ராமநாதபுரம் அருகே கார் கவிழ்ந்து விபத்து- பெண் பலி

ராமநாதபுரம்:

ராமநாதபுரம் மாவட்டம் ராமேசுவரத்துக்கு தினமும் ஏராளமான சுற்றுலா பயணிகள் வந்து செல்கின்றனர். ராமநாதசுவாமி கோவிலில் உள்ள புனித தீர்த்தங்களில் நீராடவும், தரிசனம் செய்யவும் குடும்பத்துடன் பல்வேறு பகுதிகளில் இருந்து ஏராளமானோர் வருவதுண்டு.

சேலம் மாவட்டம் செவ்வாய்ப்பேட்டையை சேர்ந்த பாத்திர வியாபாரி கார்த்திகேயன் தனது குடும்பத்துடன் காரில் நேற்று ராமேசுவரம் புறப்பட்டார். அவரது மனைவி வெங்கடேசுவரி (வயது55), மகன் சிங்காரவேல் (29), மகள் நாகராஜலட்சுமி (37), பேத்தி நிகிதா (12) ஆகியோரும் காரில் வந்தனர்.

இன்று அதிகாலை ராமநாதபுரம் அருகே உள்ள அச்சுந்தன்வயல் பகுதியில் தனியார் என்ஜினீயரிங் கல்லூரி அருகே கார் வந்த போது எதிரே லாரி வந்தது.

அதன் மீது மோதாமல் இருக்க காரை திருப்பியபோது நிலைதடுமாறி தாறுமாறாக ஓடியது. அதே வேகத்தில் கார் சாலையில் கவிழ்ந்து விபத்துக்குள்ளானது.

இந்த விபத்தில் வெங்கடேசுவரி சம்பவ இடத்திலேயே பரிதாபமாக இறந்தார். கார்த்திகேயன் மற்றும் குடும்பத்தினர் காயத்துடன் மீட்கப்பட்டு அரசு ஆஸ் பத்திரிக்கு அனுப்பி வைக்கப்பட்டனர்.

விபத்து குறித்து தகவல் கிடைத்ததும் ராமநாதபுரம் பஜார் போலீசார் விரைந்து சென்று மீட்பு நடவடிக்கையில் ஈடுபட்டனர். தொடர்ந்து விசாரணை நடைபெற்று வருகிறது. #Tamilnews