கரூரில் குளிர்ந்த காற்றுடன் சாரல் மழை

கரூர்

கரூர் மாவட்டத்தில் பல்வேறு பகுதிகளில் நேற்று மதியம், குளிர்ந்த காற்றுடன் லேசான மழை பெய்தது. தென்மேற்கு வங்கக்கடல் பகுதியில் நிலவும் காற்றழுத்த தாழ்வு மண்டலம், நேற்று, நாகப்பட்டினத்துக்கு கிழக்கே, 470 கி.மீ., தொலைவில் மையம் கொண்டிருந்தது. இதனால், குமரி கடலை ஒட்டியுள்ள தமிழக பகுதிகளுக்கு நேற்றும், இன்றும் மழை பெய்யும் என சென்னை வானிலை ஆய்வு மையம் அறிவித்து எச்சரிக்கை விடுத்திருந்தது. இந்நிலையில் நேற்று காலை முதல் கரூர் மற்றும் காற்றுடன் வட்டார பகுதிகளில் வானம் மேகமூட்டமாக இருந்தது. மதியம் 3:30 மணி முதல் கரூர் டவுன், வெள்ளியணை, வாங்கல், வேலாயுதம் பாளையம், பசுபதி பாளையம், திருமாநிலையூர், வெங்கமேடு, தான்தோன்றிமலை, திருமாநிலையூர், சுக்காலியூர், செல்லாண்டிப்பாளையம்,காந்தி கிராமம், சணப்பிரட்டி உள்ளிட்ட கரூர் சுற்று வட்டாரம், மற்றும் மாவட்டத்தின் இதர பகுதிகளில் குளிர்ந்த காற்றுடன் மழை விட்டு பெய்தது. கிருஷ்ணராயபுரத்தை அடுத்த லாலாப் பேட்டை வல்லம், மேட்டுப்பட்டி, வரகூர், வயலுார், மகாதானபுரம் இடங்களில் பரவலாக சாரல் மழை பெய்தது. இதனால் விவசாயிகள் மகிழ்ச்சியடைந்தனர்.