நீங்கள் தேடியது "Minister Pandiarajan"

தஞ்சாவூர்:

தஞ்சை தமிழ்ப் பல்கலைக் கழகமும், அனைத்திந்திய தமிழ்ச் சங்க பேரவையும் இணைந்து நடத்திய ‘‘தமிழ் சங்கமம்’’ (இந்திய தமிழ்ச் சங்கங்களின் மாநாடு) தஞ்சை தமிழ் பல்கலைக்கழகத்தில் இன்று காலை நடைபெற்றது.

இதில் தமிழ் ஆட்சி மொழி மற்றும் தொல்லியல் துறை அமைச்சர் மா.பா.பாண்டிய ராஜன் கலந்து கொண்டு சிறப்புரையாற்றினார்.

பின்னர் அவர் நிரூபர்களுக்கு பேட்டி அளித்தார். அப்போது அவர் கூறியதாவது:-

உலகத் தமிழ்ச் சங்க கூட்டமைப்பு மாநாடு தஞ்சையில் இன்று நடந்தது. இந்தியாவில் இருக்கும் 50 சங்கங்களின் நிகழ்வாக 3 நாட்கள் மாநாடு நடை பெறுகிறது.

உலக தமிழ் சங்கங்களின் உறுப்பினர் சார்ந்த அமைப்பாக இது உருமாற்றப்பட்டு தொடங்கப்பட்டுள்ளது. தமிழ் நாட்டில் உள்ள 150-க்கும் மேற்பட்ட நல்ல தமிழ் சங்கங்கள், இந்தியாவில் உள்ள 200 தமிழ் சங்கங்கள், உலகம் முழுவதும் உள்ள 100 சங்கங்கள் ஆகியவை ஒருங்கிணைந்து நிறுவன ரீதியாக உறுப்பினர்களை மதுரையில் உள்ள தமிழ் சங்கத்துக்கு தர இருக்கிறோம்.

மறைந்த முதல்-அமைச்சர் ஜெயலலிதாவின் உலக தமிழ் சங்கங்களை உருமாற்றம் தற்போது நடந்து வருகிறது. இதற்கு செயற்குழு, பொதுக் குழு உருவாக்கம் செய்து உருமாற்றப்படுகிறது. இதற்கென ரூ.50 கோடி நிதி ஒதுக்கீடு செய்யப்பட்டுள்ளது. அடுத்த வாரம் முதல்- அமைச்சர் எடப்பாடி பழனிசாமி, ‘தெற்குவை’ திட்டத்தை தொடங்கி வைக்கிறார்.

இவ்வாறு அவர் கூறினார்.

இதையடுத்து நீட் தேர்வு விவகாரத்தில் தமிழ்பெயர்ப்பில் தவறு என்று மத்திய மந்திரி பிரகாஷ் ஜவடேகர் கூறியுள்ளாரே? என்று நிரூபர்கள் கேட்டனர்.

அதற்கு பதில் அளத்த அமைச்சர் பாண்டியராஜன் ‘‘நீட் தேர்வு தமிழில் வினாத்தாள் மொழி பெயர்ப்பு சரியாக உள்ளது. சி.பி.எஸ்.இ. மீது தான் தவறு உள்ளது’ என்றார்.

பேட்டியின் போது தமிழ் பல்கலைக்கழக துணைவேந்தர் பாஸ்கரன் உடன் இருந்தார்.

காஞ்சீபுரம்:

காஞ்சீபுரம் சங்கர மட வளாகத்தில் ஜயேந்திரர் பண்மணிமாலை நூல் வெளியீட்டு விழா நடை பெற்றது. காஞ்சி சங்கராச் சாரியார் விஜயேந்திர சரஸ்வதி சுவாமிகள் நூலை வெளியிட்டு அருளுரை வழங்கினார்.

முதல் பிரதியை அமைச்சர் மா.பா.பாண்டியராஜன், வேளாக்குறிச்சி சத்தியஞான மகாதேவ தேசிய பரமாச் சாரிய சுவாமிகள், மயிலம் பொம்மபுர ஆதினம், சிவஞான பாலய்ய சுவாமிகள் ஆகியோர் பெற்றுக் கொண்டனர். நூலின் தொகுப்பாசிரியர் ராமமூர்த்தி அனைவரையும் வரவேற்றார்.

விழாவில் அமைச்சர் பாண்டியராஜன் பேசியதாவது:-

இந்த விழாவில் கலந்து கொண்டது மிகுந்த மகிழ்ச்சி அளிக்கின்றது. இந்த நூலின் கவிதை வரிகள் பாரதியாரின் கவிதை வரிகள், பிள்ளைத்தமிழ், அபிராமி அந்தாதி போன்றும் வெண்மணி மாலை போன்றும் தொகுக்கப்பட்டுள்ளது.

வரும் அக்டோபர் மாதம் நடைபெறவுள்ள தாமிரவருணி புஷ்கரணி திருவிழா ஒரு சரித்திர நிகழ்வாக அமையும். ஆதினங்கள் மடாதிபதிகள் அனைவரும் ஒன்று கூடி நடத்தும் அற்புத விழாவாக அது அமையும்.

தமிழ்மொழியின் பெருமையை பறைசாற்றும் விதமாக ஆயிரம் தமிழ்ப்படைப்புகளை வெளியிட விழாக்குழுவினர் நடவடிக்கை மேற்கொள்ள வேண்டும். இந்த விழா சிறப்பாக நடைபெற தமிழக அரசு உறுதுணையாக இருக்கும்.

இவ்வாறு அவர் பேசினார்.

இதைதொடர்ந்து அமைச்சர் பாண்டியராஜன் நிரூபர்களிடம் கூறியதாவது:-

நீட் தேர்வு தமிழ் வினாத் தாள் மொழி பெயர்ப்பு விவகார குளறுபடிக்கு தமிழக அரசுதான் காரணம் என மத்திய அமைச்சர் பிரகாஷ் ஜவடேகர் கூறியுள்ளார்.

இந்த வி‌ஷயத்தில் தமிழக அரசு எந்த ஒரு மொழி பெயர்ப்பாளரையும் பரிந்துரை செய்யவில்லை. சி.பி.எஸ்.இ. சார்ந்த வல்லுனர்களை வைத்துத்தான் வினாத் தாளை மொழி பெயர்த்துள்ளனர். இதற்கு முழுப் பொறுப்பு சி.பி.எஸ்.இ.யை சாரும். இதற்கும் தமிழக மொழிபெயர்ப்புத் துறைக்கும் எந்த சம்பந்தமும் இல்லை.

இவ்வாறு அவர் கூறினார்.

நிகழ்ச்சியில் திருப்பனந்தாள் காசிமட திருஞான சம்பந்தர் தம்பிரான் சுவாமிகள், சிதம்பரம் மெளனமடம் சுந்தரமூர்த்தி தம்பிரான் சுவாமிகள், பூனம்பட்டி ஆதினம் ராஜசரவண மாணிக்க வாசக சுவாமிகள், கலவை சச்சிதானந்த சுவாமிகள், கோவை காமாட்சிபுர ஆதினம் சிவலிங்கேஸ்வர சுவாமிகள், சூரியனார் கோயில் ஆதினம் சங்கரலிங்க தேசிக பராமாச்சாரிய சுவாமிகள், டாக்டர் சுதா சேஷைய்யன்,கவிஞர் குருநாதன் ரமணி, வாலாஜாபாத்.பா.கணேசன், வி.சோமசுந்தரம், காஞ்சி பன்னீர்செல்வம் உள்ளிட்ட பலர் கலந்து கொண்டனர். #NeetExam #MinisterPandiarajan

சென்னை:

ம.பொ.சி.யின் மகள் மாதவி பாஸ்கரன் இது தொடர்பாக வெளியிட்டுள்ள அறிக்கையில் கூறி இருப்பதாவது:-

தமிழ்த்தாயின் தவப்பு தலைவர், எல்லைகளையெல்லாம் மீட்டு புதிய தமிழகம் படைத்த போராட்ட வீரர், விடுதலை போராட்ட வீரர் என நாட்டிற்காக சிலம்புச்செல்வர் ம.பொ.சி. செய்த தியாகங்கள் அளவிட முடியாதது. ம.பொ.சி.யின் 113-வது பிறந்த நாள் நாளை 26-ந்தேதி (செவ்வாய்க் கிழமை) சென்னையில் நடைபெற உள்ளது.

எங்களுடைய சிலம்புச் செல்வர் டாக்டர் பத்மஸ்ரீ ம.பொ.சி. அறக்கட்டளை சார்பில் அன்றைய தினம் காலை 9 மணிக்கு தியாகராயநகர் போக் சாலையில் அமைந்தள்ள ம.பொ.சி.யின் உருவச் சிலைக்கு மாலை அணிவிக்கப்படுகிறது.

அன்றைய தினம் மாலை 5 மணிக்கு தியாகராய நகர் பர்கிட் சாலையில் உள்ள ராமகிருஷ்ணா பள்ளி அரங்கத்தில் இல.கணேசன் எம்.பி. தலைமையில் சிலம்புச் செல்வர் ம.பொ.சி.-ஒரு பன்முக பார்வை என்ற தலைப்பில் கருத்தரங்கம் நடக்கிறது.

இதனை தொடர்ந்து தமிழ் வளர்ச்சித்துறை அமைச்சர் கே.பாண்டியராஜன் தலைமையில் இல.கணேசன் எம்.பி., இளங்கோகுமனன், குடத்தை மாலி ஆகியோருக்கு 2018-ம் ஆண்டு ம.பொ.சி. விருது வழங்கப்படுகிறது. இந்த ஆண்டு முதல் ம.பொ.சி.யின் பிறந்த நாளை அரசு விழாவாக கொண்டாட வேண்டும் என்று தமிழக மக்களின் சார்பில் முதல்-அமைச்சர் எடப்பாடி பழனிசாமியை கேட்டுக் கொள்கிறேன்.

இவ்வாறு அவர் கூறியுள்ளார்.

நாளை காலை நடக்கும் கருத்தரங்கை தொழில் அதிபர் வி.ஜி.சந்தோ‌ஷம் குத்து விளக்கேற்றி தொடங்கி வைக்கிறார். ம.பொ.சி. பற்றி கல்வியாளர் வ.வே.சு, திருப்பூர் கிருஷ்ணன், மரபின் மைந்தன் முத்தையா, பர்வீன் சுல்தானா ஆகியோர் பேசுகிறார்கள்.

விழா ஏற்பாடுகளை மாதவி பாஸ்கரன், செந்தில் ம.பொ.சி. செய்துள்ளனர். #Tamilnews

சென்னை:

கவிஞர் கண்ணதாசன் 92-வது பிறந்த நாளையொட்டி சென்னையில் உள்ள அவரது சிலைக்கு அமைச்சர்கள் ஜெயக்குமார், கடம்பூர் ராஜு, பாண்டியராஜன் ஆகியோர் மாலை அணிவித்து மரியாதை செலுத்தினர்.

அப்போது அமைச்சர் பாண்டியராஜன் நிரூபர்களிடம் கூறியதாவது:-

தமிழக கவர்னர் ஒவ்வொரு மாவட்டத்திற்கும் செல்லும்போது தமிழக அரசின் பணிகள், திட்டங்களை வலுப்படுத்துவது மாதிரிதான் உள்ளது.

எந்த இடத்திலும் நாங்கள் தவறு செய்ததாக கவர்னர் சொல்லவில்லை. அரசின் திட்டங்களை மக்களிடம் கொண்டு செல்லும்போது அதிகாரிகள் அளவில் அவர் ஆய்வு செய்வது எங்களை பொறுத்தவரை எந்த பிரச்சினையும் இல்லை.

ஆனால் தி.மு.க.வினர் கவர்னர் செல்லும் இடங்களில் எல்லாம் கருப்பு கொடி காட்டுவதும், எதிர்ப்பு தெரிவிப்பதும் தேவையில்லாதது. சட்டரீதியாகவும் சரி கிடையாது. தார்மீக ரீதியாகவும் சரி கிடையாது. கவர்னர் ராஜ்பவனில் இருந்து கொண்டுதான் பணியாற்ற வேண்டும் என்று நினைப்பது தவறு.

அரசியல் சாசன சட்டப்படி அவருக்கு உள்ள கடமையை அவர் செய்கிறார். தூய்மை இந்தியா திட்டம் போன்றவற்றை மக்களிடம் கொண்டு செல்ல கவர்னர் செயல்படுகிறார்.

முன்னாள் கவர்னர் சென்னாரெட்டியை மாற்ற வேண்டும் என்று மறைந்த முதல்வர் ஜெயலலிதா கூறியதற்கு காரணம் வேறு. அந்த உதாரணம் இந்த கவர்னருக்கு பொருந்தாது.

சென்னாரெட்டி அரசின் திட்டங்களை எதிர்த்தார். இதனால் ஜெயலலிதா எதிர்ப்பு தெரிவித்தார். ஆனால் இப்போதைய கவர்னர் நெகட்டிவ் ஆக எதுவும் சொல்லவில்லை. எங்களை ஊக்கப்படுத்தி தான் வருகிறார்.

பயங்கரவாதிகளை ஒடுக்காவிட்டால் தமிழகம் சுடுகாடாக மாறும் என்று மத்திய மந்திரி பொன்.ராதாகிருஷ்ணன் கூறியிருப்பது ஏற்புடையது அல்ல. உண்மை நிலவரத்துக்கும், அவர் சொல்வதற்கும் சம்பந்தம் இல்லை. தமிழகம் அமைதி பூங்காவாக திகழ்கிறது. பயங்கரவாதிகளை இரும்புகரம் கொண்டு அடக்கி இருக்கிறோம்.

தமிழகத்தில் எத்தனையோ போராட்டங்கள் நடத்தினாலும் முடிந்தவரை வன்முறைகள் இல்லாத நிலைவரை அனுமதிக்கிறோம். ஒரு வருடத்தில் 27 ஆயிரம் போராட்டங்கள் நடந்துள்ளது. இந்தியாவிலேயே அதிக போராட்டம் தமிழகத்தில்தான் நடந்துள்ளது. சட்டம்-ஒழுங்கு சிறப்பாக பேணப்படுகிறது.

எம்.ஜி.ஆர். காலத்தில் தர்மபுரி, கிருஷ்ணகிரி மாவட்டங்களில் இரும்புகரம் கொண்டு ஒடுக்கினார். அந்த நாளில் இருந்து நக்சலைட்டுகள் தலைதூக்க விடாமல் ஜெயலலிதா பார்த்துக்கொண்டார்,

நெல்லூரில் இருந்து நேபாளம் வரை நக்சலைட்டுகள் பரவி இருந்த நிலையிலும் தமிழகத்தில் அவர்களால் தலைவைத்து படுக்க முடியவில்லை. இப்போது கூட முளையிலேயே கிள்ளி எறிந்ததால் தமிழகம் அமைதியாக திகழ்கிறது.

பா.ஜனதா ஆட்சி நடத்தும் மாநிலங்களை விட தமிழகத்தில் குற்றங்களின் எண்ணிக்கை குறைவாகதான் உள்ளது. இது பொன்.ராதாகிருஷ்ணனுக்கு நன்றாகவே தெரியும். ஆனாலும் உண்மைக்கு மாறாக அவர் கூறி வருகிறார்.

சேலம்-சென்னை பசுமை வழி சாலை அமைக்கப்படுவதால் ஏற்படக்கூடிய பாதிப்புகளை விட நன்மைகள்தான் அதிகம். இதில் எவ்வளவு நிலங்கள் சாலைக்காக எடுக்கப்பட உள்ளது போன்ற விபரங்களை ஏற்கனவே முதல்-அமைச்சர் தெளிவுபடுத்தி இருக்கிறார்.

இவ்வாறு அவர் கூறினார். #MinisterPandiarajan