நீங்கள் தேடியது "நம்பிக்கையில்லா தீர்மானம்"

புதுடெல்லி:

இந்திய ஒலிம்பிக் சங்கத்தின் தலைவராக பி.டி. உஷா உள்ளார். 2022-ம் ஆண்டு டிசம்பர் மாதம் முதல் இந்த பொறுப்பில் அவர் இருந்து வருகிறார்.

முன்னாள் தடகள வீராங்கனையான பி.டி.உஷா ஒலிம்பிக் ஒப்பந்தம் தொடர்பாக ரிலையன்ஸ் நிறுவனத்துக்கு சலுகைகள் வழங்கியதாகவும், இதனால் இந்திய ஒலிம்பிக் சங்கத்துக்கு ரூ.24 கோடி இழப்பு ஏற்பட்டதாகவும் குற்றம் சாட்டப்பட்டது. இதை அவர் மறுத்தார். இது தொடர்பாக அவருக்கும் நிர்வாக குழுவுக்கும் இடையே மோதல் போக்கு ஏற்பட்டது.

இதற்கிடையே பி.டி.உஷா மீது நம்பிக்கையில்லா தீர்மானம் கொண்டு இதற்கான இந்திய ஒலிம்பிக் சங்கத்தின் சிறப்பு பொதுக்குழு கூட்டம் நாளை (25-ந்தேதி) நடைபெறுவதாக அறிவிக்கப்பட்டு இருந்தது.

இந்த நிலையில் இந்திய ஒலிம்பிக் சங்கத்தின் சிறப்பு பொதுக்குழு கூட்டம் தள்ளி வைக்கப்பட்டுள்ளது. பி.டி.உஷா இதற்கான உத்தரவை பிறப்பித்துள்ளார்.

இதை இந்திய ஒலிம்பிக் சங்கத்தின் இயக்குனர் ஜார்ஜ் மேத்யூ நிர்வாக குழு மற்றும் உறுப்பினர்களுக்கு ஈ-மெயில் மூலம் தெரிவித்துள்ளார்.

இந்திய ஒலிம்பிக் சங்கத்தின் சிறப்பு பொதுக் குழு கூட்டம் நடைபெறும் புதிய தேதி, நேரம் பின்னர் அறிவிக்கப்படும் என்றும், உங்களுக்கு ஏற்பட்ட சிரமத்திற்கு வருந்துகிறோம் என்றும் அதில் தெரிவிக்கப்பட் டுள்ளது.

காஞ்சிபுரம்:

காஞ்சிபுரம் மாநகராட்சியில் தி.மு.க.வை சேர்ந்த மகாலட்சுமி யுவராஜ் மேயராக உள்ளார்.

மாநகராட்சியில் மொத்தம் தி.மு.க.வில் 33 பேர், காங்கிரஸ்-1, அ.தி.மு.க.-8, த.மா.கா-1, பா.ம.க.-2, பா.ஜனதா-1, விடுதலை சிறுத்தைகள்-1, சுயேட்சைகள்-4 உறுப்பினர்கள் உள்ளனர். துணை மேயராக காங்கிரசை சேர்ந்த குமரகுருநாதன் உள்ளார்.

மேயர் மகாலட்சுமி யுவராஜிக்கு சொந்த கட்சியான தி.மு.க. கவுன்சிலர்களே எதிர்ப்பு தெரிவித்தனர். அவர்களுடன் எதிர்க்கட்சி உறுப்பினர்களும் சேர்ந்து மேயருக்கு எதிராக போர்க்கொடி தூக்கினர். மேயருக்கு எதிராக மொத்தம் 33 கவுன்சிலர்கள் இருந்தனர்.

அவர்கள், மகாலட்சுமி யுவராஜ் மேயர் பதவியில் இருந்து விலககோரி மாவட்ட கலெக்டர், மாநகராட்சி கமிஷனரிடம் புகார் மனு அளித்தனர். தி.மு.க. எதிர்ப்பு கவுன்சிலர்களை கட்சி மேலிடம் அழைத்து சமாதானம் செய்தும் அவர்கள் தங்களது முடிவில் இருந்து பின்வாங்கவில்லை.

இதைத்தொடர்ந்து மேயருக்கு எதிராக இன்று (29-ந்தேதி) நம்பிக்கையில்லா தீர்மானம் மற்றும் அது தொடர்பான விவாதம் மற்றும் வாக்கெடுப்பு நடத்தப்படும் என்று மாநகராட்சி கமிஷனர் செந்தில் முருகன் ஏற்கனவே அறிவித்து இருந்தார்.

இதற்கிடையே நேற்று முன்தினம் மொத்தம் உள்ள 51 கவுன்சிலர்களில் 30-க்கும் மேற்பட்டோர் சொகுசு பஸ்சில் காஞ்சிபுரத்தில் இருந்து சுற்றுலா சென்றனர்.

அவர்கள் சென்னை கிழக்கு கடற்கரை சாலையில் உள்ள ரிசார்ட்டுகளில் தங்கி இருப்பதாக கூறப்படுகிறது. இதனால் அவர்கள் மாநகராட்சி கூட்டத்தில் பங்கேற்பார்களா? என்ற கேள்வி எழுந்து இருந்தது.

இந்த பரபரப்பான சூழ்நிலையில் காஞ்சிபுரம் மாநகராட்சி கூட்டம் இன்று காலை 10 மணிக்கு தொடங்கியது. மாநகராட்சி கமிஷனர் செந்தில் முருகன் சரியாக காலை 10 மணிக்கு தனது இருக்கையில் வந்து அமர்ந்தார். அவரது இருக்கை அருகில் நம்பிக்கையில்லா தீர்மானத்திற்கு வாக்களிக்க பூட்டு போடப்பட்ட பெட்டியும் தயாராக இருந்தது.

ஆனால் மாநகராட்சி கூட்டத்திற்கு கவுன்சிலர்கள் யாரும் வரவில்லை. அதிகாரிகள் மட்டும் வந்திருந்தனர். கூட்டத்தில் கவுன்சிலர்கள் யாரும் பங்கேற்காததால் வெறிச்சோடி கிடந்தது.

சிறிது நேரத்திற்கு பின்னர் அதிருப்தி தி.மு.க. கவுன்சிலரான 34-வது வார்டு உறுப்பினர் பிரவீன் குமார் மாநகராட்சி கூட்டத்திற்கு வந்தார். இதனால் அங்கு பரபரப்பு ஏற்பட்டது. அவர் இருக்கையில் அமராமல் நேராக கமிஷனர் செந்தில் முருகனிடம் சென்று கடிதம் ஒன்றை கொடுக்க முயன்றார். ஆனால் அதனை கமிஷனர் வாங்க மறுத்தார். மேலும் வருகை பதிவேட்டில் கையெழுத்திட்ட பின்னர் கடிதத்தை வழங்கும் படி தெரிவித்தார்.

ஆனால் கவுன்சிலர் பிரவீன்குமார் வருகை பதிவேட்டில் கையெழுத்து போட வில்லை. மேலும் அவர் தான் கொண்டு வந்த கடிதத்தை கமிஷனர் செந்தில் முருகன் இருந்த மேஜை மீது வைத்து விட்டு சென்றார். அதனை கமிஷனர் கண்டுகொள்ள வில்லை. அதனை எடுத்து பார்க்கவும் இல்லை.

மேயர் மகாலட்சுமி யுவராஜிக்கு எதிராக நம்பிக்கை இல்லா தீர்மானம் கொண்டு வந்து போர்க்கொடி தூக்கிய கவுன்சிலர்கள் மற்றும் மேயருக்கு ஆதரவான கவுன்சிலர்கள் யாரும் கூட்டத்தில் பங்கேற்காததால் தொடர்ந்து பரபரப்பான நிலை நிலவியது. மேயரும் கூட்டத்திற்கு வரவில்லை.

மேயரை பதவி நீக்கம் செய்ய 5-ல் 4 பங்கு கவுன்சிலர்கள் மேயருக்கு எதிராக வாக்களிக்க வேண்டும். ஆனால் உறுப்பினர்கள் யாரும் கூட்டத்தில் பங்கேற்காததால் நம்பிக்கையில்லா தீர்மானம் மற்றும் அது தொடர்பான விவாதம், வாக்கெடுப்புக்கு ஏற்கப்பட வில்லை. இதனால் நம்பிக்கையில்லா தீர்மானம் தோல்வி அடைந்தது. இதனால் மகாலட்சுமி யுவராஜின் மேயர் பதவி தப்பியது.

கட்சியின் தலைைமக்கு கட்டுப்பட்டு மேயர் மகாலட்சுமி யுவராஜிக்கு எதிரான நம்பிக்கையில்லா தீர்மானத்தை கொண்டு வந்த தி.மு.க. கவுன்சிலர்கள் கூட்டத்தில் பங்கேற்கவில்லை என்று தெரிகிறது.

இதனால் காஞ்சிபுரம் மாநகராட்சி முன்பு டி.எஸ்.பி.முரளி தலைமையில் பலத்த பாதுகாப்பு போடப்பட்டு இருந்தது. இதனால் அப்பகுதி பரபரப்பாக காணப்படுகிறது.

காஞ்சிபுரம்:

காஞ்சிபுரம் மாநகராட்சி மேயராக தி.மு.க. பெண் மேயர் மகாலட்சுமி இருந்து வருகிறார். மாநகராட்சியில் மொத்தம் உள்ள 51 வார்டுகளில் தி.மு.க.வுக்கு 33 கவுன்சிலர்கள் உள்ளனர்.

அ.தி.மு.க.வுக்கு 8 கவுன்சிலர்களும், காங்கிரஸ், பா.ம.க., த.மா.கா., விடுதலை சிறுத்தைகள் கட்சி, பாஜக ஆகிய கட்சிகளுக்கு தலா ஒரு கவுன்சிலர்களும், 6 சுயேட்சை கவுன்சிலர்களும் உள்ளனர்.

மாநகராட்சி மேயர் மகாலட்சுமிக்கு எதிராக தி.மு.க. கவுன்சிலர்கள் போர்க் கொடி தூக்கியுள்ளனர். தி.மு.க. கவுன்சிலர்கள் உள்பட 33 கவுன்சிலர்கள் மேயர் மகாலட்சுமிக்கு எதிராக நம்பிக்கையில்லா தீர்மானம் கொண்டு வந்துள்ளனர். இதன்படி 19 தி.மு.க. கவுன்சிலர்கள் மற்றும் துணை மேயர் குமரகுரு நாதன் (காங்கிரஸ்) மற்றும் எதிர்க்கட்சிகளை சேர்ந்த கவுன்சிலர்கள் மேயருக்கு எதிரான நடவடிக்கைகளில் ஈடுபட்டுள்ளனர்.

இதுதொடர்பாக மாநகராட்சி கமிஷனர் செந்தில் முருகன், மாவட்ட கலெக்டர் ஆகியோரிடம் கடந்த சில நாட்களுக்கு முன்பு மனு அளித்தனர்.

மாநகராட்சி உறுப்பினர்களின் இந்த கோரிக்கையை ஏற்று கமிஷனர் செந்தில் முருகன், காஞ்சிபுரம் மாநகராட்சி மேயர் மீது அளிக்கப் நம்பிக்கையில்லா தீர்மானத்தின் மீது விவாதம் நடத்துவதற்காக நாளை (29-ந் தேதி) காலை 10 மணிக்கு மாநகராட்சி கூட்டம் நடைபெறும் என்று தெரிவித்திருந்தார்.

கடந்த 3 வாரங்களுக்கு முன்பு இதற்கான அறிவிப்பு வெளியிடப்பட்டிருந்தது. இது தொடர்பாக மாநகராட்சி உறுப்பினர்களுக்கு கடிதமும் அனுப்பப்பட்டது.

இந்த நிலையில் தி.மு.க. கவுன்சிலர்கள் 19 பேர் நேற்று மாலையில் காஞ்சிபுரத்தில் இருந்து புறப்பட்டு ஊட்டிக்கு இன்ப சுற்றுலா சென்றனர். மேயர் மகாலட்சுமிக்கு எதிராக நாளை நம்பிக்கையில்லா தீர்மானம் கொண்டு வரப்பட உள்ள நிலையில் இவர்கள் சுற்றுலா புறப்பட்டு சென்றிருப்பதால் நாளை நம்பிக்கை தீர்மானத்தின் மீது ஓட்டெடுப்பு நடைபெறுமா? மேயர் மகாலட்சுமியின் பதவி தப்புமா? என்கிற கேள்விகள் எழுந்து பலத்த எதிர்பார்ப்பை ஏற்படுத்தி உள்ளது.

மொத்தம் உள்ள தி.மு.க. கவுன்சிலர்கள் 33 பேரில் மேயரை தவிர்த்து 32 பேர் மாநகராட்சி கவுன்சிலர்களாக செயல்பட்டு வரும் நிலையில், இவர்களில் 13 பேர் மேயருக்கு ஆதரவாகவே உள்ளனர்.

மீதமுள்ள 19 பேரும் மேயருக்கு எதிரான மன நிலையில் உள்ளனர். இவர்கள் அனைவரும் சேர்ந்து நம்பிக்கையில்லா தீர்மானத்தை கொண்டு வர மனு அளித்துவிட்டு தற்போது ஊட்டிக்கு இன்ப சுற்றுலா சென்றிருப்பது சர்ச்சையை ஏற்படுத்தி உள்ளது. இது தொடர்பாக சுற்றுலா சென்றுள்ள தி.மு.க. கவுன்சிலர்கள் சிலரை தொடர்பு கொண்டு கேட்ட போது, நாளைய கூட்டத்தில் பங்கேற்பது தொடர்பாக இதுவரை எதையும் தெரிவிக்க முடியாது என்றனர்.

சில கவுன்சிலர்களோ, நாளைய கூட்டத்தில் பங்கேற்போம் என்றும் கூறியுள்ளனர். இதனால் குழப்பமான சூழலே நிலவி வருகிறது.

மேயர் மகாலட்சுமி மீதான நம்பிக்கை தீர்மானம் வெற்றி பெற வேண்டுமானால் மாநகராட்சி விதிகளின்படி 5-ல் 4 பங்கு கவுன்சிலர்கள் கூட்டத்தில் பங்கேற்று ஓட்டு போட வேண்டும். இதன்படி மொத்தம் உள்ள 51 கவுன்சிலர்களில் 41 பேர் கூட்டத்துக்கு வந்து தீர்மானத்தின் மீது ஓட்டு போட வேண்டும்.

அதே நேரத்தில் நம்பிக்கை தீர்மானத்தை தோற்கடிப்பதற்கு 5-ல் ஒரு பங்குக்கு மேற்பட்டோர் ஓட்டு போட வேண்டும். இதன்படி பார்த்தால் 10-க்கும் மேற்பட்டவர்கள் வாக்களித்தால் மேயர் பதவி தப்பும். தற்போது மேயருக்கு ஆதரவாக தி.மு.க. கவுன்சிலர்கள் 13 பேர் செயல்பட்டு வருவது குறிப்பிடத்தக்கது. மேயருக்கு எதிராக அணி திரண்டுள்ள தி.மு.க. கவுன்சிலர்கள் அனைவரும் ஒன்று சேர்ந்து அவர்களோடு எதிர்க்கட்சி கவுன்சிலர்களும் அணி திரண்டுள்ள நிலையில் காஞ்சிபுரம் மாநகராட்சி கூட்டம் நாளை நடைபெறுமா? என்கிற கேள்வியும் பலமாக எழுந்துள்ளது.

காஞ்சிபுரம்:

காஞ்சிபுரம் மாநகராட்சியில் 51 வார்டுகள் உள்ளன. இந்த நிலையில் மாநகராட்சி மேயர், துணை மேயர், 49 மாநகராட்சி உறுப்பினர்கள் பதவியில் உள்ளனர். திமுகவை சேர்ந்த மகாலட்சுமி யுவராஜ் மாநகராட்சி மேயராகவும், காங்கிரஸ் கட்சியை சேர்ந்த குமரகுருபரன் துணை மேயராகவும் உள்ளனர்.

மாநகராட்சி மேயர் தங்களை உரிய முறையில் மதிக்கவில்லை. தங்கள் வார்டுகளுக்கு தேவையான மக்கள் நல பணிகளை செய்து தரவில்லை என அதிமுக, பாமக, பாஜனதா, தமிழ் மாநில காங்கிரஸ், சுயேச்சை, உறுப்பினர்கள் கூறி வந்த நிலையில் தற்போது ஆளும் கட்சியான திமுகவை சேர்ந்த மாநகராட்சி உறுப்பினர்களும், சேர்ந்து கொண்டு மேயர் மகாலட்சுமி யுவராஜுடன் மோதல் போக்கை மேற்கொண்டு வந்தனர்.

இந்த நிலையில் திமுக மற்றும் எதிர்க்கட்சி உறுப்பினர்கள் என 33 பேர் மாநகராட்சி மேயர் மகாலட்சுமி யுவராஜ் மீது நம்பிக்கையில்லா தீர்மானம் கொண்டுவர வேண்டும் என காஞ்சிபுரம் மாவட்ட கலெக்டர் மற்றும் மாநகராட்சி கமிஷனரி டம் மனு வழங்கி இருந்தனர். இது குறித்து தகவல் அறிந்து நகராட்சி துறை அமைச்சர் கே.என். நேரு மாநகராட்சி உறுப்பினர்கள் மற்றும் மேயரை வரவழைத்து பேச்சுவார்த்தை நடத்தி அனுப்பி வைத்தார்.

இருப்பினும் மாநகராட்சி உறுப்பினர்கள் தொடர்ந்து மாநகராட்சி மேயர் மகாலட்சுமி யுவராஜை மாற்ற வேண்டும் என வலியுறுத்தி வந்தனர்.

இந்த நிலையில் மாநகராட்சி கமிஷனர் செந்தில் முருகன், மாநகராட்சி உறுப்பினர்களின் கோரிக்கையை ஏற்று, தமிழ்நாடு நகர்ப்புற உள்ளாட்சி அமைப்புகளின் சட்டம் 1998 (திருத்தப்பட்ட சட்டம் 32, ஆண்டு 2022) பிரிவு 51 (2) (3) படி காஞ்சிபுரம் மாநகராட்சி உறுப்பினர்களால் மாநகராட்சி மேயர் மீது அளிக்கப்பட்டுள்ள, நம்பிக்கையில்லா தீர்மானத்தின் மீது விவாதம் மற்றும் வாக்கெடுப்பு நடத்துவதற்கான கூட்டம் இந்த மாதம் 29-ம்தேதி (திங்கட்கிழமை) காலை 10 மணிக்கு மாநகராட்சி கூட்டம் நடைபெற உள்ளது என்றும், மேற்படி கூட்டத்தில் மாநகராட்சி உறுப்பினர்கள் அனைவரும் தவறாமல் கலந்து கொள்ள வேண்டும் என அறிவிப்பு வெளியிட்டு அதற்கான கடிதங்களை மாநகராட்சி கவுன்சிலர்களுக்கு அனுப்பி வைத்துள்ளார்.

மாநகராட்சி கவுன்சிலர்கள் விவரம்

மொத்தம்:- 51

திமுக - 33

காங்கிரஸ் -1

அதிமுக -8

தமாகா -1

பாமக -2

பாஜனதா -1

விடுதலை சிறுத்தைகள் கட்சி-1

சுயேச்சை -4

பீகார் சட்டப்பேரவையில் சபாநாயகருக்கு எதிராக நம்பிக்கையில்லா தீர்மானம் கொண்டு வரப்பட்டது.

ராஷ்டிரிய ஜனதா தளம் (RJD) கட்சியுடன் சேர்ந்து ஆட்சியமைத்து இருந்த நிதிஷ் குமார், அக்கூட்டணியிலிருந்து திடீரென விலகி, சில தினங்களுக்கு முன் பா.ஜ.க.வுடன் கூட்டணி அமைத்து அவர்கள் ஆதரவுடன் ஆட்சி அமைத்தார்.

இன்று நிதிஷ் குமாரின் ஆட்சி மீதான நம்பிக்கை குறித்து முடிவாக உள்ள நிலையில், முன்னதாக சபாநாயகர் அவத் பீகாரி சவுத்ரி (Awadh Bihari Choudhary) மீது நம்பிக்கையில்லா தீர்மானம் கொண்டு வரப்பட்டது.

இத்தீர்மானத்திற்கு ஆதரவாக 125 உறுப்பினர்களும், எதிர்த்து 112 உறுப்பினர்களும் வாக்களித்தனர்.

இதனையடுத்து தீர்மானம் வெற்றிகரமாக நிறைவேற்றப்பட்டது.

இதை தொடர்ந்து ராஷ்டிரிய ஜனதா தளத்தை சேர்ந்த சவுத்ரி பதவி விலகினார்.

நெல்லை:

நெல்லை மாநகர் மாவட்ட அ.தி.மு.க செயலாளர் தச்சை கணேசராஜா இன்று மாவட்ட அலுவலகத்தில் செய்தியாளர்களிடம் கூறியதாவது:-

நெல்லை மாநகராட்சி மேயர் சரவணனுக்கு எதிராக ஆளுங்கட்சி கவுன்சிலர்களே நம்பிக்கை இல்லா தீர்மானம் கொண்டு வருமாறு மனு அளித்துள்ளனர்.

தற்போது 80 சதவீதம் கவுன்சிலர்கள் அதாவது 38 கவுன்சிலர்கள் நம்பிக்கை இல்லா தீர்மானம் கொண்டு வந்துள்ளனர். இவ்வாறு கொண்டு வரும்போது மாநகராட்சி கமிஷனர் அடுத்த 15 நாட்களுக்குள் அனைத்து கவுன்சிலர்களுக்கும் நோட்டீஸ் வழங்க வேண்டும். ஒரு மாதத்திற்குள் நம்பிக்கை இல்லா தீர்மானம் மீதான வாக்கெடுப்பை நடத்த வேண்டும்.

தற்போது உள்ள கமிஷனர் மிகவும் நேர்மையான நபராக இருப்பதால் கண்டிப்பாக இதை செய்வார் என்று நம்புகிறோம்.

தற்போது கொண்டு வந்துள்ள நம்பிக்கை இல்லா தீர்மானத்திற்கு மக்கள் நலனை கருத்தில் கொண்டு அ.தி.மு.க கவுன்சிலர்கள் நிச்சயமாக ஆதரவு அளிப்பார்கள்.

மாநகராட்சி கமிஷனர் உடனடியாக இந்த மனு தொடர்பாக நடவடிக்கை எடுக்க வேண்டும். மாநகராட்சியை முடக்கி வைத்து உடனடி தீர்வு காண வேண்டும்.

சுமார் 6 லட்சம் மக்கள் வசிக்கும் இந்த மாநகராட்சியில் மக்கள் நலனை கருத்தில் கொண்டு தற்போதுள்ள தி.மு.க அரசின் மாநகராட்சியை கலைக்க வேண்டும். தற்போது அளிக்கப்பட்டுள்ள நம்பிக்கை இல்லா தீர்மானம் தொடர்பான மனுவில் அ.தி.மு.க. கவுன்சிலர்களின் கையெழுத்தும் இருக்கலாம்.

சந்திப்பு பஸ் நிலையம் எப்போது திறக்கும் என்று தெரியவில்லை. பேட்டை பகுதியில் அமைக்கப்பட்ட சரக்கு முனையத்தை முதலமைச்சர் காணொளி காட்சி வாயிலாக திறந்து வைத்து ஆண்டுகள் ஆகிவிட்டது. இதுவரை அது பயன்பாட்டுக்கு வரவில்லை. ரூ.2.85 கோடி மதிப்பில் நெல்லை சந்திப்பு ஈரடுக்கு மேம்பாலம் சீரமைக்கப்பட்டது என்று கூறினர். ஆனால் வெறுமனே பெயிண்டிங் மட்டும் அடித்து முடித்து விட்டனர். தற்போது அதில் தூண் பகுதி இடிந்து விழுந்து ஒருவர் உயிரிழந்து விட்டார்.

இவ்வாறு அவர் கூறினார்.

இந்த பேட்டியின்போது பொதுக்குழு உறுப்பினர் கங்கை வசந்தி, பகுதி செயலாளர் காந்தி வெங்கடாசலம், பகுதி மாணவர் அணி செயலாளர் புஷ்பராஜ் ஜெய்சன்,தச்சை மாதவன், மாவட்ட இளைஞர் பாசறை முத்துப்பாண்டி, சம்சு சுல்தான் உள்பட பலர் இருந்தனர். 

நெல்லை:

நெல்லை மாநகராட்சியில் மொத்தமுள்ள 55 வார்டுகளில் 51 வார்டுகளில் தி.மு.க. மற்றும் கூட்டணி கட்சிகளை சேர்ந்த கவுன்சிலர்கள் உள்ளனர்.

மேயர் சரவணனுக்கும், பெரும்பான்மையான தி.மு.க. கவுன்சிலர்களுக்கும் இடையே ஆரம்பம் முதலே கருத்து வேறுபாடுகள் இருந்து வருகிறது.

இதைத்தொடர்ந்து தி.மு.க. கவுன்சிலர்கள் சென்னையில் நகராட்சி துறை அமைச்சர் கே.என்.நேருவை சந்தித்து புகார் தெரிவித்தனர். அவர் இரு தரப்பினரையும் சமாதானம் செய்து வைத்தார்.

மேலும் நெல்லை மாவட்ட பொறுப்பு அமைச்சரான தங்கம் தென்னரசுவும் இரு தரப்பினரிடமும் பேசி மாநகராட்சி கூட்டத்தை சுமூகமாக நடத்த வலியுறுத்தினார்.

கடந்த மாதம் 21-ந்தேதி நடைபெற்ற மாநகராட்சி கூட்டத்தில் கவுன்சிலர்கள் வந்த நிலையில் மேயர் வரவில்லை என கூறி தி.மு.க. கவுன்சிலர்கள் போராட்டத்தில் ஈடுபட்டனர்.

இந்நிலையில் தி.மு.க.வை சேர்ந்த 38 கவுன்சிலர்கள் நேற்று மாநகராட்சி கமிஷனர் சுபம் ஞானதேவ் ராவை சந்தித்து மேயர் சரவணன் மீது நம்பிக்கையில்லா தீர்மானம் கொண்டு வரும் கடிதத்தை வழங்கினர். ஆனால் அதனை வாங்க கமிஷனர் மறுப்பு தெரிவித்ததாக கூறப்படுகிறது.

ஆனால் கடிதத்தை வாங்காவிட்டால் போராட்டத்தில் ஈடுபட போவதாக தி.மு.க. கவுன்சிலர்கள் கூறியதால் அந்த கடிதத்தை பெற்றுக் கொண்டு கமிஷனர் ஒப்புகை சீட்டு வழங்கினார்.

இத்தகவல் பரவியதும் பரபரப்பு ஏற்பட்டுள்ளது. இது தொடர்பாக கமிஷனர் சுபம் ஞானதேவ் ராவ் கூறும்போது, தி.மு.க. கவுன்சிலர்கள், மேயர் மீது நம்பிக்கையில்லா தீர்மானம் கொண்டு வர கடிதம் கொடுத்துள்ளனர்.

இதுதொடர்பாக விரைவில் மாமன்ற கூட்டத்தை கூட்டி விவாதம் நடத்தி முடிவுகள் எடுக்கப்படும் என தெரிவித்தார்.

மணிப்பூர் விவகாரம் தொடர்பாக மக்களவையில் எதிர்க்கட்சிகள் நம்பிக்கையில்லா தீர்மானம் கொண்டு வந்தன. அதன்மீதான விவாதங்கள் நடைபெற்று முடிந்த நிலையில், நேற்று மாலை 4 மணிக்கு பிரதமர் மோடி பதில் உரை அளித்தார்.

அப்போது எதிர்க்கட்சிகளை கடுமையாக விமர்சித்தார். சுமார் ஒன்றரை மணி நேரம் எதிர்க்கட்சிகள் குறித்தே பேசினார். இதற்கு எதிர்க்கட்சிகள் கடும் ஆட்சேபம் தெரிவித்தனர். அவையில் இருந்து வெளிநடப்பு செய்தனர்.

இந்த நிலையில், அவையில் நாங்கள் இருந்த 90 நிமிடங்கள் வரை பிரதமர் மோடி, மணிப்பூர் விவகாரம் குறித்து ஒரு வார்த்தைக் கூட பேசவில்லை. மக்களவையை தேர்தல் பேரணியாக பயன்படுத்தியுள்ளார் என காங்கிரஸ் விமர்சனம் செய்துள்ளது.

இதுகுறித்து காங்கிரஸ் தலைவர் மல்லிகார்ஜூன கார்கே கூறுகையில் ''கடைசியாக பிரதமர் மோடி மக்களவை வந்து பேசியதற்கு நன்றி. முன்னதாகவே, தனது ஆணவத்தை விட்டுவிட்டு பாராளுமன்றம் வர சம்மதம் தெரிவித்திருந்தால், பராளுமன்றத்தின் மதிப்புமிக்க நேரம் சேமிக்கப்பட்டு, சிறந்த விவாதத்திற்குப் பிறகு, முக்கியமான மசோதாக்கல் நிறைவேற்றப்பட்டிருக்கும்'' என்றார்.

''எதிர்பாராத விதமாக மணிப்பூர் விசயம் தொடர்பாக, பாராளுமன்றத்தில் நம்பிக்கையில்லா தீர்மானம் கொண்டு வந்தது எங்களுக்கு வேதனை அளிக்கிறது. ஆனால், நீங்கள் மக்களவையை தேர்தல் பேரணி போன்று பயன்படுத்தியுள்ளீர்கள்'' என மக்களவை காங்கிரஸ் கட்சியின் துணைத் தலைவர் கௌரவ் கோகாய் விமர்சனம் செய்துள்ளார்.

மேலும், ஒட்டுமொத்த பேச்சியின்போது பிரதமர் மோடி காங்கிரசை தாக்கு பேசினார். மணிப்பூரை பற்றி சிறிதளவே பேசியுள்ளார். காங்கிரசை விமர்சனம் செய்தபோது, அவரிடம் காங்கிரஸ் மீதான பயனத்தை நாங்கள் பார்க்க முடிந்தது.'' என்றார்.

புதுடெல்லி:

பாராளுமன்ற மக்களவையில் மத்திய அரசுக்கு எதிரான நம்பிக்கையில்லா தீர்மானம் மீதான விவாதத்தில் பங்கேற்ற எதிர்க்கட்சி உறுப்பினர்கள் மத்திய அரசின் மீதும், பிரதமர் மீதும் அடுக்கடுக்கான குற்றச்சாட்டுகளை முன்வைத்தனர். இன்று 3-வது நாளாக விவாதம் நடந்தது.

எதிர்க்கட்சிகளின் குற்றச்சாட்டுகளுக்கு பதிலளித்து மத்திய நிதி மந்திரி நிர்மலா சீதாராமன் பேசும்போது, தமிழக முன்னாள் முதல்வர் ஜெயலலிதா குறித்து பேசினார்.

இந்தியாவில் பெண்கள் பாதுகாப்பு குறித்து திமுக உறுப்பினர் கனிமொழி கூறிய குற்றச்சாட்டுக்கு பதிலளித்த நிர்மலா சீதாராமன், "மணிப்பூர், ராஜஸ்தான், டெல்லி என எங்கும் பெண்கள் பாதிக்கப்படுகிறார்கள். அதை நாம் தீவிரமாக எடுத்துக் கொள்ள வேண்டும், ஆனால் அதை வைத்து அரசியல் செய்யக்கூடாது" என்றார்.

1989 ஆம் ஆண்டு மார்ச் 25ஆம் தேதி தமிழ்நாடு சட்டமன்றத்தில் ஜெயலலிதாவின் புடவையை பிடித்து இழுத்த சம்பவத்தை நிர்மலா சீதாராமன் நினைவு கூர்ந்தார். "அவர் எதிர்க்கட்சித் தலைவராக இருந்தார். தி.மு.க. உறுப்பினர்கள் அவரைப் பார்த்து சிரித்தனர். முதல்வராக பதவியேற்ற பிறகுதான் சட்டசபைக்கு வருவேன் என்று ஜெயலலிதா சபதம் எடுத்தார். இரண்டு ஆண்டுகளுக்குப் பிறகு மீண்டும் முதல்வரானார்" என குறிப்பிட்டார்.

போராட்டத்தில் ஈடுபட்ட திமுக உறுப்பினர்களைப் பார்த்து பேசிய அவர், "கௌரவர்களின் சபை பற்றி பேசுகிறீர்கள், திரவுபதியை பற்றி பேசுகிறீர்கள், ஆனால் ஜெயலலிதாவை திமுக மறந்துவிட்டதா?" என கேள்வி எழுப்பினார்.

மத்திய அரசு இந்தியை திணிக்க முயற்சிப்பதாக திமுக எம்.பி. கனிமொழியின் மற்றொரு குற்றச்சாட்டுக்கு பதிலளித்த நிதி மந்திரி, சிலப்பதிகாரத்தின் உணர்வை பிரதமர் செயல்படுத்தி வருவதாக தெரிவித்தார்.

புதுடெல்லி:

மணிப்பூர் மாநிலத்தில் நடந்த கலவரம் தொடர்பாக பிரதமர் மோடி விளக்கம் அளிக்க வேண்டும் என்று எதிர்க்கட்சிகள் கோரிக்கை விடுத்தன. ஆனால் பிரதமர் மோடி அதை கண்டு கொள்ளவில்லை.

இந்தநிலையில் மணிப்பூர் விவகாரம் பற்றி பாராளுமன்றத்தில் பிரதமர் மோடியை பேச வைக்க வேண்டும் என்பதற்காக எதிர்க்கட்சிகள் நம்பிக்கையில்லா தீர்மானம் கொண்டு வந்தன.

அந்த நம்பிக்கையில்லா தீர்மானம் மீது நேற்று முன்தினம் பாராளுமன்ற மக்களவையில் விவாதம் தொடங்கியது. முதல் நாள் காங்கிரஸ், பா.ஜ.க. தரப்பில் எம்.பி.க்கள் பேசினார்கள். இந்தநிலையில் 2-வது நாளாக நேற்று நடந்த விவாதம் பாராளுமன்றத்தில் அனல் பறக்கும் வகையில் இருந்தது.

காங்கிரஸ் முன்னாள் தலைவர் ராகுல் காந்தி விவாதத்தை தொடங்கி வைத்து பேசுகையில் மத்திய அரசு மீது அடுக்கடுக்காக பல்வேறு குற்றச்சாட்டுகளை சுமத்தினார். பிரதமர் மோடி மணிப்பூருக்கு செல்லாதது ஏன்? மணிப்பூர் கலவரத்தை ராணுவத்தை அனுப்பி கட்டுப்படுத்தாதது ஏன்? என்று அவர் கேள்வி எழுப்பினார்.

ராகுல் காந்தி மேலும் பேசுகையில், "பா.ஜனதா செய்து வரும் அரசியல் மணிப்பூர் மாநிலத்தை மட்டும் கொல்லவில்லை. இந்தியாவையே கொன்று விட்டது. இந்தியாவை கொல்வதன் மூலம் பாரத மாதாவை கொன்று விட்டீர்கள்" என்று பகிரங்கமாக பேசினார்.

அதற்கு மத்திய மந்திரிகள் அமித் ஷா, ஸ்மிருதி இரானி பதிலளித்து பேசினார்கள். அமித்ஷா பேசுகையில், "மணிப்பூர் விவகாரத்தை எதிர்க்கட்சிகள் அரசியலாக்க வேண்டாம்" என்று வேண்டுகோள் விடுத்தார். மத்திய அரசு மேற்கொண்ட நடவடிக்கைகளையும் அமித் ஷா விளக்கி கூறினார்.

அமித் ஷா தனது பேச்சை முடிக்கும் போது மணிப்பூரில் அமைதி ஏற்பட தீர்மானம் நிறைவேற்ற வேண்டும் என்று பாராளுமன்ற மக்களவை சபாநாயகர் ஓம் பிர்லாவுக்கு கோரிக்கை விடுத்தார். அந்த தீர்மான நகல்கள் எம்.பி.க்களுக்கு கொடுக்கப்பட்டது.

அந்த தீர்மானத்தை சபாநாயகர் ஓம் பிர்லா வாசித்தார். இதையடுத்து பாராளுமன்றத்தில் அந்த தீர்மானம் உடனடியாக நிறைவேற்றப்பட்டது.

இந்தநிலையில் இன்று (வியாழக்கிழமை) எதிர்க்கட்சிகள் கொண்டு வந்த நம்பிக்கையில்லா தீர்மானம் மீதான விவாதத்தின் போது எதிர்க்கட்சிகள் அமளியில் ஈடுபட்டதால் அவை ஒத்திவைப்பட்டது. பின்னர் அவை தொடங்கிய போது மத்திய நிதி அமைச்சர் நிர்மலா சீதாராமன் பேசினார். கடந்த 2 நாட்களில் பெரும்பாலான கட்சிகளுக்கு இந்த தீர்மானத்தின் மீது பேச வாய்ப்பு வழங்கப்படவில்லை. எனவே இன்று இவர்களுக்கு குறைந்த நேரம் ஒதுக்கீடு செய்யப்பட்டு வாய்ப்பு வழங்கப்பட்டது.

எதிர்க்கட்சிகளின் இந்தியா கூட்டணியில் இடம் பெற்றுள்ள எம்.பி.க்கள் தொடர்ந்து வாதம் செய்தனர். மத்திய அரசு மீதும், பிரதமர் மோடி மீதும் பல்வேறு குற்றச்சாட்டுகள் தெரிவிக்கப்பட்டன. இதனால் பாராளுமன்றத்தில் இடைஇடையே அமளி ஏற்பட்டது.

எதிர்க்கட்சிகளின் குற்றச்சாட்டுகளுக்கு பிரதமர் மோடி பதில் அளிக்க உள்ளார். இன்று மாலை 4 மணிக்கு மக்களவையில் பிரதமர் மோடி பேச உள்ளார். இதனால் பிரதமர் மோடியின் பதில் மிகுந்த எதிர்பார்ப்பை ஏற்படுத்தி உள்ளது.

மணிப்பூர் மாநிலத்தில் கடந்த மே மாதம் எத்தகைய சூழ்நிலையில் வன்முறை தொடங்கியது? அதை மத்திய, மாநில அரசுகள் எத்தகைய நடவடிக்கைகள் மூலம் கட்டுக்குள் கொண்டு வந்தன? என்பது பற்றி மோடி விளக்குவார் என்று தெரிகிறது. மேலும் மணிப்பூர் வன்முறை தொடர்பாக மேற்கொள்ளப்பட்டுள்ள நடவடிக்கைகள் பற்றியும் முழுமையாக பிரதமர் மோடி பேசுவார் என்று எதிர்பார்க்கப்படுகிறது.

மணிப்பூர் விவகாரம் தொடர்பாக பாராளுமன்ற இரு அவைகளிலும் பிரதமர் மோடி விளக்கம் அளிக்க வேண்டும் என எதிர்க்கட்சிகள் தொடர் அமளியில் ஈடுபட்டு வந்தன. மேலும், பாராளுமன்ற விதி 267-ன்படி விரிவான விவாதம் நடத்த வேண்டும் என கோரிக்கை வைத்து வந்தனர்.

மேற்கண்ட கோரிக்கைகளுக்கு பாராளுமன்றத்தில் அனுமதி அளிக்கப்படாததால், மணிப்பூர் விவகாரம் தொடர்பாக மத்திய அரசுக்கு எதிராக நம்பிக்கை இல்லா தீர்மானத்தைக் கொண்டு வந்தனர். இதனை மக்களவை சபாநாயகர் ஓம் பிர்லா ஏற்றுக்கொண்டார்.

இதன் மீதான விவாதம் நேற்றுமுன்தினம் தொடங்கிய நிலையில், நேற்றும் நம்பிக்கை இல்லா தீர்மானத்தின் மீது காரசாரமான விவாதம் நடைபெற்றது. இந்த விவாதத்தில் ராகுல்காந்தி பா.ஜ.க. அரசை விமர்சித்து காட்டமாகப் பேசியிருந்தார். அதனை தொடர்ந்து கனிமொழி எம்.பி. உரையாற்றினார்.

இதற்கிடையே, மணிப்பூர் விவகாரம் தொடர்பாக எதிர்க்கட்சிகளின் கேள்விக்கு மத்திய உள்துறை மந்திரி அமித்ஷா மக்களவையில் பதிலளித்தார். மேலும், மணிப்பூரில் அனைத்துப் பிரிவினரும் இணைந்து பேச்சுவார்த்தையில் பங்கேற்க வேண்டும் என தீர்மானத்தில் தெரிவிக்கப்பட்ட நிலையில், தீர்மானம் ஒருமனதாக நிறைவேற்றப்பட்டதாக சபாநாயகர் தெரிவித்தார்.

இதையடுத்து இரு அவைகளும் நாளை காலை 11 மணி வரை ஒத்திவைக்கப்பட்டது. இந்நிலையில், நம்பிக்கை இல்லாத தீர்மானத்தின் மீதான விவாதத்திற்கு பிரதமர் மோடி இன்று பதில் உரை வழங்குகிறார்.

தன் மீதும் மத்திய அரசின் மீதும் எதிர்க்கட்சி எம்.பி.,க்கள் வைத்த குற்றச்சாட்டுகளுக்கு அவர் பதில் அளிப்பார். குறிப்பாக ராகுல் காந்தியின் அடுக்கடுக்கான குற்றச்சாட்டுகளுக்கு பிரதமர் மோடி நிச்சயம் பதிலடி கொடுப்பார் என பா.ஜ.க. வட்டாரங்கள் தெரிவித்தன.

புதுடெல்லி:

மணிப்பூர் விவகாரம் தொடர்பாக பாராளுமன்ற இரு அவைகளிலும் பிரதமர் மோடி விளக்கம் அளிக்க வேண்டும் என எதிர்க்கட்சிகள் தொடர் அமளியில் ஈடுபட்டு வந்தன. மேலும் , பாராளுமன்ற விதி 267இன் படி விரிவான விவாதம் நடத்த வேண்டும் என கோரிக்கை வைத்து வந்தனர்.

மேற்கண்ட கோரிக்கைகளுக்கு பாராளுமன்றத்தில் அனுமதி அளிக்கப்படாததால், மணிப்பூர் விவகாரம் தொடர்பாக மத்திய அரசுக்கு எதிராக நம்பிக்கை இல்லா தீர்மானத்தைக் கொண்டுவந்தனர். இதனை மக்களவை சபாநாயகர் ஓம் பிர்லா ஏற்றுக்கொண்டார்.

இதன் மீதான விவாதம் நேற்று நடைபெற்ற நிலையில், இன்றும் நம்பிக்கை இல்லா தீர்மானத்தின் மீது காரசாரமான விவாதம் நடைபெற்றது. இந்த விவாதத்தில் ராகுல்காந்தி பா.ஜ.க. அரசை விமர்சித்து காட்டமாகப் பேசியிருந்தார். அதனை தொடர்ந்து கனிமொழி எம்.பி உரையாற்றினார்.

இதற்கிடையே, மணிப்பூர் விவகாரம் தொடர்பாக எதிர்க்கட்சிகளின் கேள்விக்கு மத்திய உள்துறை மந்திரி அமித்ஷா மக்களவையில் பதிலளித்தார்.

மேலும், மணிப்பூரில் அனைத்துப் பிரிவினரும் இணைந்து பேச்சுவார்த்தையில் பங்கேற்க வேண்டும் என தீர்மானத்தில் தெரிவிக்கப்பட்ட நிலையில், தீர்மானம் ஒருமனதாக நிறைவேற்றப்பட்டதாக சபாநாயகர் தெரிவித்தார். இதையடுத்து இரு அவைகளும் நாளை காலை 11 மணி வரை ஒத்திவைக்கப்பட்டது.

இந்நிலையில், நம்பிக்கை இல்லாத தீர்மானத்தின் மீதான விவாதத்திற்கு பிரதமர் மோடி நாளை பதில் உரை வழங்குவார் என மத்திய பாதுகாப்பு துறை மந்திரி ராஜ்நாத் சிங் தெரிவித்துள்ளார்.

பிரதமர் மீதும் மத்திய அரசின் மீதும் எதிர்க்கட்சி எம்.பி.,க்கள் வைத்த குற்றச்சாட்டுகளுக்கு அவர் நாளை பதில் அளிப்பார். குறிப்பாக ராகுல் காந்தியின் அடுக்கடுக்கான குற்றச்சாட்டுகளுக்கு பிரதமர் மோடி நிச்சயம் பதிலடி கொடுப்பார் என பா.ஜ.க. வட்டாரங்கள் தெரிவித்தன.