பாளையில் செல்போன் திருடிய 3 பேர் கைது

நெல்லை:

நெல்லை, பாளை பகுதியில் அடிக்கடி செல்போன்கள் திருட்டு போய் வந்தன. நெல்லை தற்காலிக பஸ் நிலையத்தில் தனது விலை உயர்ந்த செல்போன் திருட்டு போய் விட்டதாக அம்பையை சேர்ந்த கந்தசாமி (வயது39) என்பவர் புகார் செய்து இருந்தார்.

இதுபோல வண்ணார்பேட்டையை சேர்ந்த கணேசன் (28) என்பவரும் தனது செல்போனை காணவில்லை என புகார் செய்திருந்தார்.

இதைத்தொடர்ந்து பாளை குற்றப்பிரிவு போலீசார் அந்த செல்போன்களில் இ.எம்.ஐ. நம்பரை வைத்து ரகசியமாக தேடி வந்தனர். தற்போது அந்த செல்போன்கள் மீண்டும் இயக்கப்பட்டதால் உடனடியாக போலீசார் குற்றவாளிகளை கண்டு பிடித்தனர்.

மேலப்பாளையம் ஆமீன் புரத்தை சேர்ந்த செய்யது இப்ராகிம் (35) என்பவர் கணேசனின் செல்போனை திருடி வைத்திருந்தது கண்டுபிடிக்கப்பட்டது. உடனடியாக போலீசார் அவரை கைது செய்து செல்போனை பறிமுதல் செய்தனர்.

இதுபோல கந்தசாமியின் செல்போனை நெல்லை சந்திப்பு பகுதியை சேர்ந்த கதிர்வேல் (50) மற்றும் பேட்டையை சேர்ந்த ராஜா மைதீன் (26) ஆகிய 2 பேரும் திருடியது தெரியவந்தது. அவர்களை கைது செய்த போலீசார் அவர்களிடம் இருந்தும் காணாமல் போன செல்போனை பறிமுதல் செய்தனர்.