நீங்கள் தேடியது "சஸ்பெண்டு"

தருமபுரி:

தருமபுரி மாவட்டம் பாப்பிரெட்டிப்பட்டி அருகே மஞ்சவாடியில் உள்ள வனப்பகுதியில் சிலர் அரசு அனுமதியின்றி மரங்களை வெட்டினர்.

இதுகுறித்து அந்த பகுதியைச் சேர்ந்த சமூக ஆர்வலர்கள் தாசில்தாரிடம் புகார் தெரிவித்தனர்.

இந்த புகாரின்பேரில் பாப்பிரெட்டிப்பட்டி தாசில்தார் கற்பகவள்ளியின் பரிந்துரையின்பேரிலும், தருமபுரி மாவட்ட கலெக்டர் மலர்விழி உத்தரவின்படி மரங்களை வெட்டி கடத்தலை கண்காணிக்க தவறிய பாப்பிரெட்டிப்பட்டி வருவாய் ஆய்வாளர் சேரன், மஞ்சவாடி கிராம நிர்வாக அலுவலர் ஜெய்சுதா ஆகியோர் சஸ்பெண்டு செய்யப்பட்டனர்.

இந்த சம்பவத்தில் ஈடுபட்டதாக கூறப்படும் தனி வட்டாட்சியர் (பொறுப்பு) செல்வகுமார் மற்றும் கிராம நிர்வாக அலுவலக உதவியாளர் கிருஷ்ணன் ஆகியோர் மீது துறை ரீதியான நடவடிக்கை எடுக்க காத்திருப்போர் பட்டியல் வைக்கப்பட்டு உள்ளனர். #tamilnews

கம்பம்:

தேனி மாவட்டத்தில் 336 அங்கன்வாடி உதவியாளர்கள், 22 குறுஅங்கன்வாடி பணியாளர்கள், 362 குறுஅங்கன்வாடி உதவியாளர்கள் என 720 காலிப்பணியிடங்களை நிரப்ப விண்ணப்பங்கள் பெறப்பட்டது.

மொத்தமுள்ள 8 வட்டாரங்களில் விண்ணப்பங்களை ஆராய்ந்து கம்பம் தவிர மற்ற அனைத்து வட்டாரங்களுக்கும் பணியிடங்களுக்கான நேர்முகத்தேர்வுகள் நடத்தப்பட்டு பயனாளிகளுக்கு பணிநியமன ஆணை வழங்கப்பட்டது. ஒருசில இடங்களில் இரவோடு இரவாக பணி நியமன ஆணை பெண்களிடம் வழங்கப்பட்டதால் அவர்கள் இன்ப அதிர்ச்சி அடைந்தனர்.

ஆனால் கம்பம் வட்டாரத்தில் மட்டும் விண்ணப்பங்களை மாவட்ட நிர்வாகத்திற்கு அனுப்புவதில் முறைகேடு நடந்ததாக குற்றச்சாட்டு எழுந்தது.

ஒருசில விண்ணப்பங்களில் குறிப்பிட்டவற்றை ஒயிட் மார்க் இட்டு முறைகேடாக மாவட்ட நிர்வாகத்திற்கு அனுப்பியதாக கம்பம் வட்டார ஒருங்கிணைந்த குழந்தைகள் வளர்ச்சித்திட்ட அலுவலர் விஜயலட்சுமி மீது புகார் எழுந்தது.

இதுகுறித்து மாவட்ட கலெக்டர் பல்லவிபல்தேவ் நடத்திய விசாரணையில் விஜயலட்சுமியை சஸ்பெண்டு செய்து உத்தரவிட்டார். மேலும் இதில் தொடர்புடைய அலுவலர்களிடம் விசாரணை நடந்துவருவதால் அவர்களிடையே பீதி கிளம்பியுள்ளது.

சென்னை:

சென்னையை சேர்ந்த வக்கீல் எஸ். சாகுல் ஹமீது, இவரது மனைவி ஷிகா சமர்தான். இவரும் வக்கீல் ஆக பணிபுரிகிறார்கள்.

கடந்த மாதம் (ஜூலை) 30-ந்தேதி இவர்கள் இருவரும் சென்னை அண்ணாநகரில் காரில் சென்று கொண்டிருந்தனர். அப்போது ஐகோர்ட்டு நீதிபதியின் கார் இவர்களது காரை முந்திச் சென்றது.

அதை தொடர்ந்து விரட்டிச் சென்ற வக்கீல் சாகுல் ஹமீது தனது காரை நீதிபதியின் கார் முன்பு மறித்து நிறுத்தினார். பின்னர் அவரது கார் டிரைவரை தகாத வார்த்தைகளால் திட்டி தகராறு செய்தனர்.

அப்போது காரில் நீதிபதி இருந்தார். அங்கு அவர் இருப்பது தெரிந்தும் அவர்கள் இத்தகைய செயலில் ஈடுபட்டதாக குற்றம் சாட்டப்பட்டுள்ளது. வக்கீல் தம்பதியின் இந்த நடவடிக்கையை ரோட்டில் கூடியிருந்த பொதுமக்களும் மற்ற வாகன ஓட்டிகளும் வேடிக்கை பார்த்தனர்.

அத்துடன் விடாமல் சம்பவம் நடந்த 3 நாள் கழித்து நீதிபதியின் வீட்டுக்கு சென்று கார் டிரைவருடன் அவர்கள் மீண்டும் தகராறில் ஈடுபட்டனர். அந்த நேரம் கோர்ட்டுக்கு செல்ல நீதிபதி தயாராகி கொண்டிருந்தார்.

இச்சம்பவங்கள் குறித்து தமிழ்நாடு மற்றும் புதுச்சேரி வக்கீல்கள் சங்கத்தில் நீதிபதியின் பெர்சனல் பாதுகாப்பு அதிகாரி புகார் செய்தார். இதுகுறித்து அட்வகேட் ஜெனரல் விஜய் நாராயணன், சீனியர் கவுன்சில் ஆர். சிங்கார வேலன் மற்றும் வக்கீல் சந்திரசேகரன் தலைமையிலான சிறப்பு கமிட்டி விசாரணை நடத்தியது.

முடிவில் வக்கீல் தம்பதி ஷாகுல்ஹமீது, ஷிகா சமர்தான் ஆகியோரை 15 நாள் சஸ்பெண்டு (தற்காலிக பணி நீக்கம்) செய்து உத்தரவிட்டனர். இக்கால கட்டத்தில் இவர்கள் நாட்டில் உள்ள எந்த கோர்ட்டிலும் நடுவர் மன்றங்களிலும் பணிபுரிய முடியாது.

சிறப்பு கமிட்டியின் சஸ்பெண்டு நடவடிக்கை உத்தரவு நகல் வக்கீல் சங்க செயலாளர் எஸ்.ராஜ்குமார் மூலம் சாகுல் ஹமீது, ஷிகா சமர்தான் தம்பதிக்கு வழங்கப்பட்டது.

அதில் வக்கீல் தம்பதியரின் இத்தகைய நடவடிக்கை மதிப்புமிக்க நீதிபதிகள் மற்றும் நீதித்துறையின் மீதான ஒட்டு மொத்த மதிப்பையும், நம்பிக்கையையும் பாழ்படுத்தியுள்ளது. எனவே அவர்கள் சஸ்பெண்டு செய்யப்படுவதாக கூறப்பட்டுள்ளது.

மேலும் நீதிபதி கார் டிரைவருடன் ஏற்பட்ட தகராறு குறித்த புகாருக்கு சிறப்பு கமிட்டியில் 15 நாட்களுக்குள் பதில் அளிக்க அவர்களுக்கு கால அவகாசம் வழங்கப்பட்டுள்ளது. பதில் அளிக்க தவறினால் இந்த விவகாரம் ஒழுங்கு நடவடிக்கை குழுவுக்கு அனுப்பப்படும்.

கடலூர் மாவட்டம் சிதம்பரம் நகராட்சியில் கடந்த 2012-17-ம் ஆண்டில் வீடுகளுக்கு புதிதாக மீட்டருடன் குடிநீர் இணைப்பு கொடுப்பதற்காக ரூ.1  கோடியே 31 லட்சம் நிதி ஒதுக்கப்பட்டது.

இதில் பல்வேறு முறைகேடுகள் நடந்துள்ளதாக லஞ்ச ஒழிப்பு போலீசாருக்கு புகார்கள் வந்தன. இது குறித்து அவர்கள் விசாரணை நடத்தினர். அதில் பல்வேறு தகவல்கள் வெளியாகின.

சிதம்பரம் நகராட்சியில் ஏற்கனவே 5 ஆயிரத்து 300 இணைப்புகள் இருந்தன. ஆனால், புதிதாக இணைப்பு கொடுக்கப்பட்டுள்ளதாக கணக்கு காண்பித்து அதற்கான பணம் முறைகேடு செய்யப்பட்டது தெரிய வந்தது.

அதேபோல் சிதம்பரம் கனகசபை, பஸ் நிலையம் பகுதிகளில் நீர் உந்துநிலையம் அமைக்க ரூ.11 லட்சத்து 49 ஆயிரம் ஒதுக்கப்பட்டது. இதில் குடிநீர் அளவீட்டு கருவிகள் பொருத்தப்படவில்லை.

நல்லாம்புத்தூரில் சேதமடைந்துள்ள ஆழ்துளை கிணற்றை சீரமைத்து பயன்பாட்டுக்கு கொண்டு வர ரூ.4 லட்சத்து 23 ஆயிரம் ஒதுக்கப்பட்டது. ஆனால் ஆழ்துளை கிணற்றை சீரமைக்காமலேயே சீரமைத்ததாக கணக்கு காண்பித்து அதற்குரிய செலவின தொகை பெறப்பட்டுள்ளது.

பழுது மற்றும் பராமரிப்புக்காக ரூ.1 கோடியே 36 லட்சம் ஒதுக்கப்பட்டது. இதில் தரமற்ற பொருட்கள் பொருத்தப்பட்டுள்ளன. தேவைப்படும் இடத்தில் பொருத்த வேண்டிய குடிநீர் வால்வுகள் அமைக்கப்படவில்லை.

சிதம்பரம் நகராட்சியில் குடிநீர் அபிவிருத்தி திட்டத்துக்காக ஒதுக்கப்பட்ட தொகையில் மொத்தம் ரூ.3½ கோடி அளவில் மோசடி நடந்துள்ளது தெரிய வந்தது.

இதனை தொடர்ந்து குடிநீர் வடிகால் வாரிய சிதம்பரம் உதவி செயற்பொறியாளர்கள் அசோகன், பாண்டியன், விஜயகுமார், உதவி பொறியாளர்கள் விஜயலட்சுமி, காசிநாதன், சென்னை நெசப்பாக்கம் அன்னை சத்யா நகரை சேர்ந்த தனியார் ஒப்பந்ததாரர் ஆகிய 6 பேர் மீது லஞ்ச ஒழிப்பு போலீசார் வழக்குப்பதிவு செய்து விசாரணை நடத்தினர்.

இதற்கிடையே இந்த மோசடி தொடர்பாக 5 அதிகாரிகள் சஸ்பெண்டு செய்யப்பட்டுள்ளனர்.

பாட்னா:

பீகார் மாநிலம் பாட்னாவில் சாலையோரம் வியாபாரம் செய்பவர்களிடம் போலீசார் கட்டாய மாமூல் வசூலில் ஈடுபட்டனர். அப்போது ஒரு சிறுவன் இப்போது தான் வந்தேன் வியாபாரம் ஆகவில்லை என்றான்.அப்படியானால் காய்கறியாக கொடு என்று கேட்டனர். அதற்கு சிறுவன் மறுத்து விட்டான். இதையடுத்து சிறுவன் மீது போலீசார் வழக்குப்பதிவு செய்து சிறையில் அடைத்தனர்.

போலீசாரின் இந்த செயல் குறித்து சிறுவனின் தந்தை முதல்-மந்திரி நிதிஷ்குமாருக்கு கடிதம் எழுதினார். அவர் உடனே விசாரித்து நடவடிக்கை எடுக்க உத்தரவிட்டார். இதையடுத்து பாட்னா ஐ.ஜி. நய்யார் உசைன்கான் இதுபற்றி விசாரிக்க 3 பேர் குழுவை நியமித்தார். அவர்கள் விசாரணை நடத்தி ஐ.ஜி.யிடம் அறிக்கை தாக்கல் செய்தனர். இதில் சிறுவனுக்கு எதிராக போலீசார் விதியை மீறி முதல் தகவல் அறிக்கை பதிவு செய்து சிறையில் அடைந்து இருப்பதாக தெரிவிக்கப்பட்டு இருந்தது.

இதையடுத்து சம்பந்தப்பட்ட 2 போலீஸ் நிலைய அதிகாரிகள் உள்பட 11 போலீஸ்காரர்களை சஸ்பெண்டு செய்து ஐ.ஜி. உத்தரவிட்டார். மேலும் மத்திய சிறையில் அடைக்கப்பட்டு இருந்த சிறுவனை விடுதலை செய்து சிறுவர் சீர்திருத்தப் பள்ளியில் சேர்க்கவும் உத்தரவிடப்பட்டது. #patnapolice

தண்டராம்பட்டு:

திருவண்ணாமலை மாவட்டம் தண்டராம்பட்டு அருகில் உள்ள ராதாபுரத்தில் தொடக்க வேளாண்மை கூட்டுறவு வங்கி உள்ளது. இதில் நடந்து முடிந்த தேர்தலுக்கு முன்பு ஏ.சி. கணேசன் என்பவர் தலைவராக இருந்தார்.

அப்போது செயலாளராக கோழாப்பாடியை சேர்ந்த முருகனும், காசாளராக அகரத்தை சேர்ந்த சுதாகரும், நகை மதிப்பீட்டாளராக தினக்கூலி அடிப்படையில் சிறுபாக்கத்தை சேர்ந்த குமாரும், விற்பனையாளராக சேர்ப்பாப்பட்டு பகுதியை சேர்ந்த சேகர் என்பவரும் பணியாற்றி வந்தனர்.

அப்போது அவர்கள் பணி காலத்தில் போலி நகை அடமானம் வைத்து ரூ.49 லட்சம் வரை மோசடி செய்யப்பட்டுள்ளதாகவும், வாடிக்கையாளர்களின் வைப்புத்தொகையில் இருந்து ரூ.10 லட்சமும், போலியாக சிலர் பேரில் பயிர்க்கடன் ரூ.13 லட்சம் பெற்று உள்ளதாகவும் இவர்கள் மீது தொடர்ந்து பல்வேறு புகார்கள் வந்தன.

இந்த முறைகேடுகள் சம்பந்தமாக சே.கூடலூரை சேர்ந்த கூட்டுறவு கடன் சங்கத்தை சேர்ந்த முன்னாள் தலைவர் சக்கரவர்த்தி கலெக்டர், கூட்டுறவு இணை பதிவாளர், துணை பதிவாளர் ஆகியோரிடம் புகார் செய்தார்.

இதுகுறித்து கலெக்டர் கந்தசாமி விசாரணை நடத்த அதிகாரிகளுக்கு உத்தரவிட்டார். இதையடுத்து அதிகாரிகள் விசாரணை நடத்தி, மோசடியில் ஈடுபட்ட செயலாளர் முருகன், காசாளர் சுதாகர், நகை மதிப்பீட்டாளர் குமார் ஆகியோரை சஸ்பெண்டு செய்து உத்தரவிட்டனர்.

விற்பனையாளர் சேகரிடம் விசாரணை நடத்தி வருகின்றனர்.

கோவை:

கோவையில் அரசு மருத்துவக்கல்லூரி மருத்துவமனை உள்ளது. இங்கு கோவை மட்டுமன்றி திருப்பூர், ஈரோடு, நீலகிரி, உள்ளிட்ட மாவட்டங்களை சேர்ந்த நோயாளிகள் சிகிச்சைக்கு வந்து செல்கிறார்கள்.

தற்கொலை மற்றும் விபத்தில் சிக்கி உயிரிழப்பவர்கள் உடல் பிரேத பரிசோதனை செய்யப்பட்டு உறவினர்களிடம் ஒப்படைக்கப்படுகிறது. அவ்வாறு பிரேத பரிசோதனை செய்யப்பட்ட ஒரு உடலை பிணவறையில் இருந்து வெளியே எடுத்து வந்து உறவினர்களிடம் அங்கு வேலை பார்க்கும் ஊழியர் லஞ்சம் கேட்பது போன்ற வீடியோ தற்போது வைரலாக பரவி வருகிறது. ஊழியர் லஞ்சம் கேட்கும்போது அருகில் போலீஸ்காரர் ஒருவர் நிற்கும் காட்சியும் அதில் பதிவாகி உள்ளது.

கோவை அரசு ஆஸ்பத்திரியில் பிரேத பரிசோதனை முடிந்து உறவினர்களிடம் உடலை ஒப்படைக்கும்போது 2 ஆயிரம், 3 ஆயிரம் பணம் கேட்பதாக ஏற்கனவே புகார் வந்து இருந்தது.

இந்த நிலையில் பிணத்தை ஒப்படைக்க போலீசார் முன்னிலையில் ஊழியர் லஞ்சம் கேட்ட விவகாரம் பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது.

இதுகுறித்து அரசு ஆஸ்பத்திரி டீன் அசோகனிடம் புகார் தெரிவிக்கப்பட்டது. அவர் விசாரணை நடத்தினார். அப்போது லஞ்சம் கேட்டது அரசு ஆஸ்பத்திரியில் துப்புரவு ஊழியராக வேலை பார்த்து வரும் பரமசிவம்(42) என்பது தெரிய வந்தது. அவரை சஸ்பெண்ட் செய்து டீன் அசோகன் உத்தரவிட்டார். பரமசிவம் லஞ்சம் கேட்டபோது அங்கு இருந்த போலீசார் மீது துறைரீதியான நடவடிக்கை எடுக்கப்படும் என தெரிகிறது.

கோவை:

கோவை பீளமேடை சேர்ந்தவர் ரமேஷ்(வயது 46). இவர் அடிதடி வழக்கில் கடந்த மாதம் 5-ந் தேதி கைது செய்யப்பட்டு கோவை மத்திய ஜெயிலில் அடைக்கப்பட்டார்.

பேரூர் பரட்டையம்மாள் கோவில் தெருவை சேர்ந்தவர் விஜய்(19). இவர் அதே பகுதியை சேர்ந்த ஒருவரை தாக்கி கொலை மிரட்டல் விடுத்த புகாரில் கடந்த 25-ந் தேதி கைது செய்யப்பட்டார்.

ரமேஷ் சிறிது மனநலம் பாதிக்கப்பட்டவர் என கூறப்படுகிறது. டாக்டர்கள் அறிவுரைப்படி தினமும் மருந்து, மாத்திரைகள் சாப்பிட்டு வருகிறார். விஜய் குடிப்பழக்கத்துக்கு அடிமையாகி மருந்து சாப்பிட்டு வருகிறார். விசாரணை கைதிகளான இருவரும் கோவை மத்திய ஜெயிலில் 3-வது பிளாக்கில் தனித்தனி அறைகளில் அடைக்கப்பட்டிருந்தனர். நேற்று மதிய உணவுக்காக கைதிகள் திறந்து விடப்பட்டனர்.

அப்போது கழிவறை சென்று விட்டு வந்த விஜய், ரமேஷ் இடையே தகராறு ஏற்பட்டது. வாக்குவாதம் முடிந்த பின் ரமேஷ் 3-வது பிளாக் அருகே திண்ணையில் படுத்திருந்தார். அங்கு சென்ற விஜய் கீழே கிடந்த பெரிய கல்லை எடுத்து ரமேசை தாக்கினார். அவரது அலறல் சத்தம் கேட்டு ஓடி வந்த ஜெயில் ஊழியர்கள் ரமேசை மீட்டு அரசு ஆஸ்பத்திரிக்கு அழைத்து சென்றனர். வழியிலேயே ரமேஷ் இறந்தார்.

இதுகுறித்து ஜெயிலர் தர்மலிங்கம் கொடுத்த புகாரின் பேரில் ரேஸ்கோர்ஸ் போலீசார் வழக்குப்பதிவு செய்து விசாரணை நடத்தினர். இதற்காக ஜெயிலுக்குள் சென்ற போலீசார் சக கைதிகள் மற்றும் சம்பவத்தை நேரில் பார்த்த சிறை ஊழியர்கள், சக கைதிகளிடம் விசாரணை நடத்தி வருகின்றனர்.

ஜெயிலில் கைதிகளுக்குள் நடந்த மோதல் சம்பவம் பரபரப்பை ஏற்படுத்தியது. இது குறித்து துறை ரீதியாக விசாரணை நடத்தி நடவடிக்கை எடுக்க சிறைத்துறை டி.ஐ.ஜி. அறிவுடைநம்பி உத்தரவிட்டார். அதன்பேரில் ஜெயில் சூப்பிரண்டு செந்தில்குமார் விசாரணை நடத்தினார்.

மோதல் சம்பவம் நடந்த போது தலைமை வார்டன் முனுசாமி (49), வார்டன் ஆதி கருப்பசாமி(27) ஆகியோர் 3-வது பிளாக்கில் பணியில் இருந்துள்ளனர். அவர்கள் பணியில் கவனக்குறைவாக இருந்தததாக கூறி இருவரையும் சஸ்பெண்டு செய்து எஸ்.பி. செந்தில்குமார் நடவடிக்கை எடுத்துள்ளார்.

இதுகுறித்து போலீஸ் அதிகாரிகள் கூறியதாவது:-

கோவை மத்திய ஜெயிலில் மொத்தம் 1768 கைதிகள் உள்ளனர். இதில் விசாரணை கைதிகள் 807 பேர் ஆவர். நேற்றைய சம்பவத்தில் ரமேசுக்கும், விஜய்க்கும் இடையே முன்விரோதம் எதுவும் இல்லை. விஜய் கழிவறை சென்று விட்டு திரும்பிய போது ரமேஷ் அவரது தாயாரை பற்றி தகாத வார்த்தைகளால் திட்டி உள்ளார்.

இதனால் விஜய் ஆவேசமடைந்து ரமேசை தாக்கியது முதற்கட்ட விசாரணையில் தெரிய வந்துள்ளது. தொடர்ந்து விசாரணை நடத்தி வருகிறோம்.

இவ்வாறு அவர்கள் கூறினர்.

இதற்கிடையே, மோதல் சம்பவத்தை தொடர்ந்து கோவை மத்திய ஜெயிலில் பாதுகாப்பு பலப்படுத்தப்பட்டுள்ளது.

கொலை செய்யப்பட்ட ரமேஷ் உடல் இன்று பிரேத பரிசோதனை செய்யப்பட்டு உறவினர்களிடம் ஒப்படைக்கப்படுகிறது. #tamilnews

திருச்சி:

திருச்சி மாவட்டம் துறையூர் அரசு ஆஸ்பத்திரியில் உள்ள பிணவறையில் பிரேத பரிசோதனைக்கு உட்படுத்தப்பட்ட உடலை மருத்துவப் பணியாளர் அல்லாத ஒருவர் ஊசியால் தைப்பது போன்ற வீடியோ கடந்த 2 நாட்களாக சமூக வலைதளங்களில் வைரலாக பரவி வருகிறது. மேலும் மருத்துவப் பணியாளர் அல்லாத ஒருவர் இது போன்ற பணிகளில் ஈடுபடுத்தப்பட்டது சர்ச்சையையும் ஏற்படுத்தியது.

இதையடுத்து கலெக்டர் ராசாமணி உத்தரவின் பேரில் மாவட்ட மருத்துவம் மற்றும் ஊரக நலப்பணிகள் இணை இயக்குநர் சம்‌ஷத் பேகம் தலைமையிலான குழுவினர் துறையூர் அரசு ஆஸ்பத்திரிக்கு சென்று இது தொடர்பாக விசாரணை மேற்கொண்டனர்.

அப்போது வீடியோ வில் இருந்த நபர் ஆஸ்பத் திரியில் ஒப்பந்த சலவைத் தொழிலாளியாக பணி புரியக்கூடிய வீரமணி (வயது 52) என்பதும், மருத்துவர்கள் பிரேத பரிசோதனை செய்தவுடன் அந்த உடலின் பாகங்களை ஒன்று சேர்த்து தைக்ககூடிய பணியில் மருத்துவப் பணியாளர்களுக்கு பதிலாக இவர் அப்பணியை செய்து வந்ததும் தெரியவந்தது.

இதைத்தொடர்ந்து எத்தனை நாட்களாக இது போன்று நடைபெற்று வருகிறது. தவறு செய்த மருத்துவப் பணியாளர்கள் யார் யார் என்பன உள்ளிட்ட விவரங்கள் குறித்து விசாரணை மேற்கொள்ளப்பட்டது. அதனடிப்படையில் தற்போது 3 மருத்துவப் பணியாளர்கள் பணியிடை நீக்கம் செய்யப்பட்டுள்ளனர்.

இது தொடர்பாக மருத்துவம் மற்றும் ஊரக நலப்பணிகள் துறை அதிகாரிகள் கூறும் போது, மருத்துவமனையில் பணியாற்றக்கூடிய சில மருத்துவப் பணியாளர்கள் தாங்கள் செய்ய வேண்டிய வேலையை சலவைத் தொழிலாளியைக் கொண்டு செய்தது உறுதி செய்யப்பட்டுள்ளது.

எனவே முதல்கட்டமாக 3 பேர் பணியிடை நீக்கம் செய்யப்பட்டுள்ளனர். இது தொடர்பாக விரிவான அறிக்கையை உயரதிகாரிகளுக்கு அனுப்பி வைக்கப்பட்டுள்ளது. இதனடிப்படையில் மேலும் சிலர் மீதும் நடவடிக்கை எடுக்க வாய்ப்புள்ளது என்றனர்.