எண்ணூர் துறைமுகத்தில் மலேசியா மணல் முன்பதிவு இன்று மாலை தொடங்குகிறது

சென்னை:

தமிழ்நாட்டில் மணல் தட்டுப்பாடு அதிகமானதால் மணலுக்கு மாற்றாக எம்.சான்ட் (ஜல்லிக்கற்களின் துகள்) தயாரித்து விற்பனை செய்து வந்தனர். ஆனால் பொதுமக்கள் மத்தியில் எம்.சாண்ட் மணலுக்கு எதிர்பார்த்த வரவேற்பு கிடைக்கவில்லை. இதனால் மணல் தட்டுப்பாட்டை போக்க வெளிநாடுகளில் இருந்து மணலை இறக்குமதி செய்ய முடிவு எடுக்கப்பட்டது.

இந்த மணலை வாங்குவதற்கு ஆன்லைனில் முன்பதிவு செய்ய வேண்டும் என பொதுப்பணித்துறை அறிவித்துள்ளது. இதற்காக TNsand இணையதளத்திலும், செல்போன் செயலி மூலமாகவும் கட்டணம் செலுத்தி பதிவு செய்யலாம் என்று அறிவிக்கப்பட்டுள்ளது. முதலில் பதிவு செய்தவர்களுக்கு முன்னுரிமை வழங்கப்படும் என்றும் கூறப்பட்டுள்ளது.

ஒரு யூனிட் (100 கனஅடி) மணல் விலை ரூ.9,990 என நிர்ணயம் செய்யப்பட்டுள்ளது. இதுதவிர லாரி வாடகை கொடுக்கப்பட வேண்டும்.


இறக்குமதி மணல் விற்பனையில் எந்த முறைகேடும் நடக்க கூடாது என்பதில் அரசு கவனமாக இருப்பதாகவும், தவறும்பட்சத்தில் சம்பந்தப்பட்டவர்கள் மீது கடும் நடவடிக்கை எடுக்கப்படும் என்று அரசு அறிவித்துள்ளது.

இதுபற்றி மணல் லாரி உரிமையாளர்கள் சங்கத் தலைவர் யுவராஜ் கூறுகையில் “எண்ணூரில் மணல் விற்பனை நடைபெறுவது சென்னையில் உள்ளவர்களுக்கு மகிழ்ச்சியை தருகிறது. ஏனென்றால் சென்னை மற்றும் புறநகரில் மணல் தட்டுப்பாடு அதிகமாக உள்ளது. மலேசியா மணல் இறக்குமதியால் மணல் தேவை ஓரளவு பூர்த்தியாகும்.

விண்ணப்பிக்கும் ஒவ்வொருவருக்கும் எவ்வளவு யூனிட் மணல் கிடைக்கும் என்பதை பொறுத்திருந்து தான் பார்க்க வேண்டும்.

இவ்வாறு அவர் கூறினார். #SandImport #EnnorePort