சாலிகிராமத்தில் கடத்தப்பட்ட ஓட்டல் ஊழியர் மீட்பு- 2 பேர் கைது

போரூர்:

சென்னை சாலிகிராமம் ஸ்டேட் பாங்க் காலனி 2-வது தெருவை சேர்ந்தவர் இம்ரான். இவர் திருவண்ணாமலையில் உள்ள ஓட்டல் ஒன்றில் பணியாற்றினார். இதற்கிடையே சாலிகிராமத்தில் வீட்டில் இருந்த அவரை தாக்கி ஆட்டோவில் வந்த கும்பல் கடத்தி சென்றது.

இதுகுறித்து விருகம்பாக்கம் போலீசில் இம்ரானின் மனைவி சரஸ்வதி புகார் செய்தார். அதை தொடர்ந்து போலீஸ் இன்ஸ்பெக்டர் ராஜீவ் பிரின்ஸ் ஆரோன் வழக்கு பதிவு செய்து விசாரணை நடத்தினார்.

ஸ்டேட் பாங்கி சாலையில் உள்ள கண்காணிப்பு காமிராவை ஆய்வு செய்த போது கடத்தலுக்கு பயன்படுத்தப்பட்ட ஆட்டோவின் பதிவு எண் திருவண்ணாமலையை சேர்ந்தது என தெரிய வந்தது.

உடனே திருவண்ணாமலை சென்ற போலீசார் இம்ரானை மீட்டனர். மேலும் அவரை கடத்தி சென்ற மெக்கானிக் ராஜசேகர், அஸ்லாம் ஆகிய 2 பேரையும் கைது செய்தனர்.

அவர்களிடம் போலீசார் விசாரணை நடத்தினர். இப்போது மெக்கானிக் ராஜசேகர் கூறியதாவது:-

இம்ரான் திருவண்ணாமலையில் ஓட்டல் ஒன்றில் பணியாற்றினார். அதன் அருகே ஒரு மெக்கானிக்கடையில் பணியாற்றி வருகிறேன். கடந்த 10 நாட்களுக்கு முன்பு எங்கள் கடையில் இருந்த வாடிக்கையாளர் ஒருவரின் மோட்டார் சைச்கிளை இம்ரான் திருடிக்கொண்டு சென்னை வந்து விட்டார்.

கண்காணிப்பு காமிரா மூலம் எங்களுக்கு இது தெரிய வந்தது. எனவே இம்ரானை தேடி சென்னைக்கு ஆட்டோவில் வந்த நானும் எனது நண்பர் அஸ்லாமும் அவரை கடத்தி வந்தோம். அங்கிருந்த மோட்டார் சைக்கிளையும் எடுத்து வந்து விட்டோம் என்றார். #tamilnews