மு.க.ஸ்டாலின் அமெரிக்கா பயணம்: புதிய தொழில்களுக்கு அனுமதி வழங்குவது குறித்து ஆலோசனை
- அமெரிக்கா வாழ் தமிழர்களை சந்திக்க திட்டம்.
- இன்று காலை தமிழக அமைச்சரவைக் கூட்டம் நடைபெற்றது.
சென்னை:
தமிழக அமைச்சரவைக் கூட்டம் முதலமைச்சர் மு.க.ஸ்டாலின் தலைமையில் இன்று நடைபெற்றது.
உலக முதலீட்டாளர் மாநாட்டின் தொடர்ச்சியாக தொழில் முதலீடுகளை ஈர்ப்பதற்காக முதல்-அமைச்சர் மு.க.ஸ்டாலின் வருகிற 27-ந்தேதி அமெரிக்கா செல்ல உள்ளார்.
அமெரிக்கா செல்லும் முதல்-அமைச்சர் கூகுள் நிறுவன தலைமை செயல் அதிகாரி சுந்தர் பிச்சை உட்பட பல்வேறு தொழில் அதிபர்களை சந்திப்பதோடு அமெரிக்கா வாழ் தமிழர்களையும் சந்திக்க திட்டமிட்டு உள்ளார்.
இந்நிலையில் சென்னை தலைமைச் செயலகத்தில் காலை 11 மணிக்கு முதல்-அமைச்சர் மு.க.ஸ்டாலின் தலைமையில் தமிழக அமைச்சரவைக் கூட்டம் நடைபெற்று வருகிறது.
இதில் முதல் அமைச்சரின் வெளிநாட்டு பயணத்திற்கு ஒப்புதல் அளிப்பது உள்ளிட்ட பல்வேறு விஷயங்கள் குறித்து விவாதிக்கபட்டதாக தெரிகிறது.
மேலும், பல்வேறு முக்கிய தொழில் நிறுவனங்கள், திட்டங்களுக்கு ஒப்புதல் அளிப்பது தொடர்பாகவும் முடிவு எடுக்கப்பட்டதாக தெரிகிறது.
முதலமைச்சரின் வெளிநாடு பயணம் சுமார் 15 நாட்கள் வரை இருக்கலாம் என தகவல் வெளியாகி வரும் நிலையில் மாநிலத்தில் முதல் அமைச்சர் இல்லாத சூழலில், எத்தகைய பணிகளை அமைச்சா்கள் மேற்கொள்ள வேண்டும் என்பது உள்பட பல்வேறு முக்கிய விஷயங்கள் குறித்து விவாதிக்கப்பட்டதாக தகவல்கள் தெரிவிக்கின்றன.
அத்துடன், தமிழகத்தில் புதிதாக தொடங்க உள்ள தொழில் திட்டங்களுக்கும் அனுமதிகள் பெறப்பட்டதாக தகவல் வெளியாகி உள்ளது.