நீங்கள் தேடியது "car accident"

அரியலூர்:

அரியலூர் கீழப்பளூர் அருகே வாரணவாசி திருச்சி சாலையில் பஸ் நிழற்குடை உள்ளது. இன்று காலை வேலைக்கு செல்லும் தொழிலாளர்கள் மற்றும் பள்ளி மாணவர்கள், பொதுமக்கள் பஸ் ஏறுவதற்காக நிழற்குடையின் கீழ் நின்று கொண்டிருந்தனர்.

அப்போது அந்த வழியாக வந்த கார் நிலைதடுமாறி தாறுமாறாக ஓடி நிழற்குடைக்குள் புகுந்தது. இதில் அங்கு நின்றிருந்த அப்பகுதியை சேர்ந்த தொழிலாளி மருதமுத்து (வயது 70), இளங்கோவன் (55) ஆகியோர் மீது மோதியதில் அவர்கள் சம்பவ இடத்திலேயே பலியாகினர். மேலும் பயணிகள் திருநாவுக்கரசு, சாமிநாதன், கொளஞ்சி, பள்ளி மாணவன் விக்கிரமதி (15) ஆகியோர் பலத்த காயமடைந்தனர்.

இது குறித்த தகவல் அறிந்ததும் அரியலூர் டி.எஸ்.பி. மோகன்தாஸ் மற்றும்கீழப்பளூர் போலீசார் சம்பவ இடத்திற்கு விரைந்து சென்றனர். பின்னர் காயமடைந்த 4 பேரையும் மீட்டு சிகிச்சைக்காக அரியலூர் அரசு ஆஸ்பத்திரிக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. பலியான 2 பேரின் உடல்களும் பிரேத பரிசோதனைக்காக அரியலூர் ஆஸ்பத்திரிக்கு அனுப்பி வைக்கப்பட்டது.

விபத்தை ஏற்படுத்திய காரின் டிரைவர் , சம்பவம் நடந்ததும் காரை அங்கேயே விட்டு விட்டு தப்பியோடிவிட்டார். காரில் கட்சி கொடி கட்டப்பட்டுள்ளது. இதனால் விபத்தை ஏற்படுத்திய நபர் அரசியல் கட்சி பிரமுகராக இருக்கலாம் என தெரியவந்துள்ளது. அவர் யாரென்று விசாரணை நடத்தி போலீசார் தேடி வருகின்றனர்.

விபத்தில் பலியான இளங்கோவனின் பேரன் விக்கிரமதி. இவன் கீழப்பளூரில் உள்ள தனியார் பள்ளியில் 10-ம்வகுப்பு படித்து வருகிறான். அவனை பஸ் ஏற்றி விடுவதற்காக இளங்கோவன் பஸ் நிலையத்திற்கு அழைத்து வந்திருந்தார். இந்தநிலையில் பேரன் கண் முன்பே இளங்கோவன் பலியான சம்பவம் அப்பகுதி பொதுமக்களிடையே பெரும் சோகத்தை ஏற்படுத்தியுள்ளது.

இந்தநிலையில் விபத்தை ஏற்படுத்திய நபர் மீது உரிய நடவடிக்கை எடுக்க கோரியும், வாரணவாசி பயணிகள் நிழற்குடை அருகே வேகத்தடை அமைக்க கோரியும் அப்பகுதி பொதுமக்கள் திடீரென அங்கு சாலை மறியல் போராட்டத்தில் ஈடுபட்டனர். இதனால் அந்த வழியாக போக்குவரத்து பாதிக்கப்பட்டது.

இதையடுத்து போலீசார் பேச்சுவார்த்தை நடத்தினர். அப்போது வேகத்தடை அமைக்க உரிய நடவடிக்கை எடுக்கப்படும் என்று கூறியதையடுத்து பொதுமக்கள் மறியலை கைவிட்டு கலைந்து சென்றனர்.

கும்பகோணம்:

தஞ்சை மாவட்டம் கும்பகோணம் அடுத்த திருவிடைமருதூர் அருகே உள்ள புளியடி மெயின் ரோட்டை சேர்ந்தவர் ராஜகோபால். இவரது மகன் பிரசன்னா(வயது 7). இவன் ஆடுதுறையில் உள்ள ஒரு பள்ளியில் 2-ம் வகுப்பு படித்து வந்தான்.

ராஜகோபாலின் சகோதரி மகன் ஹரிஹரன்(14). இவனும் மாமா வீட்டிலேயே தங்கி 9-ம் வகுப்பு படித்து வருகிறான்.

இந்த நிலையில் நேற்று வீட்டின் அருகே பிரசன்னாவிற்கு, ஹரிஹரன் சைக்கிள் ஓட்ட பழகி கொடுத்தான். அந்த நேரத்தில் கும்பகோணத்தில் இருந்து புதூர் நோக்கி சென்ற கார், பிரசன்னா ஓட்டிக்கொண்டு இருந்த சைக்கிள் மீது மோதியது. இதில் பிரசன்னா படுகாயம் அடைந்தான். ஹரிகரனுக்கு லேசான காயம் ஏற்பட்டது.

படுகாயம் அடைந்த பிரசன்னாவை, உடனடியாக மருத்துவமனைக்கு சிகிச்சைக்காக கொண்டு சென்றனர். ஆனால் செல்லும் வழியிலேயே பிரசன்னா பரிதாபமாக இறந்தான்.

பின்னர் அவனது உடலை, பிரேத பரிசோதனைக்காக கும்பகோணம் அரசு மருத்துவமனைக்கு அனுப்பி வைத்தனர். ஹரிஹரன் கும்பகோணம் அரசு மருத்துவமனையில் சிகிச்சை பெற்று வருகிறான்.

விபத்து நடந்தவுடன் கார் டிரைவர், காரை நிறுத்தாமல் வேகமாக ஓட்டிச் சென்றார். உடனே அந்த பகுதியில் உள்ள வாலிபர்கள், மோட்டார் சைக்கிளில் அந்த காரை பின்தொடர்ந்து விரட்டி சென்று மடக்கி பிடித்து திருநீலக்குடி போலீசில் ஒப்படைத்தனர்.

திருநீலக்குடி போலீஸ் சப்-இன் பெக்டர் அருள்குமார், அவரிடம் விசாரணை நடத்தினார். விசாரணையில், காரை ஓட்டி வந்தது மாந்தை கிராமத்தை சேர்ந்த ஜோஸ்வா(23) என்று தெரியவந்தது. இது குறித்து போலீசார் வழக்குப்பதிவு செய்து ஜோஸ்வாவை கைது செய்தனர்.

காங்கயம்:

திருப்பூர் மாவட்டம் காங்கயம் பொங்கலூர் சக்தி நகரை சேர்ந்தவர் ராமசாமி (வயது 69). ஓய்வு பெற்ற தலைமை ஆசிரியர். இவர் நேற்று மாலை மோட்டார் சைக்கிளில் பொங்கலூருக்கு புறப்பட்டார்.

காட்டூர் பிரிவு வந்தபோது எதிரே ஒரு கார் வந்தது. காருக்கு வழிவிட முயன்றபோது பக்கவாட்டில் மற்றொரு மோட்டார் சைக்கிள் வந்தது. இதில் 3 வாகனங்களும் மோதி விபத்தானது.

இதில் தலைமை ஆசிரியர் படுகாயம் அடைந்தார். கார், மோட்டார் சைக்கிள் ஓட்டுனர்கள் தப்பி விட்டனர். அக்கம் பக்கத்தினர் ராமசாமியை மீட்டு அரசு ஆஸ்பத்திரிக்கு அனுப்பி வைத்தனர்.

ஆனால் செல்லும் வழியிலேயே அவர் பரிதாபமாக இறந்தார். இது குறித்து அவினாசிபாளையம் போலீசார் வழக்குப்பதிவு செய்து விபத்தை ஏற்படுத்திவிட்டு நிற்காமல் சென்ற கார், மோட்டார் சைக்கிள் ஓட்டுனர்களை தேடி வருகிறார்கள்.

இதேபோன்று சேலம் மாவட்டம் எடப்பாடியை சேர்ந்தவர் சேகர் (46). இவர் காங்கயம் பகுதியில் தங்கி தென்னை மட்டை பின்னும் வேலை பார்த்து வந்தார். நேற்று இரவு வேலை முடிந்து வீட்டுக்கு நடந்து வந்தார். அப்போது எதிரே வந்த கார் அவர் மீது மோதியது.

இதில் படுகாயம் அடைந்த சேகரை அக்கம் பக்கத்தினர் மீட்டு காங்கயம் அரசு ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி சேகர் பரிதாபமாக இறந்தார்.

இது குறித்து காங்கயம் போலீசார் வழக்குப்பதிவு செய்து விபத்தை ஏற்படுத்திய கார் ஓட்டுனரை தேடி வருகிறார்கள்.