மாகியில் கம்யூனிஸ்டு பிரமுகர் கொலையில் 3 பேர் கைது

புதுச்சேரி:

புதுவை மாநிலத்தின் மாகி பிராந்தியமான பள்ளூர் பகுதியை சேர்ந்தவர் பாபு கன்னிபொயில் (வயது 45). கட்டிட ஒப்பந்ததாரரான இவர் மார்க்சிஸ்டு கம்யூனிஸ்டு கட்சியின் முன்னாள் கவுன்சிலர் ஆவார்.

இவர் கடந்த 7-ந்தேதி மோட்டார் சைக்கிளில் அப்பகுதியில் சென்றபோது 4 பேர் கொண்ட கும்பலால் வெட்டி கொலை செய்யப்பட்டார். இந்த கொலை சம்பவம் அப்பகுதியில் பெரும் பரபரப்பையும், பதட்டத்தையும் ஏற்படுத்தியது.

இதையடுத்து போலீஸ் டி.ஜி.பி. சுனில்குமார் கவுதம், சீனியர் போலீஸ் சூப்பிரண்டு அபூர்வா குப்தா ஆகியோர் நேரில் சென்று சம்பவம் குறித்து விசாரணை நடத்தினர். மேலும் கொலையாளிகளை கைது செய்ய தனிப்படையும் அமைத்தனர்.

இந்த நிலையில் இந்த தனிப்படையினர் தீவிர விசாரணை நடத்தி மார்க்சிஸ்டு கம்யூனிஸ்டு பிரமுகர் பாபுகன்னி பொயிலை கொலை செய்த மாகி பந்தக்கால் பகுதியை சேர்ந்த சரத், வடக்கு பள்ளூர் பகுதியை சேர்ந்த நிதேஸ் மற்றும் கேரள மாநிலம் பன்னூரை சேர்ந்த ஜெரிசுரேஷ் ஆகிய 3 பேரை கைது செய்துள்ளனர்.