அணுசக்திக்கு தேவையான யூரேனியத்தை அதிகமாக செறிவூட்ட ஈரான் முடிவு

டெஹ்ரான்:

எண்ணை வளம்மிக்க நாடான ஈரானுக்கும் அமெரிக்கா. பிரான்ஸ், பிரிட்டன், சீனா, ரஷ்யா, ஜெர்மனி ஆகிய நாடுகளுக்கும் இடையில் முன்னர் நடைபெற்ற பேச்சுவார்த்தையில் அணுசக்திக்கு தேவையான யுரேனியம் என்னும் மஞ்சள் நிற தாதுவை செறிவூட்டும் விவகாரம் தீவிரமாக ஆராயப்பட்டது.


இந்நிலையில், அணுசக்திக்கு தேவையான யூரேனியத்தை செறிவூட்டும் நிலையத்தை செயல்படுத்தி அதிகமான உற்பத்தியை தொடங்கவுள்ளதாக சர்வதேச முகமையிடம் ஈரான் தெரிவித்துள்ளது.

இஸ்பஹான் மாகாணத்தில் உள்ள நட்டான்ஸ் பகுதியில் உள்ள அணு உலையில் யூரேனியம் செறிவூட்டும் பணிகளை தொடங்குவதாக சர்வதேச அணு சக்தி முகமைக்கு கடிதம் அனுப்பியுள்ளதாக ஈரான் அணு சக்தி முகமையின் தலைவர் அலி அக்பர் சாலே இன்று தெரிவித்துள்ளார்.

சந்தர்ப்பம் சாதகமாக அமைந்தால் நாளை இரவில் இருந்து இந்த அணு உலை செயல்படலாம் என்றும் அவர் குறிப்பிட்டுள்ளார்.