செய்திகள் (Tamil News)
உலகக்கோப்பை கிரிக்கெட் - ஆஸ்திரேலியாவுக்கு 326 ரன்களை இலக்காக நிர்ணயித்தது தென்ஆப்பிரிக்கா
உலகக்கோப்பை கிரிக்கெட்டில் டு பிளசிஸ் அபார சதத்தால் ஆஸ்திரேலியாவுக்கு 326 ரன்களை இலக்காக நிர்ணயித்துள்ளது தென்ஆப்பிரிக்கா அணி.
மான்செஸ்டர்:
உலகக்கோப்பை கிரிக்கெட் போட்டியில் மான்செஸ்டரில் இன்று நடைபெறும் 45-வது லீக் ஆட்டத்தில் முன்னாள் சாம்பியன் ஆஸ்திரேலியா அணி, தென்ஆப்பிரிக்காவை எதிர்கொண்டது.
டாஸ் வென்ற தென்ஆப்பிரிக்கா அணி கேப்டன் டு பிளசிஸ் பேட்டிங் தேர்வு செய்துள்ளார். இதையடுத்து, அந்த அணியின் தொடக்க ஆட்டக்காரர்களாக
மார்கிராம், குயிண்டன் டி காக் களமிறங்கினர். மார்கிராம் 34 ரன்னில் அவுட்டானார். டி காக் அரை சதமடித்த் 52 ரன்னில் அவுட்டானார்.
அடுத்து இறங்கிய கேப்டன் டு பிளசிசும், வான் டெர் ஹுசைனும் பொறுப்புடன் ஆடினார். இருவரும் கிடைத்த இடைவெளியில் தங்கள் அதிரடியை காட்டினர்.
இருவரும் இணைந்து 151 ரன்கள் சேர்த்த நிலையில் டு பிளசிஸ் சதமடித்து 100 ரன்னில் ஆட்டமிழந்தார். சதமடிப்பார் என எதிர்பார்க்கப்பட்ட வான் டெர் ஹுசைன் 95 ரன்னில் அவுட்டானார்.
இறுதியில் தென் ஆப்பிரிக்கா அணி நிர்ணயிக்கப்பட்ட 50 ஓவரில் 6 விக்கெட் இழப்புக்கு 325 ரன்கள் குவித்துள்ளது. இதையடுத்து, 326 ரன்கள் எடுத்தால் வெற்றி என்ற இலக்குடன் ஆஸ்திரேலியா களமிறங்க உள்ளது.
ஆஸ்திரேலியா சார்பில் மிட்செல் ஸ்டார்க், நாதன் லியான் தலா 2 விக்கெட் வீழ்த்தினர்.