நீங்கள் தேடியது "பன்றிக் காய்ச்சல்"

குடியாத்தம்:

குடியாத்தம் பீமாபுரத்தில் மேல்ஆலத்தூர் ரோட்டை சேர்ந்தவர் கோவிந்தசாமி மகன் ராமமூர்த்தி (வயது43), விவசாயி. இவருக்கு கல்பனா என்ற மனைவி, ஒரு மகள், ஒரு மகன் உள்ளனர்.

இந்த நிலையில் ராமமூர்த்தி கடந்த சில நாட்களாக காய்ச்சலால் பாதிக்கப்பட்டார். உள்ளூர் ஆஸ்பத்திரியில் சிகிச்சை பெற்ற பிறகும், காய்ச்சல் தீவிரமடைந்ததால், வேலூரில் உள்ள தனியார் மருத்துவமனையில் அனுமதிக்கப்பட்டார். தொடர் சிகிச்சை அளித்தும் அவருக்கு காய்ச்சல் குறையவில்லை.

இதையடுத்து, சென்னை பெரும்பாக்கம் சேரன் நகரில் உள்ள தனியார் மருத்துவ மனைக்கு மாற்றப்பட்டார். அங்கு, ராமமூர்த்தியின் ரத்த மாதிரி சேகரிக்கப்பட்டு பரிசோதனை செய்யப்பட்டது. அதில், பன்றிக்காய்ச்சலால் அவர் பாதிக்கப்பட்டிருப்பது உறுதி செய்யப்பட்டது.

இதையடுத்து, தீவிர சிகிச்சை அளிக்கப்பட்டும் பலனின்றி ராமமூர்த்தி பரிதாபமாக உயிரிழந்தார்.

பன்றிக்காய்ச்சலுக்கு விவசாயி பலியான சம்பவம், குடியாத்தம் பகுதியில் உள்ள பொதுமக்களை அச்சமடைய செய்துள்ளது. பீமாபுரத்தில் நகராட்சி நிர்வாகம் தீவிர சுகாதார பணிகளை செய்து வருகிறது.

மேலும், மருத்துவ குழு முகாமிட்டு கிராம மக்களின் ரத்த மாதிரிகளை சேகரித்து பரிசோதனை செய்து வருகின்றனர். மேலும் பலருக்கு காய்ச்சல் இருப்பதும் கண்டறியப்பட்டுள்ளது.

அவர்கள் எதுபோன்ற காய்ச்சலால் பாதிக்கப்பட்டுள்ளனர் என்பது குறித்து மருத்துவக்குழுவினர் தீவிரமாக கண்காணிக்கின்றனர். இதனால் அங்கு பரபரப்பு ஏற்பட்டுள்ளது. #Swineflu

கடலூர்:

கடலூர் மஞ்சக்குப்பம் விவேகானந்தா அவன்யூ பகுதியை சேர்ந்தவர் கோபிநாதன்(வயது 29). என்ஜினீயர்.

இவர் கடலூர் ஊராட்சி ஒன்றிய அலுவலகத்தில் கடந்த 2 ஆண்டுகளுக்கு முன்பு தானே சிறப்பு திட்டத்தின் கீழ் வீடு கட்டிக்கொடுக்கும் பணியில் ஒப்பந்த பணியாளராக இருந்து வந்தார்.

கோபிநாதனுக்கு கடந்த 26-ந்தேதி காய்ச்சல் ஏற்பட்டது. இதையடுத்து அவர் சிகிச்சைக்காக கடலூர் அரசு ஆஸ்பத்திரியில் சேர்க்கப்பட்டார். அங்கு அவருக்கு டாக்டர்கள் சிகிச்சை அளித்தனர்.

இருப்பினும் கோபிநாதனுக்கு காய்ச்சல் குணமடையவில்லை. இதையடுத்து அங்கிருந்து மேல் சிகிச்சைக்காக புதுவையில் உள்ள ஒரு தனியார் ஆஸ்பத்திரிக்கு கொண்டு செல்லப்பட்டார். அங்கு அவரது ரத்த மாதிரியை எடுத்து டாக்டர் பரிசோதனை செய்தனர்.

அதில் அவருக்கு பன்றி காய்ச்சல் இருப்பது தெரியவந்தது. தொடர்ந்து அவருக்கு சிகிச்சை அளித்தனர். ஆனால் அவரது உடல் நிலையில் முன்னேற்றம் ஏற்படவில்லை.

பின்னர் அவர் சென்னையில் உள்ள தனியார் ஆஸ்பத்திரிக்கு அழைத்து செல்லப்பட்டார். அங்கு டாக்டர்கள் தீவிர சிகிச்சை அளித்து வந்தார்கள்.

இந்தநிலையில் சிகிச்சை பலனளிக்காமல் நேற்று கோபிநாதன் பரிதாபமாக இறந்தார்.

கடலூர் மாவட்டத்தில் 650 பேர் காய்ச்சலால் பாதிக்கப்பட்டுள்ளனர். பல்வேறு பகுதிகளில் உள்ள அரசு ஆஸ்பத்திரிகளில் உள்நோயாளிகளாக அனுமதிக்கப்பட்டுள்ளனர்.

கடலூர் அரசு ஆஸ்பத்திரியில் அனுமதிக்கப்பட்டுள்ள 3 பேருக்கு டெங்கு காய்ச்சல் இருப்பது உறுதி செய்யப்பட்டுள்ளது.

புவனகிரியை சேர்ந்த ராஜ்குமார் என்பவர் திருவள்ளுவர் மாவட்டத்தில் பணியாற்றிய போது டெங்கு காய்ச்சலால் பாதிக்கப்பட்டார். தற்போது ராஜ்குமார் உள்பட 3 பேருக்கு கடலூர் அரசு ஆஸ்பத்திரியில் தீவிர சிகிச்சை அளிக்கப்படுகிறது. #Swineflu

திருமலை:

திருப்பதி பகுதியில், ‘ஸ்வைன் புளு’ என்கிற பன்றி காய்ச்சல் பரவி வருகிறது. திருப்பதியை சுற்றியுள்ள பகுதியில் 7 பேருக்கு பன்றி காய்ச்சல் தாக்கம் இருந்தது.

அதில் 3 பேர் திருப்பதி சிம்ஸ் ஆஸ்பத்திரியில் சிகிச்சைக்காக அனுமதிக்கப்பட்டனர். கடந்த 5 நாட்களுக்கு முன்பு கங்காதரநெல்லூர் பகுதியைச் சேர்ந்த ஒரு பெண்ணுக்கு திடீரென காய்ச்சல், இருமல் ஏற்பட்டது.

அவரை, குடும்பத்தினர் மீட்டு சிகிச்சைக்காக திருப்பதி சிம்ஸ் ஆஸ்பத்திரியில் சேர்த்தனர். அங்கு, அவருக்கு ரத்த பரிசோதனை செய்யப்பட்டது.

அதில் அவருக்கு பன்றி காய்ச்சல் தாக்கியிருப்பது உறுதி செய்யப்பட்டது. அந்த பெண்ணுக்கு தீவிர சிகிச்சை அளித்தும், சிகிச்சை பலனின்றி அவர் பரிதாபமாக இறந்தார்.

மேலும் திருப்பதி சிம்ஸ் ஆஸ்பத்திரியில் உதவி மருத்துவ பேராசிரியராக பணியாற்றி வரும் ஒரு டாக்டருக்கும் பன்றி காய்ச்சல் தாக்கியிருப்பது உறுதி செய்யப்பட்டுள்ளது. அதன் எதிரொலியாக திருப்பதியில் சுகாதார நடவடிக்கைகள் தீவிரப்படுத்தப்பட்டுள்ளன. சிம்ஸ் ஆஸ்பத்திரியில் பன்றிக் காய்ச்சலுக்காக தனி வார்டு அமைக்கப்பட்டுள்ளது.

இதுதொடர்பாக திருப்பதி ரெயில் நிலைய மேலாளர் சுபோத்மித்ரா கூறுகையில், ‘‘திருப்பதி வழியாக பல்வேறு ரெயில்களில் பல மாநிலங்களை சேர்ந்த பொதுமக்கள் பயணம் செய்வதால், பலருக்கு பன்றி காய்ச்சல் பரவ வாய்ப்புள்ளது. பொதுமக்கள் நெருங்கி பழகும்போதும், பேசும்போதும் ஒருவரின் எச்சில் மற்றவர் மீது படக்கூடாது. கைக்குலுக்கும்போதும் பன்றி காய்ச்சல் தொற்றுப் பரவ வாய்ப்புள்ளது.

ரெயிலில் பயணம் செய்து விட்டும், வெளியில் சென்று வந்தாலும், மற்றவர்களுக்கு அடிக்கடி கைக் குலுக்கினாலும் உடனே கையை கழுவ வேண்டும். தும்மல் வந்தால் கைக்குட்டையால் மூக்கை மூடி கொள்ள வேண்டும். பன்றி காய்ச்சல் பரவாமல் தடுக்க ரெயில் நிலையத்தில் தடுப்பு நடவடிக்கைகள் தீவிரமாக எடுக்கப்பட்டுள்ளது’’ என்றார். #Swineflu #Swinefludeath