ராகுலை பிரதமர் வேட்பாளராக அறிவித்ததில் எந்த தவறும் இல்லை- மு.க.ஸ்டாலின் பேச்சு

செஞ்சி:

விழுப்புரம் வடக்கு மாவட்ட தி.மு.க. செயலாளரும், செஞ்சி தொகுதி எம்.எல்.ஏ.வுமான செஞ்சி மஸ்தான் மகன் திருமண வரவேற்பு விழா இன்று காலை செஞ்சியில் உள்ள அல்ஹிலால் மெட்ரிக் மேல்நிலைப்பள்ளி மைதானத்தில் நடைபெற்றது.

இந்த விழாவில் தி.மு.க. தலைவர் மு.க.ஸ்டாலின் தலைமை தாங்கி மணமக்களை வாழ்த்தி பேசினார். அப்போது அவர் பேசியதாவது:-

செஞ்சி மஸ்தான் இல்ல திருமண வரவேற்பு விழாவில் கலந்து கொள்வதில் மட்டற்ற மகிழ்ச்சி அடைகிறேன். இது திருமண வரவேற்பு விழாவா? அல்லது மாநாடா? என்று தெரியவில்லை. அந்தளவுக்கு மக்கள் கூடியுள்ளீர்கள்.

கஜா புயலால் திருவாரூர், நாகப்பட்டினம், தஞ்சை உள்பட 8 மாவட்டங்கள் பெருமளவு பாதிக்கப்பட்டன. இதுவரை பிரதமர் மோடி கஜா புயலால் பாதிக்கப்பட்டவர்களை சந்திக்க வரவில்லை. இதுவே மகாராஷ்டிரம், குஜராத் மாநிலங்களில் நடந்திருந்தால் மோடி வருத்தம் தெரிவிக்கிறார், அனுதாபம் தெரிவிக்கிறார். ஏன் வெளிநாடுகளில் அசம்பாவிதம் நடந்தால் கூட அனுதாபம் தெரிவித்து செய்தி வெளியிடுகிறார். ஆனால், தமிழ்நாட்டில் விவசாயம் அழிந்து வருகிறது. கஜா புயல் 8 மாவட்டங்களை பெருமளவில் சூறையாடி உள்ளது. இதற்கு பிரதமர் வருத்தம் தெரிவிக்கவில்லை.

தமிழக அரசு 14 ஆயிரம் கோடி ரூபாய் மத்திய அரசிடம் நிதி கேட்டது. ஆனால், 300 கோடி ரூபாயை மட்டுமே மத்திய அரசு தந்துள்ளது. இதுவும் நிவாரண தொகையாக தரவில்லை. மத்திய அரசிடம் இருந்து மாநில அரசுக்கு வழக்கம்போல் கொடுக்கப்படும் நிதியாக கொடுக்கப்பட்டுள்ளது வருத்தம் அளிக்கிறது.

கலைஞர் சிலை திறப்பு விழாவின்போது மோடியை நான் ‘சேடிஸ்ட்’ என்று கூறியதாக பல்வேறு விமர்சனங்கள் வந்துள்ளது. நான் தனிப்பட்ட மோடியை விமர்சிக்கவில்லை. அவர் பிரதமராக இருக்கிறார் என்றதால் அவரை சேடிஸ்ட் என்று கூறினேன். இதில் என்ன தவறு? ஒருமுறை அல்ல, பலமுறை அவரை ‘சேடிஸ்ட்’... ‘சேடிஸ்ட்’... என்று கூறினாலும் அதுமிகையாகாது.

நாட்டில் மாற்றம் தேவை என கருதி ராகுலை பிரதமராக முன்மொழிந்தேன். அதில் என்ன தவறு? கலைஞர் இந்திராகாந்தியை அழைத்து நிலையான ஆட்சி தரவேண்டும் என்றார். அதன் பின்னர் சோனியாகாந்தியை அழைத்து நல்லாட்சி தரவேண்டும் என்றார். அதன் வரிசையிலேயே தற்போது நான் ராகுலை அழைத்து நல்லாட்சி தர வேண்டும் என்று முன்மொழிந்துள்ளேன். நான் ராகுலை முன்மொழிந்தது தவறு என்று யாரும் கூறவில்லை. மோடிக்கு எதிராக நல்லகூட்டணி அமைத்த பின்பு அறிவிக்கலாம் என்று இருந்தனர்.

இனி மத்தியிலும், மாநிலத்திலும் ஆள முடியாத இருகட்சிகளும் தி.மு.க.வை விமர்சிப்பது வியப்பாக உள்ளது. தூத்துக்குடியில் ஸ்டெர்லைட் ஆலைக்கு எதிராக நடைபெற்ற போராட்டத்தில் துப்பாக்கி சூடு நடத்தப்பட்டது. இதில் 13 பேர் பலியானார்கள். அதில் 12 பேரின் தலையிலும், மார்பிலும் குண்டு பாய்ந்துள்ளது. இதில் போலீசார் விதிமுறைகளை மீறி குறிபார்த்து துப்பாக்கி சூடு நடத்தியுள்ளனர்.

இதற்காக நான் அன்றே சொன்னேன். சி.பி.ஐ. விசாரணை வேண்டும் என்று. ஆனால், தற்போதுள்ள எடப்பாடி ஆட்சி உச்சநீதிமன்றம் வரை சென்று சி.பி.ஐ. விசாரணை வேண்டாம் என்று வலியுறுத்தியது. ஆனால், அதையும் மீறி சி.பி.ஐ. விசாரணை தற்போது நடந்து வருகிறது. எனவே, மத்தியிலும், தமிழகத்திலும் ஆட்சி மாற்றம் தேவை என்று தமிழக மக்கள் தயாராகி விட்டனர். தமிழகத்தில் பாரதிய ஜனதா தலைதூக்க முடியாது. அதுபோல இந்தியாவிலும் பாரதிய ஜனதாவை தூக்கி எறிவோம். தமிழக அரசு மத்திய அரசிடம் மண்டியிட்டு கிடக்கிறது.

இனிவரும் பாராளுமன்ற தேர்தலாக இருக்கட்டும், சட்டமன்ற தேர்தலாக இருக்கட்டும், உள்ளாட்சி தேர்தலாக இருக்கட்டும் அதில் தி.மு.க.வே வெற்றி பெற சபதம் ஏற்போம்.

இவ்வாறு அவர் பேசினார். #mkstalin #rahulgandhi #pmmodi