தவழ்வது,முட்டி போடுவது, நடப்பது, பேசுவது, மற்றும் பல.

3. படிப்பது, எழுதுவது

4. குழந்தையின் மன நலன்.

இந்த மனநிலை தொடர்பான அறிக்கையின்படி தற்பொழுது குழந்தை எந்த வயதிற்கானவளர்ச்சியில் உள்ளது என்று கண்டறிந்து பின்னர் அதற்கு தகுந்தவாறு சிறப்பு கல்வியாளரிடம் பயிற்சி வகுப்புகளை தொடங்கலாம் !!

ஐம்புலன்கள் வழியாக கற்றுக் கொள்ளும் முறை:

ஒரு குழந்தைக்கு எந்தப் புலன் வழியில் சிறந்த முறையில் கற்றுக்கொள்கிறது என்பதை அறிந்து அந்த முறையிலேயே கற்பித்தால் அந்த குழந்தை ஆர்வத்துடன் கற்றுக் கொள்ளும்.

* புலன் சார்ந்த கல்வி :

புலன் வழி கல்வி என்பது நம்மிடம் உள்ள ஐம்புலன்களை பயன்படுத்தி கல்வி கற்றுக் கொடுக்க முடியும். கற்றல் குறைபாடு உள்ள குழந்தைகளுக்கு கற்றலில் முன்னேற்றம் ஏற்பட அவர்களுக்கு எந்த புலத்தின் மூலம் கற்பித்தால் ஆர்வம் அதிகமாக இருக்கிறதோ அதனை அறிந்து அதன் மூலம் கற்பிக்கலாம். இவ்வாறு கற்பிக்கப்படுவதன் மூலம் குழந்தைகளின் கற்றல் ஆர்வமும் திறமையும் அதிகரித்து அவர்களின் நடத்தையில் முன்னேற்றம் ஏற்படும்.



* காட்சிப் பொருளின் மூலம் கற்றல்

அதாவது குழந்தைகள் படங்கள், ஓவியம், அல்லது பொருட்களை பார்த்து கற்றுக்கொள்வதில் ஆர்வமாக இருப்பார்கள். படிக்கும் பாடங்களை
பாட்டு, இசை, நடனம் மூலமாக நேராகவோ அல்லது தொலைக்காட்சி மூலமாகவோ மீண்டும் மீண்டும் பார்க்கும் பொழுது அவர்கள் ஞாபக திறனும் மேம்படும்.

* கேட்டலின் மூலம் கற்றல்

கற்பிப்பதை ஒருமுறைக்கு பலமுறை கேட்டால் அதன் மூலம் அவர்களுக்கு யோசிக்கும் திறனும் ஆர்வமும் அதிகமாகும். திரும்பத் திரும்ப ஒரு செய்தியினை கேட்டால் அது நன்றாக மூளையில் பதிந்து விடும். பொதுவாக குழந்தைகள் படிப்பதைவிட கேட்டலில் ஆர்வம் காட்டுவார்கள் உதாரணமாக ஆசிரியர் கதை சொன்னால் மாணவர்களின் கவனம் சிறிதுகூட சிதறாது.

அதேபோன்று தொலைக் காட்சியிலோ வானொலி பெட்டியிலோ கதையோ செய்தியும் கேட்கும்போது கூர்ந்து கவனிக்கும் ஆற்றல் மிக மிக அதிகமாக இருக்கும் இவற்றை அறிந்து அந்த குழந்தைகளுக்கு கேட்டல் மூலம் கற்பிக்கலாம் கற்பிக்கப்படும் பொருளை பதிவு செய்து அதை கேட்டலின் மூலம் அவர்களின் கற்றல் திறன் மேம்படும்

தொடு உணர் கல்வி

வீட்டில் உள்ள உப்பில் விரல்களால் எழுதுதல், எழுத்துக்களை வடிவமைத்தல் அதனைத் தொட்டுப் பார்த்தல் , நவதானியங்களை கொண்டு படங்களை உருவாக்கி அதனை தொட்டு விரல்களால் உணர முடியும். விரல்களை தண்ணீரில் ஈரப்படுத்திக் கொண்டு ஒவ்வொரு எழுத்தையும் சுவர்கள் மேல் எழுதி, அந்த எழுத்துக்கள் மறைவதற்குள் மற்றொரு எழுத்து எழுத வேண்டும். இதை ஒரு விளையாட்டுப்போல் கற்றுக் கொள்வார்கள். இவ்வாரு தொடு உணர்வின் மூலம் கற்றுக் கொடுப்பது கற்றலின் புதிய யுக்தி.

உடல் அசைவின் மூலம் கற்றல்

துரு துரு குழந்தைகளுக்கு இந்த வகை கற்றல் ஒரு வரப்பிரசாதம். உடல் அசைவின் மூலம் கற்றுக் கொடுக்கப்படும். இந்த வகை கற்றலில் ஆர்வம் உள்ள மாணவர்களுக்கு கவனம் மற்றும் சிந்தனை திறன் மேம்படும். சுறுசுறுப்பு உண்டாகும், நடனம் மற்றும் நாடகத்தில் இருக்கும் ஆர்வத்தை வெளிக்கொண்டுவர இது ஒரு தூண்டுதலாக அமையும்.

மூளை உடற்பயிற்சி (பிரைன் ஜிம்)

இந்த வகை கற்றலில் உபயோக படுத்தலாம். தோப்பு கர்ணம் தண்டனைகாக உபயோக படுத்தப்படுத்தப்பட்டது என்று நாம் தவறாக நினைத்துக் கொண்டிருந்தோம், ஆனால் இது ஒரு வகையான மூளை உடற்பயிற்சி என்று வெளிநாட்டு மக்கள் அங்கீகாரம் அளித்துள்ளனர். இடது - வலது பக்க மூளை தூண்டப்படுவது பிரைன் ஜிம் என்று பொருள். இரண்டு பக்க மூளையையும் செயல்படுத்துவதன் மூலம் கவனம் மேம்படும், புத்தி கூர்மை அடையும், ஞாபக சக்தி மெருகேரும், மூளை புத்துணர்ச்சி அடையும் மற்றும் புதிய நியூரான்களை உருவாக்க உதவும்.

பெற்றோர்களுக்கு : (பரம்பரையில் கற்றல் குறைபாடு )

பெற்றோர்கள் மற்ற குழந்தைகளை ஒப்பிட்டு பார்த்து பதற்றப்பட கூடாது .ஆறு வயது வரை குழந்தைகளுக்கு கற்று உணரும் பருவம். பள்ளிக்குச் செல்லும் முன்னே இதற்கான சில அறிகுறிகள் தெரியும். இருந்தாலும் பள்ளி சென்றால்தான்படிப்பதில் பிரச்சினை இருக்கிறதா மற்றும் , யாரை அணுக வேண்டும் என்பதையும் அறியமுடியும். கற்றல் குறைபாடு மரபனு சார்ந்ததாக இருப்பதால் விரைவிலேயே கண்டறிந்து மாற்று வழி சிறப்பு பயிற்சி அளிப்பது மிக அவசியம்.

பெற்றோர்கள் கவனத்திற்கு:

என் குழந்தை எல்லா பாடத்திலும் நன்றாக படிப்பானா , கற்றல் குறைபாட்டிலிருந்து விடுபட்டு விடுவானா ? எவ்வளவு சீக்கிரம் இந்த குறைபாட்டை சரிப்படுத்த முடியும்? இந்த குறைபாடு போகப் போக சரியாகி விடுமா?

பயிற்சிக்கான கால நேரம் குறிப்பிடுவது கடினம். பெற்றோர்கள் பொறுமையுடனும் நிதானத்துடனும் தன் குழந்தையின் முன்னேற்றத்திற்கு உறுதுணையாக இருந்து அவர்களை ஊக்குவிக்கவேண்டும்.மேலும் பயிற்சிகளை பாதியில் நிறுத்தாமல் தொடர்ச்சியாக பயிற்சி கொடுப்பது மிக மிக அவசியம் !! 

படிப்படியாக உயர்ந்து வருகிறது தமிழக கல்வித்துறை. தனியார் வசம் இருந்த கிண்டர்கார்டன் எனப்படும் மழலையர் பள்ளிக்கூடங்களை சொந்தமாக்கி சாத்தியமாக்கி இருக்கிறது தமிழ்நாடு பள்ளிக்கல்வித்துறை. தனியார் பள்ளிகள் வசம் இருந்த தூண்டில் இந்த கே.ஜி. வகுப்புகள். 5 வயது நிறைவடைந்த பின்னர்தான் அரசு பள்ளிக்கூடங்களில் ஒன்றாம் வகுப்பில் சேர்க்க முடியும் என்ற நிலை இருந்ததால், 3 வயதில் இருந்தே சமாளிக்க முடியாத குழந்தைகளை கே.ஜி. வகுப்புகளில் சேர்க்க வேண்டிய கட்டாயம் எல்லா வீடுகளையும் எட்டிப்பார்க்க, அந்த நுழைவு வாயில் தனியார் பள்ளிகளின் முக்கிய வாயிலாகவே உள்ளது.

ஏற்கனவே மழலையர்களுக்காக அங்கன்வாடி மையங்கள் சமூக நலத்துறை மூலம் இயங்கி வந்தாலும், அதில் தனியார் ஆங்கிலப்பள்ளிகளுக்கு நிகரான கல்வி வாய்ப்பு இல்லாமல் இருந்ததால் அதில் குழந்தைகளை சேர்க்க பொதுமக்கள் விரும்பவில்லை என்பதே உண்மையாக இருந்தது.

ஆனால், தமிழக பள்ளிக்கல்வித்துறை அமைச்சர் கே.ஏ.செங்ககோட்டையன் எடுத்த பல்வேறு திட்டங்கள் பள்ளிக்கல்வித் துறையை புது எழுச்சி கொள்ள வைத்தது. அவரால் எடுக்கப்பட்ட முடிவுகளில் ஒன்று, அங்கன்வாடி மையங்களை மழலையர் வகுப்புகளாக மாற்றுவது.

இந்த திட்டம் பொதுமக்களுக்கு மிகப்பெரிய மகிழ்ச்சியை ஏற்படுத்தி இருக்கிறது என்பதை கடந்த விஜயதசமி நாள் வெளிக்காட்டியது. மாதிரி பள்ளிக்கூடங்களில் தொடங்கப்பட்ட எல்கே.ஜி. வகுப்புகளை பொதுமக்கள் பலரும் வந்து பார்த்து, அடுத்த ஆண்டு சேர்க்கைக்காக முன்பதிவு செய்து வரும் வேளையில், அரசு நடுநிலைப்பள்ளி, தொடக்கப்பள்ளிக்கூடங்களுடன் இணைந்து இருக்கும் அங்கன்வாடி மையங்களை மழலையர் பள்ளிகளாக மாற்றி, வகுப்புகளையும் தொடங்கி இருக்கிறது தமிழக பள்ளிக்கல்வித்துறை.

கடந்த 21-ந்தேதி வகுப்புகள் தொடங்கிய அன்று மாணவர் சேர்க்கை பரவலாக நன்றாகவே இருந்தது என்கிறது அதிகாரிகளின் புள்ளிவிவரங்கள். பெற்றோர் பலரும் பள்ளிக்கூடங்களுக்கு வந்து மழலையர் வகுப்புகள் செயல்பாடுகள் குறித்து கேட்டு செல்கிறார்கள்.

இனி இலவசமாக மழலையர் கல்வி கிடைக்கும் என்பது நடுத்தர பெற்றோருக்கும், நமது குழந்தைகளும் மழலையர் பள்ளிக்கு செல்லுமே என்கிற மகிழ்ச்சி ஏழை பெற்றோருக்கும்...

ஆனால், ஆசிரியர்கள் மத்தியில் இன்னொரு வடிவில் பிரச்சினை எழும்பி உள்ளது.

தொடக்கத்தில் அங்கன்வாடி மையங்கள் மழலையர் பள்ளிகளாக மாற்றப்படும் என்று அறிவிக்கப்பட்டபோது, சமூக நலத்துறை மூலம் பணியில் சேர்ந்து தற்போது அங்கன்வாடி அமைப்பாளர்களாக இருக்கும் பணியாளர்கள் தங்களுக்கு ஆசிரியை பணி வர வாய்ப்பு உள்ளது என்று கருதினார்கள். காரணம், கடந்த சில ஆண்டுகளாக அங்கன்வாடி பணியாளர்களாக தேர்வு பெற்றிருப்பவர்களில் 50 சதவீதத்துக்கும் அதிகமானவர்கள் பட்டப்படிப்பு முடித்தவர்கள். ஆசிரியை பயிற்சி முடித்தவர்களும் இருக்கிறார்கள். எனவே கல்வித்தகுதி அடிப்படையில் தங்களுக்கு அந்த வாய்ப்பு கிடைக்கும் என்று நினைத்தார்கள்.

ஆனால், மழலையர் பள்ளிகள் பள்ளிக்கல்வித்துறையின் கீழ் இயங்கும் என்ற முடிவு, அவர்களுக்கு மட்டுமின்றி பள்ளிக்கல்வித்துறையில் பணியாற்றி வரும் ஆசிரிய-ஆசிரியைகளுக்கும் அதிர்ச்சியை அளித்து இருக்கிறது. மழலையர் பள்ளிகளுக்கு பணிநிரவல் முறையில் தற்போது ஆசிரியைகள் நியமிக்கப்பட்டு உள்ளனர். அரசு மற்றும் அரசு நிதி உதவி பெறும் பள்ளிக்கூடங்களில் 30 பேருக்கு ஒருவர் என்ற விகிதத்தில் மாணவர் ஆசிரியர் விகிதாச்சாரம் உள்ளது.

இந்த விகிதாச்சாரத்தின் படி உபரியாக இருக்கும் ஆசிரியைகளை மழலையர் பள்ளிகளுக்கு அனுப்ப முடிவு செய்து, பணியிட மாறுதல்கள் வழங்கப்பட்டு உள்ளன. இதனால் அவர்களுக்கு ஊதிய பாதிப்பு எதுவும் இல்லை. ஆனால், மழலையர் பள்ளிக்கூடங்களுக்கு பாடம் எடுக்க செல்வதன் மூலம் தங்களுக்கு பணி பாதுகாப்பு இல்லாத நிலை வந்து விடுமோ என்கிற அச்சம் ஏற்பட்டு உள்ளது. இதனால் கடந்த வாரமே பள்ளிக்கல்வித்துறை சம்பந்தப்பட்ட ஆசிரியைகளுக்கு பணியிட மாறுதல் உத்தரவு வழங்கியும் யாரும் உத்தரவை பெற்றுக்கொள்ளவில்லை. இதனால் 21-ந்தேதி மழலையர் வகுப்புகள் தொடங்கப்பட்டபோது அதற்காக நியமிக்கப்பட்ட ஆசிரியைகள் யாரும் பணிக்கு வரவில்லை.

எனவே மழலையர் வகுப்புகள் தொடங்கப்பட்டு இருப்பது சாதகமா? பாதகமா? என்கிற கேள்வி மக்கள் மத்தியிலும், ஆசிரியர்கள் மத்தியிலும், அங்கன்வாடி பணியாளர்கள் மத்தியிலும் ஏற்பட்டு இருக்கிறது.

மழலையர் வகுப்புகளுக்கு பள்ளிக்கல்வித்துறையின் கீழ் ஆசிரியர்கள் நியமிக்கப்படுகிறார்கள். பள்ளிக்கல்வித்துறை பாடத்திட்டத்தை அளிக்கிறது. ஆனால், அங்கன்வாடி மையங்கள் மூலம் உணவு, சத்துமாவு, முட்டை உள்ளிட்ட அரசின் நலத்திட்டங்கள் வழங்கப்படுகின்றன. 1-ம் வகுப்பு முதல் படிக்கும் மாணவ-மாணவிகளுக்கு அரசு 14 வகையான இலவச திட்டங்களை அறிவித்து செயல்படுத்தி இருக்கிறது. புதிதாக தொடங்கப்பட்ட மழலையர் பள்ளிகளுக்கு இந்த இலவசங்கள் கிடைக்குமா? என்பது பெற்றோரின் கேள்வி.

பள்ளிக்கல்வித்துறையின் கட்டுப்பாட்டில் குழந்தைகள் சென்றுவிட்டால், அங்குள்ள அங்கன்வாடி மையங்களில் எங்களுக்கு என்ன வேலை? நாங்கள் என்ன செய்வது? என்பது அங்கன்வாடி மைய பணியாளர்களின் கேள்வி.

மழலையர் பள்ளிகளுக்கு என்று நியமிக்கப்பட்டு இருக்கும் ஆசிரியைகள் யாருடைய கட்டுப்பாட்டில் இயங்குவார்கள்?. அவர்களை பள்ளிக்கூட தலைமை ஆசிரியர்கள் கட்டுப்படுத்த முடியுமா? அவர்களை வேறு வகுப்புகள் எடுக்க பயன்படுத்த முடியுமா? என்பது பள்ளிக்கூட தலைமை ஆசிரியர்களின் கேள்வி.

இதுவரை 1-ம் வகுப்பு முதல் 8-ம் வகுப்புவரை மாணவ-மாணவிகளுக்கு பாடம் கற்றுத்தந்து விட்டு, உபரி என்கிற காரணத்தால் மழலையர் பள்ளிகளுக்கு செல்பவர்கள் யாருடைய கட்டுப்பாட்டில் இயங்க வேண்டும். அத்தியாவசிய தேவைகளுக்கு விடுமுறை எடுத்தால், சம்பந்தப்பட்ட பள்ளிக்கூட ஆசிரிய-ஆசிரியைகள் குழந்தைகளை கவனிப்பார்களா?. இனி வரும் ஆண்டுகளில் பள்ளிக்கூடங்களில் மாணவர் சேர்க்கை அதிகரித்தால் மீண்டும் 1-ம் வகுப்பு முதல் 8-ம் வகுப்புவரையான பள்ளிக்கூடங்களில் பாடம் எடுக்க அனுமதிக்கப்படுவார்களா?. அங்கன்வாடி மையங்கள் சமூகநலத்துறை கட்டுப்பாட்டில் இயங்குவதால், மழலையர் பள்ளிகளில் பணிக்கு சேரும் ஆசிரியைகளும் பள்ளிக்கல்வித் துறையில் இருந்து சமூக நலத்துறைக்கு சென்று விட வேண்டுமா? என்ற கேள்வி ஆசிரியர்களுக்கு. ஒன்றிய வாரியாக, பள்ளிக்கூடங்கள் வாரியாக இளையோராக இருக்கும் ஆசிரியர்களுக்கு அடுத்து அங்கன்வாடி மையங்கள் மழலையர் பள்ளிகளாக மாற்றப்படும்போது நமக்கும் இதே நிலைதானா? என்ற கேள்வி.

இப்படி கேள்விகளால் தங்களுக்கு பாதகமாக இருப்பதாக ஒருதரப்பு இருக்கிறது. எனவே தற்போது மழலையர் பள்ளிக் கூடங்கள் வெற்றிகரமாக இயங்க, அரசின் சார்பில் சரியான புரிதலை ஏற்படுத்த வேண்டும். மழலையர் பள்ளிக்கூடங்களுக்கு என்று புதிதாக ஆசிரியைகளை தேர்வு செய்து பணியில் நியமித்து குழந்தைகளுக்கு சிறப்பான அடித்தளத்தை உருவாக்க வேண்டும்.

-முடிவேல் மரியா

தேர்வு நெருங்க நெருங்க பலருக்கும் பயமும், பதற்றமும் தொற்றிக் கொள்ளும். அப்படி அவசியமற்ற பயம் வரவேண்டாம் என்றால் தேர்வுக்கு தெளிவாக திட்டமிட்டு படித்தாலே போதுமானது. ஏறத்தாழ பாடத்திட்டங்கள் நிறைவு பெற்று முழுஆண்டுத் தேர்வுக்கு விறுவிறுப்பாக இயங்கிக் கொண்டிருப்பீர்கள். இனி மீதி இருக்கும் காலங்களை சரியாக திட்டமிட்டு படித்தால் பயமின்றி சாதனை படைக்கலாம். அதற்கான சில அடிப்படை விஷயங்கள் இங்கே...

தேவை புதிய அட்டவணை

அரையாண்டு விடுமுறை மற்றும் நீண்ட பொங்கல் விடுமுறை இடைவேளை உங்களுக்குப் புத்துணர்ச்சி தந்திருக்கும். அந்த உற்சாகத்துடன் பொதுத் தேர்வுக்கு திட்டமிட சரியான தருணம் இது. பாடத்திட்டங்கள் நடத்தி முடிக்கப்பட்டு நிறைவு பெற்றிருக்கும் சமயத்தில் ஒவ்வொரு பாடத்திற்குமான நேர ஒதுக்கீடு செய்து படிப்பது, எழுதிப் பார்ப்பது, தேர்வில் அதிக மதிப்பெண் பெற கை கைகொடுக்கும்.

அதற்கான திட்டமிடலுக்கு சரியான புரிதல் அவசியம். முதலில் எல்லா நேரமும் படித்துக் கொண்டே இருக்க வேண்டும் என்று மன இறுக்கத்தை ஏற்படுத்தாதீர்கள். படிப்புக்கு இடையில் கட்டாயம் ஓய்வு அவசியம். எனவே போதிய இடைவேளை மற்றும் மன இறுக்கம் போக்கும் பொழுதுபோக்கு அம்சத்துடன்கூடிய தேர்வு அட்டவணையை தயார் செய்யுங்கள்.

அட்டவணை தயாரிக்கும்போது படித்த பாடங்களுக்கு குறைவான நேரத்தை ஒதுக்கி திருப்புதல் செய்யுங்கள். இன்று முதல் தேர்வுக்கு இருக்கும் காலத்தை சரிபாதியாக பிரித்து, இதுவரை நன்றாகப் படிக்காத மற்றும் முக்கியமாக படிக்க வேண்டிய பாடங்களுக்கு முக்கியத்துவம் கொடுத்து படியுங்கள்.

தேர்வுக்கு இன்னும் எத்தனை வாரங்கள் இருக்கின்றன. ஒவ்வொரு பாடத்திலும் எவ்வளவு பக்கங்கள் இருக்கின்றன என்பதை கணக்கிடுங்கள். இறுதி வாரத்தை முற்றிலும் ஒதுக்கிவிட்டு மற்ற வாரங்களுக்குள் படித்து முடிக்கும் வகையில் திட்டமிடுங்கள். ஒவ்வொரு வாரத்திற்கும் எவ்வளவு பகுதிகளை படித்து முடிக்க வேண்டும். தினசரி எவ்வளவு பாடங்களை திருப்புதல் செய்ய வேண்டும் என்பதை கணக்கிடுங்கள்.

படிப்பின்போது...

அட்டவணையின்படி படித்து முடிப்பதை வழக்கமாக்குங்கள். உங்கள் அட்டவணையை பெற்றோரிடம் காண்பித்து அவர்களின் உதவியுடன் தினசரி பயிற்சிகளில் கேள்வி கேட்பது அல்லது எழுதிக்காட்டுவது என பயிற்சி மேற்கொள்ளலாம்.

சகதோழிகள், மாணவர்களை சேர்த்துக் கொண்டும் குழுவாக படித்து பயிற்சி பெறுவது நல்ல பலன் தரும். பாடங்களை மற்றவர்களிடம் ஒப்புவிப்பது தவறுகளை தவிர்க்கவும், நினைவில் நிறுத்தவும் சிறந்த வாய்ப்பாக அமையும். எழுதிப்பார்க்க அதிக நேரம் கிடைக்காவிட்டால் இப்படிச் செய்வது சிறந்தது.

பள்ளியிலும், டியூசன்களிலும் நடைபெறும் மாதிரி தேர்வுகளை மகிழ்ச்சியுடன், முக்கியத்துவம் கொடுத்து எதிர்கொள்ளுங்கள். வீட்டிலும் நீங்கள் படித்த பாடப்பகுதிகளில் சுய தேர்வு எழுதி பரிசோதனை செய்யுங்கள்.

புதிய பாடங்கள் மற்றும் கடினமான பாடங்களை படிக்க அதிகாலை நேரத்தை ஒதுக்குங்கள். போதிய ஓய்வுக்குப் பிறகு மூளை புத்துணர்ச்சியுடன் இருக்கும் காலைப்பொழுதில் படிக்கும் பாடங்கள் எளிதில் மனதில் பதிந்துவிடும்.

படிக்கும் இடத்தில் இடையூறு இல்லாமல் பார்த்துக் கொள்ளுங்கள். அமைதியான இடத்தை படிக்க தேர்வு செய்யுங்கள்.

ஒவ்வொரு மணி நேரத்திற்கும் சில நிமிடங்களை இடைவேளைவிடுங்கள். 5 முதல் 10 நிமிடங்களை ஒதுக்கி நண்பர்களுடன் அரட்டை அடிப்பது, நகைச்சுவை துணுக்குகளை ரசிப்பது என மனதை லேசாக்கிக் கொள்ளுங்கள். இயற்கை காட்சிகளைப் பார்த்தும், கண்களை மூடி தியானித்தும் கண்களுக்கு பயிற்சியளித்துக் கொள்ளுங்கள்.

பொழுதுபோக்கு மற்றும் இடைவேளை நேரத்தில் படிப்பைப் பற்றி சிந்திக்க வேண்டாம்.

தினசரி முடித்த பாடங்களை அட்டவணையில் பதிவு செய்யுங்கள்.


சராசரி மாணவர்கள்

சராசரியாக படிக்கும் மாணவர்கள், பாடங்கள் நிறைய சேர்ந்துவிட்டதை எண்ணி பதற்றப்பட வேண்டாம். அப்படி படபடப்புடன் படிப்பது ஏற்கனவே படித்த பாடங்களைக்கூட மறக்க வைத்துவிடும். அதுபோன்றவர்கள் முக்கியமான பாடங்களை மட்டும் படிக்க முயற்சியுங்கள். இதுவரை படித்த பாடங்களை மீண்டும் நன்கு பயிற்சி செய்து கொள்ளுங்கள்.

ஆசிரியர், பெற்றோர் உதவியை நாடுங்கள். ஒவ்வொரு பாடத்திலும் எளிதாக மதிப்பெண் பெறும் முறைகளை ஆசிரியர்களிடம் கேட்டு அறிந்து கொண்டு தேர்ச்சி பெறுவதற்கான முயற்சியில் இறங்குங்கள்.

தேர்வுக்கு இன்னும் நாட்கள் இருக்கிறது என்று விடுமுறை நாட்களையும், நேரத்தையும் வீணடிக்க வேண்டாம். ஒவ்வொரு பாடத்திற்கும் உள்ள இடைவேளை நாட்களில் படித்துக் கொள்ளலாம் என்ற அதீத நம்பிக்கையை கைவிட வேண்டும். இல்லாவிட்டால் தேர்வு பயம் தொற்றுவதை தவிர்க்க முடியாது. மனச்சோர்வும் மிகுந்துவிடும்.

பாடங்களை படிப்பதுடன் நில்லாமல் எழுதிப் பார்க்கவும் நேரம் ஒதுக்குங்கள். படங்கள், தேற்றங்கள், சமன்பாடுகள், கிராப் வரைபடங்கள், மேப், ஒரு மதிப்பெண் வினாக்கள் போன்றவை எளிதாக மதிப்பெண்கள் பெற உதவும் என்பதால் அவற்றை சரியாக பயிற்சி செய்வது அவசியம்.

உடல் நலன்

தேர்வு எவ்வளவு முக்கியமோ, அதை எதிர்கொள்ள உடல் ஆரோக்கியமும் முக்கியம். தொடர்ந்து படிப்பது மற்றும் பயத்துடன் படிப்பது போன்றவற்றால் மாணவர்களுக்கு பல்வேறு பாதிப்புகள் ஏற்படும் வாய்ப்பு உண்டு. படித்ததை மறந்துவிடுதல், மனச் சோர்வு, மலச்சிக்கல், கண்களில் கருவளையம் உண்டாதல், ஆற்றல் இழப்பு போன்றவை குறிப்பிடத்தக்கவை.

நிறைய நேரம் படித்தும் மனதில் எதுவும் நிற்காவிட்டால் சிந்தனை சிதறல் இருப்பதாக அறியலாம். மனதை பக்குப்படுத்தும் யோகா மற்றும் உடற்பயிற்சி செய்து மனதை ஒருமுகப்படுத்திவிட்டு படிக்க ஆரம்பித்தால் இந்த பிரச்சினைகளைப் போக்கலாம்.

மூச்சுப்பயிற்சியானது மூளை சுறுசுறுப்பாக செயல்பட வைக்கும். இது மனச்சோர்வின்றி படிக்க துணை செய்யும்.

நொறுக்குத் தீனி கொறித்துக் கொண்டே படிப்பதும் சிந்தனையை மழுங்கடிக்கும். காரம், புளிப்பு அதிகமாகாமல் பார்த்துக் கொள்வதும் மலச்சிக்கல் உள்ளிட்ட பிரச்சினைகளை தடுக்கும்.

காலை உணவை தவிர்க்கக்கூடாது. பீட்ஸா, பர்கர், பரோட்டா போன்றவற்றை தவிர்க்க வேண்டும். காய்கறிகள், பழங்கள், கீரைகளை அதிகமாக சேர்த்துக் கொள்ளுங்கள். போதிய அளவு தண்ணீர் பருகுங்கள்.

நீண்ட நேரம் படிப்பதால் கண்களில் எரிச்சல் ஏற்பட வாய்ப்பு உண்டு. கண்விழித்துப் படித்தால் கண்கள் சிவந்துவிடுவது, கண்களைச் சுற்றி கருவளையம் ஏற்படுவது போன்ற பாதிப்புகளை எதிர்கொள்ளலாம். எனவே குறைந்தபட்சம் 6 முதல் 8 மணி நேரம் ஓய்வு எடுத்துக் கொண்டு படியுங்கள்.

செய்யக்கூடாதவை...

உணவுப் பழக்கத்தில் செய்யக்கூடாதவற்றை ஏற்கனவே தெரிந்து கொண்டோம்.

தேர்வு நேரத்தில் வேறு சில விஷயங்களையும் தவிர்க்க வேண்டும். காயம் மற்றும் விபத்து நேரும் சாகசங்களில் ஈடுபடக்கூடாது. உதாரணமாக பைக்குகளை ஸ்டைலாக ஓட்டுவது, கிணற்றில் டைவ் அடித்து குளிப்பது, பஸ்கள், ரெயில்களில் தொங்கியபடி பயணிப்பது போன்றவை கூடாது. கடினமான வேலைகள், கூர்மையான ஆயுதங்கள், நெருப்பை பயன்படுத்தி செய்யும் வேலைகளில் கவனமாக இருக்க வேண்டும். காயம் ஏற்பட்டால் படிப்பை பாதிக்கும். பெரிய பாதிப்பு ஏற்பட்டால் தேர்வை எதிர்கொள்ள விடாமலும் செய்துவிடும் என்பதால் கவனம் தேவை.

அதிகமாக டி.வி. மற்றும் செல்போனை பார்ப்பதை தவிர்த்துவிட்டு தேர்வுக்கு தயாராகுங்கள்.

தலைமுடியின் அழகும், வண்ணமிகு ஆடையின் அழகும், வாசனைப் பூச்சின் அழகும் உண்மையான அழகாகாது. நாம் நல்லவனாக இருக்கிறோம் என்ற உறுதிப்பாட்டினைத் தருகின்ற ஒழுக்க கல்வியைப் பெறுதலே சிறந்த அழகாகும். எது சிறந்த கல்வி, எது உண்மையான அழகு என்பதை நாலடியார் அழகாகச், சிறப்பாகச் சொல்கிறது. நல்ல ஒழுக்கங்களை, கற்றுத் தரும் கல்வி அறிவே இன்று மிக முக்கியத் தேவை. முன்பு மாணவர்கள் குருகுலத்தில் தங்கி குருவிடம் நல்ல பண்புகள், ஒழுக்கங்கள் என்று கற்றுக்கொண்டார்கள். படிப்பு முடிந்து அவர்கள் வரும்போது வாழ்வை எதிர்கொள்ளும், தீரம், தைரியம், நம்பிக்கை மனம் முழுதும் நிரம்பி இருக்கும்.

ஆனால் இன்றைய கல்வி முறை மாணவர்களை, அடிப்படை மனித குணங்கள் இல்லாதவர்களாக்கிக் கொண்டிருக்கிறது. அவர்களின் பொறுமை, நல்ல எண்ணங்கள், நம்பிக்கை போன்றவற்றை கல்வி அழித்துவிட்டதோ என்ற உணர்வுதான் ஏற்படுகிறது. அதற்கு சாட்சியாக எத்தனை விதமான செய்திகள். ஆசிரியர் திட்டியதால் மாணவி தற்கொலை. பெற்றோர் திட்டியதால் மாணவர் விஷம் குடித்து சாவு, தந்தையைக் கொன்ற மகன், ஆசிரியரைக் குத்திக் கொன்ற மாணவன் என்ற செய்திகளை படிக்கும்போது மனம் பதறுகிறது.

படிக்கும் காலத்தில் பாதை மாறுவது, பெரியவர்கள், ஆசிரியர்களிடம் மரியாதை இல்லாமல் நடப்பது, கண்டித்தால் உடனே விபரீத முடிவு எடுப்பது என்று இன்றைய இளைய சமுதாயம் பயமுறுத்துகிறது. தான் தவறு செய்தாலும் திட்டுவது, மனம் நோகப் பேசக் கூடாது, கண்டிக்கக் கூடாது என்றால் அவர்களை எப்படிதான் திருத்துவது, ஆசிரியர் எப்படி திட்டுவது.

எந்தச் சுயநலமும் இல்லாமல் நம் குழந்தைகள் இவர்கள். இவர்கள் நன்றாகப் படித்து, தங்கள் வாழ்க்கைத் தரத்தை உயர்த்திக் கொள்ள வேண்டும் என்ற அக்கறைதான் ஆசிரியரின் கண்டிப்பில் இருக்கும். இதேபோல்தான் பெற்றோர்களும். நம்மை இந்த உலகத்துக்குக் கொண்டு வந்தவர்கள். நமக்காக பாடுபட்டு, தன் சுக துக்கங்களை மறந்து பெற்ற குழந்தைகளின் வளர்ச்சிக்குப் பாடுபடுபவர்களுக்கு, ஒரு தவறை சுட்டிக் காட்டித் திட்டவோ, கண்டிக்கவோ உரிமை இல்லையா?

கல்வியும் இன்றைய மாணவ சமுதாயத்துக்கு கடினமாக இருக்கிறது. தேர்ச்சி என்ற ஒரு இலக்கை மட்டுமே வைத்து கல்வி நிறுவனங்கள் ஓடிக் கொண்டிருக்கிறது. மாணவர்களுக்கு சிறிது கூட ஓய்வு என்றில்லாமல் எப்போதும் எதோ ஒரு தேர்வு வந்து கொண்டிருக்கிறது. காலாண்டு, அரையாண்டுத் தேர்வு விடுமுறை நாட்களிலும் ஏதாவது வகுப்புகள் வைத்து மாணவர்களுக்கு பொழுதுபோக்குக்கு தடை ஏற்படுத்தி விடுகின்றனர்.

சிறிது கவனம் பிசகினாலும் தேர்ச்சி அடைய முடியாது என்று பயம். தொழில்நுட்ப உலகின் வேகத்துக்கு ஈடு கொடுத்து வாழ்வில் ஸ்திரமாக்கி நிற்க வேண்டும் என்ற பயம் மாணவர்கள் மனதில். போட்டிகளைச் சமாளித்து முதலிடத்தை தக்க வைக்க வேண்டும், மாணவர்களின் எண்ணிக்கையை அதிகமாக்க வேண்டும் என்ற பதற்றம் கல்வி வியாபார நிறுவனங்களிடம்.

மனம் ஒரு மாற்றத்திற்கு ஏங்குகிறது. அப்போது ஒரு சினிமா, பாடல், மனசை குறுகுறுக்க வைக்கும் விஷயத்தில் கவனம் போய் விடுகிறது. பல மாணவிகள் படிக்கும் காலத்தில் பாதை மாறிப் போவது இதனால்தான். இந்த நேரத்தில் ஒரு சின்ன வழிகாட்டலை ஆசிரியரும், பெற்றோர்களும் மேற்கொள்ள வேண்டும். ஆசிரியர் திட்டினால் பெற்றோர்களும் உடனே அது குறித்து புகார் தருவது, அரசியல் பிரமுகரை அழைத்துக்கொண்டு வந்து பள்ளியில் ஆசிரியரை தரக் குறைவாகப் பேசுவது என்ற மனப்பான்மையை மாற்றிக்கொள்ள வேண்டும்.

எந்த ஆசிரியரும் ஆசைப்பட்டு மாணவர்களை திட்டுவதில்லை. அவர்கள் தவறு செய்தால் கண்டிக்க வேண்டியது ஒரு ஆசிரியராக அவர்களது கடமை. ஆசிரியர் கண்டிப்பது நல்ல பண்புகளுடன் நடக்கத்தான் என்ற உணர்வும், ஆசிரியையும் பள்ளியில் அவளுக்கு ஒரு தாய் என்ற உணர்வும் மாணவர்களுக்கு வர வேண்டும்.

“கல்வி கரையில், கற்பவை நாள் சில” என்கிறது அதே நாலடியார். “நல்ல ஒழுக்கமுள்ள பெற்றோர்களும், அதைக் கற்பிக்கும் ஆசிரியர்களே இன்று நம் தேவை” என்கிறார் மகாத்மா. கல்வியின் முழுப் பயன் எது? என்பதை உணர்ந்து அதை கற்க வேண்டும். “கற்க கசடற, நிற்க அதற்குத் தக” என்கிறது குறள். இன்று பயங்கரவாதம், ஊழல், லஞ்சம், பாலியல் வன்முறை என்று பல சம்பவம் நடப்பதை காண்கிறோம். அதில் ஈடுபட்டவர்களைப் பார்த்தால் அதிகம் பேர் மெத்தப் படித்தவர்கள். மதிப்பான பதவியில் இருப்பவர்கள். கல்வி இவர்களுக்கு கற்றுத் தந்தது என்ன? ஒழுக்கக் கல்வி என்பது பிறக்கும்போதே ஆரம்பித்து விட வேண்டும்.

மனிதப் பண்புகள், தன்னைப் போலவே பிறரையும் நினைக்கும் பாங்கு, அன்பு, கருணை, பொறுமை, நேர்மை, என்ற நல்ல விஷயங்களை கற்றுக்கொடுக்க வேண்டும் பள்ளிகளும், வீடுகளும்.

ஒழுக்கம் என்பது யாரும் இல்லாத போதும் நம் செயல்கள், சிந்தனைகள், பேச்சுகள் நேர்மையாக இருப்பதே. அது மனசாட்சியின் வடிவம். அதை மீறி நடந்தால் பின் வாழும் நாள் வரை உறுத்தலோடுதான் வாழ வேண்டும். கல்வியின் முழு வடிவம் என்ன என்று ஆசிரியர்கள் தெளிவாக உணர்ந்து அதன்படி நடக்க வேண்டும். சமூகத்தின் அடித்தளம் அவர்கள். சம்பளம் வாங்குவதும், தேர்ச்சி சதவீதம் காட்டுவதும் மட்டுமே வேலை அல்ல. ஒரு சமூகமே அவர்களின் விரல் அசைவுக்கு கட்டுப்படும். அதை உணர்ந்து கனிவோடும், அன்போடும், நல்ல எண்ணங்களுடன் மாணவ சமுதாயத்தை அணுக வேண்டும்.

பாடத்துடன் நல்ல ஒழுக்க நெறிகளையும் கற்பிக்க வேண்டும். பள்ளிக்குப் போகும் தங்கள் குழந்தைகள் என்ன செய்கிறார்கள்? எப்படிப் படிக்கிறார்கள்? என்று பெற்றோர்களும் அடிக்கடி கண்காணிக்க வேண்டும். அதைவிட முக்கிய கடமை மாணவர்களுக்கு உள்ளது. இந்தப் பருவத்தில் கவனம் சிதறாமல் இருந்தால் வாழ்நாள் முழுதும் மதிப்பும், கவுரவமாக வாழலாம். சந்தோஷம் என்பது கோடீஸ்வரனாக வாழ்வதில் இல்லை. மற்றவர்களால் வணங்கத் தக்க விதத்தில் நல்ல சான்றோர்களாக, ஒழுக்கமுள்ளவர்களாக வாழ்வதிலேயே உண்மையான மகிழ்ச்சி அடங்கி உள்ளது.

ஜி.ஏ.பிரபா, எழுத்தாளர்.

கணினிகளை மிஞ்சியதாக செல்போன்கள் அவதரித்துவிட்டபிறகு, மென்பொருட்களைவிட அப்ளிகேசன்களின் ஆட்சி அதிகமாகிவிட்டது. உணவு ஆர்டர் கொடுப்பதில் இருந்து முன்பதிவில்லா டிக்கெட் பெறுவதுவரை அப்ளிகேசன்களின் பயன்பாடு அதிகம். கல்விச் சேவைக்கும் எண்ணற்ற அப்ளிகேசன்கள் உள்ளன. கல்லூரி மாணவர்களுக்கு பயன்படும் சில அப்ளிகேசன்களை இங்கே அறிவோம்...

புராஜெக்ட்கள் தயாரிக்க...

பள்ளிப் பருவத்தில் இருந்தே கட்டுரைகள் படைப்பது பலருக்கு கஷ்டமான விஷயம். கல்லூரியில் கட்டுரைகள் மற்றும் அசைன்மென்டுகள் விரிவாகவும் தெளிவாகவும் தயாரிக்கப்பட வேண்டும். பல நேரங்களில் ஆராய்ச்சி கட்டுரைகள்போல பாடப்புத்தகத்தில் இல்லாத நிறைய தகவல்களை சேகரித்தும், புதிய நோக்கில் ஆராய்ந்தும் கட்டுரைகள் படைக்க வேண்டியதிருக்கும். இதற்கு மிகுந்த புத்திசாலித்தனமும், சாதுர்யமும் அவசியமாகும்.

இப்படி கல்லூரியில் தரப்படும் புராஜெக்ட்களால் தடுமாறும் மாணவர் கூட்டம் நிறைய. அவர்கள் வெளியே தனிநபரிடம் உதவி பெற்று தங்கள் பிராஜெக்ட்டை செய்து தரக் கேட்பதும் அல்லது பிறர் செய்ததை காப்பி அடித்து எழுதுவதும் உண்டு. இதற்காக உதவியாளரை தேடித்திரி வதும் உண்டு.

இப்படி சிரமப்படாமல் கல்லூரி கட்டுரைகளுக்கும், புராஜெக்ட் திட்டங்களுக்கும் கைகொடுக்க இணைய தளங்களில் பல்வேறு அப்ளிகேசன்கள் கொட்டிக்கிடக்கின்றன. அதில் ஒன்றுதான் நிஞ்சா எஸ்ஸேஸ்(NinjaEssays). 300-க்கும் மேற்பட்ட பேராசிரியர்கள், மாணவர்களின் நலன்கருதி எழுதிய ஏராளமான கட்டுரைகள் இங்கே கிடைக்கின்றன, பல கட்டுரைகளை இலவசமாக படிக்க முடியும், சில கட்டுரைகளுக்கு கட்டணம் விதிக்கப்படுகிறது. தேவையெனில் விருப்பப்படும் பேராசிரியரை உதவியாளராக நியமித்துக் கொண்டு புராஜெக்ட் செய்யலாம்.

மேற்கூறியது போன்ற அப்ளிகேசன்தான் help.plagtracker. ஆனால் உங்கள் கட்டுரைகள் மற்றும் புராஜெக்ட்டுகளுக்கு ரெடிமேடு தயாரிப்புகளை வழங்குவதற்குப்பதிலாக உங்கள் தயாரிப்புகளை சரிபார்க்கவும், தேவையான, சரியான மாற்றங்களை செய்துகொடுக்கும் எடிட்டிங் வேலைகளுக்கு பேராசிரியர்களின் உதவியை பெற்றுத் தருகிறது இந்த அப்ளிகேசன். உங்களுடைய படைப்பை கொடுத்து எடிட் செய்து தர கேட்கலாம் அல்லது தனிநபர் உதவியாளராக ஒரு பேராசிரியரை நியமித்துக் கொள்ளவும் வழி உண்டு.

குழுவாக படிக்க...


புத்தகங்களைப் பார்த்துப் படித்து புரிந்துகொள்வதைவிட, மற்றொருவர் வாசித்துக் காட்ட அதில் இருந்து தேவையான விஷயங்களைப் புரிந்து கொள்வது பலருக்கு எளிதாக இருக்கும். இதற்காக கல்லூரி புத்தகங்கள் பெரும்பாலானவற்றை ஆடியோவாக குரல் வடிவில் தருகிறது audible அப்ளிகேசன். வகுப்பறையில் மீண்டும் மீண்டும் ஒன்றை நடத்தச் சொல்லிக் கேட்பது இயலாத காரியம். ஆனால் ஆடியோ புத்தகத்தில் உங்களுக்கு புரியும் வரை ரீவைண்ட் செய்து கேட்டு பாடத்தை மனதில் ஏற்றிக்கொள்ளலாம். ஆரம்பத்தில் இந்த அப்ளிகேசன் ஒரு மாதத்திற்கு இலவசமாகவும், பின்பு சலுகை கட்டணத்திலும் வழங்கப்படுகிறது.

ஆராய்ச்சி தலைப்புகளுக்கு...

புதிதாக என்ன தலைப்பில் ஆராய்ச்சி செய்யலாம், அதற்கு என்ன விவரங்கள் தேவைப்படும் என்பது மாணவர்களுக்கு தலைவலியை உருவாக்கும் பிரச்சினையாக இருக்கும். அதுபோன்ற நேரத்தில் உதவக்கூடிய இணையதளங்களும் இன்று நிறைய உள்ளன. அதில் ஒன்றுதான் InstaGrok. இதில் நீங்கள் விரும்பிய தலைப்பை உள்ளீடு செய்து அது பற்றிய ஆராய்ச்சி கட்டுரைகளையும், சில ஆராய்ச்சி தலைப்புகளையும் அறிய முடியும். ஆய்வுக்கு வழிகாட்டும் பேராசிரியர்களுடன் கலந்துரையாடவும் முடியும். ஆய்வுக்கு உதவும் பல்வேறு தகவல் தொகுப்புகளும் இதில் காணப்படும்.

கட்டுப்பாடுகளுக்கு...

வகுப்பறைக்குள், செல்போன்கள் அனுமதிக்கப்படுவ தில்லை. சிலர் மறதியிலோ, ரகசியமாகவோ வகுப்பறைக்கு செல்போன்களை கொண்டு சென்றுவிட்டு, அழைப்பு வந்ததும் செல்போன் சிணுங்கி மாட்டிக் கொள்வதும், பேராசிரியர்களின் கண்டிப்புக்கும், தண்டனைக்கும் ஆளாவது உண்டு. இது போன்ற சிக்கல்களை தவிர்க்க உதவுகிறது ஸ்டடியஸ் (Studious) அப்ளிகேசன். இதில் நீங்கள் எந்த நேரத்தில் எங்கிருப்பீர்கள், எந்த நேரத்தில் உங்கள் மொபைல் சைலன்ட்மோடுக்கு மாற வேண்டும் என்பதை பதிவு செய்து வைக்கலாம். அப்படிச் செய்துவிட்டால் நீங்கள் மறந்தாலும் அந்த நேரத்திற்கு தானாக சைலன்ட் மோடுக்கு மாறி, வகுப்பறையிலும், செமினாரிலும் நீங்கள் அவமானப்படுவதை தடுத்துவிடும்.

வகுப்பறையில் கண்டிப்புக்கு பயந்து சைலன்ட் மோடுக்கு மாறலாம். ஆனால் வகுப்பைவிட்டு வெளியே வந்துவிட்டால் படிக்கும் நேரத்திலும் சமூக வலைத்தளங்களில் உலவ மனம் துடிக்குமே. அப்படி மனம் அலைபாயும் நேரத்தில் பேஸ்புக், வாட்ஸ்ஆப் போன்ற சமூக வலைத் தளங்களின் இணைப்பை தற்காலிகமாக துண்டித்து படிப்பில் கவனம் செலுத்த உதவுகிறது SelfControl அப்ளிகேசன். இதை இலவசமாக பயன்படுத்த முடியும்.

இன்னும் சில அவசிய தேவைகள்...

* பாடத்திட்டங்கள், வகுப்பு நேரங்கள் மற்றும் உங்கள் கல்வித்திட்டங்களை குறிப்பிட்டு சீராக வழி நடத்த உதவுகிறது ஐ-ஸ்டிஸ் புரோ (iStudiez Pro) அப்ளிகேசன். இது ஐபோன், ஐபேடு கருவிகளில் மட்டுமே செயல்படும்.

* தேவையான புத்தகங்களை வாங்கவும், தேவையற்ற புத்தகங்களை விற்கவும் உதவும் ஹால்ப்.காம் (Half.com) இணையப் பக்கம் வசதியாக இருக்கும்.

* மாணவர்களின் செலவை மேற்பார்வையிட உதவும் அப்ளிகேசன் மின்ட் (Mint). செலவுகள், தேவைகள் எல்லாவற்றையும் பதிவிடும்போது பயனுள்ள சேமிப்பு வழிகளை நினைவூட்டக்கூடியது மின்ட் அப்ளிகேசன், இது இலவச அப்ளிகேசனாகும்.

* எழுதாமல், தட்டச்சு செய்யாமல் குறிப்பெடுக்க உதவுகிறது Dragon Dictation அப்ளிகேசன். இது, நாம் உச்சரித்தாலே எழுத்துகளாக குறிப்பெடுத்துக் கொள்ளும். இது பலவகையில் உதவியாக இருக்கும்.

* உங்கள் பயிற்சிகள் அழிந்துவிடாமல் பாதுகாக்க சுகர் சிங் (SugarSync) அப்ளிகேசன் உதவுகிறது. இது பல கருவிகளில் உங்கள் தயாரிப்புகளை சேமிப்பதுடன், பாதுகாப்பை வழங்குகிறது.

* மாணவர்களுக்கான மின்னணு நூலகமாக விளங்கும் அப்ளிகேசன் BenchPrep. நூல்கள் மட்டுமல்லாது பிளாஸ்கார்டு, வினாத்தாள்கள், பாடங்களும் உள்ளன.

* கல்லூரி பாடங்களின் சொற்களுக்கு பொருளும், எளிய விளக்கமும் தரும் அகராதி அப்ளிகேசன் Dictionary.com/Mobile.

மாணவர்களான நீங்கள், செல்போனில் பொழுதுபோக்கு தளங்களில் சென்று நேரத்தை வீணாக்காமல் பயனுள்ள அப்ளிகேசன்களை பயன்படுத்தி கல்வியை வளப்படுத்திக் கொண்டால் எதிர்காலம் பிரகாசமாக இருக்கும்.

யாராவது நம்மை ஏதாவது சொல்லிவிட்டால் `நான் யார் தெரியுமா?’ என்று எகிறுகிறீர்களா, அல்லது “நம்மைப் போய் இப்படிச் சொல்லி விட்டார்களே என்று முடங்கிவிடுகிறீர்களா?” இரண்டுமே விமர்சனங்களை எதிர்கொள்ளும் சரியான அணுகுமுறையல்ல. மாணவப் பருவத்தில் இருந்தே விமர்சனங்களை எதிர்கொள்ளப் பழகிவிட்டால் வாழ்வில் வெற்றிகள் குவியும். விமர்சனங்களை எதிர்கொண்டு வெற்றியாளராவது எப்படி? என்று பார்ப்போம்...

மாணவப் பருவம் இனிமையானது. அப்போது கிடைக்கும் பாராட்டுகளும், மகிழ்ச்சியான அனுபவங்களும் வாழ்க்கை முழுவதும் உந்துசக்தி வழங்கக்கூடியது. மலரும் நினைவு களாக எதிரொலிக்கக் கூடியது. அதுபோலவே எதிர்மறையான கேலிகளும், கிண்டலும், மனதை காயப்படுத்தும் விஷயங்களும்கூட வாழ்க்கை முழுவதும் மனதில் வடுவாகப் பதிந்துவிடும். மோசமான விமர்சனங்கள் பலரை வாழ்வில் செயல்பட விடாமலேயே தடுத்திருக்கிறது.

சக மாணவர்கள், வேடிக்கையாய் செய்யும் விமர்சனங்கள் உங்களை காயப்படுத்துகிறதா? உங்கள் உடையைப் பற்றியும், உருவத்தைப் பற்றியும் அவர்கள் பேசுவது மனதுக்கு சங்கடமாக இருக்கிறதா? ஒரு விஷயம் தெரியாமல் இருக்கும்போது, ‘உனக்கு இது கூட தெரியாதா?’ என்று ஆசிரியரும், மற்றவர்களும் கிண்டல் செய்கிறார்களா?

தேர்வுகளில் மதிப்பெண் குறைவாகப் பெற்றதையோ, பதில்சொல்லும்போதும், எழுதும்போதும் நடந்த தவறுகளை ஆசிரியர்கள் கேலியாக சுட்டிக் காட்டுகிறாரா? மற்ற மாணவ- மாணவிகளுக்கு முன்பு உங்களை அப்படிச் சொல்லியது அவமானமாக தெரிகிறதா?

இவர்கள்தான் இப்படியென்றால், வீட்டில் பெற்றோரும், மற்றவர்களின் கருத்தை ஆமோதிப்பதுபோல உங்களை மட்டம் தட்டி பேசி, வருத்தப்பட வைக்கிறார்களா? எல்லோரது விமர்சனத்துக்கும் விடையாய் அமைகிறது ஒரு தமிழ் பழமொழி. “வைவார்க்கு இன்பம் இல்லை; பொறுத்தார்க்குத் துன்பம் இல்லை”.

அவர்களின் விமர்சனத்தில், கருத்துகளில் அர்த்தம் இருந்தால் ஏற்றுக் கொள்ளுங்கள். உங்களின் தவறுகளை திருத்தி முன்னேற்றம் காணுங்கள். பொருளற்ற விமர்சனங்களால், கேலி கிண்டல்களால் அவர்கள் அடையும் மகிழ்ச்சி தற்காலிகமானது. அது உங்களின் முன்னேற்றத்தால், நீங்கள் பெற்ற சிறப்பால் அவர்களுக்கு ஏற்பட்ட பொறாமையின் வெளிப்பாடாகவும் இருக்கலாம். அது போன்றவர்களின் கேலிகளை அலட்சியம் செய்துவிடுங்கள். அவர்களுக்கு பதில்களால் பதிலடி கொடுக்காமல், முன்னேற்றத்தால் அவர்களிடம் மனம் மாற்றம் ஏற்படச் செய்யுங்கள். ‘வைய வைய வைரக்கல், திட்டத் திட்ட திண்டுக்கல்’ என்னும் பொன்மொழிக்கேற்ப உங்கள் மனதை திடமான வைரமாக வைத்திருந்து ஜொலியுங்கள்.

உடல் அமைப்பு, ஆடைத் தோற்றம், பெற்றோரின் நிலை போன்ற பல காரணங்களுக்காக உங்களை பட்டப்பெயர் சூட்டி அழைப்பது சிலருக்கு வேடிக்கையாக தோன்றலாம். அதற்காக நீங்கள் கலங்க வேண்டியதில்லை. அவர்களே இன்னும் பண்பட வேண்டியவர்களாவார்கள். அப்படி பேசுபவர்களிடம் எதிர்த்து விவாதிக்க வேண்டாம். சிறு புன்னகையுடன் அலட்சியமாக கடந்துபோனாலே அவர்கள் சோர்வடைந்து போவார்கள்.

பள்ளிப்பருவத்தில் மட்டுமல்ல, வாழ்க்கை முழுவதுமே இதுபோன்ற விமர்சனங்கள், எதிர் கருத்துகளை எதிர்கொள்ளப் பழக வேண்டும். சொல்லப்போனால், அர்த்தமுள்ள சமூக வாழ்க்கையின் அடித்தளமே எதிர்க்கருத்துதான். சரியோ தவறோ, எதுவாக இருந்தாலும் ஒன்றைப் பற்றிய பல்வேறு பார்வைகள் இருக்க வேண்டும்.

உங்களைப் பற்றிய விமர்சனங்கள்தான் உங்கள் செயல்களின் அறுவடை. வெறும் பாராட்டுகளால் மட்டும் திருப்தி அடைபவர்களைவிட, விமர்சனத்தை சரியாக எதிர்கொண்டவர்கள், தங்கள் தவறுகளை திருத்திக் கொண்டவர்கள் என்றும் வெற்றியாளர்களாக நிலைப்பார்கள். எனவே பாராட்டுகளில் மயங்க வேண்டாம், விமர் சனங்களால் முடங்க வேண்டாம்.

நம்மை யாராவது விமர்சனம் செய்யும்போது அதன் உண்மைத் தன்மையை ஆராய வேண்டும். உண்மையிலேயே நம் மீது தவறு இருந்து, அதை ஒருவர் சுட்டிக்காட்டியிருந்தால் அதைக் களைய முன் வரவேண்டும். இது இறங்கி வருவதல்ல; வளர்ச்சிப் பாதையில் மேலே மேலே போவதற்கான வழி.

ஒரு நேர்மையான விமர்சகர், தனிநபர் தாக்குதலில் இறங்க மாட்டார்; அவருடைய விமர்சனம் ஒருவரின் திறமையை அடையாளம் காட்டுவதாக இருக்கும். ஆசிரியர்களின் விமர்சனங்களை இந்த வகையில் சேருங்கள். விளையாட்டாய் விமர்சிப்பவர்கள் மாறிவிடுவார்கள். நண்பர்களின் கேலிகளை இந்த வகையில் சேருங்கள். போட்டியாளர்களும், எதிராளிகளும் தீய எண்ணத்துடன் விமர்சித்து சீண்டிப் பார்ப்பவர்களாக இருப்பார்கள். அவர்கள், உங்கள் வளர்ச்சியினால் பொசுங்கிப் போவார்கள். ஆனால் அதற்கு, அவர்களின் வார்த்தைப் பொறியில் சிக்கி நீங்கள் வாடி, முடங்கிப்போகாமல் விமர்சனங்களை எதிர்கொள்ள வேண்டும். அதுதான் வெற்றி ரகசியம்!

மாணவர்கள் நீங்கள் இணையதளம் சென்றால் எங்கு உலவுவீர்கள்? சமூகவலைத் தளங்களில்தானே. அதனால்தான் உங்கள் பெற்றோர் அதிருப்தி அடைகிறார்கள். நீங்கள் உங்கள் கல்வியையும், எதிர்காலத்தையும் வளப்படுத்திக் கொள்ள வழி செய்யும் நிறைய இணையதளங்கள் இருப்பதை நீங்கள் பயன்படுத்த வேண்டும். அவற்றில் முக்கியமான சில இணைய தளங்களை இங்கே பட்டியலிடுகிறோம்...

புதிதாக படிக்க விரும்புபவர்களுக்கு...

புதிது புதிதாக ஏதாவது படிக்க விரும்புபவர்களுக்காக இணையதளத்தில் ஏராளமான ஆன்லைன் படிப்புகள் உருவாகிக் கொண்டே இருக்கின்றன. அவற்றில் குறிப்பிடத்தக்க இணையதளங்களில் ஒன்றுEdX.org. உலகில் அதிகம்பேர் திறக்கும், அதிகமான ஆன்லைன் படிப்புகள் கொண்ட இணையப் பக்கம் இது. Udacity.com,AcademicEarth.org போன்ற இணையதளங் களும் இது போன்றவையே.Coursera.org இணையதளத்தில் பள்ளிமுதல் பல்கலைக்கழக அளவிலான பாடத்திட்டங்களுடன், கூடுதல் அறிவு வளர்க்கும் விஷயங்களும் கொடுக்கப்பட்டிருக்கின்றன.

பொது கட்டுரைகளுக்கு...

நவீன உலகைப் பற்றியும், வாழ்வின் பல்வேறு நிலைகள் பற்றிய அனைத்து விஷயங்களையும் பயனுள்ள வகையில் தொகுத்து வழங்கும் இங்கிலாந்து இணையதளம் இது LifeHacker.co.uk. கதைகள், வாழ்க்கை, வேலை, வர்த்தகம், டிப்ஸ், டிரிக்ஸ், பணம் என பலவிதமான பிரிவுகளில் பயனுள்ள தொகுப்புகள் கொட்டிக் கிடக்கின்றன. எந்த சூழ்நிலையில் என்ன பரிசு வழங்கலாம், ஒரு முடிவு எடுக்கும் முன்பு யோசிக்க வேண்டியவை எவை? பண வரவுக்கான வழிகளை உருவாக்குவது எப்படி? ‘லிங்ட் இன்’ பக்கத்தில் பாதுகாப்பை வலுப்படுத்துவது எப்படி? என்பது போன்ற தகவல்களை இதில் படித்து பயன்பெறலாம்.

நீங்கள் இணையதளத்தில் சென்று பொழுதுபோக்கு வீடியோக்களை ரசிக்கும் பழக்கத்திற்கு அடிடையானவர்கள் என்றால், உங்களை அறிவியல் மற்றும் கல்வி சார்ந்த வீடியோக்களால் ஈர்க்கிறது UnplugTheTV.com இணையதளம். வீடியோக்கள் மட்டுமல்லாது கட்டுரைகளாகவும், புகைப்படங்களாகவும், பொன்மொழிகளாகவும், ஒலி வடிவிலும் ஏராளமான தகவல்கள் நிரம்பி உள்ளன. கேள்வி கேட்பதன் மூலமும் நமக்கு அவசியமான தகவல்களை அறிந்து கொள்ள முடியும். வேறுசில முக்கியமான பக்கங்களுக்கான தொடர்பு முகவரிகளையும் கொடுத்திருப்பார்கள்.


உணவுப் பிரியர்களுக்கு...

மாணவர்களுக்கான உணவுப்பட்டியலையும், அதை தயாரிக்கும் முறையையும் கற்றுத்தருகிறது StudentRecipes.com. 4 ஆயிரத்திற்கும் மேற்பட்ட ரெஸிபிகளும், சமையல் யுத்திகளும் உள்ளன.

ஆரோக்கியத்தை மதிப்பிட

உங்களின் தற்போதைய உடல் நலத்தை மதிப்பிட உதவும் இணையதளம்WebMD.com. உங்களுக்குத் தோன்றும் உடல் அறிகுறிகளை குறிப்புகளைக் கொடுத்தால், அதனுடன் தொடர்புடைய நோய் பாதிப்புகளைப் பற்றிய தகவல்களைத் தரும். இது இணைய மருத்துவர் இல்லையென்றாலும், மருத்துவ துணைவனாக சில புரிதல்களை ஏற்படுத்தும். மருந்துகளை இது பரிந்துரைப்பதில்லை என்பதால் உடல்நலம் பற்றிய தெளிவுகளை மட்டும் பெறலாம்.

இதுபோல மாணவப் பருவத்தில் ஏற்படும் உடல், மன நலப்பிரச்சினைகள் பற்றி கட்டுரைகளை கொண்டது The Ultimate Health Food Guide இணைய தளம். இந்த பக்கத்தில் உடல்நலத்திற்கேற்ற உணவுகளையும் அறிந்து கொள்ளலாம். நோய் எதிர்ப்புசக்திக்குத் தேவையான உணவுப்பட்டியலையும் தரும்.

உங்கள் தூக்கத்தை ஆராய்ச்சி செய்யும் இணையதளம் Sleepyti.me. இதில் நீங்கள் ஒரு கணக்கு துவங்கிக் கொண்டு, தினசரி தூங்கச் செல்லும் நேரத்தையும், விழிக்கும் நேரத்தையும் பதிவு செய்தால், உங்கள் தூக்க நேரத்திற்கு ஏற்ப பல ஆலோசனைகள் வழங்கும். அப்படி இல்லாமலும் நீங்கள் தூங்கும் நேரத்தின் அளவைக் குறிப்பிட்டும், உங்கள் தூக்கம் போதுமானதா? எவ்வளவு நேரம் ஓய்வு எடுப்பது என்பது போன்ற பயனுள்ள தகவல்களை பெறலாம்.

புத்தகங்களை வாங்க விற்க...

TheBookPond.comஇணைய தளம் உங்கள் பழைய பள்ளி, கல்லூரி பாடநூல்களை விற்கவும், மற்றவர்களிடம் இருந்து வாங்கி பயன்பெறவும் துணை செய்கிறது. அமேசான், இபே, கம்ட்ரீ போன்ற பொதுவான இணைய வர்த்தக தளங்களிலும் கல்வி தொடர்பான பொருட்களை தேடி வாங்கலாம்.

வரவு செலவுக்கான தளங்கள்...

நீங்கள் பணம் வரவு செலவு மற்றும் நிதி விவரங்கள் பற்றிய தகவல்களை அறிந்து கொள்ள MoneySavingExpert.com என்ற இணையதளம் கைகொடுக்கும். இதில் குறிப்பிட்ட வங்கிகளின் வட்டி விகிதம் உள்ளிட்ட பல்வேறு தகவல்களைஅறியலாம். Wise Bread.com தளத்திலும் பயனுள்ள நிதி ஆலோசனைகள் கிடைக்கும். இதில் சில ஐடியாக்களை வழங்கி வருவாய் ஈட்டவும் முடியும்.

Mint.com என்ற இணையதளம் சென்றால் உங்கள் வரவு செலவை பதிந்து வைக்க வழி உண்டு. அதற்கேற்ப சில ஆலோசனைகளையும் இந்த இணையதளம் வழங்கும்.

குழந்தைகளை வீட்டுப்பாடம் செய்யவைக்க அன்றாடம் அம்மாக்கள் படும்பாடு சொல்லி மாளாது. ஹோம் வொர்க் நேரத்தில் குழந்தைகளை எப்படிக் கையாள வேண்டும் என்று பார்க்கலாம்.

‘`பொதுவாக அம்மாக்கள், தங்கள் வேலைக்கு என ஒரு அட்டவணை வைத்திருப்பார்கள். அதில் ஒன்றாக, மாலை நேரத்தில் குறிப்பிட்ட சில மணி நேரம் பிள்ளைகளின் ஹோம்வொர்க்குக்காக ஒதுக்கப்பட்டிருக்கும். அந்த நேரத்துக்குள் குழந்தைகளை வீட்டுப்பாடம் முடிக்க வைத்து, சீரியல், இரவு சமையல் என தங்களின் அடுத்த வேலையைப் பார்க்கச் செல்ல வேண்டுமே என்கிற அவசரம் அவர்களுக்கு இருக்கும்.

ஆனால், உங்களின் அவசரத்துக்கு குழந்தைகளால் ஈடுகொடுக்க முடியாது என்பதைப் புரிந்துகொள்ளுங்கள். ‘ஒரு மணி நேரமா சொல்லிக் கொடுக்கிறேன், இன்னும் படிக்கல’ என்பது போன்ற உங்களின் கோபம், பதற்றம், கண்டிப்பு போன்றவை குழந்தைகளை அடுத்த ஐந்து நிமிடங்களில் அனைத்தையும் கற்க வைத்துவிடாது. ரைம்ஸையோ, எழுத்துக்களையோ, கணித எண்களையோ அவர்கள் கற்கும்வரை பொறுமையாக அவர்களுக்குக் கற்றுக் கொடுங்கள். அதற்கு முதல்படியாக, உங்கள் அட்டவணையில் இருந்து நீங்கள் வெளிவர வேண்டும்!

படிக்க, விளையாட, சாப்பிட என குழந்தைகளை அந்தந்த நேரத்துக்கான செயல்களைச் செய்யப் பழக்கப்படுத்துங்கள். அதே நேரம், செல்போன், டி.வி, அவுட்டிங் என்பதை எல்லாம்விட உங்கள் குழந்தைகளுக்கு நீங்கள் அதிகப்படியான நேரத்தை ஒதுக்குங்கள். அப்படி செய்யும்போது, வீட்டுப்பாடத்துக்கான நேர நிர்ணயத்துக்குள் முடிக்கவைக்க வேண்டிய கட்டாயம் காணாமல் போகும்.



குழந்தைகளுக்குப் புரியும்படி பாடம் கற்றுக் கொடுப்பதற்கான வழி என்ன தெரியுமா? அதை அவர்களுக்குப் பிடிக்கும் விதங்களில் கற்றுக்கொடுப்பதுதான். அதற்கு உங்களின் கற்பிக்கும் முறையில் மாற்றம் செய்யுங்கள். ஒரு வாரமாக கஷ்டப்பட்டும், திட்டியும், அடித்தும் சொல்லிக்கொடுத்து அவர்கள் மனதில் பதியாத ரைம்ஸை, நடனம், கதை என உடல் அசைவுகளின் வாயிலாகவும், சந்தோஷமான மனநிலையிலும் சொல்லிக்கொடுங்கள்.

அது நிச்சயம் அவர்கள் மனதில் பதிந்துவிடும். ‘சர்க்கிள் ஷேப்’பை கற்றுக்கொடுக்க, புத்தகத்தில் உள்ள வட்டத்தையே நம்பாமல் பூரி, வளையல், தட்டு என்று வாழ்க்கையில் இருந்து அவர்களுக்கு அந்த வடிவத்தைக் காட்டுங்கள். மேலும், கண்ணால் பார்த்து, வாய்விட்டுப் படித்து, எழுதிப் பார்த்து என இந்த மூன்று முறைகளில், எந்த முறையில் பாடம் கற்க உங்கள் குழந்தைக்கு விருப்பம் என்பதைத் தெரிந்து, அதற்கேற்ற வகையிலும் சொல்லிக் கொடுங்கள்.

கவனிக்கும் திறன் குறைவாக இருக்கும் குழந்தைகளுக்கு சற்று கூடுதல் மெனக்கெடல் தேவைப்படும்தான். ஆனால், அது இயலாத காரியம் என்றில்லை. இவர்களுக்கு அடிப்படைகளை தெளிவுறப் புரியவைப்பது, மீண்டும் மீண்டும் அவற்றை நினைவுபடுத்துவது, கூடுதல் பொறுமையுடன் கற்றுக் கொடுப்பது அவசியம்.

சிறு வயதிலேயே குழந்தைகளுக்குப் படிப்பில் அக்கறை வரவேண்டும் என்று எதிர்பார்க்கக் கூடாது. கற்றுக் கொடுக்கும் பாடத்தின் அருமை உங்களுக்குப் பெரிதாக தெரியலாம். குழந்தைகளுக்கோ அது ஒரு வீட்டுப்பாடம்… அவ்வளவுதான். விளையாட்டு, பொழுதுபோக்குபோல அன்றாடமான ஒரு விஷயம்தான் அவர்களைப் பொறுத்தவரை படிப்பும்.