நீங்கள் தேடியது "குப்பை"

ஆவடி:

ஆவடி நகராட்சியில் ஆவடி, பருத்திப்பட்டு, விளிஞ்யம்பாக்கம், திருமுல்லைவாயல், தண்டுரை, சேக்காடு, அண்ணனூர், பட்டாபிராம், கோவில்பாதாகை, மிட்டின மல்லி, முத்தாபுதுப்பேட்டை ஆகிய பகுதிகள் உள்ளன.

இங்கு சுமார் 4 லட்சம் மக்கள் வசிக்கின்றனர். தினமும் நகராட்சி பகுதிகளில் சுமார் 140 டன் குப்பைகள் சேர்கின்றன.

இவ்வாறு நகராட்சி முழுவதும் 4200டன் குப்பைகள் மாதந்தோறும் சேருகின்றன. குப்பைகளை 170 நகராட்சி ஊழியர்கள் மற்றும் 700 ஒப்பந்த ஊழியர்கள் அள்ளி வருகின்றனர். மேலும், அந்த குப்பைகளை ஊழியர்கள் சேக்காட்டில் உள்ள குப்பை கிடங்கில் கொட்டி வருகின்றனர்.

இந்த நிலையில், கடந்த சில மாதங்களாக நகராட்சி பகுதிகளில் குப்பைகள் சரி வர அள்ளப்படுவதில்லை என்று பொதுமக்கள் குற்றம் சாட்டி உள்ளனர்.

இதுகுறித்து அவர்கள் கூறும்போது, “முக்கிய சாலைகள், தெருக்களில் குப்பைகள் ஆங்காங்கே குவிந்து கிடக்கிறது. பல இடங்களில் சாலைகளில் வைக்கப்பட்ட குப்பை தொட்டிகளில் குப்பைகள் நிறைந்து வழிகிறது.

அந்த குப்பைகள் காற்றில் பறந்து சாலைகளில் சிதறி கிடக்கின்றன. அச்சாலைகளில் வேகமாக வாகனங்கள் செல்லும் போது குப்பைகள் காற்றில் பறந்து கடைகள், வீடுகளுக்குள் விழுகிறது.

சாலை, தெருக்களில் குவிந்து கிடக்கும் குப்பைகளால் துர்நாற்றம் வீசுகிறது. இதனால் தொற்று நோய் பரவும் அபாயம் உள்ளது. தெருக்களில் தேங்கி கிடக்கும் குப்பைகளில் கொசுக்கள் உற்பத்தி ஆகிவருகிறது.

தனியார் ஒப்பந்த நிறுவனத்தின் அலட்சிய போக்கால் ஆவடி நகராட்சி பகுதிகளில் குப்பைகள் குவிந்து சுகாதார கேடு ஏற்பட்டு உள்ளது. இது குறித்து நடவடிக்கை எடுக்க வேண்டிய அதிகாரிகளும் மெத்தனமாகவே உள்ளனர். இது தொடர்பாக பொது நலச்சங்கள் மற்றும் சமூக ஆர்வலர்கள் பல முறை புகார் கூறியும் அதிகாரிகள் நடவடிக்கை எடுப்பது இல்லை.

எனவே, நகராட்சி உயர் அதிகாரிகள் குப்பைகளை உடனுக்குடன் அள்ளவும், சுகாதார சீர்கேட்டை தடுக்கவும் நடவடிக்கை எடுக்க வேண்டும்.

இவ்வாறு அவர்கள் கூறினர்.

சென்னை:

சென்னை கோயம்பேடு மொத்த விற்பனை மார்க்கெட்டில் காய்கறி, பழங்கள், பூக்கள் விற்பனை தினமும் மும்முரமாக நடந்து வருகிறது. சென்னை, புறநகர் பகுதிகளை சேர்ந்த பல ஆயிரக்கணக்கான சிறு வியாபாரிகள் தினமும் மார்க் கெட்டுக்கு வந்து காய்கறி, பழங்கள், பூக்களை வாங்கி சென்று வருகிறார்கள்.

இங்கு வருகை தரும் வியாபாரிகளின் வாகனங்களை நிறுத்துவதற்காக மார்க்கெட் வளாகத்தில் உள்ள காலி இடத்தில் ‘பார்க்கிங்’ வசதி செய்யப்பட்டுள்ளது. தற்போது இந்த ‘பார்க்கிங்’ இடத்தில் சரிவர பராமரிப்பு பணி இல்லாததால் மழைநீர் தேங்கி சுகாதாரக்கேடு ஏற்பட்டு வருகிறது. மேலும் ஆங்காங்கே மலை போல் குப்பைகள் குவிந்துள்ளன.

இதனால் அங்கு கொசுக்கள் உற்பத்தியாகி வருகின்றன. மேலும் பூ மார்க் கெட்டில் உள்ள கழிவுகள் அங்கு கொட்டப்படுவதால் துர்நாற்றம் வீசுகிறது.

பூ மார்க்கெட்டில் மொத்தம் 470 சிறிய, பெரிய பூக்கடைகள் உள்ளன. இங்குள்ள கழிவு பூக்கள் திறந்த வெளி ‘பார்க்கிங்’ இடத்தில் கொட்டப்பட்டு வருவதால் அங்கு வரும் வியாபாரிகள், பொதுமக்கள் துர்நாற்றம் மற்றும் கொசுத் தொல்லையால் அவதிப்பட்டு வருகிறார்கள்.

இதனால் தொற்றுநோய் பரவும் அபாயம் ஏற்பட்டுள்ளது.

கோயம்பேடு மார்க்கெட் வளாகத்தில் குப்பைகள், மழைநீர், கழிவுநீர் தேக்கம் ஆகியவற்றை உடனடியாக அகற்ற மார்க்கெட் மேலாண்மை நிர்வாகம் நடவடிக்கை எடுக்க வேண்டும்.

அங்கு வடிகால் வசதி அமைக்க வேண்டும் என்று வியாபாரிகள், பொதுமக்கள் கோரிக்கை விடுத்துள்ளனர்.

புதுச்சேரி:

வடகிழக்கு பருவ மழையை எதிர்கொள்ள புதுவை கவர்னர் கிரண்பேடி பல்வேறு நடவடிக்கைகளை எடுத்துள்ளார்.

புதுவையின் கிராமப்புற பகுதிகளில் 23 வாய்க்கால்களை சுமார் 84 கி.மீ. தூரம் தூர்வாரப்பட்டுள்ளது. இதனை தொடர்ந்து நகர பகுதியில் மழை நீர் தேங்காமல் இருக்க கழிவு நீர் வாய்க்கால்கள், கால்வாய்களை தூர்வாரும் பணி நடந்து வருகிறது.

இந்த பணிகளை கவர்னர் கிரண்பேடி நேரடியாக ஆய்வு செய்து வருகிறார். பெரும் பாலும் வாய்க்காலில் பிளாஸ்டிக் குப்பைகள் அடைக்கப்பட்டு தண்ணீர் வெளியேற முடியாமல் அடைக்கப்பட்டு இருந்தது.

ஏற்கனவே கடந்த சில மாதங்களுக்கு முன்பு கவர்னர் கிரண்பேடி வாய்க்கால்களை ஆய்வு செய்த போதும் பிளாஸ்டிக் கழிவுகள் அதிக அளவில் அடைத்து இருந்தது. இதனால், வாய்க்கால்களில் குப்பை கொட்டினால் அபராதம் விதிக்கும்படி கவர்னர் கிரண்பேடி உத்தரவிட்டார்.

ஆனால், இந்த அபராதம் விதிப்பு அமல் படுத்தப்படவில்லை. இதே நிலை தற்போதும் நீடிப்பது கவர்னர் கிரண்பேடியை கோபம் அடைய செய்துள்ளது. இதனால் தினமும் வாய்க்காலில் குப்பை கொட்டும் 100 பேருக்கு அதிக அளவில் அபராதம் விதிக்குமாறு கவர்னர் கிரண்பேடி உத்தரவிட்டுள்ளார்.

புதுவை கவர்னர் மாளிகையில் பொதுப்பணித்துறை பல்நோக்கு ஊழியர்கள், நகராட்சி ஊழியர்கள் ஆகியோரை அழைத்து கவர்னர் கிரண்பேடி மழைக் கால பணிகள் குறித்து கலந்துரையாடினார். அப்போது ஊழியர்களுக்கு சில ஆலோசனைகளையும் வழங்கினார்.

இதனையடுத்து எடுக்கப்பட்ட முடிவுகள் தொடர்பாக கவர்னர் கிரண்பேடி வாட்ஸ்அப்பில் வெளியிட்ட பதிவில் கூறியிருப்பதாவது:-

தூர்வாரப்பட்ட கழிவுநீர் கால்வாயில் தண்ணீர் செல்கிறது. கால்வாயில் குப்பை கொட்டினால் திங்கள் முதல் அபராதம் விதிக்கலாம். நகராட்சி ஆய்வாளர்கள் இதை நடைமுறைப்படுத்தலாம். நாள்தோறும் 100 பேர் வரை இம்முறையில் அபராதம் விதிக்கலாம். குப்பை கொட்டுவோர் மீது அதிகளவு அபராதம் விதியுங்கள். இது இறுதி எச்சரிக்கை.

இவ்வாறு கிரண்பேடி அந்த பதிவில் கூறியுள்ளார். #PondicherryGovernor #Kiranbedi

கூடலூர்:

தேனி மாவட்ட போலீஸ் சூப்பிரண்டு பாஸ்கரன் குமுளி மலைச்சாலையில் ஆய்வு மேற்கொண்டார். அப்போது கம்பம் மேற்கு வனச்சரகத்துக்கு உட்பட்ட வனப்பகுதியில் அதிக அளவு குப்பைக் கழிவுகள் இருப்பது கண்டு அதிர்ச்சியடைந்தார். இது குறித்து பொதுமக்களிடம் விசாரித்த போது கேரள பகுதியான குமுளியில் ஏராளமான ஓட்டல், லாட்ஜ்கள் உள்ளன. இங்கிருந்தும் குடியிருப்பு பகுதியில் இருந்தும் அதிக அளவு குப்பைகளை தமிழக வனப்பகுதியில் கொட்டிச் செல்வதாக ஆதங்கம் தெரிவித்தனர். எனவே போலீசார் தீவிர ரோந்து பணியில் ஈடுபட எஸ்.பி. உத்தரவிட்டார்.

அதன்படி தனிப்படை போலீசார் தீவிரரோந்து பணியில் ஈடுபட்டனர். அப்போது அரசு போக்குவரத்து கழக பணிமனை பின்புறம் வனப்பகுதியில் 2 பேர் குப்பைகளை கொட்டியுள்ளனர்.

அவர்களை மடக்கி பிடித்த போலீசார் விசாரித்ததில் அந்த நபர்கள் குமுளியைச் சேர்ந்த வர்க்கீஸ் (வயது 53), ரபீக் (20) என தெரிய வந்தது. அவர்களை கைது செய்த போலீசார் அவர்கள் பயன்படுத்திய மோட்டார் சைக்கிளையும் பறிமுதல் செய்தனர்.

இது குறித்து போலீஸ் அதிகாரிகள் தெரிவிக்கையில், வனப்பகுதியில் குப்பைகள் கொட்டுவதை கண்காணிக்க தனிப்படை அமைக்கப்பட்டுள்ளது. இவர்கள் வனத்துறையினருடன் இணைந்து கண்காணித்து வருகின்றனர்.

குப்பைகளை கொட்டுபவர்கள் மீது கடும் நடவடிக்கை எடுக்கவும் அறிவுறுத்தப்பட்டுள்ளது என்று தெரிவித்தனர்.

குன்னூர்:

குன்னூர் நகர பகுதியான 8-வது வார்டில் உழவர் சந்தை இயங்கி வருகிறது. இதன் அருகே நகராட்சி டவுன் சோலா மைதானம் உள்ளது. இங்கு கடந்த காலத்தில் பூங்கா அமைக்கப்பட்டிருந்தது. அது காலப்போக்கில் முட்புதர்கள் வளர்ந்து காடுகளாக மாறியது.

விளையாட்டு மைதானத்தில் சிறுவர்கள் மற்றும் பெரியவர்கள் பல்வேறு விளையாட்டுகளை விளையாடி வருகின்றனர். இந்த மைதானத்தில் ஒரு பகுதியில் குடிநீர் கிணறு உள்ளது.

இந்த குடிநீர் கிணற்றில் இருந்து அருகில் உள்ள காமராஜபுரம், ராக்பி, ரேலி காம்பவுண்ட், எல்.ஐ.சி. காலனி, முனிசிபால் லைன், பழைய ஆஸ்பத்திரி லைன், ராஜாஜி நகர் மற்றும் ஹேர்வுட் பகுதிகளுக்கு விணியோகம் செய்யப்பட்டு வருகிறது.

இப்பகுதிகளில் சுமார் 5000-க்கு மேற்ப்பட்ட குடியிருப்புகளும் தோட்ட தொழிலாளர்களின் தலைமை அலுவலக வங்கியும் செயல்பட்டு வருகிறது.

தனியார் தங்கும் விடுதி, உழவர் சந்தை, பொது மக்களின் கூட்டுறவு மண்எண்ணை பங்க், மேலும் பள்ளி கூடங்கள், தனியார் மருத்துவமணை, கோவில்கள், சர்ச்சுகள், குறிப்பாக நீலகிரி பாராளுமன்ற உறுப்பினரின் அலுவலகமும் உள்ளது.

இதனை கண்டு கொள்ளாத குன்னூர் நகராட்சி அதிகாரிகள் உழவர் சந்தை அருகில் உள்ள விளையாட்டு மைதானத்தில் குப்பை கிடங்கு அமைக்க பணிகள் நடைபெற்று வருவதால் அப்பகுதியில் உள்ள குடியிருப்புகளில் பொதுமக்களுக்கும், குழந்தைகளுக்கும் தொற்று நோய் பரவும் சூழ்நிலையும், சிறிய வகை பூச்சிகளும், புழுக்களும், ஈ, கொசுகளும் உண்டாகி பொதுமக்களை அச்சுறுத்தி நோய்களை ஏற்படுத்தும் என்றும் இதனை நகராட்சி நிறுத்தி வேறு இடத்திற்கு மாற்ற கோரி அப்பகுதியை சேர்ந்த நூற்றுக்கும் மேற்பட்ட பொது மக்கள் ரேலி காம்பவுண்ட்டில் உள்ள கேரள சமாஜம் கலை அரங்கில் கூட்டத்தை நடத்தினர்.

இதில் இந்த குப்பை கிடங்கை நகராட்சி உடனே நிறுத்தி வேறு இடத்திற்கு மாற்ற வேண்டும் என்றும் அனைத்து மக்களும் குன்னூர் ஆணையர் மற்றும் மாவட்ட கலெக்டரிடம் மனுவை கொடுத்து அந்த பணிகளை வேறு இடத்திற்கு மாற்ற கோரிக்கை வைப்பதென்று தீர்மானம் நிறைவேற்றப்பட்டது.

இதில் ஏராளமான பெண்களும் சமூக ஆர்வலர்களும் மருத்துவர்களும் வக்கீல்களும் கலந்து கொண்டனர்.

இந்த குப்பை கிடங்கை மாற்றும் வரை மக்கள் பல்வேறு விதத்தில் கண்டனம் தெரிவித்து போராட்டங்களை நடத்த முடிவு செய்துள்ளனர்.

மேலசொக்கநாதபுரம்:

தேனி அருகே போடியில் ஜ.க.நி ஆரம்ப பள்ளியில் 1-ம் வகுப்பு முதல் 5-ம் வகுப்பு வரை சுமார் 1,000மாணவ, மாணவிகள் பயின்று வருகின்றன. இந்தபள்ளியின் அருகே தினசரி காய்கறி மார்க்கெட் உள்ளது.

அதன் அன்றாட குப்பைகளை இந்த பள்ளியின் சுற்றுச்சுவர் பகுதிகளில் குப்பைகளை நகராட்சி சேகரிக்கின்றன. குப்பைகளால் மிகுந்த துர்நாற்றம் வீசுகின்றது. துர்நாற்றம் வீசுவதால் தொற்றுநோய் ஏற்படும் வாய்ப்பு அதிகமாக உள்ளது.

பள்ளியில் பயிலும் சிறு வயது குழந்தைகள் என்பதால் குப்பைகளின் துர்நாற்றத்தினால் அடிக்கடி குழந்தைகளுக்கு வயிற்றுப் போக்கு, வாந்தி, மூச்சுத் திணறல், காய்ச்சல் ஏற்படுகின்றது.

கல்வி கற்கும் குழந்தைகள் நோய்களால் பாதிக்கப்படுவதால் கல்வி தரம் பாதிக்கப்படுகிறது.

எனவே நகராட்சியும், பள்ளி நிர்வாகவும் சேர்ந்து குப்பைகள் சேகரிக்கும் இடத்தை வேறொரு இடத்திற்கு மாற்றி அந்த இடங்களில் மரக்கன்றுகளை நட்டு பராமரிக்க வேண்டும் என பொதுமக்களும், குழந்தைகளின் பெற்றோர்களும், சமூக ஆர்வலர்களும் வேண்டுகோள் விடுத்து உள்ளனர்.