கால்நடை மருத்துவ படிப்பு - விண்ணப்பிக்க அவகாசம் நீட்டிப்பு

சென்னை:

பி.வி.எஸ்ஸி மற்றும் ஏ.எச்., பி.டெக் ஆகிய கால்நடை மருத்துவ படிப்புக்கு ஆன்லைன் மூலம் விண்ணப்பிக்க வருகிற 18-ந் தேதி வரை கால அவகாசம் நீட்டிக்கப்பட்டுள்ளது.

விண்ணப்பத்தினை பதிவிறக்கம் செய்து தகுந்த சான்றிதழ் நகல்களுடன் தலைவர், சேர்க்கைக்குழு, (இளநிலை பட்டப்படிப்பு) தமிழ்நாடு கால்நடை மருத்துவ அறிவியல் பல்கலைக்கழகம், மாதவரம் பால் பண்ணை, சென்னை-51 என்ற முகவரிக்கு அன்று மாலை 5.45 மணிக்குள் கிடைக்குமாறு அனுப்ப வேண்டும்.

இளநிலை பட்டப்படிப்புகளுக்கு 10,373 விண்ணப்பங்கள் ஆன் லைன் வழியாக சமர்ப்பிக்கப்பட்டுள்ளன. பிடெக் (உணவு தொழில் நுட்பம்) பிடெக் (கோழியின் உற்பத்தி தொழில் நுட்பம்) மற்றும் பிடெக் (பால்வளத் தொழில் நுட்பம்) ஆகிய படிப்புகளுக்கு விண்ணப்பதாரர்கள் ஒரே விண்ணப்பத்தின் மூலம் விண்ணப்பிக்க வேண்டும். கலந்தாய்வின் போது அவர்களின் தரவரிசைப்படி தமக்கு விருப்பமான தொழில் நுட்ப பட்டப்படிப்புகளை தேர்வு செய்யலாம் என்று சேர்க்கை குழு தெரிவித்துள்ளது.