நீங்கள் தேடியது "slug 102009"

சென்னை:

சென்னை கந்தன்சாவடி மருத்துவமனையில் கட்டுமான பணியின்போது இரும்பு சாரம் சரிந்த இடத்தை தமிழக அரசின் சுகாதாரத்துறை முதன்மை செயலாளர் ராதாகிருஷ்ணன் இன்று பார்வையிட்டார்.

பின்னர் அவர் நிருபர்களிடம் கூறியதாவது:-

நேற்றையதினம் இரவு சுமார் 7.15 மணி அளவில் ஏற்பட்ட இந்த விபத்து பற்றி அறிந்ததும் அனைத்து துறை அதிகாரிகளும் விரைந்து செயல்பட்டு மீட்பு பணிக்கு உதவினார்கள்.

இடிபாடுகளில் சிக்கியவர்களில் பப்லு என்பவர் உயிர் இழந்தார். 33 பேர் உயிருடன் மீட்கப்பட்டு தொடர் சிகிச்சையில் உள்ளனர். மேலும் 5 பேர் புறநோயாளியாக சிகிச்சை பெற்றுள்ளனர். 16 பேர் அப்பல்லோ ஆஸ்பத்திரியில் உள் நோயாளியாக உள்ளனர்.

படுகாயம் அடைந்தவர்களுக்கு ஆகும் செலவை அரசே ஏற்கும் என முதல்- அமைச்சர் கூறி உள்ளார். எனவே தனியார் ஆஸ்த்திரியில் சிகிச்சை பெற்று வருபவர்களை அங்கிருந்து மாற்ற வேண்டாம் என்று நேற்று இரவு தெரிவிக்கப்பட்டுள்ளது.

3 ஆம்புலன்ஸ் வண்டிகள் தொடர்ந்து தயார் நிலையில் உள்ளது. இது ஒரு தனியார் மருத்துவமனை கட்டிடம். இந்த கட்டிடத்துக்கு அனுமதி பெற்று இருக்கிறார்களா? என்பதை சம்பந்தப்பட்ட துறை அதிகாரிகள் ஆய்வு செய்வார்கள்.

இவ்வாறு அவர் கூறினார்.

காஞ்சீபுரம் கலெக்டர் பொன்னையா கூறுகையில், “கட்டிட விபத்து குறித்த விசாரணை அறிக்கைப்படி மருத்துவமனை மீது நடவடிக்கை எடுக்கப்படும். காயம் அடைந்த தொழிலாளர்களுக்கு மருத்துவ சிகிச்சை அளிக்கப்பட்டு வருகிறது” என்றார்.

மாநில பேரிடர் மீட்பு குழு கமி‌ஷனர் ராஜேந்திர ரத்னு கூறுகையில், “மீட்பு பணியில் பேரிடர் மீட்பு குழுவினர் 50 பேர் ஈடுபட்டு வருகிறார்கள். சரிந்து விழுந்துள்ள ராட்சத இரும்பு தூண், சாரம், கம்பிகள் கியாஸ் வெல்டிங் மூலம் வெட்டி அகற்றப்பட்டு வருகிறது. இன்று மாலைக்குள் மீட்பு பணிகள் முடிந்து விடும் என்றார்.

விபத்து குறித்து அப்பகுதியை சேர்ந்த சமூக ஆர்வலர் ஜவகர் சண்முகம் கூறியதாவது:-

தனியார் மருத்துவமனை கட்டுமான பணி விபத்து குறித்து அரசு உரிய விசாரணை நடத்தி நடவடிக்கை எடுக்க வேண்டும். ராட்சத ஜெனரேட்டர் அறை அமைப்பு பணியில் அடித்தளம் உறுதித்தன்மை இல்லாததால் விபத்து ஏற்பட்டு உள்ளது. தரமற்ற கட்டுமான பொருட்கள் பயன்படுத்தப்பட்டுள்ளது. கட்டிட காண்டிராக்டர் மீது உரிய நடவடிக்கை எடுக்க வேண்டும். இதுபோல் விபத்து ஏற்படாமல் இருக்க முன் எச்சரிக்கை நடவடிக்கைகளை மேற்கொள்ள வேண்டும்.

இவ்வாறு அவர் கூறினார். #Buildingcollapse #ChennaiBuildingcollapse 

கிருஷ்ணகிரி:

சென்னை மேற்கு மாம்பலம் பகுதியைச் சேர்ந்தவர் சந்தன பாண்டியன் (வயது 30). இவரது மனைவி ரஞ்சிதா(26). இவர்களுக்கு பாக்யஸ்ரீ (7), காவியாஸ்ரீ(3) என்ற 2 மகள்கள் உள்ளனர்.

சந்தனபாண்டியன் காரில் தனது மனைவி மற்றும் மகளுடன் கிருஷ்ணகிரி மாவட்டம் ஓசூரில் உள்ள மாமனார் நடராஜ் வீட்டிற்கு சென்றார். இன்று அதிகாலை மீண்டும் அவர்கள் சென்னைக்கு காரில் புறப்பட்டனர்.  அவர்களுடன் நடராஜூம் உடன் சென்றார். காரை சந்தனபாண்டியன் ஓட்டிசென்றார்.

கார் பர்கூரை அடுத்த ஒப்பதவாடி கூட்ரோடு பகுதிக்கு வந்தது. அப்போது கார் திடீரென்று கட்டுபாட்டை இழந்து முன்னால் சென்ற லாரி மீது மோதியது. இந்த விபத்தில் ரஞ்சிதாவும், அவரது தந்தை நடராஜூம் சம்பவ இடத்திலேயே பரிதாபமாக இறந்தனர். சந்தனபாண்டியனும், அவரது 2 மகள்களும் காயம் அடைந்தனர்.

இதுகுறித்து தகவலறிந்த பர்கூர் போலீசார் உடனே அங்கு விரைந்து வந்து விபத்தில் இறந்த ரஞ்சிதா மற்றும் நடராஜின் உடலை கைப்பற்றி பிரேத பரிசோதனைக்காக கிருஷ்ணகிரி அரசு மருத்துவமனைக்கு அனுப்பி வைத்தனர். காயம் அடைந்தவர்களை அரசு ஆஸ்பத்திரியில் சிகிச்சைக்காக சேர்த்தனர். தொடர்ந்து அங்கு அவர்கள் சிகிச்சை பெற்று வருகின்றனர்.

இந்த சம்பவம் குறித்து போலீசார் தொடர்ந்து விசாரணை நடத்தி வருகின்றனர்.

விருதுநகர்:

விருதுநகரில் இருந்து சிவகாசி வழியாக ராஜபாளையத்திற்கு தனியார் பஸ் தினமும் இயக்கப்பட்டு வருகிறது. இந்த பஸ் இன்று காலை 8 மணிக்கு விருதுநகரில் இருந்து புறப்பட்டது.

பஸ்சில் மாணவ- மாணவிகள் பணிக்குச் செல்வோர், பொதுமக்கள் என 50-க்கும் மேற்பட்டோர் பயணம் செய்தனர்.

அழகாபுரி விலக்கு பகுதியில் பஸ் சென்ற போது சாலையின் குறுக்கே ஒருவர் வந்தார். அவர் மீது மோதாமல் இருப்பதற்காக டிரைவர் பஸ்சை திருப்பினர்.

அப்போது கட்டுப்பாட்டை இழந்த பஸ், சாலையின் வலதுபுறம் பள்ளத்தில் தலைகுப்புற கவிழ்ந்தது. பஸ்சில் இருந்தவர்கள் அய்யோ... அம்மா... என கூக்குரல் எழுப்பினர்.

பஸ் கவிழ்ந்ததை பார்த்த அக்கம், பக்கத்தினர் அதிர்ச்சி அடைந்தனர். உடனடியாக அவர்கள் விரைந்து சென்று பஸ்சுக்கு அடியில் சிக்கியவர்களை காப்பாற்ற முயன்றனர். பஸ் தலைகுப்புற கவிழ்ந்து கிடந்ததால் அவர்களால் வேகமாக மீட்பு பணி செய்ய முடியவில்லை.

விபத்து குறித்து தகவல் கிடைத்ததும் தீயணைப்பு படையினரும், போலீசாரும் விரைந்து வந்து அதிரடியாக பஸ்சுக்குள் சிக்கியவர்களை மீட்கும் பணியில் ஈடுபட்டனர்.

விபத்தில் சிக்கிய மாணவ-மாணவிகள் மற்றும் பொதுமக்களை மீட்டு அரசு ஆஸ்பத்திரிக்கு அனுப்பி வைத்தனர்.

இந்த நிலையில் விருதுநகர், சூலக்கரையைச் சேர்ந்த குட்டியம்மாள் (வயது 60), அருப்புக்கோட்டையைச் சேர்ந்த பாலிடெக்னிக் மாணவர் சசிக்குமார் (20) ஆகியோர் பஸ்சின் அடியில் சிக்கி பலியாகி இருப்பது தெரியவந்தது. அவர்களது உடலை தீயணைப்பு படையினர் மீட்டு பிரேத பரிசோதனைக்கு அனுப்பி வைத்தனர்.

விபத்தில் காயம் அடைந்த 30-க்கும் மேற்பட்டோர் விருதுநகர் அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர்.

விபத்து நடந்த இடத்தில் பள்ளிக்கூட பைகள் அதிக அளவில் கிடந்தன. இதனால் 15-க்கும் மேற்பட்ட மாணவ-மாணவிகள் காயமடைந்து இருக்கலாம் என்று கருதப்படுகிறது.

திண்டிவனம்:

கடலூர் மஞ்சக்குப்பம் சுதர்சனநாயுடு தெருவை சேர்ந்தவர் காசிம். இவரது மகன் முபாரக்(வயது 24). இவரது நண்பர் சிவக்குமார்(22).

முபாரக், சிவக்குமார் ஆகியோர் ஒரு காரில் சென்னைக்கு புறப்பட்டு சென்றனர்.

இன்று காலை 7 மணியளவில் அந்த கார் திண்டிவனம் அடுத்த பாதிரி என்ற இடத்தில் சென்றுகொண்டிருந்தது. திடீரென்று டிரைவரின் கட்டுப்பாட்டை இழந்து தாறுமாறாக ஓடியது.

பின்னர் அந்த கார் சாலையின் நடுவில் உள்ள தடுப்புக்கட்டையை தாண்டி எதிர்திசையை நோக்கி சென்றது. அப்போது அந்த வழியாக லாரி ஒன்று வந்தது. அந்த லாரி இந்த கார் மீது பயங்கரமாக மோதியது.

இதில் காரின் முன்பகுதி அப்பளம்போல் நொறுங்கியது. விபத்தில் காரில் இருந்த முபாரக், சிவக்குமார் ஆகியோர் அதே இடத்தில் உடல்நசுங்கி பரிதாபமாக இறந்தனர்.

விபத்து குறித்து தகவல் அறிந்ததும் ஒலக்கூர் போலீசார் சம்பவ இடத்துக்கு விரைந்து சென்று மீட்பு பணியில் ஈடுபட்டனர். விபத்தில் பலியான 2 பேரின் உடல்களை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் தொடர்ந்து விசாரணை நடத்தி வருகின்றனர்.

கயத்தாறு:

நெல்லை மாவட்டம் சீதபற்பநல்லூர் வேளார்குளத்தை சேர்ந்தவர் முருகன் (வயது 52 ). இவரது மனைவி பார்வதி (50). இவர்களது உறவினர் திருமணம் சமீபத்தில் நடந்தது. இதையடுத்து திருமண தம்பதிகளை மறுவீடு அனுப்ப கோயம்புத்தூருக்கு நேற்று ஒரு வேனில் புறப்பட்டு சென்றனர்.

வேனில் முருகன், பார்வதி மற்றும் 2 சிறுமிகள் உள்பட 10 பேர் சென்றனர். அவர்கள் கோவையில் புதுமண தம்பதியை விட்டு விட்டு மீண்டும் நெல்லையை நோக்கி திரும்பி வந்து கொண்டிருந்தனர்.

வேனை மானூர் அருகே உள்ள தெற்குபட்டியைச் சேர்ந்த ஜெயபால் (42) என்பவர் ஓட்டிவந்தார். அவர்களது வேன் தூத்துக்குடி மாவட்டம் கயத்தாறு அருகே உள்ள புலவர்த்தான்குளத்தில் இன்று காலை வந்தது. அப்போது அந்த பகுதியில் லேசான சாரல் மழை பெய்து கொண்டிருந்தது.

சாலை வழுவழுப்பாக இருந்ததால் வேகத்தை குறைக்க வேன் டிரைவர் பிரேக் பிடிக்க முயன்றார். ஆனால் சாலையில் மழைநீர் நின்றதால் டிரைவரின் கட்டுப்பாட்டை இழந்த வேன் கவிழ்ந்தது. இதில் சம்பவ இடத்திலேயே வேனின் டிரைவர் ஜெயபால், பயணம் செய்து வந்த பார்வதி ஆகிய இருவரும் பலியானார்கள்.

வேனில் இருந்த இசக்கிமுத்து(37), அவரது மனைவி மணிமாலா(32), முருகன்(34), அவரது மனைவி பரமேஷ்வரி(33), லட்சுமி(62), சுதர்சன்(22) உள்ளிட்ட 7 பேர் படுகாயமடைந்து உயிருக்கு போராடிக் கொண்டிருந்தார்கள். இதில் அதிர்ஷ்டவசமாக வேனில் பயணம் செய்த 2 சிறுமிகளுக்கு காயம் ஏதும் ஏற்படவில்லை.

இந்த விபத்து பற்றி தகவல் அறிந்து சம்பவ இடத்திற்கு விரைந்து வந்த கங்கை கொண்டான் சப்-இன்ஸ்பெக்டர் மற்றும் போலீசார், படுகாயமடைந்த 7 பேரை மீட்டு நெல்லை அரசு மருத்துவமனைக்கு சிகிச்சைக்காக அனுப்பி வைத்தனர்.

மேலும் பலியான பார்வதி, ஜெயபால் உடல்களை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இந்த விபத்து குறித்து கங்கை கொண்டான் போலீசார் வழக்குப்பதிவு செய்து விசாரணை நடத்தி வருகிறார்கள்.

கோபி:

ஈரோடு மாவட்டம் அத்தாணியில் இருந்து திருப்பூரில் உள்ள பனியன் கம்பெனிக்கு தொழிலாளர்களை ஏற்றிக் கொண்டு இன்று காலை ஒரு வேன் புறப்பட்டது.

வேனை திருப்பூரை சேர்ந்த முருகன் (வயது 26) என்பவர் ஓட்டினார். வேனில் சுமதி, குமார், சரசாள், மகாலட்சுமி உள்பட 5 பேர் இருந்தனர்.

அந்த வேன் இன்று காலை கோபி அருகே அந்தியூர் சாலையில் உள்ள புதுக்கரைப்புதூர் என்ற இடத்தில் வந்தபோது நிலை தடுமாறி ஓடியது.

இதனால் அந்த வேன் ரோட்டோரத்தில் வயல் வெளியில் கவிழ்ந்தது. இந்த விபத்தில் டிரைவர் முருகன், வேனில் இருந்த தொழிலாளர்களான சுமதி, குமார், சரசாள், மகாலட்சுமி உள்பட 5 பேர் காயம் அடைந்தனர்.

அவர்களை அக்கம் பக்கத்தினர் உடனடியாக மீட்டு சிகிச்சைக்காக கோபி அரசு ஆஸ்பத்திரியில் சேர்த்தனர். அங்கு அவர்களுக்கு சிகிச்சை அளிக்கப்படுகிறது.

இந்த விபத்து குறித்து கோபி போலீசார் விசாரணை நடத்தி வருகிறார்கள்.

மொகடிஷு:

அல் கொய்தா பயங்கரவாத இயக்கத்தின் ஆதரவாளர்களாக சோமாலியா நாட்டில் இயங்கிவரும் அல் ஷபாப் பயங்கரவாதிகள், இஸ்லாமிய சட்டதிட்டங்களுக்கு உட்பட்ட ஆட்சியை ஏற்படுத்தும் நோக்கத்தில் அரசுக்கு எதிரான ஆயுதப் போராட்டத்தில் ஈடுபட்டு வருகின்றனர்.

நாட்டின் சில பகுதிகளில் ஆதிக்கம் செலுத்திவரும் இவர்கள் அவ்வப்போது வன்முறை தாக்குதல்களை நடத்தி பலரை கொன்று குவித்தும் வருகின்றனர்.

இந்நிலையில், தலைநகர் மொகடிஷுவில் உள்ள அதிபர் மாளிகை மற்றும் உள்துறை அமைச்சக தலைமையகத்தின் அருகே இன்று பிற்பகல் இரு கார் குண்டுகள் அடுத்தடுத்து வெடித்தன.

அல் ஷபாப் பயங்கரவாதிகள் பொறுப்பேற்றுள்ள இந்த தாக்குதலில் 9 பேர் உயிரிழந்ததாகவும், பலர் காயமடைந்ததாகவும் முதல்கட்ட தகவல் வெளியாகியுள்ளது. காயமடைந்த சிலரின் நிலைமை கவலைக்கிடமாக உள்ளதால் பலி எண்ணிக்கை அதிகரிக்கக்கூடும் என அஞ்சப்படுவதாக உள்நாட்டு ஊடகங்கள் செய்தி வெளியிட்டுள்ளன. #Somalia #AlShabab

வேப்பூர்:

விழுப்புரம் மாவட்டம் கள்ளக்குறிச்சி அருகே உள்ள கூத்தக்குடியை சேர்ந்தவர் ராணி (வயது 40).

கடலூர் மாவட்டம் வேப்பூர் அருகே உள்ள தொண்டாங்குறிச்சியில் இவரது உறவினர் ஒருவர் இறந்து விட்டார். இந்த துக்க நிகழ்ச்சியில் கலந்து கொள்ள ராணி உள்பட 100 பேர் 2 மினி லாரிகளில் இன்று காலை தொண்டாங்குறிச்சி புறப்பட்டனர்.

இன்று காலை 10.30 மணிக்கு வேப்பூர் கூட்ரோடு அருகே மினி லாரிகள் ஒன்றன் பின் ஒன்றாக சென்று கொண்டிருந்தன. அப்போது சென்னையில் இருந்து திருச்சி நோக்கி வந்த கார் ஒன்று பின்னால் சென்ற ஒரு மினி லாரி மீது மோதியது.

இதில் அந்த மினி லாரி நிலைதடுமாறி சாலையோர பள்ளத்தில் கவிழ்ந்தது. இதனால் லாரியில் இருந்தவர்கள் இடிபாடுகளுக்குள் சிக்கி கூச்சலிட்டனர். இந்த விபத்தில் ராணி உள்பட 2 பேர் பரிதாபமாக உயிரிழந்தனர். மேலும் 30 பேர் படுகாயம் அடைந் தனர்.

இந்த விபத்து குறித்து தகவல் அறிந்ததும் வேப்பூர் போலீசார் விரைந்து சென்று மீட்பு பணியில் ஈடுபட்டனர். காயம் அடைந்த 30 பேரை மீட்டு உளுந்தூர்பேட்டை மற்றும் விருத்தாசலம், பெரம்பலூர் அரசு ஆஸ்பத்திரிகளுக்கு அனுப்பி வைத்தனர்.

விருத்தாசலம் ஆஸ்பத்திரியில் சுப்பிரமணியன், சிவகாமி, பூங்காவனம், மலர்கொடி, அஞ்சலை உள்பட 7 பேரும், உளுந்தூர்பேட்டை ஆஸ்பத்திரியில் சுகந்தி (29), சரண்யா (50), தேவி (45), அழகம்மாள் (55), கமலம் (26), ஜெயா (45), முத்துலட்சுமி (40), பட்டம்மாள் (60), கல்யாணி (52) உள்பட 20 பேரும் அனுமதிக்கப்பட்டு சிகிச்சை பெற்று வருகிறார்கள்.

மும்பை:

மும்பையில் கடந்த சில மாதங்களாக பலத்த மழை பெய்து வருகிறது.

நேற்றிரவும் மும்பையில் பல இடங்களில் மழை பெய்தது. இன்று காலையிலும் மழை நீடித்தது.

பலத்த மழை காரணமாக மும்பை அந்தேரியில் ரெயில்வே நடைமேம்பாலம் ஒன்று திடீரென இடிந்து விழுந்தது. இன்று காலை 7.30 மணிக்கு அந்த பாலம் இடிந்தது.

பாலத்தின் ஒரு பகுதி ரெயில் தண்டவாளங்கள் மீது விழுந்தது. அந்த சமயத்தில் ரெயில்கள் எதுவும் வராததால் அதிர்ஷ்டவசமாக மிகப்பெரிய அளவில் சேதம் தவிர்க்கப்பட்டது.

பாலம் இடிந்ததில் அந்த பகுதியில் நின்றவர்களில் 6 பேர் காயம் அடைந்தனர். அவர்கள் சிகிச்சைக்காக மருத்துவமனைகளில் சேர்க்கப்பட்டுள்ளனர்.

இடிந்து விழுந்த கோகலே சாலை பாலம்தான் மேற்கு அந்தேரியையும் கிழக்கு அந்தேரியையும் இணைக்கும் பாலமாக திகழ்ந்தது. பாலம் இடிந்ததால் அந்தேரிகள் இணைப்பு துண்டிக்கப்பட்டுள்ளது.

இந்த பாலம் வழியாகத் தான் டப்பாவாலாக்கள் உணவு பாத்திரகளை எடுத்து செல்வார்கள். பல்லாயிரக்கணக்கான பணியாளர்களுக்கு அவர்கள் சேவை தான் முக்கியமானதாகும்.

இணைப்பு பாலம் இடிந்ததால் டப்பாவாலாக்கள் தங்கள் சேவையை இன்று நிறுத்தியுள்ளனர். #MumbaiRain

சென்னை:

மறைந்த முதல்-அமைச்சர் ஜெயலலிதாவின் பிறந்தநாளை முன்னிட்டு, கிருஷ்ணகிரியில் 90 ஜோடிகளுக்கு திருமணம் செய்து வைக்கும் நிகழ்ச்சி நேற்று நடைபெற்றது. திருமண நிகழ்ச்சியில் முதல்-அமைச்சர் எடப்பாடி பழனிசாமி கலந்துகொண்டு, திருமணத்தை நடத்திவைத்ததுடன் மணமக்களை வாழ்த்தி பேசினார்.

நிகழ்ச்சி முடிந்ததும், கிருஷ்ணகிரியில் இருந்து சென்னைக்கு எடப்பாடி பழனிசாமி காரிலேயே புறப்பட்டார். கார் ஆம்பூர் அருகே வடசேரி என்னும் இடத்தில் வந்துகொண்டிருந்தபோது, எதிரே சாலையில் மினி லாரியும், மொபட்டும் மோதிய விபத்தில் ஒருவர் காயத்துடன் உயிருக்கு போராடிக்கொண்டிருந்ததை, எடப்பாடி பழனிசாமி பார்த்தார். உடனே, தனது காரை நிறுத்தச்சொல்லி, இறங்கி சென்று காயமடைந்தவரின் அருகில் சென்று விசாரித்தார்.

உடனடியாக, தன்னுடன் வந்த ஆம்புலன்ஸ் வேனை கொண்டுவரச் செய்து, காயமடைந்தவரை அருகில் உள்ள ஆஸ்பத்திரிக்கு விரைவாக அழைத்துச் சென்று சிகிச்சை அளிக்குமாறு உத்தரவிட்டார். மேலும், மாவட்ட கலெக்டரிடமும் செல்போனில் தொடர்பு கொண்டு பேசி, காயமடைந்தவருக்கு உரிய சிகிச்சை அளிக்க உத்தரவிடுமாறு கூறினார்.

காயமடைந்தவர் ஆம்புலன்ஸ் வேனில் ஏற்றிச்செல்லப்படும் வரை அங்கேயே இருந்த முதல்-அமைச்சர் எடப்பாடி பழனிசாமி பின்னர், அங்கிருந்து சென்னை நோக்கி காரில் புறப்பட்டார். 

திருமானூர்:

அரியலூர் மாவட்டம், திருமானூர் அருகே உள்ள கோக்குடி கிராமத்தில் நேற்று ஜல்லிக்கட்டு போட்டி நடைபெற்றது. இதையொட்டி கிராமத்தில் நடுவீதியில் வாடிவாசல் அமைக்கப்பட்டது. முதலில் காளைகளுக்கு மருத்துவ பரிசோதனை நடைபெற்றது. அதைத்தொடர்ந்து கோவில் காளை முதலில் அவிழ்த்து விடப்பட்டது. பின்னர் வாடிவாசலில் இருந்து அலங்கரிக்கப்பட்ட காளைகள் ஒவ்வொன்றாக அவிழ்த்து விடப்பட்டன.

இதில் 150-க்கும் மேற்பட்ட மாடுபிடி வீரர்கள் கலந்து கொண்டு சீறிப்பாய்ந்து வந்த காளைகளை போட்டி போட்டு அடக்கினர். அப்போது பொதுமக்கள் கைத்தட்டி ஆரவாரம் செய்தனர். சில காளைகள் வீரர்களை தூக்கி வீசி பந்தாடியது. இதில் திருச்சி, அரியலூர், பெரம்பலூர், தஞ்சை, ஜெயங்கொண்டம், திருமானூர் உள்ளிட்ட இடங்களில் இருந்து வந்திருந்த 550-க்கும் மேற்பட்ட காளைகள் அவிழ்த்து விடப்பட்டன.

காளைகள் முட்டியதில் சமயபுரத்தை சேர்ந்த ஜெகதீசன் (வயது 31), மலையப்பநகரை சேர்ந்த ராமு (26), திருவெறும்பூரை சேர்ந்த தமிழ்(24), கோக்குடியை சேர்ந்த ரோஸ் (53), செல்வகுமார் (33) உள்பட 11 பேர் காயமடைந்தனர். அவர்களுக்கு அங்கிருந்த மருத்துவக்குழுவினரால் சிகிச்சை அளிக்கப்பட்டது. இதில் படுகாயமடைந்த செல்வகுமார் மட்டும் மேல் சிகிச்சைக்காக அரியலூர் அரசு மருத்துவமனைக்கு அனுப்பி வைத்தனர்.

ஜல்லிக்கட்டு போட்டியில் காளைகளை அடக்கிய வீரர்களுக்கும், வீரர்களிடம் பிடிபடாத காளைகளின் உரிமையாளர்களுக்கும் விழா குழுவினரால் கட்டில், நாற்காலிகள், சைக்கிள், சில்வர் பாத்திரங்கள் போன்ற பரிசு பொருட்கள் வழங்கப்பட்டன.

ஜல்லிக்கட்டு போட்டியை காண திருச்சி, அரியலூர், பெரம்பலூர், தஞ்சை, ஜெயங்கொண்டம், திருமானூர் உள்ளிட்ட பகுதியில் இருந்து திரளான பொதுமக்கள் கலந்து கொண்டு போட்டியை கண்டு களித்தனர். ஜல்லிக்கட்டு போட்டிக்கான ஏற்பாடுகளை விழாக்குழுவினர் மற்றும் கோக்குடி பொதுமக்கள் செய்திருந்தனர்.