கோவையில் ஆவின்பால் வினியோகம் செய்யும் முகவர்களுக்கு பாதுகாப்பு அளிக்க வேண்டும்- போலீஸ் கமிஷனருக்கு மனு

கோவை,

கோவை மாவட்ட ஆவின்பால் முகவர்கள் பாதுகாப்பு நலச்சங்க தலைவர் மைக்கேல்ராஜ் தலைமையில் நிர்வாகிகள் கோவை போலீஸ் கமிஷனர் அலுவலகத்தில் அளித்த மனுவில் கூறியிருப்பதாவது:-

கோவை மாவட்டத்தில் 708 ஆவின் பூத்துகள் உள்ளன. இதில் ஒரு சில பூத்துகள் மட்டுமே கடைகள் எடுத்து பாலை கடைக்குள் வைக்கின்றன. மற்ற முகவர்கள் சாலையின் ஓரமாக இறக்கி வைத்து வியாபாரம் செய்கின்றனர். ஆவின் பால் முகவர்கள் பொருளாதார ரீதியாக பெரிய அளவில் வாடகை கொடுத்து வியாபாரம் செய்வது என்பது மிகவும் சிரமமானது.

ஆவின் முகவர்கள் பால் பொருட்களை வினியோகம் செய்ய இரவு நேரங்களில் வாகனங்களில் செல்லும் போது மர்மநபர்களால் அடிக்கடி தாக்கப்பட்டு பணம், உடமை இழக்கும் சம்பவம் நடக்கிறது.

மேலும் பால் பூத்துகளிலும் அடிக்கடி பால் திருட்டு போய் வருகிறது. எனவே போலீசார் ரோந்து பணியில் ஈடுபட்டு, அங்கு சந்தேகப்படும் படியாக யார் நின்றாலும் அவர்களை விசாரித்து செல்ல வேண்டும். முகவர்களுக்கு பாதுகாப்பு அளிக்க வேண்டும்.

இவ்வாறு அதில் கூறப்பட்டுள்ளது.