போடியில் சிறுமிக்கு திருமணம் - புது மாப்பிள்ளையுடன் தாய் கைது

மேலசொக்கநாதபுரம்:

போடி அருகே குரங்கணி பகுதியை சேர்ந்தவர் முத்துமீனா. இவரது 15 வயது மகளை அதே பகுதியை சேர்ந்த சதீஷ் (27) என்பவருக்கு திருமணம் செய்து வைத்தார். சதீஷ் ஆந்திராவில் உள்ள முருக்கு கம்பெனியில் வேலை பார்த்து வருகிறார்.

மகளை திருமணம் செய்து வைத்தால் தனக்கு ஆதரவாக இருப்பார்கள் என முத்துமீனா நினைத்தார். ஆனால் திருமணம் முடிந்ததும் சதீஷ் மற்றும் அவரது மனைவி ஆந்திராவிற்கு சென்று விட்டனர்.

கணவன் இறந்து விட்டதால் தனியாக இருந்த முத்துமீனா அவர்களை தன்னுடன் வசிக்குமாறு கூறி உள்ளார். அதற்கு அவர்கள் மறுக்கவே போலீசில் தனது மகளை கடத்தி விட்டதாக புகார் அளித்தார்.

இது குறித்து போலீசார் நடத்திய விசாரணையில் 3 மாதத்திற்கு முன்பு முத்துமீனாவே தனது மகளை சதீசுக்கு திருமணம் செய்து வைத்ததும் தற்போது அந்த சிறுமி 2 மாத கர்ப்பிணியாக இருந்ததும் தெரிய வந்தது.

இது குறித்து மாவட்ட சைல்டு லைன் அமைப்புக்கு தகவல் தெரிவிக்கப்பட்டது. அவர்கள் அளித்த புகாரின் பேரில் முத்துமீனா மற்றும் சதீஷ் கைதுசெய்யப்பட்டனர்.

தாய் மற்றும் கணவர் சிறைக்கு சென்றதால் 15 வயது சிறுமி என்ன செய்வது என தெரியாமல் அழுது கொண்டிருந்தது அங்கிருந்தவர்களை கண் கலங்கச் செய்தது.