களக்காடு அருகே மோட்டார் சைக்கிளில் இருந்து தவறி விழுந்து முதியவர் பலி

நெல்லை:

களக்காடு அருகே உள்ள பூதத்தான் குடியிருப்பை சேர்ந்தவர் ராமசாமி(வயது 68). இவர் நேற்று புலவன் குடியிருப்பு தெற்கு தெருவை சேர்ந்த ஜான் டக்லஸ்(35) என்பவருடன் மோட்டார் சைக்கிளில் பின்னால் அமர்ந்து சென்றுள்ளார்.

அப்போது சாலையின் குறுக்காக ஓடிய நாய் எதிர்பாராதவிதமாக ராமசாமி சென்ற மோட்டார் சைக்கிளில் பாய்ந்தது. இதனால் மோட்டார் சைக்கிள் சாலையில் சறுக்கியதில் ராமசாமி தவறி கீழே விழுந்தார்.

இதில் படுகாயம் அடைந்த அவரை அரசு ஆஸ்பத்திரியில் சிகிச்சைக்காக சேர்த்தனர். அங்கு அவர் சிகிச்சை பலனளிக்காமல் பரிதாபமாக இறந்தார். இதுதொடர்பாக களக்காடு போலீசார் வழக்குப்பதிவு செய்து மோட்டார் சைக்கிளை ஓட்டி வந்த ஜான் டக்லசிடம் விசாரணை நடத்தி வருகின்றனர்.