டிரான்ஸ்பார்மர் மீது டெம்போ மோதியது- மின்தடை காரணமாக பெரும் விபத்து தவிர்ப்பு

ஆரல்வாய்மொழி:

ஆரல்வாய்மொழியை அடுத்த செண்பகராமன்புதூ ரில் ஏராளமான செங்கல் சூளைகள் உள்ளன. செங்கல் சூளையில் செங்கல் ஏற்ற இன்று காலை டெம்போக்கள் வரிசையாக வந்த வண்ணம் இருந்தன. ஆரல்வாய்மொழி-நெடுமங்காடு தேசிய நெடுஞ்சாலையிலும் ஒரு டெம்போ செண்பகராமன்புதூர் நோக்கி வேகமாக வந்தது.

டெம்போவை ஆரல்வாய்மொழி கிறிஸ்து நகரைச் சேர்ந்த மணிகண்டன் (வயது 34) என்பவர் ஓட்டினார். மிஷின் காம்பவுண்டு அருகே வந்தபோது டெம்போ டிரைவரின் கட்டுப்பாட்டை மீறி சாலையோரம் இருந்த மின்சார டிரான்ஸ்பார்மர் மீது மோதியது.

டெம்போ மோதியதில் டிரான்ஸ்பார்மர் நொறுங்கியது. மின்கம்பிகளும் அறுந்து விழுந்தன. இதில், டிரைவர் மணிகண்டன் படுகாயமடைந்தார். அக்கம் பக்கத்தினர் ஓடி வந்து அவரை மீட்டனர். பின்னர் அவரை அருகில் உள்ள தனியார் ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்படுகிறது.

ஆரல்வாய்மொழி பகுதியில் இன்று அதிகாலை மின்சாரம் தடைப்பட்டு இருந்தது. இதனால் மின்சார டிரான்ஸ்பார்மர் மீது டெம்போ மோதியபோது பெரும் விபத்து தவிர்க்கப்பட்டது. மின்சாரம் இருந்திருந்தால் தீ விபத்து ஏற்பட்டு பலத்த சேதம் ஏற்பட்டிருக்கும். அதிர்ஷ்டவசமாக இங்கு நடக்க இருந்த அசம்பாவிதம் தடுக்கப்பட்டது.