நீங்கள் தேடியது "Governor banwarilal purohit"

வடமதுரை:

திண்டுக்கல் அருகே தாமரைப்பாடி டாஸ்மாக் குடோனில் இருந்து கடந்த மாதம் 1-ந் தேதி மதுபான பாட்டில்களை ஏற்றிய லாரி சென்றது. வெள்ளபொம்மன்பட்டி பிரிவில் தமிழக வாழ்வுரிமை கட்சியினர் லாரியை மறித்து தீவைத்தனர். இதில் மதுபாட்டில்களுடன் லாரி எரிந்து நாசமானது.

இதுகுறித்து தமிழக வாழ்வுரிமை கட்சியின் நிறுவன தலைவர் வேல்முருகன் உள்பட 7 பேர் மீது வழக்குப்பதிவு செய்யப்பட்டது. இதுதொடர்பாக வழக்கு வேடசந்தூர் கோர்ட்டில் நடந்து வருகிறது.

இந்த வழக்கு விசாரணைக்காக வேல்முருகன் இன்று வேடசந்தூர் வந்தார். கோர்ட்டில் ஆஜராகி விட்டு நிருபர்களிடம் கூறியதாவது:-

காவல் துறையை கையில் வைத்து கொண்டு காட்டு தர்பார் ஆட்சி நடக்கிறது. தமிழகத்தின் சூப்பர் முதல்வராக கவர்னர் பன்வாரிலால் புரோகித் செயல்படுகிறார். அதற்கு தமிழக அரசும் துதிபாடி வருகிறது. பாரதிய ஜனதா உதவியுடன் தமிழக அரசு கைகோர்த்து போராட்டம் நடத்தும் மக்கள் மீது அடக்குமுறையை ஏவி வருகிறது.

இவ்வாறு அவர் கூறினார். #Velmurugan #BanwarilalPurohit

சென்னை:

உலக எம்.ஜி.ஆர். பேரவை பிரதிநிதிகள் மாநாடு சென்னை பல்லாவரம் வேல்ஸ் பல்கலைக்கழக வளாகத்தில் நேற்று காலை தொடங்கியது. மாநாட்டு கொடியை பெருநகர சென்னை மாநகராட்சியின் முன்னாள் மேயர் சைதை துரைசாமி ஏற்றி வைத்து நிகழ்ச்சியை தொடங்கி வைத்தார். பின்னர் அவரும், டாக்டர் எம்.ஜி.ஆர். கல்வி மற்றும் ஆராய்ச்சி பல்கலைக்கழக வேந்தர் ஏ.சி.சண்முகம், வேல்ஸ் பல்கலைக்கழக வேந்தர் ஐசரி கே.கணேஷ், சத்தியபாமா பல்கலைக்கழக வேந்தர் மரியஸீனா (ஜேப்பியார் மகள்), முருக பத்மநாபன், எம்.ஜி.ஆர். வளர்ப்பு மகள் சுதா, முன்னாள் எம்.எல்.ஏ. சமரசம் உள்ளிட்டோரும் குத்துவிளக்கேற்றினர்.

அதைத்தொடர்ந்து பேச்சுப்போட்டி, எம்.ஜி.ஆர். பற்றிய புகைப்பட கண்காட்சி நடந்தது. கவிஞர்கள் புலமைப்பித்தன், முத்துலிங்கம், இசையமுது, பூங்குழலி, அசோக், சுப்பிரமணி, ரவிபாரதி மற்றும் கரு.நாகராஜன் ஆகியோர் பங்கேற்ற சிறப்பு பட்டிமன்றம் நடைபெற்றது.

சிறப்பு விருந்தினராக கவர்னர் பன்வாரிலால் புரோகித் கலந்துகொண்டார். ‘மேயர் சைதை துரைசாமியின் 5 ஆண்டு கால பணிகள்’ என்னும் எஸ்.கே.முருகன் எழுதிய ஆய்வு நூலையும், சைதை துரைசாமி தயாரித்த ‘வேர்களுக்கு வெளிச்சம்’ என்ற நூலையும் கவர்னர் பன்வாரிலால் புரோகித் வெளியிட்டார். இதனை முன்னாள் நீதிபதி ஜெயச்சந்திரன், முன்னாள் கல்வி அமைச்சர் எஸ்.ஆர்.ராதா ஆகியோர் பெற்றுக்கொண்டனர்.

இதையடுத்து எம்.ஜி.ஆர். உடன் பணியாற்றியவர்கள், உதவியாளர்கள், உறவினர்கள் என அவருடைய வாழ்க்கையோடு தொடர்புடைய முகவரி ரமேஷ், காமாட்சி சுப்பிரமணியம், பாலம் கல்யாணசுந்தரம், லீலாவதி (எம்.ஜி.ஆருக்கு சிறுநீரகம் தானமாக வழங்கியவர்), டாக்டர் ராஜாமணி, பழனிசாமி, எம்.கே.ஆர்.ராஜா, டாக்டர் சமரசம், ப.மோகன், மகாலிங்கம், துரை கர்ணா, எம்.பி.நிர்மல், துக்ளக் ரமேஷ், ஜே.பிரபாகரன், நெற்றிக்கண் மணி, மேகலா சித்திரைவேல், ஓய்வுபெற்ற ஐ.ஏ.எஸ். அதிகாரி பிச்சாண்டி, சங்கரசுப்பு, போஸ், நடிகர்கள் விஜயகுமார், ராஜேஷ், பாக்யராஜ் ஆகியோர் கவர்னரால் கவுரவிக்கப்பட்டனர். இதையடுத்து டாக்டர் எம்.ஜி.ஆர். நூற்றாண்டு விழா தூண், கவர்னரால் திறக்கப்பட்டது.

பின்னர் தமிழக கவர்னர் பன்வாரிலால் புரோகித் பேசியதாவது:-

எம்.ஜி.ஆர். அனைத்து தரப்பு மக்களையும் அரவணைத்து ஆட்சி செய்தார். பல்வேறு புதிய மற்றும் உன்னத திட்டங்களை செயல்படுத்தி நாட்டுக்கே வழிகாட்டியாக திகழ்ந்தார். இதுபோன்ற நிர்வாக சாதனைகளால் சாதாரண மக்கள் எம்.ஜி.ஆரை இன்றும் நேசித்து வருகின்றனர்.

எம்.ஜி.ஆரின் மதிய உணவு திட்டத்தால் பள்ளிக்கு செல்லாமல் இடைநின்ற மாணவர்களின் எண்ணிக்கை தற்போது வரையிலும் கணிசமாக குறைந்துள்ளது. இதன்மூலம் பள்ளி கல்வித்துறையில் சாதனை படைக்கும் சிறந்த மாநிலங்களில் பட்டியலில் தமிழகமும் இணைந்திருக்கிறது. உயர்கல்வியில் அவர் கொண்டு வந்த கொள்கைரீதியான மாற்றம் காரணமாக 2 ஆயிரம் கல்லூரிகள் தமிழகத்தில் தோற்றுவிக்கப்பட்டன.

துன்பப்படுபவர்கள் மற்றும் ஒடுக்கப்பட்டவர்கள் பற்றிய அவருடைய கவலை மிகவும் நேர்மையான ஒன்றாக இருந்தது. கர்ணனை பின்பற்றி பெருந்தன்மை மற்றும் இரக்கம் ஆகியவற்றால் ஒரு மாபெரும் கொடை வள்ளலாகவே எம்.ஜி.ஆர். வாழ்ந்து வந்தார். எம்.ஜி.ஆர். அளித்த உதவியால் பலர் வக்கீல்கள், என்ஜினீயர்கள், டாக்டர்கள் மற்றும் அரசியல்வாதிகளாக உருவெடுத்திருக்கிறார்கள்.


எம்.ஜி.ஆர்., மறைந்த ஜனாதிபதி அப்துல் கலாம் ஆகியோர் வாழ்க்கை முழுவதும் சேவையாக செய்து, முன் மாதிரி தலைவர்களாக திகழ்கிறார்கள். அவர்களை வருங்கால தலைமுறை பின்பற்றுவார்கள் என்று நம்புகிறேன்.

இவ்வாறு அவர் பேசினார்.

இதையடுத்து மாநாட்டில் நிறைவேற்றப்பட்ட தீர்மானங்கள் கவர்னரிடம் கொடுக்கப்பட்டது. சென்னை சென்டிரல் ரெயில் நிலையத்துக்கு எம்.ஜி.ஆர். பெயரை சூட்ட வேண்டும் என்ற தீர்மானத்தை மத்திய அரசின் கவனத்துக்கு எடுத்து செல்வதாக கவர்னர் தெரிவித்தார்.

விழாவில் ஐசரி கணேஷ் பேசும்போது, வேல்ஸ் பல்கலைக்கழகத்தில் எம்.ஜி.ஆர். பெயரில் இருக்கை அமைக்கப்படும். கவர்னர் கையால் அந்த இருக்கை தொடங்கி வைக்கப்படும் என்றார்.

எம்.ஜி.ஆர். புகைப்பட கண்காட்சியில் அவர் பயன்படுத்திய கார், தொப்பி, கண்ணாடி உள்ளிட்ட பல்வேறு பொருட்களும் காட்சிக்காக வைக்கப்பட்டிருந்தன. மேலும் சங்கர் கணேசின் இசை நிகழ்ச்சி, திரைப்பட சண்டை பயிற்சி நிபுணர் ஜாக்குவார் தங்கம் குழுவினரின் வீர விளையாட்டு சாகசங்களும் நடந்தது.

மாநாட்டில் இலங்கை கல்வித்துறை மந்திரி ராதாகிருஷ்ணன், முன்னாள் எம்.எல்.ஏ. எஸ்.ஆர்.சுப்பிரமணிய ஆதித்தன், எம்.ஜி.ஆரின் உடை அலங்கார நிபுணர் எம்.ஏ.முத்து, நடிகை லதா, தொழில் அதிபர் வி.ஜி.சந்தோஷம் உள்பட பலர் கலந்து கொண்டனர்.

மாநாட்டில் கவிஞர் வைரமுத்து பேசியதாவது:-

இங்கு கூடியுள்ளவர்கள் எம்.ஜி.ஆரால் பயன்பெற்றவர்கள் மட்டுமல்ல, எம்.ஜி.ஆருக்கும் பயன்பட்டவர்கள். இறந்து 31 ஆண்டுகளுக்கு பிறகும் கூட ஒரு மனிதனின் பெயர் மங்காமல் இருக்கும் பாக்கியம் யாருக்கும் கிடைத்ததில்லை.

3-ம் வகுப்பை தாண்டாத மனிதர், தமிழுக்கு தமிழகத்தில் பல்கலைக்கழகம் வைக்கும் அளவுக்கு உயர்ந்தார். இன்றைக்கு அமெரிக்கா வரைக்கும் பொறியியல் படிப்பில் நம் மாணவர்கள் வளர்ந்து வருகிறார்கள் என்றால், அது எம்.ஜி.ஆர். போட்டுக்கொடுத்த கல்வித்திட்டத்தால் தான்.

எம்.ஜி.ஆருக்கு நான் தீவிர ரசிகன். அவர் தனது சிறிய வயதில் சோற்றுக்கு கஷ்டப்பட்டவர். அதனால் தன்னை தேடி வரும் அனைவரையும் ‘சாப்பிட்டீங்களா?’, என்று கேட்பார். எம்.ஜி.ஆரை பற்றி பாட்டெழுத எனக்கு வாய்ப்பு கிடைக்கவில்லை. நான் எழுதியது, அவருக்கான இரங்கல் பாட்டு மட்டுமே.

இவ்வாறு அவர் பேசினார்.

மாநாட்டில் மாலையில் கவியரங்கம் மற்றும் கலை நிகழ்ச்சிகள் நடைபெற்றது. அதன் பின்னர் கிழக்கு ஆப்பிரிக்காவில் ராஜூ படத்தின் ஆடியோ வெளியிடப்பட்டது.

சைதை துரைசாமி, ஏசி சண்முகம், ஐசரி கணேஷ் ஆகியோர் ஆடியோவை வெளியிட நடிகர்கள் பிரபுதேவா, ஆர்.ஜே.பாலாஜி ஆகியோர் பெற்றுக்கொண்டனர். இந்த படத்திற்கு கவிஞர் வைரமுத்து பாடல்கள் எழுதி இசையமைப்பாளர் டி.இமான் இசை அமைத்துள்ளார்.

மாநாட்டில் நிறைவேற்றப்பட்ட தீர்மானங்களை சைதை துரைசாமி முன்மொழிந்து வாசித்தார்.

தீர்மானங்கள் விவரம் வருமாறு:-

* மும்பை ரெயில் நிலையத்துக்கு ‘சத்ரபதி சிவாஜி’ பெயர் சூட்டியது போன்று, எம்.ஜி.ஆரின் பெயரை சென்னை சென்டிரல் ரெயில் நிலையத்துக்கு மத்திய அரசு சூட்ட வேண்டும்.

* வருகிற ஆண்டு முதல் எம்.ஜி.ஆர். பெயரிலும் தமிழக அரசு விருது வழங்க வேண்டும்.

* எம்.ஜி.ஆரை பற்றி வருங்கால சந்ததியினர் தெரிந்து கொள்ளும் வகையில், அவரை பற்றிய அனைத்து ஆவணங்களையும் முழுமையாக திரட்டி காலப்பெட்டகமாக பாதுகாத்திட வேண்டும்.

* எம்.ஜி.ஆர். பிறந்தநாளான ஜனவரி 17-ந் தேதியை மனிதநேய நாளாக அறிவித்து அரசு ஆண்டுதோறும் கொண்டாட வேண்டும். எம்.ஜி.ஆரின் வாழ்க்கை வரலாற்றை பள்ளி பாடப்புத்தகங்களில் இடம் பெற செய்ய வேண்டும் என்பன உள்ளிட்ட 9 தீர்மானங்கள் நிறைவேற்றப்பட்டன. 

சென்னை:

சென்னையில் உள்ள அரசு பள்ளிகள், அரசு உதவிபெறும் பள்ளிகள், தனியார் பள்ளிகள் என 70 பள்ளிகளின் மாணவ-மாணவிகளுக்கு விழிப்புணர்வை ஏற்படுத்தும் வகையில் அந்த பள்ளிகளுக்கு கவர்னர் மாளிகையில் தயாரிக்கப்பட்ட மண்புழு உரங்களை இலவசமாக வழங்கும் நிகழ்ச்சி சென்னை கிண்டியில் உள்ள கவர்னர் மாளிகையில் நடைபெற்றது. கவர்னர் பன்வாரிலால் புரோகித், பள்ளி தலைமை ஆசிரியர்களிடம் மண்புழு உரங்களை வழங்கி பேசியதாவது:-

மண்புழு உரத்தின் முக்கியத்துவத்தையும், அதை தயாரிக்கும் முறையையும் பள்ளி முதல்வர்கள், தலைமை ஆசிரியர்களுக்கு தெரியப்படுத்துவதின் மூலமாக நீங்கள் பள்ளிகளுக்கு சென்று மண்புழு உரத்தின் அவசியம் குறித்து மாணவ, மாணவிகளுக்கு விழிப்புணர்வு ஏற்படுத்த முடியும் என்பதற்காக இந்நிகழ்ச்சி ஏற்பாடு செய்யப்பட்டுள்ளது. மாணவ-மாணவிகளுக்கு மண்புழு தயாரிக்கும் முறையை தெரியப்படுத்துவதால், சிறுவயதிலேயே நன்கு தெரிந்து கொள்வார்கள். இதை மறக்க மாட்டார்கள்.

சுற்றுச்சூழலை பாதுகாக்கும் வகையில் மரம், செடிகளை வளர்த்து மண், நீர் மற்றும் காற்று மாசுபடாமல் தடுக்க வேண்டும். இயற்கையான முறையில் சாகுபடி செய்யப்படும் பழங்கள், காய்கறிகள் மற்றும் தானியங்களை உண்பதால் நோயில்லாமல் ஆரோக்கியமாக வாழ முடியும். தாவரங்களின் இலை தழைகள் மற்றும் இதர பண்ணை கழிவுகளை மண்ணில் இட்டு சிறிதளவு மக்கச்செய்து அவற்றுடன் ஆடு, மாடுகளின் சாணக்கழிவுகளை கலந்து நிழற்பாங்கான பகுதிகளில் வைத்து மண்புழுக்களை விடுவதால் நமக்கு நல்ல மண்புழு உரம் கிடைக்கிறது.

மண்புழு உரத்தை நிலத்துக்கு இடுவதால் மண்ணில் உள்ள ரசாயனத்தின் அளவு குறைக்கப்பட்டு, மண்ணின் உயிர் தன்மை மேம்படு கிறது. நுண்ணுயிர்களின் அளவு அதிகரிக்கிறது. மண்புழு உரம் மண்ணின் கடின தன்மையை குறைத்து செடிகளின் வேர்கள் நன்கு வளர்வதற்கான காற்றோட்டம், நீர்ப்பிடித்தன்மை, இயற்கை அங்கக தன்மை போன்றவற்றை மேம்படுத்துகிறது. மண்புழு உரத்தில் இயற்கையாகவே உள்ள ஊட்டச்சத்துக்கள் தாவர வளர்ச்சியை ஊக்குவிக்கிறது.

எனவே ரசாயன இடுபொருட்களின் பயன்பாட்டை குறைத்து, மண்புழு உரங்களை பயன்படுத்தி இயற்கை வழியில் உணவு உற்பத்தி செய்து நமது தேக ஆரோக்கியம் மற்றும் சந்ததிகளை காப்போம். வீடுகளில் சேரும் மக்கும் குப்பைகளை பயன்படுத்தி அவரவர் வீடுகளில் இயற்கை உரங்களை பெற்று இயற்கை வழியில் காய்கறிகளை உற்பத்தி செய்து, பயன்பெற வேண்டும்.

இவ்வாறு அவர் பேசினார்.

நிகழ்ச்சியில் கூடுதல் தலைமை செயலாளர் ஆர்.ராஜகோபால், பெருநகர சென்னை மாநகராட்சி துணை ஆணையர் (கல்வி) மகேஸ்வரி ரவிக்குமார் மற்றும் பலர் கலந்து கொண்டனர். 

கோவில்பட்டி:

கோவில்பட்டியில் இந்திய கம்யூனிஸ்ட் மாநில செயலாளர் முத்தரசன் நிருபர்களிடம் கூறியதாவது:-

காவிரி மேலாண்மை ஆணையம் அமைத்தது மத்தியில் ஆளும் பாரதிய ஜனதா அரசு. ஆனால் ஆணையத்துக்கு எதிராக கர்நாடகா முன்னாள் முதல்வர் எடியூரப்பா பேசி வருகிறார். இவர்களது சூழ்ச்சி வலையில் கர்நாடக முதல்வர் சிக்கி கொள்ள கூடாது. உச்சநீதிமன்ற தீர்ப்பை முழுமையாக அமல்படுத்த வேண்டும்.

தூத்துக்குடியில் கடந்த மே 22-ம் தேதி நடந்த துப்பாக்கி சூடு, தடியடி நடந்ததை தொலைக்காட்சியில் பார்த்து தெரிந்து கொண்டதாக சட்டமன்றத்தில் முதல்வர் கூறியிருக்கிறார். அப்படியென்றால் தமிழகத்தில் ஆளுநர் ஆட்சி நடக்கிறதா. துப்பாக்கி சூட்டுக்கு ஆளுநர் உத்தரவிட்டாரா என முதல்வர் தெளிவுபடுத்த வேண்டும்.

மாவட்ட கலெக்டர், காவல் கண்காணிப்பாளர் உட்பட துப்பாக்கி சூடு சம்பவத்தில் ஈடுபட்ட அனைவர் மீதும் கொலை வழக்கு பதிவு செய்ய வேண்டும். துணை வட்டாட்சியர்கள் துப்பாக்கி சூடுக்கு உத்தரவிட முடியாது. இது திட்டமிட்டு நடத்தப்பட்ட படுகொலை. தமிழக அரசு ஸ்டெர்லைட் ஆலையின் அடியாட்களாக காவல்துறையை பயன்படுத்தி உள்ளது.

சம்பவம் நடந்து முடிந்த பின்னர் சில குறிப்பிட்ட அமைப்புகளை சேர்ந்தவர்களை காவல் துறையினர் கைது செய்வதும், வீடுகளுக்கு சென்று பெண்களை அச்சுறுத்துவதும் தொடர்ச்சியாக நடந்து வருவது மீண்டும் பதற்றம் உருவாக்க அரசு முயன்று வருகிறது. மக்கள் அதிகாரத்தை சேர்ந்த வக்கீல் வாஞ்சிநாதன் கைது செய்யப்பட்டு, அவர் வாக்குமூலம் கொடுத்ததாக நீதிமன்றத்தில் தாக்கல் செய்யப்பட்டுள்ளது. இது ஜோடிக்கப்பட்ட வழக்கு. ஸ்டெர்லைட் ஆலை மூடியதால், வேலை வாய்ப்பு இழந்தவர்களுக்கு மாற்று வேலை அளிக்க வேண்டியது அரசின் கடமை.

இந்த பிரச்சனை குறித்து மக்களுக்கு உண்மை நிலை தெரிய வேண்டும் என்றால் உயர்நீதிமன்ற கண்காணிப்போடு சி.பி.ஐ. விசாரணை நடக்க வேண்டும். கைது நடவடிக்கைகளை கைவிட வேண்டும். அப்பாவி மக்கள் விடுதலை செய்யப்பட வேண்டும்.

சேலம் - சென்னை 8 வழி பசுமை சாலை திட்டத்தில் பாதிக்கப்படுகிற விவசாயிகளிடம், பொதுமக்களிடம் கருத்துகளை அறிந்து நடவடிக்கை எடுக்க கூறி வருகிறோம். ஆனால் வருவாய்த்துறை, காவல் துறை மூலமாக அரசு பலவந்தமாக கருங்கல் நடும் பணி நடத்துகிறது. இது மத்திய அரசின் திட்டம். எங்களுக்கும் அதுக்கும் சம்பந்தமில்லை என கூறுவது மாநில முதல்வருக்கு அழகல்ல. இந்த 8 வழி சாலையை மறு பரிசீலனை செய்ய வேண்டும்.

தமிழகத்தில் கிட்டத்தட்ட அறிவிக்கப்பட்ட அவசர நிலை பிரகடனம் அமல்படுத்துவது போல் காணப்படுகிறது. இதனை கண்டித்து சென்னையில் நாளை உண்ணாவிரத போராட்டம் நடக்கிறது. இதில் அனைத்து கட்சி தலைவர்கள் கலந்து கொள்ள உள்ளனர்.
தமிழகத்தில் மாநில சுயாட்சிக்கு எதிராக கவர்னர் பன்வாரிலால் புரோகித் செயல்படுகிறார். அவர், முதல் அமைச்சருக்கு தெரிவிக்காமலேயே, தலைமை செயலாளர் மூலம் பயண திட்டத்தை வகுத்து கொண்டு பல்வேறு ஊர்களிலும் ஆய்வுக்கூட்டம் நடத்துகிறார். இதனை வன்மையாக கண்டிக்கிறேன்.

கவர்னருக்கு கருப்புக் கொடி காட்டினால், 7 ஆண்டு சிறை தண்டனை விதிக்கப்படும் என்று மிரட்டுகிறார்கள். கவர்னர் இனி எங்கு ஆய்வுக்கு சென்றாலும், எனது (முத்தரசன்) தலைமையில் கருப்புக்கொடி காட்டி போராட்டம் நடத்துவோம்.

இவ்வாறு அவர் கூறினார். #Mutharasan #TNGovernor #BanwarilalPurohit

பெரம்பூர்:

உலக சுற்றுச்சூழல் தினத்தை முன்னிட்டு பள்ளி கல்வித்துறை சார்பில், சென்னை வியாசர்பாடி எம்.கே.பி. நகர் அரசு மேல்நிலைப்பள்ளியில் மரக்கன்று நடும் விழா நேற்று நடைபெற்றது.

இதில் தமிழக கவர்னர் பன்வாரிலால் புரோகித் கலந்துகொண்டு மரக்கன்று நட்டு வைத்து, பள்ளி ஆசிரியர்களுக்கு மரக்கன்றுகளை வழங்கினார். பின்னர் மாணவ-மாணவிகள் மத்தியில் கவர்னர் பன்வாரிலால் புரோகித் பேசியதாவது:-
இயற்கை தாய் நமக்கு நிலம், நீர் என பல்வேறு வளங்களை வழங்கி உள்ளார். நமது பாரம்பரியம் 5 ஆயிரம் ஆண்டுகள் பழமை வாய்ந்தது. ஆகவே இயற்கையை நாம் பேணி காக்க வேண்டும். இயற்கையை பாதுகாக்க வேண்டியதுடன், இயற்கை சார்ந்த பொருட்களை சிக்கனமாக பயன்படுத்த வேண்டும்.

தமிழகத்தில் கொண்டாடப்படும் பொங்கல் பண்டிகை, பல்வேறு மாநிலங்களில் பல்வேறு பெயர்களில் இயற்கைக்கு நன்றி கூறும் வகையில் கொண்டாடப்படுகிறது. ஒவ்வொரு ஆண்டும் வெவ்வேறு நோக்கங்களோடு சுற்றுச்சுழல் தினம் கொண்டாடப்படுகிறது.

மாணவர்கள் வகுப்பறையை விட்டு வெளியே செல்லும்போது மின்விசிறி, மின் விளக்கு போன்ற மின்சாதன பொருட்கள் அணைக்கப்பட்டு உள்ளதா? என சரி பார்த்து விட்டு வெளியே செல்ல வேண்டும். மின்சார சேமிப்பு, மிக முக்கியம்.

உலக வெப்பமயமாதல் அதிகரிக்கும் சூழலை பார்க்கிறோம். அதனை கட்டுப்படுத்திடவேண்டும். எனவே மின்சாரத்தை சிக்கனமாக பயன்படுத்த வேண்டும்.

மாணவர்கள், சாதாரணமான வாழ்வையே மேற்கொள்ளவேண்டும். தங்களது தாய், தந்தையை மதிக்கவேண்டும். குடும்ப உறுப்பினர்கள் மீது முதலில் நம்பிக்கை வைக்கவேண்டும்.

கவர்னர் மாளிகையில் இயற்கை உரம் தயாரிக்கப்படுகிறது. அதனை இலவசமாக பெற்று, அதை பயன்படுத்தி மரம் வளர்க்கலாம். நாம் அனைவரும் இயற்கையை பாதுகாக்க வேண்டும் என்றால் எளிமையான வாழ்க்கையை வாழ வேண்டும். இயற்கையை காக்கவேண்டியது நமது கடமை.

இவ்வாறு அவர் பேசினார்.

இதில் பள்ளி கல்வித்துறை முதன்மை செயலாளார் பிரதீப்யாதவ், தலைமை கல்வி அதிகாரி மனோகரன், பள்ளி கல்வித்துறை இயக்குனர் இளங்கோவன் மற்றும் பள்ளி தலைமை ஆசிரியர் கோவிந்தசாமி மற்றும் பள்ளி மாணவ-மாணவிகள் கலந்துகொண்டனர். #TNGovernor #BanwarilalPurohit

நாமக்கல்:

தமிழக கவர்னர் பன்வாரிலால் புரோகித் ஒவ்வொரு மாவட்டமாக சுற்றுப்பயணம் செய்து ஆய்வு மேற்கொண்டு வருகிறார். அதன்படி நேற்று இரவு நாமக்கல்லுக்கு வருகை தந்த அவரை கலெக்டர் ஆசியா மரியம் பூங்கொத்து கொடுத்து வரவேற்றார்.

பின்னர் கவர்னர் இரவு கலெக்டர் அலுவலக பெருந்திட்ட வளாகத்தில் உள்ள பயணியர் சுற்றுலா மாளிகையில் தங்கினார். இன்று காலையில் கவர்னர் பன்வாரிலால் புரோகித் மாவட்டத்தில் நடைபெறும் வளர்ச்சி பணிகள் குறித்து ஆய்வு செய்ய சுற்றுலா மாளிகையில் இருந்து காரில் புறப்பட்டு சென்றார்.

அப்போது மணிக்கூண்டு, அண்ணாசிலை அருகே தி.மு.க. மற்றும் கூட்டணி கட்சிகளை சேர்ந்த 300-க்கும் மேற்பட்டோர் கவர்னரின் ஆய்வுக்கு எதிர்ப்பு தெரிவித்து கருப்புக்கொடி ஏந்தி ஆர்ப்பாட்டத்தில் ஈடுபட்டனர்.

இந்த ஆர்ப்பாட்டத்திற்கு நாமக்கல் கிழக்கு மாவட்ட பொறுப்பாளர் காந்திசெல்வன், மேற்கு மாவட்ட செயலாளரும் எம்.எல்.ஏ.வுமான கே.எஸ்.மூர்த்தி ஆகியோர் தலைமை தாங்கினர்.

இதில் ஒன்றிய செயலாளர்கள் பாலு, நவலடி, மாநில துணை தலைவர் ராணி, முன்னாள் எம்.எல்.ஏ. பொன்னுசாமி, சரஸ்வதி, ராணா ஆனந்த் உள்பட பலர் கருப்பு சட்டை அணிந்து ஆர்ப்பாட்டத்தில் பங்கேற்றனர்.


கவர்னர் ஆய்வுக்கு எதிர்ப்பு தெரிவித்து தி.மு.க.வினர் கோ‌ஷம் எழுப்பினார்கள். அப்போது போலீஸ் அதிகாரிகள் சென்று, நீங்கள் அனுமதி பெறாமல் இங்கே ஆர்ப்பாட்டம் நடத்துகிறீர்கள். கவர்னர் ஆய்வு செய்வதற்கு எதிராக கோ‌ஷம் எழுப்புகிறீர்கள். எனவே உங்களை முன்எச்சரிக்கை நடவடிக்கையாக நாங்கள் கைது செய்கிறோம் என்றனர்.

இதற்கு தி.மு.க.வினர் கடும் எதிர்ப்பு தெரிவித்து போலீசாரிடம் வாக்குவாதத்தில் ஈடுபட்டனர். இதனால் அங்கு பெரும் பரபரப்பு ஏற்பட்டது. இதையடுத்து அங்கு ஏராளமான ஆயுதப்படை போலீசார் குவிக்கப்பட்டனர்.

பின்னர் ஆர்ப்பாட்டத்தில் ஈடுபட்ட தி.மு.க. எம்.எல்.ஏ. கே.எஸ்.மூர்த்தி, 31 பெண்கள் உள்பட 300 பேரை போலீசார் கைது செய்து வேனில் ஏற்றி நாமக்கல்லில் உள்ள ஒரு திருமண மண்டபத்தில் தங்க வைத்தனர்.

மேலும் ஏதேனும் பிரச்சினை ஏற்பட்டு விடாமல் இருக்கும் வகையில் கவர்னரின் காருக்கு முன்னாலும், பின்னாலும் போலீஸ் வாகனங்கள் வரிசையாக அணிவகுத்து சென்றது. அதுபோல் கவர்னர் செல்லும் வழிநெடுகிலும் பலத்த போலீஸ் பாதுகாப்பு போடப்பட்டிருந்தது.

இதையடுத்து நாமக்கல் பஸ் நிலைய வளாகத்தில் தூய்மை இந்தியா ரதம் மற்றும் விழிப்புணர்வு ஊர்வலத்தை கவர்னர் பன்வாரிலால் புரோகித் தொடங்கி வைத்தார். இந்த நிகழ்ச்சியில் அமைச்சர்கள் தங்கமணி, சரோஜ், பி.ஆர்.சுந்தரம் எம்.பி., கலெக்டர் ஆசியாமரியம், கே.பி.பி.பாஸ்கர் எம்.எல்.ஏ. மற்றும் அதிகாரிகள் பலர் கலந்து கொண்டனர்.

இதனை தொடர்ந்து அங்கு சிறப்பு மருத்துவ முகாமை தொடங்கி வைத்து, அனைத்து துறைகளின் சார்பில் அமைக்கப்பட்டு உள்ள கண்காட்சியை பார்வையிட்டார். அப்போது மாவட்ட ஒருங்கிணைந்த குழந்தைகள் வளர்ச்சி பணிகள் துறை சார்பில் அமைக்கப்பட்டு இருந்த அரங்கில் கவர்னரை வரவேற்கும் விதமாக நவதானியங்கள் கொண்டு பொம்மை உருவாக்கப்பட்டு இருந்தது.

இந்த நவதானிய பொம்மையை பார்த்து கவர்னர் மகிழ்ச்சி அடைந்து, துறை ஊழியர்களை பாராட்டினார். பின்னர் தனியார் கல்லூரி சார்பாக ஏற்பாடு செய்யப்பட்டு இருந்த நிகழ்ச்சியில் கவர்னர் பங்கேற்று மாணவர்கள் மத்தியில் பேசினார்.

பிற்பகலில் பயணியர் சுற்றுலா மாளிகையில் அவர் விவசாயிகள், பொதுமக்கள் தொண்டு நிறுவனங்களின் பிரதிநிதிகள், அரசியல் கட்சி பிரமுகர்களிடம் கோரிக்கை மனுக்களை பெற்றார்.

மாலையில் திருச்செங்கோடு காந்தி ஆசிரமத்தில் நடைபெறும் மகாத்மா காந்தியின் 150-வது ஆண்டு பிறந்தநாள் விழாவில் அவர் சிறப்பு அழைப்பாளராக கலந்துகொண்டு பேசுகிறார்.

சென்னையை அடுத்த பல்லாவரத்தில் உள்ள வேல்ஸ் பல்கலைக்கழகத்தில் 8-வது பட்டமளிப்பு விழா பல்கலைக்கழக நிறுவனர் ஐசரி கே.கணேஷ் தலைமையில் நடைபெற்றது. தமிழக கவர்னர் பன்வாரிலால் புரோகித் இதில் கலந்து கொண்டார்.

பட்டமளிப்பு விழாவில் திரைப்பட நடிகரும், இயக்குனருமான பாண்டியராஜன் 1949-முதல் 2000-ம் ஆண்டு வரை தமிழ் திரைப்பட கலைஞர்களின் சமுதாய பங்களிப்பு குறித்து ஆய்வுசெய்து தாக்கல் செய்த கட்டுரைக்கு டாக்டர் பட்டம் (பிஎச்.டி) வழங்குவதாக அறிவிக்கப்பட்டது. நடிகர் பாண்டியராஜனுக்கு தமிழக கவர்னர் பன்வாரிலால் புரோகித் இந்த டாக்டர் பட்டத்தை வழங்கினார். விழாவில் பல்கலைக்கழக துணை தலைவர் ஆர்த்தி கணேஷ் உள்பட பலர் கலந்து கொண்டனர்.

தாம்பரம்:

வேல்ஸ் பல்கலைக்கழக பட்டமளிப்பு விழாவில் இஸ்ரோ தலைவர் கே.சிவன், நடிகர் பாண்டியராஜன் உள்ளிட்டோருக்கு டாக்டர் பட்டம் வழங்கப்பட்டது. தமிழக கவர்னர் பன்வாரிலால் புரோகித் கலந்து கொண்டு பட்டங்களை வழங்கினார்.

சென்னையை அடுத்த பல்லாவரத்தில் உள்ள வேல்ஸ் பல்கலைக்கழகத்தில் 8-ம் ஆண்டு பட்டமளிப்பு விழா நடைபெற்றது. வேல்ஸ் அறிவியல் தொழில்நுட்ப உயர் ஆராய்ச்சி நிறுவனத்தின் நிறுவனரும், பல்கலைக்கழக வேந்தருமான டாக்டர் ஐசரி கே.கணேஷ் தலைமை தாங்கினார். பல்கலைக்கழக துணைவேந்தர் சுவாமிநாதன் அனைவரையும் வரவேற்றார்.

இந்த விழாவில் தமிழக கவர்னர் பன்வாரிலால் புரோகித் கலந்துகொண்டு பட்டங்களை வழங்கினார். இஸ்ரோ தலைவர் கே.சிவன், பாரதீய நபிக்கிய வித்யுட் நிகாம் நிறுவனத்தின் தலைவரும், நிர்வாக இயக்குனருமான கல்லோல் ராய் ஆகியோருக்கு தங்களது துறைகளில் சிறப்பாக செயல்பட்டதற்காக கவுரவ டாக்டர் பட்டம் வழங்கப்பட்டது.

நடிகர் பாண்டியராஜன்

தமிழ் திரைப்பட கலைஞர்களின் சமுதாய பங்களிப்பு தொடர்பான ஆய்வு கட்டுரைக்கு நடிகர் பாண்டியராஜனுக்கும், பல்வேறு துறைகளில் ஆய்வு செய்த 69 பேருக்கும் டாக்டர் பட்டங்கள் வழங்கப்பட்டது.

இந்த விழாவில், வேல்ஸ் பல்கலைக்கழக மாணவ-மாணவிகள் 2 ஆயிரத்து 217 பேர் பட்டங்கள் பெற்றனர். விழாவில் பல்கலைக்கழக திட்டம் மற்றும் வளர்ச்சிக்கான துணைத்தலைவர் ஜோதி முருகன், கல்விக்கான துணைத்தலைவர் ஆர்த்தி கணேஷ், பதிவாளர் வீரமணி, தேர்வு கட்டுப்பாட்டு அலுவலர் வெங்கட்ராமன் உள்பட பலர் கலந்து கொண்டனர். 

புதுடெல்லி:

தமிழக கவர்னர் பன்வாரிலால் புரோகித் கடந்த 2-ந்தேதி இரவு டெல்லி சென்றார். அங்கு 2 நாட்கள் நடந்த கவர்னர்கள் மாநாட்டில் கலந்து கொண்டார்.

இந்த மாநாட்டை ஜனாதிபதி ராம்நாத் கோவிந்த் தொடங்கி வைத்தார். இதில் துணை ஜனாதிபதி வெங்கையா நாயுடு, பிரதமர் மோடி உள்ளிட்டோர் கலந்து கொண்டனர்.

மாநாடு நிறைவடைந்த நிலையில் கவர்னர் பன்வாரிலால் புரோகித் டெல்லியில் மத்திய மந்திரிகளை சந்தித்துப் பேசினார். பின்னர் நேற்று ஜனாதிபதி ராம்நாத் கோவிந்தை மரியாதை நிமித்தமாக சந்தித்தார்.

இன்று பிரதமர் மோடியை கவர்னர் சந்தித்தார். பகல் 11 மணி அளவில் இந்த சந்திப்பு நடந்தது. அப்போது தூத்துக்குடி துப்பாக்கி சூடு சம்பவம், அரசியல் கட்சிகள் போராட்டம், காவிரி மேலாண்மை வாரியம் மற்றும் தமிழக அரசியல் நிலவரங்கள் பற்றி பிரதமரிடம் கவர்னர் எடுத்துக் கூறினார்.

தூத்துக்குடி துப்பாக்கி சூடு சம்பவம் பற்றி பிரதமர் மோடி இதுவரை எந்த கருத்தும் தெரிவிக்கவில்லை, கவர்னர் பன்வாரிலால் புரோகித் தூத்துக்குடி சென்று துப்பாக்கி சூடு மற்றும் கலவரத்தில் பாதிக்கப்பட்டவர்களை நேரில் சந்தித்து ஆறுதல் கூறியதுடன் விவரங்களை கேட்டறிந்தார் என்பது குறிப்பிடத்தக்கது. #PMModi #TNGovernor #BanwarilalPurohit

சென்னை:

சென்னை கிண்டியில் உள்ள கவர்னர் மாளிகை இதுவரை இல்லாத அதிரடி மாற்றங்களை சந்தித்து வருகிறது.

தமிழகத்தின் புதிய கவர்னராக கடந்த அக்டோபர் மாதம் 6-ந்தேதி பதவி ஏற்ற பன்வாரிலால் புரோகித் இந்த அதிரடி மாற்றங்கள் ஒவ்வொன்றையும் அரங்கேற்றி வருகிறார்.

பன்வாரிலால் சென்னை கவர்னர் மாளிகைக்கு வந்ததும் சிக்கனத்துக்குதான் முதலிடம் கொடுத்தார். தேவையில்லாத இடங்களில் குளிர்சாதன பெட்டிகள் இருக்க கூடாது என்று உத்தரவிட்டார். உடனடியாக ஏராளமான ஏ.சி. பெட்டிகள் அகற்றப்பட்டன.

அதுபோல பழைய குண்டு பல்புகளை மாற்றி எல்.இ.டி. விளக்குகளை பொருத்த உத்தரவிட்டார். இதன் காரணமாக கிண்டி கவர்னர் மாளிகையில் மின்சார கட்டண செலவு கணிசமான அளவுக்கு குறைந்தது.

முன்பெல்லாம் கவர்னர் மாளிகையில் சாப்பாடு செலவு மிக கடுமையாக இருக்கும். இதனால் 2015-2016-ம் ஆண்டு கவர்னர் மாளிகை செலவு ரூ. 1.33 கோடியாக இருந்தது. 2016-2017-ம் ஆண்டு அது ரூ.1.43 கோடியாக உயர்ந்தது.

கடந்த ஆண்டு ஏப்ரல் முதல் செப்டம்பர் வரை மட்டும் செலவான தொகை ரூ.1.68 கோடி. அக்டோபர் மாதம் கவர்னராக பொறுப்பு ஏற்ற கவர்னர் பன்வாரிலால் இதை பார்த்ததும் அதிர்ச்சி அடைந்தார்.

கவர்னர் மாளிகையில் உணவு விநியோகம், மின்சாரம், சுற்றுப்பயணம், பராமரிப்பு ஆகியவற்றில் சிக்கனத்தை கடைபிடிக்க முடிவு செய்தார். அதன்படி கவர்னர் மாளிகையில் பெறப்படும் ஒவ்வொரு உணவுக்கும் கட்டணம் செலுத்த வேண்டும் என்ற புதிய நடைமுறையை கொண்டு வந்துள்ளார்.

அதன்படி காலை உணவுக்கு கட்டணமாக ரூ.50 என்று நிர்ணயிக்கப்பட்டுள்ளது. மதியம் மற்றும் இரவு உணவுக்கு தலா ரூ.80 என்று கட்டணம் நிர்ணயிக்கப்பட்டுள்ளது. கவர்னர் தனக்கும், தனது குடும்பத்தினருக்கும் இந்த கட்டணத்தை செலுத்தியே உணவு வகைகளை பெறுவதாக தகவல் வெளியாகி உள்ளது.

கவர்னரின் உறவினர்கள், நண்பர்கள் சென்னை வந்தால் கவர்னர் மாளிகையில் தங்குகிறார்கள். அவர்கள் தங்குவதற்கும், உணவு சாப்பிடுவதற்கும் கவர்னர் பன்வாரிலால் தனது சொந்த பணத்தில் இருந்து கட்டணத்தை கொடுத்து விடுவதாக தெரிய வந்துள்ளது.

டெல்லி மற்றும் வேறு மாநிலங்களில் இருந்து வரும் அரசுத்துறை உயர் அதிகாரிகளுக்கு மட்டுமே கவர்னர் மாளிகையில் உணவை கட்டணமின்றி பெற்றுக் கொள்ள விதி விலக்கு அளிக்கப்பட்டுள்ளது. மற்றபடி கவர்னர் மாளிகை சமையல் கூடத்தில் இருந்து வெளிவரும் ஒவ்வொரு உணவுக்கும் கண்டிப்பாக கட்டணம் வசூலிக்க வேண்டும் என்று கவர்னர் பன்வாரிலால் உத்தரவிட்டுள்ளார்.

மின்சாரம், உணவு போன்று தனது சுற்றுப்பயணத்தையும் கவர்னர் பன்வாரிலால் மிக மிக எளிமையாக்கி உள்ளார். இதற்கு முன்பு கவர்னராக இருந்தவர்கள் டெல்லிக்கு செல்லும்போது விமானத்தில் முதல் வகுப்பில் பயணம் செய்வார்கள். ஆனால் கவர்னர் பன்வாரிலால் சாதாரண வகுப்பு பயணத்தை மேற்கொள்கிறார்.

அதுபோல ரெயில்களில் சொகுசு பெட்டிகளில்தான் கவர்னர்கள் செல்வதுண்டு. ஆனால் பன்வாரிலால் முதல் வகுப்பு குளிர்சாதன பெட்டியை தேர்வு செய்து பயணம் செய்கிறார்.

பெரும்பாலும் கவர்னர்கள் வெளிமாவட்டத்துக்கு செல்லும் போது இந்திய விமானப்படைக்கு சொந்தமான ஹெலிகாப்டர்களை பயன்படுத்துவது உண்டு. அதற்கான கட்டணத்தை கவர்னர் மாளிகையில் இருந்து விமானப்படை கொடுப்பார்கள்.

ஆனால் கவர்னர் பன்வாரிலால் ஹெலிகாப்டர் பயணத்தை முழுமையாக நிராகரித்துள்ளார். இதனால் அத்தகைய செலவுகள் எதுவும் ஏற்படவில்லை.

இதற்கிடையே கவர்னர் மாளிகையில் உள்ள பராமரிப்பிலும் கவர்னர் பல்வேறு மாற்றங்களை கொண்டு வந்துள்ளார். இதனால் அதற்கான மாத செலவும் வீழ்ச்சி அடைந்துள்ளது.

கவர்னர் பன்வாரிலாலின் இத்தகைய நடவடிக்கைகளின் காரணமாக கடந்த ஆண்டு அக்டோபர் மாதம் முதல் கடந்த மார்ச் மாதம் வரை 6 மாதங்களுக்கு வெறும் ரூ.30 லட்சம்தான் செலவாகி உள்ளது. பல லட்சம் ரூபாயை கவர்னர் பன்வாரிலால் தனது சிக்கனத்தால் மிச்சப்படுத்தி கொடுத்துள்ளார். #TNGovernor #Banwarilalpurohit

தூத்துக்குடி:

துப்பாக்கி சூட்டில் காயமடைந்து தூத்துக்குடி அரசு மருத்துவமனையில் சிகிச்சை பெற்று வருபவர்களை கவர்னர் பன்வாரிலால் புரோகித் இன்று சந்தித்து ஆறுதல் கூறினார். அப்போது கவர்னரிடம், ‘அமைதியான முறையில் அறவழியில் போராடிய எங்களிடம் போலீசார் அராஜகமாக நடந்துகொண்டார்கள்.

துப்பாக்கி சூட்டுக்கு காரணமான அதிகாரிகள் மீது நடவடிக்கை எடுக்க வேண்டும்’ என்று குமுறினார்கள். அதை பொறுமையாக கேட்ட கவர்னர் பன்வாரிலால் புரோகித் உரிய நடவடிக்கை எடுக்கப்படும் என்றார்.

முன்னதாக துப்பாக்கி சூட்டில் பலியான சாயர்புரம் செல்வசேகர் வீட்டில் செல்வசேகரின் தாயார் மாசானம் அம்மாள் மற்றும் சகோதரிகள் சாந்தா, சீதா ஆகியோரை சந்தித்து ஆறுதல் கூறினார். அப்போது செல்வசேகர் குடும்பத்தார் கவர்னரிடம், ‘ஸ்டெர்லைட் ஆலையை நிரந்தரமாக மூடவேண்டும்.

ஏற்கனவே முன்பு இது போல் சீல் வைக்கப்பட்டு மூடப்பட்ட ஆலையை கோர்ட்டு உத்தரவு என கூறி திறந்துவிட்டார்கள். இந்த முறை அதுபோல் இல்லாமல் ஸ்டெர்லைட் ஆலையை தூத்துக்குடியை விட்டே அப்புறப்படுத்தவேண்டும்’ என்றனர். #Thoothukudifiring #TNGovernor #Banwarilalpurohit