நீங்கள் தேடியது "நகை மோசடி"

விருதுநகர்:

கன்னியாகுமரி மாவட்டம் கோவில் விளையைச் சேர்ந்தவர் அனீஷ். இவரது மனைவி ஜாஸ்மின் ஆஷா (வயது 30) இவர், விருதுநகர் மாவட்டம் சாத்தூர் போலீசில் கொடுத்துள்ள புகாரில் கூறியிருப்பதாவது:-

நான், கடந்த மாதம் (ஏப்ரல் 26-ந்தேதி) சாத்தூரில் உள்ள பெந்தே கோஸ்தே சபைக்கு வந்திருந்தேன். அப்போது ராஜ்குமார் (28) மற்றும் அடையாளம் தெரியக்கூடிய நபர் அறிமுகமானார்கள்.

அவர்கள் எனக்கு குழந்தை இல்லை என்பதை அறிந்து அந்த பகுதியில் உள்ள சின்னப்பன் குருசரடி ஆலயத்தில் நகைகளை வைத்து பரிகார பூஜை நடத்தினால் குழந்தை பாக்கியம் கிடைக்கும் என்றனர். அதனை நம்பி 13 பவுன் நகைகளை கொடுத்தேன். அதனை வாங்கிச் சென்றவர்கள் நகையோடு மாயமாகி விட்டனர். அவர்கள் மீது நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.

இதுகுறித்து சாத்தூர் போலீசார் வழக்குப்பதிவு செய்து விசாரணை நடத்தினர். இதில் ராஜ்குமார், ஏற்கனவே நகை திருட்டு வழக்கில் கைதாகி சிறையில் இருப் பது தெரியவந்தது. மற்றொரு வரை போலீசார் தேடி வருகின்றனர்.

பேரையூர்:

திருமங்கலம்- உசிலம் பட்டி சாலையில், ராதா கிருஷ்ணன் என்பவர் நகை கடை நடத்தி வருகிறார். இங்கு ஒரு பெண் மற்றும் ஒரு ஆண் வந்தனர். பழைய நகையை கொடுத்து புதிய கே.டி.எம். நகை எடுக்க வேண்டும் என்று அவர்கள் கூறினர்.

கடை ஊழியர்கள் புதிய நகைகளை காட்டினர். பழைய நகைகளை பெற்றுக் கொண்டு புதிய நகைகளை கொடுத்தனர். அதன் பிறகு பழைய நகைகளை சோதித்த போது, அது போலி நகை என தெரியவந்தது.

இது குறித்த புகாரின் பேரில் போலீசார் விசாரணை நடத்தி வந்தனர். இதில் போலி நகை கொடுத்து மோசடியில் ஈடுபட்டவர்கள், பல்வேறு இடங்களில் இது போன்று மோசடி செய்திருப்பது தெரியவந்தது.

சி.சி.டி.வி. கேமிரா பதிவு மூலம் குற்றவாளிகளை போலீசார் தேடி வந்தனர். மதுரை சோலையழகுபுரம் கணேசன் மனைவி மீனாட்சி, ஜெய்ஹிந்துபுரம் ஆறுமுகம் மகன் சசிகுமார் (40) ஆகியோர் தான் மோசடியில் ஈடுபட்டவர்கள் என தெரியவர, இருவரும் கைது செய்யப்பட்டனர்.

தாம்பரம்:

சென்னை பல்லாவரம் பகுதியை சேர்ந்தவர் நவ ரத்தன்மால் (வயது52). இவர் பல்லாவரம் இந்திராகாந்தி பிரதான சாலையில் நவரத்தன் ஜெயின் என்ற பெயரில் நகைக்கடை மற்றும் அடகுகடை நடத்தி வருகிறார்.

அ.தி.மு.க. பிரமுகரான இவர் காஞ்சீபுரம் மாவட்ட அம்மா பேரவை துணை செயலாளராகவும் உள்ளார். இவரது சொந்த ஊர் ராஜஸ்தான் மாநிலம் ஜெய்ப்பூர் ஆகும். கடந்த 10 வருடங்களாக இவர் இங்கு நகைக்கடையையும், அடகு கடையையும் நடத்தி வருகிறார்.

கடந்த ஆண்டு அக்டோபர் மாதம் அவரது கடைக்கு 4 பேர் வந்தனர். அவர்கள் நவரத்தன் மாலிடம் தங்களது சொந்த ஊரும் ராஜஸ்தான் மாநிலம் ஜெய்ப்பூர்தான் என்று கூறினார்கள். உங்கள் உறவினர்களை எங்களுக்கு தெரியும் என்றுகூறி அவரது உறவினர்களின் பெயர்களையும் கூறினார்கள். இதனால் நவரத்தன் மால் அவர்களிடம் நன்றாக பேசினார்.

அந்த 4 பேரும் தாங்கள் ஜெய்ப்பூரில் மாடுகளை வளர்த்து பால்பண்ணை நடத்தி வருவதாக தெரிவித்தனர். சென்னையில் தொழில்தொடங்கப் போவதாகவும் அதற்காக நகையை விற்று பணம் பெற வந்திருப்பதாகவும் தெரிவித்தனர். அவரும் நகைகளுக்கு பணம் தர சம்மதித்தார்.

2½ கிலோ எடைகொண்ட 64 காசு மாலைகளை அவரிடம் கொடுத்து ரூ.40 லட்சம் பணம் கேட்டனர். அந்த காசுமாலைகளை வாங்கி லேசாக உரசிப் பார்த்த போது தங்கம் போலவே இருந்ததால் நவரத்தன்மால் அதற்கு ரூ.40 லட்சம் பணத்தை கொடுத்தார். 4 பேரும் பணத்தை வாங்கிக்கொண்டு அங்கிருந்து சென்றுவிட்டனர்.

நவம்பர் மாதம் புதிய நகைகள் தயாரிக்கலாம் என்று கருதிய நவரத்தன் மால் அந்த காசு மாலைகளை உருக்கினார். அப்போது அது போலி நகை என்று தெரியவந்தது.

இதனால் அதிர்ச்சி அடைந்த நவரத்தன் தான் ஏமாற்றப்பட்டதை உணர்ந்தார். இதுகுறித்து அவர் கடந்தமாதம் சென்னை போலீஸ் கமி‌ஷனர் அலுவலகத்தில் புகார் செய்தார். இது தொடர்பாக வழக்குப்பதிவு செய்து விசாரணை நடத்த பல்லாவரம் போலீசாருக்கு உத்தரவிடப்பட்டது.

இதைத்தொடர்ந்து பல்லாவரம் போலீசார் போலி நகை மோசடி குறித்து வழக்குப்பதிவு செய்து விசாரணை நடத்தி 4 பேரையும் தேடி வருகிறார்கள்.

கிருஷ்ணகிரி:

கிருஷ்ணகிரியில் வங்கி ஒன்று உள்ளது. இந்த வங்கியில் நகை மதிப்பீட்டாளராக ஒரு பெண் உள்ளார். இவர் நகையை தரம்பார்த்து விட்டு அனுமதி கொடுத்த பிறகு தான் நகை கடன் கொடுப்பார்கள்.

இந்த சந்தர்ப்பத்தை பயன்படுத்தி அந்த பெண் ஊழியர் சிலரது துணையுடன் கவரிங் நகைகளை தங்க நகை என்று கூறி அடகு வைத்து பணம் மோசடி செய்து உள்ளார். இதேபோல வாடிக்கையாளர்கள் வைத்த நகைகளையும் மாற்றி அதற்கு பதிலாக கவரிங் நகைகளை லாக்கரில் வைத்து உள்ளார்.

சமீபத்தில் வங்கி லாக்கரை மானேஜர் திறந்து பார்த்தபோது நகைகள் கருத்திருப்பதை பார்த்து சந்தேகம் அடைந்து இது குறித்து அந்த பெண் ஊழியரிடம் கேட்டார். அப்போது தான் கவரிங் நகைகளை தங்க நகை என்று கூறி அடகு வைத்து லட்சக்கணக்கில் மோசடி செய்தது தெரியவந்தது. இதற்கு அந்த பெண் ஊழியரின் கணவரும் உடந்தையாக இருந்ததும் தெரியவந்தது.

இது குறித்து போலீசில் எதுவும் புகார் செய்யவில்லை. தற்போது அந்த வங்கியில் நகை கடன் கொடுப்பது தற்காலிகமாக நிறுத்தி வைக்கப்பட்டு உள்ளது. ஏற்கனவே நகைக்கடன் வாங்கியவர்கள் தொடர்பான விவரங்கள் சரிபார்க்கப்பட்டு வருகின்றன.

இந்த ஆய்வு பணி முடிந்த பிறகு தான் எவ்வளவு மோசடி நடந்துள்ளது என்பது தெரியவரும். அதன் பிறகு போலீசில் புகார் கொடுத்து அந்த பெண் ஊழியர் மீது நடவடிக்கை எடுக்க மானேஜர் திட்டமிட்டுள்ளார்.