நீங்கள் தேடியது "vinayagar sathurthi"

தமிழகத்தில் இன்று விநாயகர் சதுர்த்தி விழா, இன்று அதிகாலை முதல் கொண்டாடப்பட்டு வருகிறது. புதுச்சேரி மணக்குள விநாயகர் கோவிலில் காலையில் அபிசேகம் செய்யப்பட்டு, அலங்கார கோலத்தில் சிறப்பு அலங்காரம் செய்யப்பட்டிருந்தது. பக்தர்கள் காலை முதல் தரிசனம் செய்து வருகின்றனர்.

கோவை மாவட்டம் புளியகுளத்தில் அமைந்துள்ள ஆசியாவிலேயே மிக உயரமான விநாயகர் சிலைக்கு அபிசேகம் நடைபெற்றது. அதனைத் தொடர்ந்து அலங்காரம் செய்யப்பட்டு, சிறப்பு பூஜை செய்யப்பட்டது. பக்தர்கள் தரிசனம் செய்து வருகின்றனர்.

மேலும், தமிழகத்தில் உள்ள பிரபலமான விநாயகர் கோவில்களில் பக்தர்கள் தரிசனம் செய்து வருகின்றனர். இதற்கிடையே ஆங்காங்கே பிள்ளையார் சிலை வைத்து வழிபட்டு வருகின்றனர். சென்னையில் 4 ஆயிரம் இடங்களில் பிள்ளையார் சிலை வைக்க அனுமதி வழங்கப்பட்டுள்ளது.

கோவையில் சுமார் 2 ஆயிரம் இடங்களில் விநாயகர் சிலை வைக்கப்பட்டுள்ளது. மூன்று நாட்களுக்கு கழித்து குளங்கள் போன்ற இடங்களில் இந்த சிலைகள் கரைக்கப்படும்.

நெல்லை:

விநாயகர் சதுர்த்தி விழா வருகிற 31-ந் தேதி ( புதன் கிழமை) கொண்டாடப்பட உள்ளது.

இதை முன்னிட்டு இந்து முன்னணி மற்றும் பல்வேறு இந்து அமைப்புகள் சார்பில் பொது இடங்களில் விநாயகர் சிலைகளை பிரதிஷ்டை செய்வார்கள்.

தொடர்ந்து வழிபட்ட சிலைகளை கடல், ஆறுகள், குளங்கள் உள்ளிட்ட நீர் நிலைகளில் கரைப்பார்கள்.நெல்லையில் விநாயகர் சதுர்த்தியையொட்டி விநாயகர் சிலைகள் தயாரிக்கும் பணிகள் தீவிரமாக நடைபெற்று வருகிறது. நகரின் முக்கிய பகுதிகளில் விற்பனைக்காக விநாயகர் சிலைகள் குவித்து வைக்கப்பட்டுள்ளது.

பாளை சமாதானபுரம், கிருபா நகர், மார்க்கெட் பகுதிகள், சீவப்பேரி சாலை உள்ளிட்ட இடங்களில் விநாயகர் சிலை தயாரிக்கும் பணி இரவு பகலாக மும்மரமாக நடைபெற்று வருகிறது.

ஒரு அடி உயரம் முதல் 9 அடி உயரம் வரை சிலைகள் வடிவமைக்கப்பட்டு விற்பனைக்கு வைக்கப்பட்டுள்ளன. இவற்றில் குறைந்த பட்சமாக விநாயகர் சிலை ரூ.100 முதலும், அதிக பட்சமாக பெரிய சிலைகள் ரூ.27 ஆயிரம் வரை விற்பனை செய்யப்படுகின்றன.

பொதுஇடத்தில் விநாயகர் சிலைகள் வழிபாட்டிற்காக பலர் கடந்த மாதமே ஆர்டர்கள் கொடுத்துள்ளனர்.

சிவன், பார்வதியுடன் கூடிய விநாயகர் உள்ளிட்ட பல்வேறு வடி வங்களிலும், வண்ணங்களிலும் விற்பனைக்கு குவித்து வைக்கப்பட்டுள்ளது.

இந்த பகுதிகளில் தயார் செய்யப்படும் சிலைகள் கேரளா போன்ற வெளி மாநிலங்களுக்கும், திண்டுக்கல், திருச்சி, மதுரை, தென்காசி, தூத்துக்குடி, கன்னியாகுமரி உள்ளிட்ட தமிழகத்தின் பல்வேறு மாவட்டங்களுக்கும் அனுப்பி வைக்கப்படுகிறது.

மாசு கட்டுப்பாட்டு வாரியம் சார்பில் சுற்றுச்சூழலை பாதிக்காத வகையில் சிலைகளை செய்வதற்கு அறி வுறுத்தப்ப ட்டுள்ளது. இதனால் காகித கூல், தேங்காய் நார்கள், நீரில் கரையும் வண்ணங்கள் உள்ளிட்ட பொருட்களை பயன்படுத்தி சிலைகள் செய்யப்படுகிறது.

சிலைகள் செய்யும் பணியில் 50-க்கும் மேற்பட்ட தொழிலாளர்கள் ஈடுபட்டுள்ளனர். லெட்சுமி விநாயகர், ராஜ விநாயகர், 3 முகம் கொண்ட விநாயகர், நந்தி விநாயகர், சிவன் விநாயகர் உள்ளிட்ட பல்வேறு வடிவங்களில் விற்பனைக்கு வைக்கப்பட்டுள்ளது.

இதேபோன்று தென்காசி, செங்கோட்டை உள்ளிடட தென்காசி மாவட்டத்திற்குட்பட்ட பகுதிகளிலும் சிலைகள் தயாரிக்கும் பணி தீவிரமடைந்துள்ளது.

ஆரல்வாய்மொழி:

தோவாளையில் பூமார்க்கெட் செயல்பட்டு வருகிறது. இங்கு குமரி, நெல்லை மாவட்டங்கள் மற்றும் பெங்களூரு, சேலம், ஓசூர் போன்ற பகுதிகளில் இருந்தும் பலவிதமான பூக்கள் கொண்டு வரப்பட்டு விற்பனை செய்யப்படுகிறது.

விநாயகர் சதுர்த்தி விழாவையொட்டி இன்று தோவாளை மார்க்கெட்டுக்கு வழக்கத்தை விட அதிக அளவு பூக்கள் விற்பனைக்கு கொண்டு வரப்பட்டு இருந்தது. உள்ளூர் வியாபாரிகள் பலர் பூக்களை வாங்கி சென்றனர். பிச்சி, மல்லி போன்ற பூக்கள் விலையில் மாற்றம் இல்லை. நேற்றும் இன்றும் இந்த பூக்கள் ஒரே விலையில் விற்பனையானது. பிச்சி கிலோ ரூ. 500க்கும், மல்லி கிலோ ரூ.600க்கும் விற்பனையானது. மஞ்சள் கேந்தி ரூ.50, சிவப்பு கேந்தி ரூ.60, வெள்ளை செவ்வந்தி ரூ.200, வாடாமல்லி ரூ.25, ரோஜாப்பூ ரூ.150க்கு விற்பனையானது.

வழக்கமாக அருகம்புல் ஒரு கட்டு ரூ.10க்கு விற்பனையாகும். இன்று விநாயகர் சதுர்த்தியை யொட்டி விநாயகருக்கு அருகம்புல் மாலை அணிவித்து பூஜை செய்யப்படும் என்பதால் அருகம்புல் தேவை அதிகமாக இருந்தது. இதனால் அருகம்புல் கட்டு 3 மடங்கு விலை உயர்ந்து ரூ.30க்கு விற்பனையானது. பிள்ளையார் சிலைக்கு மாலையாக போடப்படும் எருக்கம்பூ கிலோ ரூ.100க்கு விற்கப்பட்டது. பூஜையில் பயன்படுத்தப்படும். தேட்டிப்பூ கிலோ ரூ.200 ஆக இருந்தது. #vinayagarsathurthi

வேலூர்:

வேலூர் கலெக்டர் அலுவலகத்தில் வாராந்திர மக்கள் குறைதீர்வு கூட்டம் இன்று நடந்தது. இந்து முன்னணி அமைப்பு கோட்ட தலைவர் மகேஷ் தலைமையில் விநாயகர் சிலைகளுடன் இந்து முன்னணியினர் 100-க்கும் மேற்பட்டோர், ஆஞ்சநேயர் கோவில் அருகில் இருந்து கலெக்டர் அலுவலகத்திற்கு மனு கொடுப்பதற்காக ஊர்வலமாக வந்தனர்.

கலெக்டர் அலுவலக மேம்பாலத்திற்குள் புகுந்து ஊர்வலமாக வந்த இந்து முன்னணியினரை, டி.எஸ்.பி. அலெக்ஸ் மேற்பார்வையில் சத்துவாச்சாரி இன்ஸ்பெக்டர் புகழேந்தி தலைமையிலான ஏராளமான போலீசார், பேரிகார்ட்டுகளை வைத்து தடுத்து நிறுத்தினர். இதனால் இந்து முன்னணியினருக்கும், போலீசாருக்கும் தள்ளு முள்ளு ஏற்பட்டது.

இதையடுத்து, கலெக்டர் அலுவலகத்திற்குள் செல்ல இந்து முன்னணியினர் ஒரு சிலருக்கு மட்டுமே அனுமதி வழங்கப்படும் என போலீஸ் அறிவுறுத்தியது. இதையடுத்து கோட்ட தலைவர் மகேஷ் உள்பட சிலர், கலெக்டர் அலுவலக குறைதீர்வு கூட்ட அரங்கிற்கு சென்று விநாயகர் சிலை கையில் கோரிக்கை மனுவை வைத்து அதிகாரிகளிடம் வழங்கினர்.

அந்த மனுவில், தமிழகம் முழுவதும் விநாயகர் சதுர்த்தி விழா பல ஆண்டுகளாக அமைதியான முறையில் கொண்டாடப்பட்டு வருகிறது. இந்த ஆண்டு ஒரு அரசாணை மூலம் விநாயகர் சதுர்த்தி விழாவை சாதாரண மக்கள் கொண்டாட முடியாத அளவிக்கு கட்டுப்பாடுகள் விதிக்கப்பட்டுள்ளன. இது இந்து மக்களுக்கு மத வழி பாட்டு உரிமையை மறுப்பு போல் உள்ளது.

விநாயகர் சிலையை வைக்க கலெக்டர், வருவாய் கோட்டாட்சியரிடம் தான் அனுமதி பெறவேண்டும் என்று காவல்துறையினர் கூறி வருகின்றனர். விநாயகர் சதுர்த்தி விழாவை சாமானிய மக்களும் கொண்டாட வழி வகை செய்ய வேண்டும் என்று கூறியிருந்தனர்.

கவுண்டம்பாளையம்:

கோவை பெரியநாயக்கன் பாளையம் டி.எஸ்.பி அலுவலத்திற்குட்பட்ட துடியலூர், தடாகம், பெரியநாயக்கன்பாளையம், காரமடை, மேட்டுப்பாளையம், சிறுமுகை ஆகிய பகுதிகளில் போலீஸ் நிலையங்கள் உள்ளன.

செப்டம்பர் மாதம் விநாயகர் சதுர்த்தி விழா வருகிறது. அப்போது பல்வேறு பகுதிகளில் இந்து அமைப்பினர் மற்றும் பொதுமக்கள் சார்பில் விநாயகர் சிலைகள் வைத்து வழிபட ஏற்பாடுகள் நடந்து வருகின்றன.

இதனையொட்டி பெரியநாயக்கன்பாளையம் டி.எஸ்.பி அலுவலகத்தில் இந்து அமைப்பினருடன் விநாயகர் சிலை வைப்பது, கரைப்பது, பாதுகாப்பு நடவடிக்கை குறித்து ஆலோசனை கூட்டம் நடைபெற்றது. இதில் டி.எஸ்.பி மணி பேசும்போது, விநாயகர் சதுர்த்தியை முன்னிட்டு விநாயகர் சிலைகள் வைத்து வழிபட போலீசாரிடம் முன்அனுமதி பெற வேண்டும். வைக்கக்கூடிய சிலைகள் களிமண்ணால் செய்யப்பட்ட சிலைகளாக இருக்க வேண்டும். ரசாயன கலவையால் தயாரிக்கப்பட்ட சிலைகளை வைக்கக்கூடாது.

மேலும் சிலைகளை வைப்பவர்களே கமிட்டி அமைத்து அவற்றை பாதுகாக்க வேண்டும். மேலும் சிலை அருகில் பாதுகாப்பு பணியில் 24 மணி நேரமும் 10 பேர் கொண்ட குழு இருக்க வேண்டும். இரவு நேரத்தில் போதிய லைட் வெளிச்சம் இருக்க வேண்டும். தீ தடுப்பு பாதுகாப்புகள் செய்து இருக்க வேண்டும்.

பிற மதத்தினர் புண்படும் வகையில் சுவரொட்டிகளோ, கோ‌ஷங்களோ போடக்கூடாது. ஊர்வலத்தை அனுமதித்த நேரத்திற்குள் நடத்தி முடிக்க வேண்டும். போலீசார் அறிவிக்கும் நாட்களில் விநாயகர் சிலைகளை கரைத்திட வேண்டும். துடியலூர், தடாகம், பெரியநாயக்கன்பாளையம் போலீஸ் நிலைய எல்லைக்குட்பட்ட பகுதியில் வைக்கப்படும் விநாயகர் சிலைகள் வெள்ளகிணர் குட்டையிலும், காரமடை பகுதி விநாயகர் சிலைகள் பத்ரகாளியம்மன் குளத் திலும், மேட்டுப்பாளையம் பகுதி விநாயகர் சிலைகள் பவானி ஆற்றிலும், சிறுமுகை பகுதி விநாயகர் சிலைகள் பழத்தோட்டம் ஆற்றிலும் கடந்து ஆண்டு போல இந்த ஆண்டும் கரைக்க அனுமதிக்கப்படும்.

விநாயகர் சதுர்த்தி விழா மற்றும் விநாயகர் சிலைகள் ஊர்வலத்தை அமைதியாக நடத்தி தர போலீசுக்கு ஒத்துழைப்பு தர வேண்டும். இந்த ஆலோசனை கூட்டத்தில் இந்து முன்னணி சார்பில் கோட்ட பொறுப்பாளர் உருவை பாலன் மற்றும் இந்து முன்னணியினர், இந்து மக்கள் கட்சி, அனுமன் சேனா, பாரத் சேனா, விஷ்வ இந்து பர்‌ஷத், அகில பாரத இந்து மகா சபா உள்ளிட்ட இந்து அமைப்பு நிர்வாகிகள் கலந்து கொண்டனர்.

கும்பகோணம்:

இந்து மக்கள் கட்சியின் இளைஞர் அணி மாநில பொது செயலாளராக இருப்பவர் குருமூர்த்தி. இவர் மதுரை ஐகோர்ட் கிளையில் விநாயகர் சதுர்த்தி விழா சிலை ஊர்வலம் தொடர்பாக தாக்கல் செய்த மனுவில் கூறியிருப்பதாவது:-

கும்பகோணத்தில் ஆண்டுதோறும் விநாயகர் சதுர்த்தியை முன்னிட்டு விநாயகர் சிலை ஊர்வலம் மாலை நேரத்தில் நடைபெறுகிறது. இதனால் பல்வேறு இன்னல்கள் ஏற்படுகின்றன. குறிப்பாக மழைக்காலம் என்பதால் ஜெனரேட்டர் மின்சாரம் பயன்படுத்துவதால் எளிதில் தீப்பிடிக்க வாய்ப்பு உள்ளது. மாலை நேரம் ஊர்வலம் என்பதனால் பள்ளிவாசலில் தொழுகை நேரம் முடிந்து ஊர்வலத்தை நடத்துவதால் இரவு 11 மணிக்கு மேல் விசர்ஜனம் செய்யப்படுகிறது. இதனால் பல்வேறு சமூக விரோத கும்பல் ஊர்வலத்தில் ஊடுருவி கலவரம் ஏற்படுத்த வாய்ப்புகள் உள்ளன.

இந்த ஆண்டுக்கான விநாயகர் சதுர்த்தி விழா வருகிற செப்டம்பர் 13-ம் தேதி நடைபெறுகிறது. இதையொட்டி கும்பகோணம் நகர பகுதியில் வைக்கப்பட்டுள்ள விநாயகர் சிலைகள் மறுநாள் 14-ம் தேதி ஊர்வலமாக மகாமகம் குளத்தில் இருந்து புறப்படுகிறது. முக்கிய வீதிகள் வழியாக பாலக்கரை காவிரி டபீர் படித்துறையில் விநாயகர் சிலைகள் கரைக்கப்படுகின்றன.

எனவே பாதுகாப்பு நலன் கருதியும் இரவு நேர ஊர்வலத்தினால் ஏற்படுகிற இன்னல்களை போக்கிடும் வகையில் மாலை 6 மணிக்குள் விநாயகர் சிலைகள் ஊர்வலத்தை நடத்தி முடிக்க வேண்டுமென தஞ்சை மாவட்ட காவல் துறை, கும்பகோணம் நகர காவல் துறைக்கு உத்தரவிட வேண்டும்.

கடந்த 3ஆண்டுகளாகவே இந்து மக்கள் கட்சி சார்பில் பகல் நேர ஊர்வலத்திற்கு மனு அளிக்கப்பட்டுள்ளது. ஆனால் இதனை காவல்துறை நடைமுறைப்படுத்தவில்லை.

இவ்வாறு மனுவில் கூறப்பட்டிருந்தது.

மனுவை விசாரித்த நீதிபதி ஆனந்த் வெங்கடேஷ். மனுதாரர் குருமூர்த்தியின் வேண்டுகோளை ஏற்று கும்பகோணம் நகர காவல்துறை மாலை 6 மணிக்குள் விநாயகர் ஊர்வலத்தை எந்தவித சட்டம் ஒழுங்கு பிரச்னை ஏற்படாத வகையில் நடத்த வேண்டும் என உத்தரவிட்டார்.

எனவே இதுவரை பல ஆண்டுகளாக மாலை நேரத்தில் தொடங்கி இரவு 11 மணி வரை நடைபெற்ற விநாயகர் சிலை ஊர்வலம் இந்த ஆண்டு முதன் முறையாக கும்பகோணத்தில் காலை நேரத்தில் நடைபெற உள்ளது என்பது குறிப்பிடத்தக்கது.