நீங்கள் தேடியது "slug 226642"

திருமங்கலம்

மதுரை மாவட்டம் திருமங்கலம் அருகே சவுடார்பட்டி மீனாட்சிபுரம் பகுதியைச் சேர்ந்தவர் அழகர்சாமி. இவரது மகன் அரவிந்த்குமார் (வயது30). இவர் அரசு மருத்துவமனையில் ஒப்பந்த கார் ஓட்டுனராக பணியாற்றி வருகிறார்.

இவரிடம் கடந்த 3 நாட்களுக்கு முன்பு சுங்க கட்டணம் கட்ட சுங்கச்சாவடி ஊழியர்கள் கேட்டுள்ளனர். ஆனால் திருமங்கலம் நகர் எல்லைக்குட்பட்ட பகுதியில் சுங்கச்சாவடி இருப்பதால் அதனை அகற்ற வலியுறுத்தி இப்பகுதி மக்கள் பல்வேறு போராட்டங்கள் நடத்தி வருகின்றனர்.

தொடர்ந்து போராட்டம் நடத்தி வருவதால் திருமங்கலம் தொகுதிக்கு உட்பட்ட வாகனங்கள் சுங்கச்சாவடியை கடக்கும் போது அடிக்கடி தகராறு ஏற்பது வழக்கம். மேலும் திருமங்கலம் நகர் பகுதியில் மட்டும் வாகனங்களுக்கு கட்டண விலக்கு உள்ளது. இருப்பினும் அடிக்கடி சுங்கச்சாவடி ஊழியர்கள் கட்டணம் கேட்டு தகராறில் ஈடுபட்டு வருகின்றனர்.

இந்த நிலையில் அரவிந்தன் கடந்த 3 நாட்களுக்கு முன்பு வந்தபோது சுங்கச்சாவடி ஊழியர்கள் கட்டணம் கேட்டதால், காரை அங்கேயே நிறுத்தி விட்டு சென்றுள்ளார். மேலும் நேற்று இரவு தனது காரை எடுக்க சென்றார். அப்போது சுங்கச்சாவடி ஊழியர்கள் திருமங்கலம் போலீசில் புகார் செய்துள்ளோம். அங்கு சென்று பெற்று கொள்ளுங்கள் என்று கூறி காரை எடுத்து செல்ல மறுப்பு தெரிவித்துள்ளனர்.

இதனால் ஆத்திரமடைந்த அரவிந்த்குமார் சுங்கசாவடி அலுவலகத்தை அடித்து நொறுக்கினார்.இதுகுறித்து திருமங்கலம் நகர் போலீசாருக்கு தகவல் கொடுக்கப்பட்டது. தகவலின் அடிப்படையில் திருமங்கலம் நகர் போலீசார் சம்பவ இடத்திற்கு வந்து விசாரணை மேற்கொண்ட னர். இச்சம்பவம் குறித்து கப்பலூர் சுங்கச்சாவடி மேலாளர் ராஜா கொடுத்த புகாரின் பேரில் அரவிந்த்குமார் மீது வழக்குப்பதிவு செய்து தப்பியோடிய அவரை தேடி வருகின்றனர்.

திருமங்கலம்

திருமங்கலம் ஊராட்சி ஒன்றிய அலுவலகத்தில் ஒன்றிய குழு கூட்டம் தலைவர் லதா ஜெகன் தலைமையில் நடந்தது. கூட்டத்தில் பங்கேற்ற கவுன்சிலர்கள் மக்கள் நலத்திட்டங்களுக்கு பொது நிதி ஒதுக்கீடு செய்யப்பட வில்லை என குற்றம் சாட்டினர்.

இதுகுறித்து முறையான தகவல் தெரிவிக்கப்படாததால் அதிகாரிகளுக்கிடையே வாக்குவாதம் ஏற்படுவ தாகவும் கவுன்சிலர்கள் கூறினர். கூட்டத்தில் பா.ஜனதா கவுன்சிலர் மத்திய அரசு ஜல்ஜீவன் திட்டம் திருமங்கலம் பகுதியில் முறையாக செயல்படுத்தப்படவில்லை என கூறினார்.

மேலும் இத்திட்டத்தை அதிகாரிகள் ஆய்வு செய்து அனைத்து கிராமங்களுக்கும் தண்ணீர் கொண்டு செல்ல ஏற்பாடு செய்யப்பட வேண்டும் என கோரிக்கை வைத்தார். அப்போது அதிகாரிகள் ஜல்ஜீவன் திட்டத்திற்கு போதுமான நிதி இருந்தால் மட்டுமே அனைத்து கிராமங்களுக்கும் தண்ணீர் வழங்க முடியும் என தெரிவித்தனர். தமிழக அரசு அறிவித்துள்ள அக விலைப்படி உயர்வுக்கு நன்றி தெரிவித்து கவுன்சிலர் முத்துப்பாண்டி பேசினார்.

திருமங்கலம் மற்றும் சுற்றுவட்டார பகுதி மக்களுக்கு இடையூறாக உள்ள கப்பலூர் சுங்கச்சாவடியை உடனடி யாக அகற்ற வேண்டும் என கவுன்சிலர்கள் செல்வம், மின்னல் கொடி ஆண்டிச்சாமி ஆகியோர் வலியுறுத்தினர்.

அ.தி.மு.க. ஒன்றிய தலைவர் லதா ஜெகன், துணை சேர்மன் வளர்மதி அன்பழகன் மற்றும் அனைத்து கவுன்சிலர் களும் இதற்கு ஆதரவு தெரிவித்தனர். இதனை தொடர்ந்து கப்பலூர் சுங்கச்சாவடியை உடனடி யாக அகற்ற தமிழக அரசு நடவடிக்கை எடுக்க வேண்டும் என கூறி தீர்மானம் ஒரு மனதாக நிறைவேற்றப்பட்டது.

இதில் வட்டார வளர்ச்சி அலுவலர் சங்கர் கைலாசம், கிராம ஊராட்சி சவுந்தரராஜன் மற்றும் அதிகாரிகள் கலந்து கொண்டனர்.

சென்னை:

மீஞ்சூர் முதல் வண்டலூர் வரை 6 கிலோ மீட்டர் தூரம் வெளிவட்ட சாலை ரூ.2,156 கோடி செலவில் கடந்த ஆண்டு முடிக்கப்பட்டு பொதுமக்கள் பயன்பாட்டுக்கு கொண்டு வரப்பட்டது.

இந்த சாலையில் 4 இடங்களில் கடந்த ஜனவரி முதல் சுங்கக் கட்டணம் வசூலிக்கப்பட்டு வருகிறது.

இந்த நிலையில் மீஞ்சூர்- வண்டலூர் வெளிவட்ட சாலை மற்றும் ஓ.எம்.ஆர். சாலையில் உள்ள சுங்கச் சாவடிகள் என மொத்தம் 5 இடங்களில் சுங்கக் கட்டணம் இன்று முதல் (1-ந்தேதி) உயர்த்தப்படும் என்று தமிழ்நாடு சாலை மேம்பாட்டு நிறுவனம் அறிவித்து இருந்தது.

அதன்படி சுங்கக் கட்டணம் உயர்வு இன்று முதல் அமலுக்கு வந்தது. மீஞ்சூர்- வண்டலூர் வெளி வட்ட சாலையில் உள்ள வரதராஜபுரம், கோலப் பன்சேரி, நெமிலிச்சேரி, சின்ன முல்லைவாயில் மற்றும் ஓ.எம்.ஆர். சாலையில் உள்ள நாவலூர் ஆகிய 5 சுங்கச் சாவடிகளில் கூடுதல் கட்டணம் வசூலிக்கப்பட்டது.

இதில் ஒருவழி பயணத்துக்கு ரூ.18 முதல் ரூ. 323 வரையும் மாதம் முழுவதும் பயணம் செய்ய ரூ.2,923 முதல் ரூ. 18 ஆயிரத்து 80 ஆகவும் கட்டணம் நிர்ணயம் செய்யப்பட்டுள்ளது.

வெளிவட்ட சாலையில் ஒருமுறை சென்று வர கார்களுக்கு ரூ.18 முதல் ரூ.50 வரையும் (பழைய கட்டணம் ரூ.17-ரூ.47), இலகு ரக வாகனங்களுக்கு ரூ.30 முதல் ரூ.81 வரையும் (பழைய கட்டணம் ரூ.28-ரூ.75) பஸ்களுக்கு ரூ.62 முதல் 169 வரையும் (பழைய கட்டணம் ரூ.58-ரூ.158) கனரக வாகனங்களுக்கு ரூ.119 முதல் ரூ.323 வரையும் (பழைய கட்டணம் ரூ.111-ரூ.301) கட்டணமாக உள்ளது.

கோலப்பன்சேரி சுங்கச் சாவடியில் சென்று வர ரூ.21 முதல் ரூ.115 வரையும் மாதம் முழுவதும் பயணம் செய்ய ரூ.1225 முதல் ரு.7913 ஆகவும் கட்டணம் உள்ளது.

சின்ன முல்லை வாயில் சுங்கச்சாவடியில் சென்றுவர ரூ.18 முதல் ரூ.119 வரையும் மாதம் முழுவதும் பயணிக்க ரூ.1080 முதல் ரூ.6976 ஆகவும் கட்டணம் நிர்ணயிக்கப்பட்டு உள்ளது. நெமிலிச்சேரி சுங்கச்சாவடியில் சென்று வர ரூ.27 முதல் 173 வரையும் மாதம் முழுவதும் பயணம் செய்ய ரூ.1577 முதல் ரூ.10 ஆயிரத்து 192 ஆகவும் கட்டணம் நிர்ணயித்து உள்ளனர்.

வெளிவட்ட சாலையில் உள்ள 4 சுங்கச் சாவடிகளிலும் இந்த ஆண்டு 2-வது முறையாக கட்டணம் மாற்றி அமைக்கப்பட்டு உள்ளது. இதற்கு வாகன ஓட்டிகள் எதிர்ப்பு தெரிவித்து உள்ளனர்.

ஏற்கனவே பெட்ரோல், டீசல் உயர்வால் பாதிக்கப்பட்டு உள்ள நிலையில் சுங்க கட்டணமும் உயர்த்தப்பட்டு உள்ளது என்று வேதனையுடன் தெரிவித்தனர்.

இது தொடர்பாக தமிழ்நாடு சாலை மேம்பாட்டு நிறுவன அதிகாரி ஒருவர் கூறும்போது, இந்த நிதி ஆண்டில் ஏப்ரல் 1-ந் தேதியே கட்டணம் திருத்தப்பட்டு இருக்க வேண்டும்.

மீஞ்சூர்-வண்டலூர் வெளிவட்ட சாலையில் உள்ள 4 சுங்கச்சா வடிகளிலும் கடந்த ஜனவரி 5-ந் தேதி தான் சுங்கக் கட்டணம் வசூல் தொடங்கியது. சட்டவிதிகளின் படி 6 மாதங்களுக்கு கட்டணத்தை மாற்றி அமைக்க முடியாது. எனவே தற்போது கட்டணம் மாற்றி அமைக்கப்பட்டு உள்ளது. அடுத்த ஆண்டு முதல் ஏப்ரல் 1-ந் தேதி திருத்தப்பட்ட கட்டணம் அறிவிக்கப்படும் என்றார்.

ஆவடியை சேர்ந்த டிரைவர் ஓருவர் கூறும்போது, 'பட்டாபிராமில் பாலம் கட்டும் பணியால் தண்டரை வழியாக மாற்றுப்பாதையில் செல்ல வேண்டிய நிலை உள்ளது. ஏற்கனவே மாற்றுப் பாதையில் செல்வதால் கூடுதலாக பெட்ரோல், டீசல் வீணாகிறது. இனி, சுங்கச்சாவடிக்கு அதிக செலவு செய்ய வேண்டும்' என்றார்.