நீங்கள் தேடியது "slug 96179"

பெரம்பலூர்:

சென்னையில் இருந்து தூத்துக்குடிக்கு நேற்று இரவு தனியார் ஆம்னி பஸ் ஒன்று புறப்பட்டது. அதில் சுமார் 40-க்கும் மேற்பட்ட பயணி கள் இருந்தனர்.

அந்த பஸ் இன்று அதிகாலை திருச்சி-சென்னை தேசிய நெடுஞ்சாலையில் பெரம்பலூரை அடுத்த விஜயகோபாலபுரம் என்ற இடத்தில் வந்து கொண்டிருந்தது. அப்போது திடீரென கட்டுப்பாட்டை இழந்து பஸ் தாறுமாறாக ஓடியது.

இதனால் பஸ்சில் இருந்த பயணிகள் கூச்சல் போட்டனர். அதற்குள் அந்த பஸ் சாலையின் நடுவில் இருந்த தடுப்பில் மோதி நிலை தடுமாறி நடுரோட்டில் கவிழ்ந்தது.

இந்த விபத்தில் பேருந்தின் இடிபாட்டில் சிக்கி ஜக தாம்பிகை என்ற பெண், முகேஷ் என்ற 5 வயது சிறுவன் இருவரும் சம்பவ இடத்திலேயே உயிரிழந்தனர். மேலும் சிவா (30) என்பவர் மருத்துவமனைக்கு கொண்டு வரும் வழியில் இறந்தார்.

மேலும் இந்த விபத்தில் விபத்தில் படுகாயமடைந்த 7 பெண்கள் உட்பட 13 பேர் பெரம்பலூர் அரசு மருத்துவ மனையில் சிகிச்சை பெற்று வருகின்றனர்.

சம்பவ இடத்திற்கு சென்ற பாடாலூர் போலீசார் விபத்தில் உயிரிழந்தவர்களின் உடலை மீட்டு பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்து விசாரணை மேற்கொண்டுள்ளனர். விபத்தில் உயிரிழந்த 3 பேரும் தூத்துக்குடியை சேர்ந்தவர்கள் ஆவர். விபத்து காரணமாக தேசிய நெடுஞ் சாலையி நீண்ட நேரம் போக்குவரத்து பாதிக்கப்பட்டது.

இதற்கிடையே திருச்சி சென்னை தேசிய நெடுஞ்சாலையில் சிறுவாச்சூர் அருகே மேலும் ஒரு பேருந்து கவிழ்ந்து 20-க்கும் மேற்பட்டோர் காயமடைந்தனர். விஜயகோபாலபுரத்தில் உள்ள தனியார் டயர் தொழிற்சாலைக்கு பெரம்பலூரில் இருந்து ஊழியர்களை ஏற்றிக் கொண்டு பஸ் சென்றது. அப்போது எதிரே திட்டக்குடி நோக்கி வந்த வந்த லாரி மீது எதிர்பாரதவிதமாக மோதியதில் பஸ் கவிழ்ந்தது.

இந்த விபத்தில் தனியார் டயர் தொழிற்சாலை ஊழியர்கள் 20-க்கும் மேற்பட்டோர் காயம் அடைந்தனர். இரண்டு பேருந்துகள் ஒரே பகுதியில் அடுத்தடுத்து கவிழ்ந்ததால் போக்குவரத்து மேலும் பாதிக்கப்பட்டது.

பாவூர்சத்திரம்:

பாவூர்சத்திரம் அருகே உள்ள திப்பணம்பட்டியை சேர்ந்தவர் சிவகுமார் (வயது 35). இவரும் கீழப்பாவூர் நேரு நகரை சேர்ந்த சுடலைமணி (50) என்பவரும் நேற்று மாலை தென்காசி சென்று விட்டு பைக்கில் ஊர் திரும்பி கொண்டிருந்தனர். பைக் பாவூர்சத்திரம் பள்ளி அருகில் வந்த போது இவர்களது பைக் முன்னால் சென்ற பாவூர்சத்திரம் வடக்கு தெருவை சேர்ந்த திராவிடமணி (36) என்பவர் பைக் மீது மோதியதாம்.

இதில் சிவகுமார், சுடலைமணி ஆகியோருக்கு பலத்த காயமும், திராவிடமணிக்கு லேசான காயமும் ஏற்பட்டது. 3 பேரும் சிகிச்சைக்காக தென்காசி அரசு மருத்துவமனைக்கு அனுப்பி வைக்கப்பட்டனர்.

இது குறித்து பாவூர்சத்திரம் போலீசார் வழக்குப்பதிவு செய்து விசாரணை நடத்தி வருகின்றனர்.

திருவாரூர்:

திருவாரூர் அருகே, குடவாசல் காவல் சரகம் காப்பணாமங்கலத்தில் பிடாரி அம்மன் கோவில் அமைந்துள்ளது. இக்கோவிலில் வைகாசி திருவிழா நடத்துவது தொடர்பாக அவ்வூரை சேர்ந்த இருதரப்பினரிடையே தகராறு இருந்து வருகிறது.

இதில் ஒரு தரப்பை சேர்ந்த ஊர் பெரியவர்கள் திருவிழாவை அனைவரும் சேர்ந்து ஒருசேர நடத்துவோம் என்றும், மற்றொரு தரப்பை சேர்ந்த இளைஞர்கள் தனித்தனியாகவே நடத்த வேண்டும் என்றும் கூறி வருவதால் இருதரப்பினர் இடையே முன்விரோதம் இருந்து வருவதாக கூறப்படுகிறது.

இதையடுத்து ஆர்.டி.ஓ. தலைமையில் இரு தரப்பினரையும் அழைத்து சமரச பேச்சு வார்த்தை நடத்தியும் உடன்பாடு ஏற்படவில்லை. இதையடுத்து திருவிழா நிறுத்தி வைக்கப்பட்டுள்ளது.

இந்நிலையில் ஒரு தரப்பினரை சேர்ந்த ஆசைமணி என்பவர் மோட்டார் சைக்கிளில் நேற்று வந்தபோது, மற்றொரு தரப்பை சேர்ந்த குமார் என்பவர் மீது மோதி விட்டாராம். இதையடுத்து அவர்களிடையே வாக்குவாதம் ஏற்பட்டது. குமாருக்கு ஆதரவாக விஜயகுமார், இளவழகன், தசரதன், கார்த்தி ஆகியோர் ஆசைமணியிடம் தகராறு செய்துள்ளனர்.

இதனால் ஆசைமணி தனது தரப்பை சேர்ந்த ராதாகிருஷ்ணன், ராஜா ராமன், கதிர், அருண் ஆகியோருக்கு போன் செய்து வரவழைத்தார். இதில் இருதரப்பினருக்கும் வாக்குவாதம் முற்றவே ஒருவர் மீது ஒருவர் கற்களை வீசி தாக்குதலில் ஈடுபட்டனர்.

இந்த தாக்குதலில் விஜயகுமார், குமார், ஆசைமணி ஆகிய 3 பேரும் படுகாயம் அடைந்தனர். அவர்களை மீட்டு திருவாரூர் அரசு மருத்துவமனையில் சிகிச்சைக்காக அனுமதித்துள்னர்.

இந்த கல்வீச்சு தாக்குதல் சம்பவத்தின் போது அப்பகுதியில் நிறுத்தப்பட்டு இருந்த 4 மோட்டார் சைக்கிள்கள் அடித்து உடைத்து சேதப்படுத்தப்பட்டன. இதுகுறித்து தகவல் அறிந்த குடவாசல் இன்ஸ்பெக்டர் மணிமாறன் மற்றும் போலீசார் விரைந்து வந்து விசாரணை மேற்கொண்டனர்.

இந்நிலையில் குமார் தரப்பை சேர்ந்த மணிகண்டன் என்பவருக்கு சொந்தமாக பால் கடை ஒன்று உள்ளது. இந்த கடையின் முன்புறம் இருந்த சிறிய கீற்று கொட்டகைக்கு நேற்று இரவு தீ வைக்கப்பட்டது. இதையடுத்து அப்பகுதியை மக்கள் தீயை அணைத்தனர். இந்த தீ விபத்துக்கு காரணம் மற்றொரு தரப்பினர் என்று கூறப்படுகிறது.

இதையடுத்து குடவாசல் போலீசார் குமார் தரப்பை சேர்ந்த இளவழகன், தசரதன், கார்த்தி ஆகிய 3 பேரையும் பிடித்து விசாரணை நடத்தி வருகின்றனர். இதேபோல் ஆசைமணி தரப்பை சேர்ந்த ராதாகிருஷ்ணன், ராஜா ராமன், கதிர், அருண் ஆகிய 4 பேரையும் பிடித்து விசாரணை நடத்தி வருகின்றனர். மேலும் மோதல் ஏற்படாமல் தடுக்கும் வகையில் போலீசார் பாதுகாப்பு பணியில் ஈடுபடுத்தப்பட்டுள்ளனர்.

கோஷ்டி மோதலில் 4 பைக்குகள் சேதப்படுத்தப்பட்டதோடு 7 பேரிடம் போலீசார் விசாரணை நடத்தி வரும் சம்பவம் அப்பகுதியில் பரபரப்பை ஏற்படுத்தி உள்ளது.

மதுரை:

மதுரை மேலவாசல் ஹவுசிங் போர்டு காலனியைச் சேர்ந்தவர் சுப்பிரமணி. இவரது மனைவி கீதா (வயது 36). இவர் சிவகங்கை மாவட்டம்,காளையார் கோவிலில் தலையாரியாக பணியாற்றி வருகிறார்.

சம்பவத்தன்று கீதா தனது மொபட்டில் மேலூர் மெயின் ரோட்டில் சென்று கொண்டிருந்தார். அங்குள்ள தனியார் ஆஸ்பத்திரி அருகே சென்றபோது அந்த வழியாக வேகமாக வந்த அரசு பஸ் மொபட் மீது மோதிவிட்டு நிற்காமல் சென்றது.

இந்த விபத்தில் கீதா படுகாயம் அடைந்தார். அந்தப்பகுதியைச் சேர்ந்தவர்கள் அவரை மீட்டு அருகில் உள்ள தனியார் ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

விபத்து குறித்து தல்லாகுளம் போக்குவரத்து போலீசார் வழக்குப்பதிவு செய்து விசாரித்து வருகின்றனர்.

வடமதுரை:

திண்டுக்கல்லில் இருந்து அறந்தாங்கிக்கு அரசு பஸ் சென்று கொண்டு இருந்தது. இந்த பஸ்சை குன்னக்குடியைச் சேர்ந்த வெள்ளைச்சாமி (வயது 42) என்பவர் ஓட்டிச் சென்றார்.

வடமதுரை அருகே நேற்று இரவு பஸ் சென்று கொண்டு இருந்தது. அப்போது மோட்டார் சைக்கிளில் அதிவேகமாக வந்த ஒரு வாலிபர் பஸ் மீது மோதாமல் இருப்பதற்காக பைக்கை திருப்பினார்.

எதிர்பாராதவிதமாக பைக் சினிமா காட்சிகளில் வருவதைப் போல பறந்து வந்து பஸ்சின் முன் பக்க கண்ணாடியில் மோதியது. இதனால் பஸ்சில் இருந்த பயணிகள் கூச்சலிட்டனர்.

இதில் மோட்டார் சைக்கிளை ஓட்டி வந்த ஊராளிப் பட்டியைச் சேர்ந்த காளிமுத்து (வயது 30) என்பவர் படுகாயமடைந்தார். இவர் போதையில் மோட்டார் சைக்கிளை ஓட்டி வந்தது தெரியவந்தது.

படுகாயமடைந்த அவர் மதுரை அரசு ஆஸ்பத்திரியில் சிகிச்சைக்கு அனுமதிக்கப்பட்டுள்ளார். பஸ் சேதமடையவே அதில் இருந்த பயணிகள் வேறு பஸ்சில் அனுப்பி வைக்கப்பட்டனர். விபத்து குறித்து வடமதுரை போலீசார் வழக்கு பதிவு செய்து விசாரணை நடத்தி வருகின்றனர்.

கவுந்தப்பாடி:

ஈரோட்டில் இருந்து அலுமினிய பீடிங் வேலை செய்யும் நாகராஜ் (வயது 50) என்பவர் சரத்குமார் (22) என்பவருடன் மொபட்டில் ஆப்பக்கூடலுக்கு சென்று கொண்டிருந்தனர்.

மொபட்டை நாகராஜ் ஓட்டினார். கவுந்தப்பாடி அருகே வளையக்காரபாளையம் குட்டை பக்கம் வந்தபோது அந்த வழியாக வந்த மோட்டார் சைக்கிளும், நாகராஜ் ஓட்டி வந்த மொபட்டும் நேருக்கு நேர் மோதிக்கொண்டன.

இதில் மோட்டார் சைக்கிளை ஓட்டி வந்த வளையக்கார பாளையத்தை சேர்ந்த ராமச்சந்திரன் (35), நாகராஜ் ஆகியோர் படுகாயம் அடைந்தனர். சரத்குமாருக்கு கால் முறிந்தது. ராமச்சந்திரனின் மகன் அருணுக்கு லேசான காயம் ஏற்பட்டது.

படுகாயம் அடைந்தவர்களை அக்கம் பக்கத்தினர் மீட்டு 108 ஆம்புலன்ஸ் மூலம் ஈரோடு அரசு ஆஸ்பத்திரிக்கு கொண்டு சென்றனர். அங்கு அவர்களுக்கு தீவிர சிகிச்சை அளிக்கப்பட்டது.

சிகிச்சை பலனின்றி நாகராஜ், ராமச்சந்திரன் ஆகிய இருவரும் பரிதாபமாக இறந்தனர். மற்ற 2 பேரும் சிகிச்சை பெற்று வருகிறார்கள். இது குறித்து கவுந்தப்பாடி போலீஸ் சப்- இன்ஸ்பெக்டர் குருமூர்த்தி வழக்குப்பதிவு செய்து விசாரணை செய்து வருகிறார்.