நீங்கள் தேடியது "car accident"

கள்ளக்குறிச்சி:

விழுப்புரம் மாவட்டம் கள்ளக்குறிச்சி அருகே உள்ள இந்திலி காமராஜர்நகரை சேர்ந்தவர் இளையராணி. இவரது வளர்ப்பு மகள் ரமணா (வயது 19), திருநங்கை.

இவர் நேற்று மாலை மொபட்டில் இந்திலி கிராமத்தில் இருந்து டவுன் பகுதிக்கு புறப்பட்டார். சேலம்-சென்னை தேசிய நெடுஞ்சாலையில் சென்றபோது ஒரு வளைவில் திரும்பினார். அப்போது அந்த வழியாக வேகமாக வந்த கார் ஒன்று ரமணா ஓட்டி சென்ற மெபட் மீது மோதியது. பின்னர் அருகில் உள்ள பாலத்திலும் மோதியது.

இதில் தூக்கி வீசப்பட்ட ரமணா சம்பவ இடத்திலேயே பரிதாபமாக இறந்தார். பாலத்தில் கார் மோதியதில் அதன் முன்பகுதி பலத்த சேதம் அடைந்தது. விபத்து ஏற்பட்டதும் காரில் இருந்த டிரைவர் தப்பி ஓடிவிட்டார்.

இதுகுறித்து தகவல் அறிந்ததும் கள்ளக்குறிச்சி சப்-இன்ஸ்பெக்டர் சண்முகம் மற்றும் போலீசார் விரைந்து சென்று விபத்தில் இறந்த ரமணாவின் உடலை மீட்டு பிரேத பரிசோதனைக்காக கள்ளக்குறிச்சி அரசு ஆஸ்பத்திரிக்கு அனுப்பிவைத்தனர். தொடர்ந்து விசாரணை நடத்தி வருகின்றனர். 

ஆத்தூர்:

திண்டுக்கல்லில் நேற்று மாவட்ட தி.மு.க. நிர்வாகிகள் ஆலோசனை கூட்டம் நடைபெற்றது. இக்கூட்டத்தில் கலந்து கொள்வதற்காக வத்தலக்குண்டு தி.மு.க. நகர செயலாளர் சின்னத்துரை, ஒன்றிய செயலாளர் முருகன் உள்பட 5 பேர் ஒரு காரில் வந்தனர்.

கூட்டம் முடிந்த பிறகு மீண்டும் ஊருக்கு திரும்பிக் கொண்டிருந்தனர். ஆத்தூர் அருகில் உள்ள கூலம்பட்டி பிரிவில் சென்று கொண்டிருந்தபோது வத்தலக்குண்டுவில் இருந்து திண்டுக்கல் நோக்கி வந்த கார் டயர் வெடித்தது.

இதனால் அந்த கார் டிரைவர் மோதாமல் இருப்பதற்காக இடது புறம் திருப்பினார். இதில் தி.மு.க. நிர்வாகிகள் சென்ற கார் கட்டுப்பாட்டை இழந்து அருகில் இருந்த பள்ளத்தில் கவிழ்ந்தது.

இதில் காரில் வந்த 5 பேரும் படுகாயம் அடைந்தனர். அவர்கள் வத்தலக்குண்டு மற்றும் தனியார் ஆஸ்பத்திரியில் சிகிச்சைக்காக சேர்க்கப்பட்டுள்ளனர். இது குறித்து செம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

ஒரத்தநாடு:

அதிராம்பட்டினம் பகுதியை சேர்ந்தவர் சண்முகம் (வயது 45). விவசாயி. இவரது மனைவி பரிமளா (38). இருவரும் நேற்று மாலை மோட்டார் சைக்கிளில் தஞ்சை சென்று விட்டு பின்னர் ஊர் திரும்பினர்.

அப்போது ஒரத்தநாடு அருகே பாப்பநாடு பகுதி கடைவீதியில் வந்த போது பின்னால் வேகமாக வந்த கார் மோதி இருவரும் படுகாயம் அடைந்தனர். இருவரையும் மீட்டு பட்டுககோட்டை அரசு மருத்துவமனைக்கு கொண்டு சென்றனர். அங்கு டாக்டர்கள் பரிசோதித்த போது பரிமளா ஏற்கனவே இறந்து விட்டது தெரியவந்தது. இதையடுத்து படுகாயம் அடைந்த சண்முகம் மேல் சிகிச்சைக்காக தஞ்சாவூர் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டார்.

இந்நிலையில் விபத்து ஏற்படுத்திய கார் நிற்காமல் சென்றதை கண்ட அப்பகுதி ரோந்து போலீசார் காரை பின் தொடர்ந்து விரட்டி சென்று பட்டுக்கோட்டை அருகே வீரக்குறிச்சி என்ற இடத்தில் மடக்கி பிடித்தனர். அப்போது கார் டிரைவர் தப்பி ஓடிவிட்டார்.

இதுகுறித்து பாப்பாநாடு போலீசில் சண்முகத்தின் அக்கா வளர்மதி கொடுத்த புகாரின் பேரில் போலீசார் வழக்குப்பதிவு செய்து விசாரித்து வருகின்றனர். விபத்தை ஏற்படுத்திய கார் வேதாரண்யம் பகுதி துளசியாபட்டினத்தை சேர்ந்த ஒருவருடையது என்பது தெரியவந்தது. இதுகுறித்து போலீசார் மேலும் விசாரித்து வருகின்றனர். விபத்தில் இறந்த பரிமளாவுக்கு 2 குழந்தைகள் உள்ளன.

மேட்டூர்:

ஆந்திர மாநிலம், விஜயவாடாவிலிருந்து ஒரு காரில் அய்யப்ப பக்தர்கள் 6 பேர் மேட்டூர் வழியாக சபரிமலைக்கு சென்றனர். இந்த காரை அசோக் என்பவர் ஓட்டி வந்தார்.

இந்த கார் ஈரோடு மாவட்டம் சின்ன பள்ளம் என்ற இடத்தில் சென்ற போது இன்று அதிகாலை 2.30 மணி அளவில் டிரைவர் கட்டுப்பாட்டை இழந்து நிலைதடுமாறி ரோட்டில் ஓரமாக இருந்த புளிய மரத்தின் மீது பயங்கரமாக மோதியது.

இந்த விபத்தில் காரின் முன் பகுதி அப்பளம் போல் நொறுங்கியது. காரில் இருந்த அய்யப்ப பக்தர்கள் அலறல் சத்தம் கேட்டு அக்கம் பக்கத்தினர் ஓடி வந்து பார்த்து போலீசாருக்கு தகவல் தெரிவித்தனர்.

இது குறித்து தகவல் அறிந்து வந்த ஈரோடு அம்மாப்பேட்டை போலீசார் காயமடைந்தவர்களை மீட்டு சேலத்தில் உள்ள தனியார் ஆஸ்பத்திரிக்கு அனுப்பி வைத்தனர்.

இந்த விபத்தில் பலத்த காயம் அடைந்த விஜயவாடா, ராமலிங்கேஸ்வரர் நகரைச் சேர்ந்த தனியார் மருத்துவமனை மேலாளர் ஆஞ்சினேலு (வயது 32) சம்பவ இடத்திலேயே பலியானார். இறந்த ஆஞ்சினேலுக்கு மனைவி, ஒரு மகன், ஒரு மகள் உள்ளனர்.

இந்த விபத்து குறித்து ஈரோடு அம்மாப்பேட்டை இன்ஸ்பெக்டர் குமரேசன் வழக்குப்பதிவு செய்து விசாரணை நடத்தி வருகின்றார்.

பொள்ளாச்சி:

கோவை மாவட்டம் பொள்ளாச்சி வடக்கிபாளையம் போலீஸ் நிலையத்தில் முதல்நிலை போலீசாக உள்ளவர் ஆனந்த் (வயது 36). நேற்று சப்-இன்ஸ்பெக்டர் பொன்னுசாமி, ஏட்டு ஜவஹர்லால் நேரு, ஆனந்த் மற்றும் போலீசார் வடக்கிபாளையத்தில் தடுப்பு வேலி அமைத்து வாகன சோதனையில் ஈடுபட்டனர்.

அப்போது வேகமாக வந்த கார் தடுப்பு வேலியில் மோதியது. மோதிய வேகத்தில் தடுப்பு வேலி பாய்ந்து போலீஸ்காரர் ஆனந்த் மீது மோதியது. இதில் அவர் காயம் அடைந்தார். மற்றவர்கள் சிதறி ஓடி தப்பினர். காயம் அடைந்த ஆனந்த்தை போலீசார் மீட்டு அங்குள்ள தனியார் ஆஸ்பத்திரியில் சேர்த்தனர்.

கார் ஓட்டி வந்தவரிடம் விசாரணை நடத்தியபோது அவர் எஸ். நாகூரை சேர்ந்த கணேஷ்குமார் (23) என்பது தெரியவந்தது. இதனையடுத்து போலீசார் அவரை கைது செய்தனர். கைது செய்யப்பட்ட கணேஷ் குமார் புதுமாப்பிள்ளையாவார். இன்னும் 10 நாளில் திருமணம் நடக்க உள்ளது என்பது குறிப்பிடத்தக்கது.