தலைப்புச்செய்திகள்

துணை முதலமைச்சர் உதயநிதி ஸ்டாலின் 47-வது பிறந்த நாள் வருகிற 27-ந்தேதி (புதன்) கொண்டாடப்படுகிறது.

பிறந்த நாள் விழாவை 'உதயநிதி உதயநாள் விழா' என்ற பெயரில் ஒரு மாத காலம் கொண்டாட சென்னை தெற்கு மாவட்ட செயலாளரும் மக்கள் நல்வாழ்வுத்துறை அமைச்சருமான மா.சுப்பிரமணியன் ஏற்பாடு செய்துள்ளார்.

இந்நிலையில், தன்னுடைய பிறந்தநாளை முன்னிட்டு ஃபிளெக்ஸ் பேனர் வைப்பதையும், பட்டாசுகள் வெடிப்பதையும் கழகத் தோழர்கள் தவிர்க்க வேண்டும்" என்று வேண்டுகோள் விடுத்துள்ளார்.

இதுகுறித்து உதயநிதி ஸ்டாலின் தனது எக்ஸ் தள பதிவில் கூறியிப்பதாவது:-

என் பிறந்தநாளை முன்னிட்டு, கழகத் தோழர்கள் தமிழ்நாடு முழுவதும் மக்களுக்கு பயனுள்ள வகையில் பல்வேறு நிகழ்ச்சிகளை நடத்தி வருகிறீர்கள். இந்தப் பேரன்பு தொடர்ந்து செயல்படுவதற்கான உற்சாகத்தை, ஊக்கத்தை எனக்குத் தருகிறது .

உங்கள் அனைவருக்கும் மனமார்ந்த நன்றியையும் அன்பையும் தெரிவிக்கும் இவ்வேளையில், என்னுடைய இந்தப் பிறந்தநாள் வேண்டுகோளையும் நினைவில்கொள்ளுமாறு, உங்கள் அனைவரையும் அன்புடன் கேட்டுக்கொள்கிறேன்.

இவ்வாறு அவர் குறிப்பிட்டுள்ளார்.

போட் நிறுவனம் முற்றிலும் புதிய ஏர்டோப்ஸ் லூப் ஓபன் வயர்லெஸ் இயர்பட்ஸ் மாடலை அறிமுகம் செய்தது. கடந்த ஆகஸ்ட் மாத வாக்கில் ஏர்டோப்ஸ் ப்ரோகியர் ஓபன் இயர் வயர்லெஸ் ஸ்டீரியோ இயர்பட்ஸ்-ஐ அறிமுகம் செய்த நிலையில், தற்போது புதிய ஓபன் வயர்லெஸ் மாடல் அறிமுகமாகி இருக்கிறது.

க்ளிப் ஆன் டிசைன் கொண்டிருக்கும் புதிய இயர்பட்ஸ் நீண்ட நேர பயன்பாடுகளின் போதும் அசௌகரியத்தை ஏற்படுத்தாத வகையில் உருவாக்கப்பட்டு உள்ளது. இதில் ஏர் கன்டக்ஷன் தொழில்நுட்பம் வழங்கப்பட்டு இருக்கிறது. இதை கொண்டு காதுகளை முழுமையாக அடைத்துக் கொள்ளாமல் அதிக துல்லியமான ஆடியோ அனுபவத்தை வழங்குகிறது.

இந்த இயர்பட்சில் 12mm டிரைவர்கள் உள்ளன. இத்துடன் போட் சிக்னேச்சர் சவுண்ட் மற்றும் ப்ளூடூத் 5.3 கனெக்டிவிட்டி வழங்கப்பட்டு இருக்கிறது. பயனர்கள் இதில் இரண்டு EQ மோட்களில் மாற்றிக் கொள்ளும் வசதியும் உள்ளது. கேமர்களுக்காக இந்த இயர்பட்சில் 40ms வரை லோ-லேடன்சி மோட் உள்ளது. இத்துடன் அழைப்புகளின் போது அதிக தரமுள்ள ஆடியோ கிடைப்பதை ENx உறுதிப்படுத்துகிறது.

புதிய ஏர்டோப்ஸ் லூப் மாடல் 50 மணி நேரத்திற்கு பிளேபேக் வழங்குகிறது. இதில் உள்ள ASAP சார்ஜ், இயர்பட்சை பத்து நிமிடங்கள் சார்ஜ் செய்து 200 நிமிடங்கள் வரை பயன்படுத்த வழி செய்கிறது. இத்துடன் IWP தொழில்நுட்பம், வாய்ஸ் அசிஸ்டண்ட் வசதி, IPX4 தர வாட்டர் ரெசிஸ்டண்ட் வசதி வழங்கப்பட்டு இருக்கிறது.

போட் ஏர்டோப்ஸ் லூப் மாடல்: பியல் வைட், கூல் கிரே மற்றும் லாவெண்டர் மிஸ்ட் என மூன்று நிறங்களில் கிடைக்கிறது. இதன் விலை ரூ. 1,999 என நிர்ணயம் செய்யப்பட்டுள்ளது. இந்த இயர்பட்ஸ் விற்பனை போட், அமேசான் மற்றும் ப்ளிப்கார்ட் வலைதளங்களில் நடைபெறுகிறது.

சர்வதேச அளவில் பெண்களுக்கு எதிரான வன்முறை ஒழிப்பு தினம் ஒவ்வொரு ஆண்டும் நவம்பர் 25ம் தேதி அன்று கடைபிடிக்கப்படுகிறது.

இந்நிலையில், திமுக ஆட்சியில், பெண்கள் சாலையில் நடமாடவே அச்சப்படும் அளவிற்கு பாதுகாப்பில்லாத அவல நிலை இருப்பதாக அதிமுக பொதுச் செயலாளர் எடப்பாடி பழனிசாமி குற்றம்மசாட்டி உள்ளார்.

இதுகுறித்து எடப்பாடி பழனிசாமி வெளியிட்டுள்ள எக்ஸ் தள பதிவில் கூறியிருப்பதாவது:-

சர்வதேச பெண்களுக்கு எதிரான வன்முறை ஒழிப்பு தினமான இன்று, பெண்கள் அச்சமின்றி வாழ்வதற்கான பாதுகாப்பான சூழலை அமைத்திட உறுதியேற்போம்.

திமுக ஆட்சியில், பெண்கள் சாலையில் நடமாடவே அச்சப்படும் அளவிற்கு பாதுகாப்பில்லாத அவல நிலை இருப்பதை நான் அடிக்கடி சுட்டிக்காட்டி வந்துள்ளேன். அதற்கான விடியல் இன்றுவரை கிடைத்த பாடில்லை.

பெண்கள் முன்னேற்றம்தான் சமுதாய முன்னேற்றம் என்பதை உணர்ந்து, பெண்களுக்கு எதிரான வன்முறைகளைத் தடுக்க தீர்க்கமான நடவடிக்கைகளை மேற்கொள்ள முதலமைச்சர் மு.க.ஸ்டாலினின் திமுக அரசை இத்தருணத்தில் வலியுறுத்துகிறேன்.

இவ்வாறு அவர் குறிப்பிட்டுள்ளார்.

இயக்குநர் ஏ. காளீஸ்வரன் இயக்கத்தில் உருவாகியுள்ள திரைப்படம் 'பேபி ஜான்'. தமிழில் வெளியான 'தெறி' திரைப்படத்தின் ரீமேக்கான இப்படத்தில் நடிகர் வருண் தவான் கதையின் நாயகனாக நடித்துள்ளார். இவருடன் கீர்த்தி சுரேஷ், வாமிகா கபி, ஜாக்கி ஷெராப், ராஜ்பால் யாதவ், மணிகண்டன், பி. எஸ். அவினாஷ் உள்ளிட்ட பலர் நடித்துள்ளனர்.

கிரண் கவுஷிக் ஒளிப்பதிவு செய்த இந்த திரைப்படத்திற்கு எஸ். தமன் இசையமைத்துள்ளார். ஆக்ஷன் எண்டர்டெய்னராக தயாராகியுள்ள இந்தத் திரைப்படத்தை ஜியோ ஸ்டுடியோஸ், சினி ஒன் ஸ்டுடியோஸ் மற்றும் இயக்குநர் அட்லியின் தயாரிப்பு நிறுவனமான ஏ ஃபார் ஆப்பிள் ஆகிய நிறுவனங்கள் சார்பில் தயாரிப்பாளர்கள் முராத் கெடானி, ஜோதி தேஷ்பாண்டே மற்றும் பிரியா அட்லீ ஆகியோர் இணைந்து தயாரித்துள்ளனர்.

இந்தப் படம் இந்தாண்டு கிறிஸ்துமஸ் பண்டிகையை ஒட்டி டிசம்பர் 25 ஆம் தேதி வெளியாகவுள்ளது. இந்தப் படத்தின் டீசர் ஏற்கனவே வெளியாகி பெரும் வரவேற்பை பெற்றது. இந்த நிலையில், பேபி ஜான் படத்தின் 'நைன் மடாக்கா' பாடல் தற்பொழுது வெளியாகியுள்ளது. பாடல் மிகவும் வைபாக உள்ளது. இப்பாடலை தமன் இசையில் தீ மற்றும் திலிஜித் தோசாஞ் பாடியுள்ளனர்.

பாடலின் காட்சிகள் மற்றும் கீர்த்தி சுரேஷின் நடனம் மிகவும் கவர்ச்சிகரமாக இருப்பதால் இணையத்தில் வைரலாகி வருகிறது.

உங்கள் அருகாமையில் உள்ள திரையரங்குகளில் ரிலீசான படங்களைப் பற்றிய தகவல்களை உடனுக்குடன் தெரிந்துக் கொள்ள இந்த லிங்க்-ஐ க்ளிக் செய்யவும்.

சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறியிருப்பதாவது:

நேற்று காலை தென்கிழக்கு வங்கக்கடல் மற்றும் அதனை ஒட்டிய பூமத்திய ரேகையை ஒட்டிய கிழக்கு இந்திய பெருங்கடல் பகுதியில் நிலவிய ஆழ்ந்த காற்றழுத்த தாழ்வு பகுதி, மேற்கு-வடமேற்கு திசையில் நகர்ந்து, இன்று காலை 8.30 மணி அளவில், காற்றழுத்த தாழ்வு மண்டலமாக வலுப்பெற்று, தெற்கு வங்கக்கடலின் மத்திய பகுதிகள் மற்றும் அதனை ஒட்டிய பூமத்திய ரேகையை ஒட்டிய கிழக்கு இந்திய பெருங்கடல் பகுதியில் இலங்கை திரிகோணமலையிலிருந்து தென்கிழக்கே சுமார் 600 கிலோ மீட்டர் தொலைவிலும், நாகபட்டினத்திலிருந்து தென்கிழக்கே 880 கிலோ மீட்டர் தொலைவிலும், புதுவையிலிருந்து தென்கிழக்கே 980 கிலோ மீட்டர் தொலைவிலும், சென்னையிலிருந்து தெற்கு-தென்கிழக்கே 1050 கிலோ மீட்டர் தொலைவிலும் நிலைகொண்டுள்ளது. இது வடமேற்கு திசையில் நகர்ந்து, அடுத்த 24 மணி நேரத்தில் ஆழ்ந்த காற்றழுத்த தாழ்வு மண்டலமாக வலுபெறக்கூடும். அதன் பிறகு, அதற்கடுத்த இரு தினங்களில் வடமேற்கு திசையில் தமிழகம்- இலங்கை கடற்கரையை நோக்கி நகரக்கூடும்.

கடலோர தமிழகத்தில் இன்று ஒருசில இடங்களிலும், உள் தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். நாகப்பட்டினம், திருவாரூர், தஞ்சாவூர், புதுக்கோட்டை மற்றும் ராமநாதபுரம் மாவட்டங்களில் ஓரிரு இடங்களில் கன முதல் மிக கனமழையும், மயிலாடுதுறை, சிவகங்கை, கடலூர் மற்றும் அரியலூர் மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழை பெய்யவாய்ப்புள்ளது.

தமிழகத்தில் நாளை அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். மயிலாடுதுறை, நாகப்பட்டினம், திருவாரூர் மாவட்டங்கள் மற்றும் காரைக்கால் பகுதிகளில் ஓரிரு இடங்களில் அதி கனமழையும், ஒருசில இடங்களில் கன முதல் மிக கனமழையும், விழுப்புரம், கடலூர், அரியலூர், தஞ்சாவூர், புதுக்கோட்டை, சிவகங்கை மாவட்டங்கள் மற்றும் புதுவையில் ஓரிரு இடங்களில் கன முதல் மிக கனமழையும், ராமநாதபுரம், திருச்சிராப்பள்ளி, பெரம்பலூர், கள்ளக்குறிச்சி மற்றும் செங்கல்பட்டு மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது.

தமிழகத்தில் நாளை மறுதினம் அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். கடலூர், மயிலாடுதுறை மாவட்டங்கள் மற்றும் காரைக்கால் பகுதிகளில் ஓரிரு இடங்களில் அதி கனமழையும், ஒருசில இடங்களில் கன முதல் மிக கனமழையும், அரியலூர், திருவாரூர், நாகப்பட்டினம், தஞ்சாவூர், புதுக்கோட்டை, விழுப்புரம் மாவட்டங்கள் மற்றும் புதுவையில் ஓரிரு இடங்களில் கன முதல் மிக கனமழையும், ராமநாதபுரம், சிவகங்கை, திருச்சிராப்பள்ளி, பெரம்பலூர், கள்ளக்குறிச்சி, செங்கல்பட்டு, சென்னை மற்றும் காஞ்சிபுரம் மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது.

வரும் 28-ந்தேதி தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். செங்கல்பட்டு, காஞ்சிபுரம் மற்றும் விழுப்புரம் மாவட்டங்களில் ஓரிரு இடங்களில் கன முதல் மிக கனமழையும், சென்னை, திருவள்ளூர், ராணிப்பேட்டை, திருவண்ணாமலை, கள்ளக்குறிச்சி, கடலூர் மாவட்டங்கள் மற்றும் புதுவையில் ஓரிரு இடங்களில் கனமழையும் பெய்ய வாய்ப்புள்ளது.

வரும் 29-ந்தேதி தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். சென்னை, திருவள்ளூர், காஞ்சிபுரம், செங்கல்பட்டு மற்றும் ராணிப்பேட்டை மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

நாளை முதல் வரும் 30-ந்தேதி வரை தெற்கு கேரளா கடலோரப்பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். இதனால் ஆழ்கடலில் உள்ள மீனவர்கள் இன்றே கரைக்கு திரும்புமாறு அறிவுறுத்தப்படுகிறார்கள்.

இவ்வாறு அதில் கூறப்பட்டுள்ளது.

வங்கக்கடலில் நிலவி வந்த ஆழ்ந்த காற்றழுத்த தாழ்வு பகுதி காற்றழுத்த தாழ்வு மண்டலமாக வலுப்பெற்றது. தொடர்ந்து வடமேற்கு திசையில் நகர்ந்து ஆழ்ந்த காற்றழுத்த தாழ்வு மண்டலமாக வலுப்பெற வாய்ப்பு உள்ளதாக சென்னை வானிலை ஆய்வு மையம் தெரிவித்து இருந்தது.

சென்னையில் இருந்து சுமார் 1050 கி.மீ. தொலைவில் காற்றழுத்த தாழ்வு மண்டலம் நிலை கொண்டுள்ளது. நாகையில் இருந்து சுமார் 880 கி.மீ. தொலைவில் தாழ்வு மண்டலம் நிலை கொண்டுள்ளது. இலங்கையில் இருந்து 600 கி.மீ. தொலைவில் தாழ்வு மண்டலம் நிலை கொண்டுள்ளது. காற்றழுத்த தாழ்வு மண்டலம் இலங்கை - தமிழகம் நோக்கி நகர வாய்ப்பு உள்ளதாக என்று வானிலை ஆய்வு மையம் தெரிவித்துள்ளது.

இந்நிலையில் தமிழ்நாடு, புதுச்சேரியில் உள்ள 9 துறைமுகங்களில் 1-ம் எண் புயல் எச்சரிக்கை கூண்டு ஏற்றப்பட்டுள்ளது.

தென்கிழக்கு வங்கக்கடலில் காற்றழுத்த தாழ்வு மண்டலம் வலுப்பெற்றுள்ள நிலையில் 1-ம் எண் புயல் எச்சரிக்கை கூண்டு ஏற்றப்பட்டுள்ளது.

சென்னை, கடலூர், நாகை, எண்ணூர், காட்டுப்பள்ளி, பாம்பன், தூத்துக்குடி, புதுச்சேரி, காரைக்கால் துறைமுகங்களில் கூண்டு ஏற்றப்பட்டுள்ளது.

பெர்த்:

இந்தியா- ஆஸ்திரேலியா அணிகள் மோதும் முதல் டெஸ்ட் போட்டி பெர்த் மைதானத்தில் நடைபெற்று வருகிறது.

இந்தியா முதல் இன்னிங் சில் 150 ரன்னில் ஆல் அவுட் ஆனது. ஆஸ்திரேலியா முதல் இன்னிங்சில் 104 ரன்னில் சுருண்டது.

46 ரன்கள் முன்னிலையில் 2- வது இன்னிங்சை ஆடிய இந்தியா 6 விக்கெட் இழப்புக்கு 487 ரன் குவித்து டிக்ளேர் செய்தது. இதனால் ஆஸ்திரேலியாவுக்கு 534 ரன் இலக்காக நிர்ணயிக்கப்பட்டது. ஜெய்ஷ்வால் (161 ரன்), விராட் கோலி (100 ரன்) ஆகியோர் சதம் அடித்தனர். கே.எல்.ராகுல் 77 ரன் எடுத்தார்.

534 ரன் எடுத்தால் வெற்றி என்ற கடினமான இலக்குடன் ஆடிய ஆஸ்திரேலியா நேற்றைய 3-வது நாள் ஆட்ட நேர முடிவில் 3 விக்கெட் இழப்புக்கு 12 ரன் எடுத்து இருந்தது.

இன்று 4-வது நாள் ஆட்டம் தொடங்கியது. வெற்றிக்கு மேலும் 522 ரன் தேவை.கைவசம் 7 விக்கெட் என்ற நிலையில் ஆஸ்திரேலியா தொடர்ந்து பேட்டிங் செய்தது. இறுதியில் ஆஸ்திரேலியா 238 ரன்னில் ஆல் அவுட் ஆனது. இதனால் இந்திய அணி 295 ரன்கள் வித்தியாசத்தில் வெற்றி பெற்றது.

இதன்மூலம் 5 போட்டிகள் கொண்ட டெஸ்ட் தொடரில் இந்திய அணி 1-0 என்ற கணக்கில் முன்னிலையில் உள்ளது.

இந்த போட்டியில் வெற்றி பெற்றதன் மூலம் உலக சாம்பியன்ஷிப் புள்ளி பட்டியலில் மீண்டும் முதல் இடத்திற்கு இந்திய அணி முன்னேறியுள்ளது.

இந்தியா 110 புள்ளிகளுடன் முதல் இடத்திலும் ஆஸ்திரேலியா 90 புள்ளிகளுடன் 2-வது இடத்திலும் உள்ளது.

பைக்கில் மற்றொரு வாகனத்தை சேஸ் செய்து அதில் தாவி ஏறுவது எல்லாம் ஆக்ஷன் சினிமாவில் கிளீசேவாக இடம்பெறும் காட்சிதான்.

ஆனால் இதுவே நிஜத்தில் உத்தர பிரதேச சாலையில் நடந்துள்ளது. உத்தரப் பிரதேச மாநிலம் மீரட் நகர சாலையில், குதிரையில் கோட்டு சூட்டுடன் மணமகன் அமர்ந்திருக்க திருமண ஊர்வலம் ஒன்று சென்றுகொண்டிருந்தது.

அப்போது அவ்வழியாக குட்டி யானையை [மினி டிரக்கை] ஓட்டி வந்தவர் ஊர்வலம் அருகே சென்றபோது குதிரையில் அமர்ந்திருந்த மணமகனின் கழுத்தில் இருந்த பண மாலையை கிழித்துக்கொண்டு சென்றுள்ளார்.

இதை சற்றும் எதிர்பார்க்காத மணமகன் உடனே குதிரையில் இருந்து இறங்கி வழிப்போக்கர் ஒருவரின் இரு சக்கர வாகனத்தை வாங்கிக்கொண்டு அந்த குட்டி யானையை துரத்தியுள்ளார்.

ஒரு கட்டத்தில் பைக்கில் இருந்து குட்டி யானை மீது குதித்து பக்கவாட்டு கதவு வழியாக அதிரடியாக உள்ளே நுழைந்து அதை நிறுத்தச் செய்துள்ளார்.

பின்னர் பண மாலையை பறித்த அந்த டிரைவரை கீழ் இறங்கிச் செய்து சரமாரியாக தாக்கியுள்ளார். இதற்குள் மாப்பிள்ளையின் நண்பர்களும் அங்கு வந்து சேரவே டிரைவருக்கு கடுமையான கவனிப்பு கிடைத்துள்ளது.

நான் வேண்டும் என்றே செய்யவில்லை என்று அந்த ஓட்டுநர் மாப்பிள்ளையிடம் கெஞ்சுகிறார். இந்த ஆக்ஷன் சேசிங் காட்சி குறித்த வீடியோ இணையத்தில் வைரலாகி வருகிறது. இதற்கிடையே இதுதொடர்பாக வழக்குப் பதவு செய்து போலீசார் விசாரணை நடத்தி வருகின்றனர்.

சென்னை:

முதலமைச்சர் மு.க. ஸ்டாலின் இன்று சோழிங்க நல்லூர், கண்ணகி நகர், எழில் நகரில் பல்வேறு நிகழ்ச்சிகளில் கலந்து கொள்வதற்காக சென்றார்.

கண்ணகி நகரில் அவர் சென்ற வழி நெடுக ஏராளமான ஆண்களும், பெண்களும் திரண்டு நின்றனர். அவர்களை பார்த்ததும் முதலமைச்சர் காரை விட்டு இறங்கி நடந்து சென்று அவர்களிடம் நலம் விசாரித்தும், கை குலுக்கியும் மகிழ்ச்சியை பகிர்ந்து கொண்டார்.

அப்போது சிலர் புத்தகங்களை அவருக்கு பரிசளித்தனர். பலர் கோரிக்கை மனுக்களையும் அளித்தனர். அவற்றை பொறுமையுடன் பெற்றுக் கொண்டார். நடக்க முடியாமல் அமர்ந்து இருந்த மாற்று திறனாளிகள் மற்றும் முதியவர்கள் அருகில் சென்று விசாரித்தார். அவர்கள் கொடுத்த மனுக்களையும் பெற்றுக் கொண்டார்.

அதை தொடர்ந்து கண்ணகி நகரில் மாற்றுத் திறனாளிகளுக்கு உடல், மனம் சம்பந்தப்பட்ட மறு வாழ்வு சேவைகள் வழங்குவதற்காக ரூ.3.08 கோடி மதிப்பில் கட்டப்பட்டுள்ள விழுதுகள் ஒருங்கிணைந்த சேவை மையத்தை திறந்து வைத்தார்.

மாற்று திறனாளிகள் உரிமைகள் திட்டத்தின் கீழ் தமிழ்நாடு முழுவதும் அமையப் பெறவுள்ள 273 ஒருங்கிணைந்த சேவை மையங்களில் முதலாவது மையமாக சென்னை, சோழிங்கநல்லூர், கண்ணகி நகரில் விழுதுகள் ஒருங்கிணைந்த சேவை மையம் திறக்கப்பட்டுள்ளது.

சென்னை மாவட்டத்தில் சமூக ரீதியாகவும், பொருளாதார ரீதியாகவும் முன்னேற விழையும் பகுதிகளில் ஒன்றான கண்ணகி நகரில் இச்சேவைகளை முதலில் வழங்க அரசு மிக கவனமாக இந்த பகுதியை தேர்ந்தெடுத்துள்ளது.

இந்த ஒருங்கிணைந்த சேவை மையத்தில் முதன் முறையாக மாற்றுத்திறனாளிகளின் உடல் மற்றும் மனம் தொடர்பான நாள்பட்ட மறுவாழ்வு தேவைகளை நிறைவேற்றும் வகையில், மாற்றுத்திறனாளிகளுக்கான சிறப்புக்கல்வி, கண்பார்வை அளவியல், கேட்டல் மற்றும் பேச்சுப்பயிற்சி, இயன் முறை, செயல்முறை மற்றும் உளவியல் ஆகிய ஆறு மறுவாழ்வு சேவைகள் ஒரே இடத்தில் வழங்கப்படுவதோடு, இச்சேவைகளை வழங்க வல்லுநர்களும் நியமிக்கப்பட்டுள்ளனர்.

இம்மையமானது பெருநகர சென்னை மாநகராட்சியின் பெருங்குடி மற்றும் சோழிங்கநல்லூர் மண்டலங்களில் உள்ள மாற்றுத்திறனாளிகள் பயன்பெறும் வகையில் அனைத்து அணுகல் வசதிகளுடன் அமைக்கப்பட்டு உள்ளது.

இதேபோல் எழில் நகரில் நமக்கு நாமே திட்டத்தின் கீழ் 5 வகுப்பறைகளுடன் சீரமைக்கப்பட்டுள்ள பள்ளி கட்டிடத்தில் செயல்பட்டு வரும் மாண்டிசோரி மழலையர் வகுப்புகளையும் பார்வையிட்டார்.அப்போது சின்ன குழந்தைகளுடன் கொஞ்சி மகிழ்ந்தார்.

அதை தொடர்ந்து அவுசிங் போர்டு பகுதியில் அமைந்துள்ள மாநகராட்சி நடுநிலைப்பள்ளிக்கு சென்று பார்வையிட்டார். அங்குள்ள ஆசிரியர்களிடம் கலந்துரையாடிய மு.க. ஸ்டாலின் பள்ளி குழந்தைகளுக்கு நோட்டுகள், பென்சில், கிரேயான்ஸ், ஸ்கேல் அடங்கிய பரிசு பை ஒன்றை பரிசாக வழங்கினார்.

இந்த நிகழ்ச்சியில் அமைச்சர் மா.சுப்பிரமணியன், மேயர் பிரியா, எம்.எல்.ஏ.க்கள் அரவிந்த் ரமேஷ், ஏ.எம்.வி. பிரபாகர ராஜா, க.கணபதி உள்பட பலர் கலந்து கொண்டனர்.

பின்னர் எழில் நகரில் முதலமைச்சர் மு.க. ஸ்டாலினை நிருபர்கள் சந்தித்தனர். அப்போது கனமழை எச்சரிக்கை பற்றியும் அது தொடர்பான நடவடிக்கைகள் பற்றியும் கேள்வி எழுப்பினார்கள்.

அதற்கு பதிலளித்த முதலமைச்சர் மு.க. ஸ்டாலின், ஏற்கனவே அனைத்து மாவட்ட கலெக் டர்கள் கூட்டம் நடத்தி பருவமழை தொடர்பாக எடுக்க வேண்டிய நடவடிக்கைகள் பற்றி பல்வேறு அறிவுரைகள் வழங்கப்பட்டு உள்ளது. அதன்படி மாவட்ட கலெக்டர்கள் அனைத்து நடவடிக்கைகளையும் மேற்கொள்வார்கள்.

பெருமழையை எதிர்பார்க்கிறோமோ இல்லையோ எதையும் எதிர்கொள்ள அரசு தயாராக உள்ளது என்றார்.

அதைதொடர்ந்து தமிழகத்துக்கு தேவையான நிதிகள் பெறுவது தொடர்பாக பாராளுமன்றத்தில் எம்.பி.க்கள் என்னென்ன பேசப் போகிறார்கள் என்று கேள்வி எழுப்பினார்கள்.

அதற்கு எம்.பி.க்கள் கூட்டம் நடத்தி, என்னென்ன தேவைகள் என்னென்ன செய்வார்கள் பற்றி பேச வேண்டும் என்று குறிப்புகள் கொடுக்கப்பட்டுள்ளது. தேவையான அனைத்து விசயங்களிலும் கவனம் செலுத்தி பேசுவார்கள் என்றார்.

இந்தியா- ஆஸ்திரேலியா இடையிலான முதல் டெஸ்ட் பெர்த் நகரில் நடைபெற்று வருகிறது. டாஸ் வென்று முதலில் பேட்டிங் செய்த இந்தியா முதல் இன்னிங்சில் 150 ரன்னில் சுருண்டது. பின்னர் ஆஸ்திரேலியா முதல் இன்னிங்சை தொடங்கியது. பும்ராவின் அபார பந்து வீச்சால் ஆஸ்திரேலியா 104 ரன்னில் சுருண்டது.

46 ரன்கள் முன்னிலையுடன் 2-வது இன்னிங்சை தொடங்கிய இந்தியா ஜெய்ஸ்வால் மற்றும் விராட் கோலி ஆகியோரின் சதங்களால் 6 விக்கெட் இழப்பிற்கு 487 ரன்கள் குவித்து டிக்ளேர் செய்தது. இதனால் ஆஸ்திரேலியா அணி வெற்றிக்கு 534 என்ற இமாலய இலக்கை நிர்ணயித்தது இந்தியா.

534 ரன்கள் அடித்தால் வெற்றி என்ற இலக்குடன் ஆஸ்திரேலியா நேற்றைய 3-வது நாள் ஆட்டத்தின்போது களம் இறங்கியது. பும்ரா 2 விக்கெட்டுகள் வீழ்த்த ஆஸ்திரேலியா நேற்றைய ஆட்ட நேர முடிவில் 12 ரன்கள் எடுப்பதற்குள் 3 விக்கெட்டுகளை இழந்தது.

இன்று 4-வது நாள் ஆட்டம் தொடங்கியது. உஸ்மான் கவாஜ் உடன் ஸ்மித் ஆட்டத்தை தொடங்கினார். கவாஜா 4 ரன்னிலும், ஸ்மித் 17 ரன்னிலும் ஆட்டமிழந்தனர். ஸ்மித் ஆட்டமிழக்கும்போது ஆஸ்திரேலியா 79 ரன்களுக்கு 5 விக்கெட் இழந்திருந்தது.

அதன்பின் டிராவிஸ் ஹெட் உடன் மிட்செல் மார்ஷ் உடன் ஜோடி சேர்ந்தார். இந்த ஜோடி ஓரளவிற்கு நிலைத்து நின்று விளையாடியது. குறிப்பாக டிராவிஸ் ஹெட் சிறப்பாக விளையாடினார். அவரை பும்ரா 89 ரன்னில் வீழ்த்தினார்.

அப்போது ஆஸ்திரேலியா 6 விக்கெட் இழப்பிற்கு 161 ரன்கள் எடுத்திருந்தது. மறுமுனையில் மிட்செல் மார்ஷை 47 ரன்னில் நிதிஷ் ரெட்டி வீழ்த்தினார்.

தேனீர் இடைவேளைக்கு முன் வாஷிங்டன் சுந்தர் ஸ்டார்க்கை 12 ரன்னில் வெளியேற்றினார். அதனைத் தொடர்ந்து தேனீர் இடைவேளை வரை ஆஸ்திரேலியா 227 ரன்களுக்குள் 8 விக்கெட்டுகளை இழந்தது. தேனீர் இடைவேளை முடிந்து ஆட்டம் தொடங்கியதும் வாஷிங்டன் சுந்தர் பந்தில் நாதன் லயன் ஆட்டமிழந்தார். அப்போது ஆஸ்திரேலியா 227 ரன்களுக்குள் 9 விக்கெட்டுகளை இழந்தது.

கடைசி விக்கெட்டுக்கு அலேக்ஸ் கேரியுடன் ஹேசில்வுட் ஜோடி சேர்ந்தார். 36 ரன்கள் எடுத்த நிலையில் ஹர்ஷித் ராணா பந்தில் க்ளீன் போல்டாக ஆஸ்திரேலியா 238 ரன்னில் ஆல்அவுட் ஆனது. இதனால் இந்தியா 295 ரன்கள் வித்தியாசத்தில் அபார வெற்றி பெற்றது.

இந்திய அணி பெர்த் மைதானத்தில் இதுவரை வெற்றி பெற்றது கிடையாது. இந்த வெற்றியின் மூலம் பெர்த்தில் ஆஸ்திரேலியாவை வீழ்த்தி வரலாற்று வெற்றியை பதிவு செய்துள்ளது.

இந்த வெற்றியின் மூலம் இந்தியா ஐந்து போட்டிகள் கொண்ட டெஸ்ட் தொடரில் 1-0 என முன்னிலைப் பெற்றுள்ளது.

மகா. தேர்தல் 

288 சட்டமன்றங்கள் கொண்ட மகாராஷ்டிராவுக்குக் கடந்த 20 ஆம் தேதி வாக்குப்பதிவு நடைபெற்றது. தேர்தல் ஆணையத்தின் கூற்றுப்படி இந்த தேர்தலில் 65% வாக்குகள் பதிவாகியுள்ளன. பதிவான வாக்குகள் கடந்த சனிக்கிழமை எண்ணப்பட்டு முடிவுகள் அறிவிக்கப்பட்டன.

பெரும்பான்மைக்கு 145 இடங்கள் தேவைப்படும் சூழலில் ஆளும் மாகயுதி [பாஜக 132- ஷிண்டே சேனா 57 - அஜித் பவார் என்சிபி 41, இதர கூட்டணி கட்சிகள் 5 ] 235 தொகுதிகளைக் கைப்பற்றி ஆட்சியை தக்க வைத்தது. எதிரணியான மகா விகாஸ் அகாதி [ காங்கிரஸ் 16, சரத் பவார் என்சிபி 10, உத்தவ் சிவ சேனா 20] என மொத்தம் 46 இடங்களில் மட்டுமே வெற்றி பெற்றது.

எதிர்கட்சித் தலைவராக 28 எம்எல்ஏக்கள் வைத்திருக்க வேண்டும் என்ற சூழலில் கூட்டணியின் அதிகப்பட்ச எம்எல்ஏ எண்ணிக்கையே சிவசேனாவின் 20 தான் என்ற நிலையில் மகாராஷ்டிராவில் எதிர்கட்சித் தலைவரே இல்லாத சூழல் உருவாகியுள்ளது. இது கடந்த 57 ஆண்டுகளில் இல்லாத அளவிலான மோசமான தோல்வி ஆகும்.

முதல்வர் நாற்காலி 

நிலைமை இப்படியிருக்க வெற்றி பெற்ற பாஜகவின் மகாயுதி கூட்டணியில் முதல்வர் நாற்காலிக்கான குடுமிப்பிடி சண்டை தொடங்கியுள்ளது. கடந்த 2022 ஆம் ஆண்டு ஆளும் சிவசேனாவை உடைத்து ஆதரவு எம்எல்ஏக்களுடன் ஏக்நாத் ஷிண்டே பாஜக பக்கம் தாவியதால் ஆட்சி கவிழ்க்கப்பட்டு ஷிண்டேவை முதலமைச்சராக்கி பாஜக கூட்டணி ஆட்சி அமைத்தது.

சரத் பவாரின் தேசியவாத காங்கிரசை உடைத்து அங்கிருந்து பாஜகவுக்கு ஜம்ப் அடித்த அவரது அண்ணன் மகன் அஜித் பவாருக்கு துணை முதல்வர் பதவி வழங்கப்பட்டது. கடந்த 2014 முதல் 2019 காலத்தில் மகா. முதல்வராக இருந்த தேவேந்திர பட்னாவிஸும் துணை முதல்வராக இருந்தார்.

இந்நிலையில் தற்போதைய தேர்தல் வெற்றிக்கு பின்னர் அஜித் பவார் முதல்வர் ஆக வேண்டும் என அவரது கட்சியினரும், தேவேந்திர பட்நாவிஸ் தான் முதல்வர் என பாஜகவினரும் மீண்டும் நாற்காலியை பிடிக்க ஏக்நாத் ஷிண்டேவும் போட்டி போட்டு வருகின்றனர்.

ஆர்எஸ்எஸ் கை

இந்த தேர்தலில் வென்று அதிகபட்சமாக 132 எம்எல்ஏக்களை பாஜக வைத்துள்ளதால் தேவேந்திர பட்னாவிஸ் முதல்வர் ஆக அதிக வாய்ப்புள்ளது என்று கூறப்படுகிறது. நாளையுடன் சட்டசபை பதவிக்காலம் காலாவதியாக உள்ள நிலையில் இன்றே முதல்வர் யார் என்பதைத் தீர்மானிப்பதற்கான கட்டாயம் ஏற்பட்டுள்ளது.  

அந்த வகையில் சிவசேனாவின் ஏக்நாத் ஷிண்டே, தேசியவாத காங்கிரஸ் அஜித் பவார், பாஜகவின் தேவேந்திர பட்னாவிஸ் ஆகியோர் இன்று பிரதமர் மோடி, உள்துறை அமைச்சர் அமித்ஷாவை சந்திக்கின்றனர். பேச்சுவார்த்தைக்குப் பின்னர் முதல்வர் குறித்த அதிகாரப்பூர்வ அறிவிப்பு இன்று மாலை வெளியாகலாம் என்று எதிர்பார்க்கப்படுகிறது.

மகா. பார்முலா 

மகா. வெற்றிக்கு உழைத்த ஆர்எஸ்எஸ் தேவேந்திர பட்னாவிஸை முதல்வராக்க பாஜக தலைமைக்குப் பரிந்துரைத்துள்ளதாகத் தகவல் வெளியாகி உள்ளது. ஷிண்டே விட்டுக்கொடுத்தால் அவரும், அஜித் பவாரும் துணை முதல்வர் பதவியை ஏற்பார்கள். இந்த டீலிங்கை சுமூகமாக முடிக்க அஜித் பவாரை வைத்து ஏக்நாத் ஷிண்டேவிடம் பாஜக காய் நகர்த்துவதாக மகா. வட்டாரங்கள் கூறுகின்றன. 

எனவே மகா. அரசில் முதல்வர், இரு துணை முதல்வர்கள் என்ற பார்முலா தொடரும். மேலும் 6-7 எம்எல்ஏகளுக்கு ஒரு அமைச்சர் வீதம் நியமிக்கப்பட வாய்ப்பு உள்ளது. அதன்படி பாஜகவிலிருந்து 22-24, சிவசேனா 10-12, தேசியவாத காங்கிரஸ் 8-10 அமைச்சர்கள் இடம்பெறுவார்கள். 

உத்தரபிரதேச மாநிலம் சம்பல் வன்முறை குறித்து பாராளுமன்ற மக்களவை எதிர்க்கட்சித் தலைவர் ராகுல்காந்தி தனது எக்ஸ் பக்கத்தில் கூறி இருப்பதாவது:-

உத்தரபிரதேசத்தின் சம்பல் பகுதியில் ஏற்பட்ட மோதல் விவகாரத்தில், மாநில அரசின் ஒருபக்க சார்பும், அவசர நடவடிக்கைகளும் மிகவும் துரதிர்ஷ்டவசமானது.

வன்முறை மற்றும் துப்பாக்கிச் சூட்டில் தங்கள் அன்புக்குரியவர்களை இழந்தவர்களுக்கு எனது ஆழ்ந்த இரங்கலைத் தெரிவித்துக் கொள்கிறேன்.

மாவட்ட அல்லது மாநில நிர்வாகம், அனைத்து தரப்பினரின் ஆலோசனையையும் பெறாமல் உணர்வுப்பூர்வமாக சிந்திக்காமல், நடவடிக்கையை மேற்கொண்டு, ஏற்கனவே இருக்கும் சூழலை மேலும் சீர்குலைத்து மோதலை உண்டாக்கி, மக்கள் உயிரிழக்க வழிவகுத்துள்ளது. இதற்கு பா.ஜ.க. அரசுதான் நேரடியாகப் பொறுப்பேற்க வேண்டும்.

இந்து-முஸ்லிம் சமூக மக்களுக்கு இடையே பிளவையும், பாகுபாட்டையும் உருவாக்கவே பா.ஜ.க. தனது அதிகாரத்தைப் பயன்படுத்துகிறது. மாநிலத்தின் அல்லது நாட்டின் நலனுக்கோ அல்ல. இந்த விவகாரத்தில் சுப்ரீம்கோர்ட்டு உடனடியாக தலையிட்டு நீதி வழங்க வேண்டும்.

இவ்வாறு அவர் கூறியுள்ளார்.