நீங்கள் தேடியது "காங்கிரஸ் எம்எல்ஏ"

கேரளா மாநிலம் வயநாடு மாவட்டத்தில் ஏற்பட்ட நிலச்சரிவால் ஏராளமான மக்கள் வீடுகள், உடமைகளை இழந்து பாதிக்கப்பட்டுள்ளனர்.

இந்நிலையில், பாதிக்கப்பட்ட மக்களுக்கு தமிழ்நாடு காங்கிரஸ் கட்சி சார்பாக 18 எம்.எல்.ஏ.க்கள் தங்களது ஒரு மாத சம்பளத்தை நிவாரணமாக வழங்க முடிவு செய்துள்ளனர்.

இதுதொடர்பாக காங்கிரஸ் மாநில தலைவர் செல்வப்பெருந்தகை வெளியிட்டுள்ள அறிக்கையில் கூறப்பட்டுள்ளதாவது:-

கேரள மாநிலம், வயநாடு மாவட்டத்தில் வரலாறு காணாத நிலச்சரிவு ஏற்பட்டு 300-க்கும் மேற்பட்டோர் உயிரிழந்ததோடு, நூற்றுக்கணக்கானோர் படுகாயம் அடைந்து உடைமைகளை இழந்து பரிதாப நிலையில் உள்ளனர். இதில் 24 தமிழர்களும் உயிரிழந்துள்ள செய்தி மிகுந்த வேதனையை தருகிறது.

இவர்களது துயர் துடைக்க சட்டமன்ற காங்கிரஸ் கட்சி சார்பாக 18 சட்டமன்ற உறுப்பினர்களும் தங்களது ஒரு மாத ஊதியத்தை நிவாரண நிதியாக வழங்குவதென முடிவு செய்யப்பட்டுள்ளது.

இந்நிலையில், இளமை பருவத்தில் பொறியாளர் படிப்பு படித்து சென்னையில் பயிற்சி பெற்று ராணுவ பொறியாளராக பணியில் சேர்ந்த சீதா ஷெல்கே என்பவர் வயநாடு பகுதியில் சூரல்மலை பகுதியில் 144 ராணுவ வீரர்களுடன் 36 மணி நேரத்தில் இரும்பு பாலம் அமைத்து நிவாரண பணிகள் துரிதமாக நடைபெற மகத்தான சாதனை புரிந்தது மிகுந்த வரவேற்புக்குரியது.

ராணுவ பொறியாளர் சீதா ஷெல்கே வயநாட்டில் பேரிடருக்கு எதிராக ஒரு ராணுவ வீரராக பணியாற்றியதற்கு தமிழ்நாடு காங்கிரஸ் சார்பாக பாராட்டுகளையும், வாழ்த்துகளையும் தெரிவித்துக் கொள்கிறேன்.

அதேபோல, கேரள மாநிலம், வயநாடு மாவட்டம், சூரல்மலை பகுதியில் ஏற்பட்ட நிலச்சரிவில் சிக்கி படுகாயம் அடைந்தவர்களுக்கு ஆற்று வெள்ளத்தின் நடுவே ஜிப்லைன் கம்பி மூலம் தமிழ்நாட்டைச் சேர்ந்த பெண் செவிலியர் சபீனா என்பவர் முதலுதவி சிகிச்சை மேற்கொண்டு சாதனை படைத்துள்ளார்.

நீலகிரி மாவட்டம், கூடலூரில் உள்ள தனியார் புற்றுநோய் சிகிச்சை மருத்துவமனையில் பணியாற்றி வரும் இவர் ஜிப் லைன் மூலம் ஆற்றை கடந்து சென்று சிகிச்சை அளிக்க ஆண் செவிலியர்கள் இல்லாத நிலையில் துணிச்சலாக செயல்பட்டு மருத்துவ உபகரணங்கள், மருந்துகள் வழங்கியும், நோயாளிகளுக்கு முதலுதவி சிகிச்சையும் அளித்துள்ளார். இவரது சேவை மனப்பான்மை மிக்க துணிச்சலான பணியை தமிழ்நாடு காங்கிரஸ் சார்பாக பாராட்டுகிறேன், வாழ்த்துகிறேன்."

இவ்வாறு அதில் தெரிவிக்கப்பட்டுள்ளது.

பெங்களூரு:

பெங்களூர் வசந்த்நகரில் கர்நாடகா மகரிஷி வால்மீகி பழங்குடியின வளர்ச்சி வாரியம் செயல்படுகிறது. இந்த கழகத்தின் அக்கவுண்ட் சூப்பிரண்டு சந்திரசேகரன் (வயது 52) என்பவர் கடந்த மே மாதம் 26-ந்தேதி ஷிமோகாவில் உள்ள வீட்டில் தூக்குப்போட்டு தற்கொலை செய்து கொண்டார். அவர் எழுதி வைத்திருந்த கடிதத்தில் மாநகராட்சி வங்கி கணக்கில் இருப்பு வைக்கப்பட்டு இருந்த கர்நாடக வால்மீகி வளர்ச்சிக்கழகத்தின் நிதி தொகை ரூ.94.97 கோடி ஊழல் செய்யப்பட்டுள்ளதாக தெரிவித்து இருந்தார்.

இதனை தொடர்ந்து இளைஞர் நலன் மற்றும் விளையாட்டுதறை, பழங்குடியினர் நலத்துறை மந்திரியாக இருந்த நாகேந்திரன் தனது மந்திரி பதவியை ராஜினாமா செய்தார். இதையடுத்து இந்த ஊழல் வழக்கை கர்நாடக மாநில அரசு சிறப்பு புலனாய்வுப் பிரிவுக்கு மாற்றி உத்தரவிட்டுள்ளது.

ரூ.94.97 கோடி பணம் ஐதராபாத்தை சேர்ந்த முதல் நிதிக் கடன் கூட்டுறவு சங்கத்தின் வங்கி கணக்குகளுக்கு மாநகராட்சி கணக்கில் இருந்து முறைகேடாக மாற்றப்பட்டது. பின்னர் அங்கிருந்து வெவ்வேறு கணக்குகளுக்கு மாற்றி பணத்தை எடுத்துள்ளனர் என்பது தெரியவந்தது.

இந்த கணக்கில் இருந்து சட்ட விரோதமாக பண பரிமாற்றம் செய்த வழக்கில் இதுவரை 11 பேரை போலீசார் கைது செய்துள்ளனர். அவர்கள் முறைகேடு செய்த பணத்தில் வாங்கிய தங்க நகைகளும் பறிமுதல் செய்யப்பட்டுள்ளது.

இந்த முறைகேட்டில் பழங்குடியினர் நலத்துறை அமைச்சராக இருந்த நாகேந்திரன் மற்றும் ராய்ச்சூர் ஊரக சட்டசபை தொகுதி காங்கிரஸ் எம்.எல்.ஏ.வும், மாநில மகரிஷி வால்மீகி நிகாம் தலைவருமான பசனகவுடா தாடால் என்பவருக்கு தொடர்பு இருப்பதாக சந்தேகிக்கப்படுகிறது. பண பரிமாற்ற வழக்கில் இருவரின் பங்கு குறித்து விசாரணை நடத்துவதற்காக கடந்த 5-ந்தேதி நோட்டீசு அனுப்பிய சிறப்பு புலனாய்வுப் பிரிவு விசாரணைக்கு நேரில் ஆஜராகுமாறும் உத்தரவிட்டது.

இதையடுத்து ஆஜரான நாகேந்திரன், பசனகவுடா தாடால் ஆகியோரிடம் சிறப்பு புலனாய்வுப் பிரிவு தலைவர் மணீஷ் கர்பிகர் தலைமையில் விசாரணை நடத்தி பல்வேறு கேள்விகள் கேட்டு வாக்குமூலம் பதிவு செய்தனர். இருவரின் வாக்குமூலம் வீடியோ பதிவு செய்யப்பட்டது.

இது ஒருபுறம் இருக்க மறுபுறம் இந்த சட்டவிரோத பண பரிமாற்றம் தொடர்பாக அமலாக்கத்துறை சார்பாக ஆஷாபூர் சாலை 2-வது வார்டு ராம் ரஹீம் காலனியில் உள்ள அவரது வீட்டில் சோதனை நடத்தப்பட்டது. 3 அதிகாரிகள் தலைமையில் 2 குழுக்கள் நடத்திய சோதனையில் பல்வேறு ஆவணங்கள் கைப்பற்றப்பட்டுள்ளது. இந்த ஆவணங்கள் சரிபார்ப்பு பணி தொடர்ந்து நடைபெற்று வருகிறது.

மேலும் இது தொடர்பாக காங்கிரஸ் எம்.எல்.ஏ. பசனகவுடா தாடாவிடமும் அதிகாரிகள் தீவிர விசாரணை நடத்தி வருகின்றனர்.

திருப்பதி:

தெலுங்கானா மாநிலம், கரீம் நகர் மாவட்டம் சோப்தண்டி தொகுதி காங்கிரஸ் எம்.எல்.ஏ. மெடிப்பள்ளி சத்தியம். இவரது மனைவி ரூபா தேவி. தம்பதிக்கு 2 குழந்தைகள் உள்ளனர்.

மெடிப்பள்ளி சத்தியம் ஐதராபாத் அடுத்த அல்வால் பஞ்சசீலா காலனியில் குடும்பத்தினருடன் வசித்து வருகிறார். ரூபா தேவி விகாரபாத்தில் உள்ள அரசு பள்ளியில் ஆசிரியையாக பணியாற்றி வந்தார்.

கடந்த சில நாட்களுக்கு முன்பு மெடிப்பள்ளி சத்தியம் எம்.எல்.ஏ. தனது மனைவி குழந்தைகள் மற்றும் உறவினர்களுடன் திருப்பதி மற்றும் பல்வேறு சிவன் கோவிலுக்கு சென்று தரிசனம் செய்து விட்டு வந்தனர்.

இந்த நிலையில் ரூபா தேவி கடந்த 2 நாட்களாக பள்ளிக்கு செல்லாமல் வீட்டிலேயே இருந்தார். நேற்று காலை தொகுதிக்குச் சென்ற எம்.எல்.ஏ. சத்தியம் மாலை வரை தொகுதியிலேயே இருந்தார்.

நேற்று நள்ளிரவு எம்.எல்.ஏ. சத்யம் வீடு திரும்பினார். அப்போது வீட்டில் உள்ள படுக்கை அறையில் ரூபா தேவி தூக்கில் பிணமாக தொங்கினார். இதனைக் கண்ட சத்தியம் எம்.எல்.ஏ. மற்றும் குழந்தைகள் கதறி துடித்தனர்.

இதுகுறித்து தகவல் அறிந்த போலீசார் சம்பவ இடத்திற்கு வந்து ரூபா தேவியின் பிணத்தை மீட்டு பிரேத பரிசோதனைக்காக கொம்பள்ளி அரசு ஆஸ்பத்திரிக்கு அனுப்பி வைத்தனர்.

மேலும் போலீசார் வழக்கு பதிவு செய்து எம்.எல்.ஏ.வின் மனைவி எதற்காக தற்கொலை செய்தார் என விசாரணை நடத்தி வருகின்றனர்.

ஆளுங்கட்சி எம்.எல்.ஏ.வின் மனைவி தூக்கிட்டு தற்கொலை செய்து கொண்ட சம்பவம் தெலுங்கானாவில் பரபரப்பை ஏற்படுத்தியது.

திருப்பதி:

தெலுங்கானா மாநிலம், காங்கிரஸ் கட்சி எம்.எல்.ஏ.வாக இருப்பவர் சிக்குடு வம்சி கிருஷ்ணா. டாக்டரான இவர் கடந்த சில நாட்களுக்கு முன்பு சமூக வலைதளம் மூலம் பெண் ஒருவர் வயிற்றில் உள்ள கட்டியால் மன உளைச்சல் மற்றும் உடல் நல கோளாறால் அவதி அடைந்து வருவதை அறிந்தார்.

இதையடுத்து நாகர்கர்னூல் மாவட்டம் பலமூரில் பாதிக்கப்பட்ட பெண் அனிதாவை அச்சம்பேட்டை அரசு ஆஸ்பத்திரிக்கு வரவழைத்தார். அவரிடம் விசாரணை நடத்தியதில் கடந்த ஒரு ஆண்டாக கட்டியுடன் அவதிப்படுவதாக டாக்டரிடம் தெரிவித்தார்.

அவரது வயிற்றை ஸ்கேன் செய்து பார்த்தபோது வயிற்றில் 10 கிலோ எடையுள்ள கட்டி இருப்பது தெரிய வந்தது.

இதையடுத்து சிக்குடு வம்சி கிருஷ்ணா தலைமையிலான டாக்டர் குழுவினர் அனிதாவின் வயிற்றில் இருந்த 10 கிலோ கட்டியை அறுவை சிகிச்சை மூலம் அகற்றி அவரது உயிரை காப்பாற்றினர்.

அனிதாவின் உயிரை காப்பாற்றியதற்கு அவரது குடும்பத்தினர் காங்கிரஸ் எம்.எல்.ஏ.வும், டாக்டருமான சிக்குடு வம்சி கிருஷ்ணாவிற்கு நன்றி தெரிவித்தனர்.

கர்நாடக மாநிலத்தில் காங்கிரஸ் எம்.எல்.ஏ. வாக இருந்து வருபவர் பி.ஆர். பாட்டீல். இவர் பாரதியஜனதா மீது கூறிய கருத்துக்கள் தற்போது சர்ச்சையை ஏற்படுத்தி இருக்கிறது.

அடுத்த பாராளுமன்ற தேர்தலில் பிரதமர் மோடி வெற்றி பெற அவர்கள் (பா.ஜனதா)ராமர் கோவில் மீது குண்டுகள் வீசி முஸ்லீம்கள் மீது பழி சுமத்துவார்கள் என குற்றம் சாட்டி உள்ளார். அவரது பேச்சு அடங்கிய வீடியோவை பாரதியஜனதா கட்சியினர் எக்ஸ் வலை தளத்தில் வெளியிட்டுள்ளனர்.

இது கர்நாடகாவில் பரபரப்பாகி உள்ளது. இது தொடர்பாக பாரதியஜனதாவினர் கூறும் போது இந்து-முஸ்லீம் இடையே பதற்றத்தை ஏற்படுத்தும் வகையில் காங்கிரஸ் எம்.எல்.ஏ பாட்டீல் கருத்து தெரிவித்து உள்ளதாக தெரிவித்துள்ளனர்.

ஈரோடு:

ஈரோடு கிழக்கு தொகுதி காங்கிரஸ் எம்.எல்.ஏ.வாக இருந்தவர் திருமகன் ஈவெரா (46). இவர் காங்கிரஸ் கட்சியின் மூத்த தலைவரும், முன்னாள் மத்திய மந்திரியுமான ஈ.வி.கே.எஸ். இளங்கோவனின் மூத்த மகன் ஆவார். இவருக்கு பூர்ணிமா என்ற மனைவியும், சமணா என்ற மகளும் உள்ளனர்.

திருமகன் ஈவெரா கடந்த 2021-ம் ஆண்டு நடந்த சட்டமன்ற தேர்தலில் ஈரோடு கிழக்கு தொகுதியில் போட்டியிட்டு வெற்றி பெற்றார். இவர் ஈரோடு கச்சேரி வீதியில் உள்ள குடியரசு இல்லமான தனது வீட்டில் தங்கி இருந்து தொகுதி பணிகளை செய்து வந்தார்.

தொகுதி தொடர்பான பிரச்சினைகளை சம்பந்தப்பட்ட அமைச்சர்கள், அதிகாரிகளை நேரில் சந்தித்து நிறைவேற்றி வந்தார். காங்கிரஸ் கட்சியினர் மட்டுமின்றி மாற்று கட்சியினர் மற்றும் பொதுமக்களுடன் எளிமையாக பழகி வந்தார்.

கடந்த சில நாட்களுக்கு முன்பு சென்னையில் இருந்து வந்த திருமகன் ஈவெரா எம்.எல்.ஏ. ஈரோட்டில் உள்ள தனது வீட்டில் தங்கி வழக்கம்போல் தொகுதி பணிகளை செய்து வந்தார். இந்த நிலையில் அவருக்கு திடீரென சுவாசக் கோளாறு ஏற்பட்டது. இதற்காக தனது வீட்டிலேயே சிகிச்சை பெற்று வந்தார்.

இந்த நிலையில் நேற்று வீட்டில் இருந்த திருமகன் ஈவெரா எம்.எல்.ஏ.வுக்கு மூச்சு திணறல் ஏற்பட்டது. மேலும் மாரடைப்பும் ஏற்பட்டது. இதையடுத்து அவருடன் இருந்தவர்கள் உடனடியாக அவரை சிகிச்சைக்காக ஈரோட்டில் உள்ள ஒரு தனியார் ஆஸ்பத்திரிக்கு கொண்டு சென்றனர். அவரை பரிசோதனை செய்த டாக்டர்கள் வரும் வழியிலேயே இறந்து விட்டதாக தெரிவித்தனர்.

இதையடுத்து திருமகன் ஈவெரா எம்.எல்.ஏ. உடல் கச்சேரி வீதியில் உள்ள அவரது இல்லத்துக்கு கொண்டு செல்லப்பட்டது. மேலும் திருமகன் ஈவெரா எம்.எல்.ஏ. இறந்த தகவல் கிடைத்ததும் காங்கிரஸ் நிர்வாகிகள், தொண்டர்கள், மாற்று கட்சியினர், பொதுமக்கள் அதிர்ச்சி அடைந்தனர்.

திருமகன் ஈவெரா எம்.எல்.ஏ. இறந்த தகவல் கிடைத்ததும் ஈ.வி.கே.எஸ். இளங்கோவன் சென்னையில் இருந்து தனது குடும்பத்துடன் ஈரோட்டுக்கு வந்தார். அங்கு தனது மகனின் உடலை பார்த்து இளங்கோவன் மற்றும் குடும்பத்தினர் கதறி அழுதனர். இதைப்பார்த்த அரசியல் கட்சியினர் மற்றும் பொதுமக்களும் கதறி அழுதனர்.

திருமகன் ஈவெரா எம்.எல்.ஏ. உடலுக்கு அஞ்சலி செலுத்த முதல்-அமைச்சர் மு.க.ஸ்டாலின் நேற்று இரவு சென்னையில் இருந்து விமானம் மூலம் கோவைக்கு வந்தார். பின்னர் கார் மூலம் ஈரோட்டுக்கு வந்தார். பின்னர் திருமகன் ஈவெரா உடலுக்கு மலர் வளையம் வைத்து அஞ்சலி செலுத்தினார். தொடர்ந்து ஈ.வி.கே.எஸ். இளங்கோவன் மற்றும் குடும்பத்தினருக்கு ஆறுதல் கூறினார்.

முதல்-அமைச்சர் மு.க.ஸ்டாலினுடன் அமைச்சர்கள் உதயநிதி ஸ்டாலின், கே.என்.நேரு, செந்தில்பாலாஜி, முத்துசாமி, சாமிநாதன், அன்பில்மகேஷ் பொய்யாமொழி, காந்தி, மதிவேந்தன், எம்.பி.க்கள் கனிமொழி, விஜய் வசந்த், அந்தியூர் செல்வராஜ், கணேசமூர்த்தி, எம்.எல்.ஏ.க்கள் செல்வப்பெருந்தகை, செல்வக்குமார், ஏ.ஜி.வெங்கடாசலம் மற்றும் தி.மு.க. மாநில நெசவாளர் அணி செயலாளர் சிந்து ரவிச்சந்திரன் ஆகியோரும் அஞ்சலி செலுத்தினர்.

முன்னாள் அமைச்சர்கள் செங்கோட்டையன், கே.வி.ராமலிங்கம், முன்னாள் எம்.எல்.ஏ. தென்னரசு மற்றும் முன்னாள் மத்திய மந்திரி சுப்புலட்சுமி ஜெகதீசன் உள்பட பல்வேறு அரசியல் கட்சி தலைவர்கள், பிரமுகர்கள் திருமகன் ஈவெரா எம்.எல்.ஏ. உடலுக்கு மலர் வளையம் வைத்து அஞ்சலி செலுத்தினர்.

காங்கிரஸ் மாநில தலைவர் கே.எஸ்.அழகிரி உள்ளிட்ட ஏராளமான தலைவர்கள், தொண்டர்கள் இன்று காலையில் இருந்து திருமகன் ஈவெரா எம்.எல்.ஏ.வுக்கு அஞ்சலி செலுத்தினர்.

தொகுதி மக்கள் வரிசையில் காத்திருந்து திருமகன் ஈவெரா எம்.எல்.ஏ. உடலுக்கு அஞ்சலி செலுத்தினர்.

தொடர்ந்து இறுதி சடங்குகள் நடந்து திருமகன் ஈவெரா எம்.எல்.ஏ. உடல் ஈரோடு கருங்கல்பாளையத்தில் உள்ள மின்மயானத்திற்கு அலங்கரிக்கப்பட்ட வாகனத்தில் கொண்டு செல்லப்பட்டது. அங்கு பிற்பகலில் அவரது உடல் தகனம் செய்யப்பட்டது.

திருமகன் ஈவெரா எம்.எல்.ஏ. உடலுக்கு ஏராளமான காங்கிரஸ் கட்சியினர் மற்றும் பல்வேறு கட்சியினர், பொதுமக்களும் வழிநெடுக மலர் தூவி அஞ்சலி செலுத்தினர்.

மரணம் அடைந்த திருமகன் ஈவெரா எம்.எல்.ஏ. கடந்த 2015-ம் ஆண்டு முதல் தமிழ்நாடு காங்கிரஸ் கட்சியின் தகவல் தொழில் நுட்பம் மற்றும் சமூக ஊடகத்துறையின் தலைவராக பதவி வகித்தார். தற்போது காங்கிரஸ் கட்சியின் மாநில பொதுச்செயலாளராக இருந்தார்.

ஈரோடு கிழக்கு சட்டசபை தொகுதியில் இருந்து எம்.எல்.ஏ.வாக தேர்ந்தெடுக்கப்பட்டவர் ஈ.வெ.ரா.இ.திருமகன். 45 வயதாகும் இவர் தமிழக காங்கிரஸ் கட்சியில் மாநில பொதுச் செயலாளராகவும் இருந்து வந்தார்.

கடந்த சில தினங்களாக இவர் உடல் நலக்குறைவால் பாதிக்கப்பட்டு இருந்தார். இன்று மதியம் அவருக்கு திடீர் மயக்கம் ஏற்பட்டது. இதையடுத்து அவரை மருத்துவமனையில் அனுமதித்தனர்.

ஆனால் வரும் வழியிலேயே அவர் உயிர் பிரிந்துவிட்டதாக டாக்டர்கள் தெரிவித்தனர். இதையடுத்து அவரது உடல் ஈரோட்டில் கச்சேரி சாலையில் உள்ள அவரது வீட்டுக்கு எடுத்து செல்லப்பட்டது.

இதுபற்றி தகவல் அறிந்ததும் சென்னையில் இருந்த ஈ.வி.கே.எஸ்.இளங்கோவன் கடும் அதிர்ச்சி அடைந்தார். அவர் ஈரோட்டுக்கு புறப்பட்டு சென்றார்.

திருமகன் மரணம் செய்தியை கேட்டதும் காங்கிரஸ் நிர்வாகிகள், தொண்டர்கள் கடும் அதிர்ச்சி அடைந்தனர். அவரது வீட்டுக்கு காங்கிரசார் திரண்டு சென்று அஞ்சலி செலுத்தி வருகிறார்கள்.

ஈரோட்டில் 59 ஆண்டுகளுக்கு பிறகு காங்கிரஸ் கட்சியை வெற்றி பெற வைத்த சிறப்பு திருமகனுக்கு உண்டு. தந்தை பெரியாரின் கொள்ளு பேரனான இவர் முதல் முதலாக சட்டசபைக்கு சென்றதால் ஈரோடு காங்கிரஸ் கட்சியினர் மிகுந்த மகிழ்ச்சியில் இருந்தனர்.

ஆனால் அந்த மகிழ்ச்சி நீடிக்காத அளவுக்கு திருமகன் மரணம் அடைந்துள்ளார். ஈரோடு கிழக்கு தொகுதியில் சுமார் 9 ஆயிரம் வாக்கு வித்தியாசத்தில் வெற்றி பெற்ற அவருக்கு அந்த தொகுதியில் அனைத்து தரப்பினரும் வாக்களித்து இருந்தனர் என்பது குறிப்பிடத்தக்கது.

காங்கிரஸ் கட்சியில் 2006-ம் ஆண்டு முதல் 2010-ம் ஆண்டு வரை இளைஞர் காங்கிரஸ் மாநில பொதுச் செயலாளராக இருந்தார். 2014ம் ஆண்டு முதல் 2017-ம் ஆண்டு வரை சமூக ஊடக பிரிவு தலைவராக இருந்தார்.

2016-ம் ஆண்டு முதல் அகில இந்திய காங்கிரஸ் கமிட்டி உறுப்பினராக இருந்தார். 2021-ம் ஆண்டு முதல் தமிழக காங்கிரஸ் பொதுச் செயலாளர்களில் ஒருவராக இருந்தார்.

திருவனந்தபுரம்:

கேரள மாநிலம் பெரும்பாவூர் தொகுதி காங்கிரஸ் எம்.எல்.ஏ. எல்தோஸ் மீது திருவனந்தபுரம் பேட்டை பகுதியைச் சேர்ந்த ஆசிரியை ஒருவர், கோவளம் போலீசில் பாலியல் புகார் கூறிய சம்பவம் பரபரப்பை ஏற்படுத்தி உள்ளது.

இது தொடர்பாக கோவளம் போலீசார் விசாரணை நடத்தினர். தொடர்ந்து எல்தோஸ் மீது ஜாமீனில் வெளிவர முடியாத பிரிவுகளின் கீழ் போலீசார் வழக்குப் பதிவு செய்தனர். அவரை போலீசார் விசாரணைக்கு தொடர்பு கொள்ள முயன்றபோது அவர் தலைமறைவாகிவிட்டது தெரியவந்தது.

இதற்கிடையில் வழக்கில் போலீசார் தன்னை கைது செய்யாமல் இருப்பதற்காக முன்ஜாமீன் கேட்டு, எல்தோஸ் எம்.எல்.ஏ. கோர்ட்டில் மனு தாக்கல் செய்துள்ளார். இந்த மனு வருகிற 15-ந் தேதி விசாரணைக்கு வர உள்ளது.

இந்த நிலையில் புகாரை வாபஸ் பெற, வக்கீல் மூலம் தன்னை எல்தோஸ் அணுகியதாகவும், இதற்காக ரூ.30 லட்சம் பேரம் பேசியதாகவும் தற்போது மற்றொரு குற்றச்சாட்டை ஆசிரியை தெரிவித்துள்ளார்.

திருவனந்தபுரத்தில் பேட்டியளித்த அவர், 'கடந்த 10 ஆண்டுகளாக எல்தோசுடன் எனக்கு பழக்கம் இருந்தாலும், சில மாதங்களாக தான் நாங்கள் நெருக்கமானோம். அப்போது அவரது நடவடிக்கை பிடிக்காததால் நட்பை துண்டிக்க முயன்றேன்.

இதனால் அவர் என்னை மிரட்டியதுடன் அடித்து துன்புறுத்தவும் தொடங்கினார். எனவே தான் போலீசில் புகார் அளித்தேன். இந்தநிலையில் தான் புகாரை வாபஸ் பெறுவதற்காக திருவனந்தபுரத்தில் உள்ள ஒரு வக்கீல் அலுவலகத்திற்கு வர வழைத்து ரூ.30 லட்சம் வரை பேரம் பேசினர். ஆனால் நான் ஒத்துக்கொள்ளவில்லை. விரைவில் எல்தோஸ் குறித்த மேலும் பல அதிர்ச்சி தகவல்களை வெளியிடுவேன்' என்றார்.

இதற்கிடையில், புகார் அளித்த பெண், எம்.எல்.ஏ.வின் செல்போனை பறித்து சமூக வலைதளத்தில் அவதூறாகப் பேசியதாகக் கூறி, எம்எல்ஏவின் மனைவி மரியம்மா போலீசில் புகார் அளித்துள்ளார். அந்த புகாரின் பேரில் வழக்கு பதிவு செய்யப்பட்டுள்ளது.

சண்டிகர்:

அரியானாவில் மாநிலங்களவை தேர்தலில் ஆதம்பூர் தொகுதி காங்கிரஸ் எம்.எல்.ஏ. குல்தீப் பிஷ்னோய் அக்கட்சியின் வேட்பாளர் அஜய் மாக்கானுக்கு வாக்களிக்காமல் சுயேச்சை வேட்பாளர் கார்த்திகேய சர்மாவுக்கு வாக்களித்தார். கார்த்திகேய சர்மாவுக்கு பா.ஜ.க, ஜனாயக் ஜனதா கட்சிகள் ஆதரவளித்துள்ளன.

அரியானாவில் காங்கிரஸ் வெற்றி பெற 31 எம்.எல்.ஏக்களும் காங்கிரஸ் வேட்பாளருக்கு வாக்களிக்க வேண்டிய நிலையில், குல்தீப் பிஷ்னோய் மாற்றி வாக்களித்துள்ளார். மற்றொருவரது வாக்கு ரத்து செய்யப்பட்டது. இதனால் அரியானாவில் மாநிலங்களவை தேர்தலில் காங்கிரஸ் கட்சி தோல்வியடைந்தது.

இந்நிலையில், அரியானாவில் கட்சி மாறி வாக்களித்த குல்தீப் பிஷ்னோயை காங்கிரஸ் கட்சியில் இருந்து நீக்கியுள்ளது.

இதுகுறித்து அகில இந்திய காங்கிரஸ் பொதுச்செயலாளர் கே.சி.வேணுகோபால் வெளியிட்டுள்ள அறிக்கையில், காங்கிரஸ் செயற்குழுவின் சிறப்பு அழைப்பாளர் பதவி உள்பட கட்சியின் அனைத்து பொறுப்புகளில் இருந்தும் குல்தீப் பிஷ்னோய் நீக்கப்பட்டுள்ளார் என தெரிவிக்கப்பட்டுள்ளது.

புதுடெல்லி:

முதல்-மந்திரி ராமன்சிங் தலைமையில் பா.ஜனதா ஆட்சி நடந்து வரும் சத்தீஸ்கர்  மாநில சட்டசபைக்கு 2 கட்டமாக ஓட்டுப்பதிவு நடந்தது.

மொத்தம் உள்ள 88 இடங்களில் கடந்த மாதம் 12-ந் தேதி முதல் கட்டமாக 18 தொகுதிகளுக்கும் மீதம் உள்ள 70 தொகுதிகளுக்கும் ஓட்டுப்பதிவு நடந்தது.

வருகிற 11-ந்தேதி ஓட்டு எண்ணிக்கை நடைபெறுகிறது. இதற்கிடையே சத்தீஸ்கரில் காங்கிரசுக்கு மெஜாரிட்டி கிடைக்கும் என்றும், ஆட்சியைப் பிடிக்கும் என்றும் அந்த கட்சி தலைவர்கள் நம்பிக்கை தெரிவித்துள்ளனர். மாநிலத்தில் பல்வேறு தொகுதிகளை பார்வையிட்ட பின்பு காங்கிரஸ் தலைவர்கள் இது தொடர்பாக மேலிடத்துக்கு தகவல் தெரிவித்துள்ளனர்.

சத்தீஸ்கர்  மாநில கட்சி விவகாரங்களை கவனிக்கும் மேலிட பொறுப்பாளர் பி.எல்.புனியா, காங்கிரஸ் கட்சிக்கு 50 இடங்கள் கிடைக்கும், மெஜாரிட்டி இடங்களுடன் ஆட்சி அமைக்கும் வாய்ப்பு இருப்பதாக மேலிடத்துக்கு தகவல் தெரிவித்துள்ளார்.

முதல்-மந்திரி வேட்பாளராக கருதப்படும் அஜித்ஜோகி இதர பிற்படுத்தப்பட்டோர் வாக்குகளை கவரும் வகையில் செயல்பட்டுள்ளார். இது காங்கிரசுக்கு நம்பிக்கை அளிக்கும் வகையில் உள்ளதாக தலைவர்கள் நம்பிக்கை தெரிவித்துள்ளனர்.

மேலும் காங்கிரஸ் தலைவர் ராகுல் காந்தியும், சத்தீஸ்கரில் தொகுதி வாரியாக வெற்றி வாய்ப்பு குறித்து தேர்தல் பொறுப்பாளர்களின் கருத்துக்களை கேட்டறிந்தார்.

இதையடுத்து அவர் மாநில தேர்தல் பொறுப்பாளர்களுக்கு பல அதிரடி உத்தரவுகள் பிறப்பித்துள்ளார். தேர்தல் முடிவுகள் முழுவதும் வெளியாகும் வரை யாரும் வெற்றிக் கொண்டாட்டங்களில் ஈடுபடக் கூடாது என்றும் தெரிவித்துள்ளார்.

கடந்த 3 தேர்தல்களில் தொடர்ச்சியாக காங்கிரஸ் ஆட்சி அமைக்கும் வாய்ப்பை இழந்துள்ளது. எனவே இந்த முறை ஆட்சி அமைக்க வாய்ப்பு கிடைக்கும் பட்சத்தில் கோவா, மணிப்பூர் மாநிலங்களில் எம்.எல்.ஏ.க்களை பா.ஜனதா இழுத்ததுபோல் இங்கு நடைபெறக் கூடாது என்பதில் முனைப்பாக உள்ளது.

எனவே தேர்தல் முடிவு வெளியாகத் தொடங்கியதும் வெற்றி பெறும் எம்.எல்.ஏ.க்களை பாதுகாக்கவும் ராகுல் உத்தரவிட்டுள்ளார்.

உடனடியாக அவர்களை ஒரே இடத்தில் தங்க வைத்து பாதுகாக்க வேண்டும், அவர்களுடன் தொடர்பில் இருக்க வேண்டும், தேர்தல் முடிவு வருவதற்கு முன்பே யார்-யாருக்கு வெற்றி வாய்ப்பு உள்ளதோ அவர்களை இப்போதே கண்காணித்து பாதுகாக்க வேண்டும் என்றும் உத்தரவிட்டுள்ளார்.

மேலும் ஓட்டு எண்ணிக்கையின்போது முறைகேடு நடைபெறாமல் இருக்க காங்கிரஸ் ஏஜெண்டுகள் விழிப்புடன் செயல்பட வேண்டும் என்று மேலிடம் உத்தரவிட்டுள்ளது. #RahulGandhi #ChhattisgarhElections