டி20 போட்டியில் 10,000 ரன்கள்: புதிய சாதனை படைத்த மேக்ஸ்வெல்

பிரிஸ்பேன்:

பாகிஸ்தானுக்கு எதிரான 3 போட்டிகள் கொண்ட சர்வதேச டி20 போட்டி தொடரில் ஆஸ்திரேலிய அணி விளையாடி வருகிறது.

இதன்படி, இரு அணிகளுக்கு இடையிலான முதல் டி20 போட்டி ஆஸ்திரேலியாவின் பிரிஸ்பேன் நகரில் இன்று நடந்தது. இதில் ஆஸ்திரேலிய அணி வெற்றி பெற்று தொடரில் 1-0 என முன்னிலை பெற்றுள்ளது.

இந்நிலையில், இந்தப் போட்டியில் ஆஸ்திரேலிய அணியின் ஆல்-ரவுண்டரான கிளென் மேக்ஸ்வெல் 10,000 ரன்கள் எடுத்து புதிய சாதனை படைத்துள்ளார்.

இந்தச் சாதனையை படைத்த 3-வது ஆஸ்திரேலிய வீரர் மற்றும் ஒட்டுமொத்தத்தில் 16-வது வீரர் என்ற பெருமையை மேக்ஸ்வெல் பெற்றுள்ளார்.

பாகிஸ்தானுக்கு எதிரான முதல் போட்டியில் 5 பவுண்டரிகள் மற்றும் 3 சிக்சர்களுடன் 19 பந்துகளில் 43 ரன்கள் எடுத்து இந்த சாதனையை அவர் ஏற்படுத்தி இருக்கிறார்.

இதுவரை 448 போட்டிகளில் பங்கேற்று 421 இன்னிங்ஸ்களில் விளையாடியுள்ள மேக்ஸ்வெல் மொத்தம் 10,031 ரன்களை எடுத்து பேட்டிங் சராசரி 27.70 வைத்திருக்கிறார். இவற்றில் 7 சதங்களும், 54 அரை சதங்களும் அடங்கும். ஆட்டமிழக்காமல் 154 ரன்கள் என்பதே இவருடைய அதிகபட்ச ரன் குவிப்பு ஆகும்.

இந்தப் பட்டியலில் ஆஸ்திரேலியாவின் முன்னாள் தொடக்க ஆட்டக்காரர்களான டேவிட் வார்னர் (12,411 ரன்), ஆரோன் பின்ச் (11,458 ரன்கள்) ஆகியோர் முதல் 2 இடங்களில் உள்ளனர்.