நீங்கள் தேடியது "slug 99004"

நாமக்கல்:

நாமக்கல் முல்லை நகரை சேர்ந்தவர் சரஸ்வதி (60).

இவர் கடந்த 1995-ம் ஆண்டு கபிலர் மலை சட்டமன்ற தொகுதியில் அ.தி.மு.க. சார்பில் போட்டியிட்டு சட்டமன்ற உறுப்பினராக தேர்ந்தெடுக்கப்பட்டார். முன்னாள் முதல்வர் ஜெயலலிதா மறைவிற்கு பிறகு அ.தி.மு.க.விலிருந்து விலகி தி.மு.க-வில் சேர்ந்தார்.

இந்நிலையில் கீரம்பூரை சேர்ந்த அ.தி.மு.க. கிளை கழக செயலாளர் ராஜா நாமக்கல் காவல் நிலையத்தில் ஒரு புகார் அளித்தார். அந்த புகாரில், தமிழக மின்சாரத்துறை அமைச்சர் தங்கமணி குறித்து முன்னாள் எம்.எல்.ஏ சரஸ்வதி வாட்ஸ் அப்பில் அவதூறு தகவலை பரப்பி வருகிறார். இது குறித்து அவரிடம் கேட்ட போது ஆபாச வார்த்தைகளால் திட்டி மிரட்டினார் என புகாரில் தெரிவித்தார்.

இதனைதொடர்ந்து முல்லை நகரில் உள்ள அவரது வீட்டிற்கு சென்ற நாமக்கல் இன்ஸ்பெக்டர் குலசேகரன் மற்றும் போலீசார் சரஸ்வதியை இன்று காலை கைது செய்தனர். அவர் மீது 5 பிரிவுகளில் வழக்கு பதிவு செய்யப்பட்டது.

நாமக்கல் மகளிர் காவல் நிலையத்திற்கு அழைத்து சென்ற அவரிடம் போலீசார் தொடர்ந்து விசாரணை நடத்தி வருகிறார்கள்.

தகவலறிந்து தி.மு.க. கிழக்கு மாவட்ட பொறுப்பாளர் காந்திசெல்வன் மற்றும் திமுகவினர் கைது செய்யப்பட்ட சரஸ்வதியை பார்க்க வந்ததால் பெரும் பரபரப்பு ஏற்பட்டது.

தேனி:

தேனி மாவட்டத்தில் உள்ள அரசு புறம்போக்கு நிலங்கள், நீர்நிலைகள் போன்றவற்றில் அனுமதியின்றி வண்டல் மண், களிமண், கிராவல் மண் சட்ட விரோதமாக எடுப்பதை தவிர்ப்பதற்காகவும், ரேசன் கடைகளில் இருந்து அத்தியாவசிய பொருட்களான அரிசி, மண்எண்ணெய், பாமாயில், சீனி மற்றும் பருப்பு போன்றவைகள் கடத்திச் சென்று கள்ளச்சந்தையில் விற்பனை செய்வதை தடுக்க நடவடிக்கை எடுக்கப்பட்டு உள்ளது.

டாஸ்மாக் கடைகளில் அனுமதிக்கப்பட்ட எண்ணிக்கைகளைக் காட்டிலும் கூடுதலாக மதுபாட்டில்கள் விற்பனை செய்யப்படுவது, அனுமதிக்கப்பட்ட இடங்களை தவிர்த்து வேறு கடைகள், இடங்களில் மதுபானங்கள் விற்பது, அனுமதிக்கப்பட்ட நேரத்தை தாண்டி கூடுதலான நேரங்களில் மதுபானம் விற்பனை செய்வது போன்ற செயல்பாடுகளை கட்டுப்படுத்தவும், உரிமம் இன்றி செயல்படும் மதுபானக் கூடங்கள், சட்டவிரோதமாக போதைப் பொருள்கள் விற்பனை செய்வது குறித்து நடவடிக்கை மேற்கொள்வதற்காகவும் தனியாக புகார் எண் அறிமுகப்படுத்தப்பட்டுள்ளது.

இந்த புகார்களை புகைப்படங்களாகவோ, குறுஞ்செய்திகளாகவோ, வாட்ஸ்ஆப் செய்திகளாகவோ 94877 71077 என்ற எண்ணிற்கு செல்போன் மூலம் தெரிவிக்கலாம். மேலும் இந்த எண்ணில் பிரத்தியோகமாக கைசாலா என்ற செயலியின் வசதியும் ஏற்படுத்தப்பட்டுள்ளது.

மேற்கண்ட விவரங்கள் குறித்து கைசாலா என்ற செயலியில் புகைப்படத்துடன் தெரிவிக்கும் போது புகார் தெரிவிக்கும் இடம் சரியான அமைவிடம் குறித்து தெரிந்து கொள்ள இயலும் என்பதால் விரைந்து குற்றச்செயல் நடைபெறும் இடத்தினை சென்றடைய இயலும்.

இந்த எண்ணில் பெறப்படும்புகார்களை கண்காணித்து நடவடிக்கை மேற்கொள்வதற்காக வட்ட அளவில் 24 மணி நேரமும் செயல்படும் வகையில் சிறப்பு குழுக்கள் ஏற்படுத்தப்பட்டுள்ளது.

எனவே பொதுமக்கள் புகார்களை வாட்ஸ்ஆப் எண்ணிற்கு புகைப் படங்கள், குறுஞ்செய்திகளாக தெரிவித்து சட்ட விரோதமாக நடைபெறும் குற்றச் செயல்களை களைவதற்கு மாவட்ட நிர்வாகத்திற்கு ஒத்துழைப்பு வழங்குமாறு தேனி மாவட்ட கலெக்டர் பல்லவி பல்தேவ் தெரிவித்துள்ளார்.

ஈரோடு:

இரு சக்கர வாகன ஓட்டிகள் மற்றும் பின்னால் அமர்ந்து செல்பவர்கள் ஹெல்மெட் கட்டாயம் அணிய வேண்டும். ஹெல்மெட் அணியாமல் செல்பவர்களுக்கு அபராதம் வசூலிக்கப்படும் என தமிழக அரசு எச்சரித்துள்ளது. இதற்கு ஈரோடு மக்கள் மத்தியில் கடும் எதிர்ப்பு கிளம்பியுள்ளது.

இது பற்றி ஈரோட்டில் ‘வாட்ஸ் அப்’பில் வைரலாக பரவும் சிலரது குமுறல்கள் வருமாறு:-

ஹெல்மெட் அணியாவிட்டால் ஆவணங்கள் அனைத்தும் பறிமுதல் செய்யப்படுமாம். ஊழல் செய்து சிக்கிய மந்திரிகளின் சொத்துக்களை, ஆவணங்களை பறிமுதல் செய்யமாட்டார்கள்.

பல மாடி கட்டிடங்கள் இடிந்து பல பேர் பலியாகினாலும் கட்டுவதற்கு உரிமம் கொடுத்த அதிகாரிகளின் ஆவணங்களை பறிமுதல் செய்யமாட்டார்கள்.

தவறான மருத்துவத்தால் பல பேர் பலியாகியும் மருத்துவம் பார்த்த டாக்டர்களின் சான்றிதழ்களை பறிமுதல் செய்யமாட்டார்கள்.

ஆற்று மணலை கொள்ளையடிப்பதற்கு உடந்தையாக செயல்படும் அதிகாரிகளின் பதவிகளை பிடுங்க மாட்டார்கள்.

மலைகளே காணாமல் போகும் அளவிற்கு கனிமவள கொள்ளைக்கு உடந்தையாக இருந்த அதிகாரிகளின் சான்றிதழ்களை பறிமுதல் செய்யமாட்டார்கள்.

ஆனால் மறந்து வீட்டில் விட்டுவிட்டு வரும் ஹெல்மெட்டுக்காக இரு சக்கர வாகனத்தின் ஆவணங்கள் பறிமுதல் செய்யப்படுமாம். இது என்ன நியாயம்?...

பஸ்சில் பயணம் செய்ய 55 பேருக்கு மட்டுமே லைசென்சு தரப்படுகிறது. ஆனால் சராசரியாக 110 பேர் வரை திணிக்கப்படுகின்றனர். படிக்கட்டில் மட்டும் 18 பேர் தொங்கவிடப்படுகின்றனர். சட்டத்தை அமல் செய்தால் ஈரோட்டுக்கு மட்டும் புதிதாக 250 பஸ் விட வேண்டும்.

ரெயிலில் ஒரு பெட்டிக்கு 72 பேர்தான் பயணிக்க வேண்டும். சட்டப்படி ரெயில் சென்றால் முதல் பெட்டி திருப்பூரிலும் கடைசிப் பெட்டி ஈரோட்டிலும்தான் நிற்கும்.

ஒவ்வொரு பத்திரப்பதிவு அலுவலகத்திலும் லஞ்சம் கொடுக்காமல் வேலை நடக்குமா? ஓவர் லோடு கேஸ் போட்டால் லாரி பஸ் ஒருநாள்கூட ஓடாது.

அரசு கேபிள் கட்டணம் 70 ரூபாய். கேள்வி கேட்டால் படம் தெரியுமா மக்களுக்கு? பாயிண்ட் டூ பாயிண்ட், எல். எஸ்.எஸ்.,எக்ஸ்பிரஸ் என பஸ் கட்டண கொள்ளையை தடுக்கலாமே? தியேட்டரில் 30 ரூபாய் டிக்கெட் 90 ரூபாய். ஆன்லைன் புக்கிங் செய்தால் மேலும் 20 ரூபாய். சைபர் கிரைம்ல கேஸ் போடலாமா?

ஹெல்மெட் அணியாமல் வந்த கிட்டத்தட்ட 1 லட்சத்து 40 ஆயிரம் பேர் வரை வழக்குப்பதிவு செய்து வாகனங்களை பறிமுதல் செய்து இருக்கிறார்கள். புகை பிடித்தால் மரணம் நிச்சயம் என்று தெரிந்தும் அதில் கருகிய நுரையீரல் படத்தை மட்டும் போட்டு விட்டு விற்பனை செய்ய அனுமதி அளித்துள்ளது சரியா?

குடிப்பழக்கம் உயிருக்கும், வீட்டுக்கும், நாட்டுக்கும் கேடு என்று அச்சிட்டுவிட்டு அதை அரசாங்கமே விற்பனை செய்வது நியாயமா?

ஹெல்மெட் என்பது அவசியம்தான் இல்லையென்று மறுக்க முடியாது. அது நெடுந்தூர பயணங்களில் நெடுஞ்சாலையில் செல்பவர்களுக்கு பொருந்தும். 20-30 கி.மீ. வேகத்தில் செல்லும் நகரவாசிகளை ஏதோ குற்றவாளிகளை பிடிப்பதுபோல் விரட்டி விரட்டி பிடிப்பதா?

சமீபத்தில் ஹெல்மெட் அணியாத ஒருவரை ஒரு காவலர் விரட்டி அந்த இரு சக்கர ஓட்டுநர் விபத்தில் சிக்கி பலியானார். இந்த சட்டம் அமலுக்கு வந்தபின் இதுவரை ஹெல்மெட் அணிந்தும் 30-க்கும் மேற்பட்டவர்கள் சாலை விபத்தில் பலியாகி உள்ளார்களே அதற்கு என்ன விளக்கம் தரப்போகிறீர்கள்?

சாலை விதிமுறைகளை பற்றிய தகவல்களை பள்ளிகளிலும், கல்லூரிகளிலும் கட்டாய பாடமாக கொண்டு வந்து விழிப்புணர்வை ஏற்படுத்த வேண்டும்.

ஹெல்மெட் அணிவதால். சிலருக்கு வியர்வை, அலர்ஜி, தலைவலி, முடி கொட்டுதல், தலையில் புண் போன்ற பிரச்சினைகள் ஏற்படுகிறது. கொலை, கொள்ளை, வழிப்பறி செய்யும் சமூக விரோதிகளுக்கு சாதகமாக அமைகிறது.

ஹெல்மெட் அணிவதன் அவசியத்தை மட்டும் வலியுறுத்தி விட்டு போகலாமே. அதைவிட்டுவிட்டு அபராதம், பறிமுதல் என்பது சரியா? ஹெல்மெட் அணிவதை நீங்கள் கட்டாயப்படுத்துவது எந்த வகையில் நியாயம்?

இவ்வாறு அந்த ‘வாட்ஸ் அப்’ தகவலில் தெரிவிக்கப்பட்டுள்ளது.