நீங்கள் தேடியது "ஆசிரியர்"

பாட்னா:

பீகார் மாநிலம் தனருவா பகுதியைச் சேர்ந்த அமர் காந்த் என்ற சோட்டு என்பவர் டியூசன் சென்டர் நடத்தி வருகிறார். இவர் தன்னிடம் படித்த 5 வயது குழந்தையை கண்மூடித்தனமாக தாக்கும் வீடியோ சமூக வலைத்தளங்களில் பரவி வருகிறது. அந்த வீடியோவில், ஆசிரியர் கம்பால் குழந்தையை கடுமையாக தாக்குகிறார். கம்பு உடைந்ததும் தலைமுடியைப் பிடித்து இழுத்து கைகளால் சரமாரியாக தாக்குகிறார். தன்னை விட்டுவிடும்படி குழந்தை அழுதுகொண்டே கெஞ்சியும் விடவில்லை. இதைப் பார்த்த மற்ற குழந்தைகள் பயத்தில் உறைந்துள்ளனர். ஆசிரியரைத் தடுக்கவோ, சக மாணவனை விட்டுவிடும்படி கூறவோ அவர்களால் முடியாத நிலை.

இந்த வீடியோ வைரலான நிலையில், குழந்தையின் குடும்பத்தினரின் கவனத்திற்கும் சென்றது. உடனடியாக அவர்கள் பயிற்சி மையத்திற்கு சென்று அங்கிருந்த பொருட்களை அடித்து நொறுக்கினர். பின்னர் குழந்தையின் குடும்பத்தினர் அளித்த புகாரின் அடிப்படையில் போலீசார் வழக்குப்பதிவு செய்து, டியூசன் ஆசிரிர் அமர் காந்தை கைது செய்தனர். இந்த சம்பவத்தால் அப்பகுதியில் பெரும் பரபரப்பு ஏற்பட்டது.

கைது செய்யப்பட்ட ஆசிரியர் அமர் காந்த், உயர் ரத்த அழுத்த நோயால் பாதிக்கப்பட்டவர் என்பதால் அதிகமாக டென்சன் ஆவார் என கூறப்படுகிறது. அவரது டியூசன் சென்டரில் 45 குழந்தைகள் படித்துவருவதாக போலீஸ் அதிகாரி தெரிவித்துள்ளார்.

திருப்பூர் :

தொடக்கப்பள்ளி முதல் மேல்நிலைப் பள்ளி வரை காலியாக உள்ள ஆசிரியர் பணியிடங்கள் தொகுப்பூதியத்தின் கீழ் நிரப்பப்பட உள்ளன. இதற்காக தகுதி வாய்ந்த நபர்களிடமிருந்து விண்ணப்பம் கடந்த 3 நாட்களாக பெறப்பட்டன. ஒருவரே பல பள்ளிகளில் பணியாற்ற விண்ணப்பித்துள்ளதால் விண்ணப்பங்களின் எண்ணிக்கை அதிகரித்துள்ளது.இதுகுறித்து திருப்பூர் மாவட்ட கல்வித்துறை அதிகாரிகள் கூறியதாவது:-

டி.டி.எட்., படித்தவர்கள் துவக்க பள்ளிக்கும், பி.எட்., படித்தவர்கள் நடுநிலை மற்றும் உயர்நிலைப் பள்ளிக்கும், ஒன்றுக்கும் மேற்பட்ட டிகிரிகளுடன் பி.எட்., மற்றும் எம்.எட்., படித்தவர்கள் உயர்நிலை, மேல்நிலை பள்ளிக்கும் விண்ணப்பித்தனர். ஒருவர் எத்தனை பணியிடங்களுக்கு வேண்டுமானாலும் விண்ணப்பிக்கலாம் என்பதால், காலியிடங்களை விட பல மடங்கு விண்ணப்பங்கள் திருப்பூர் கல்வி மாவட்டத்தில் பெறப்பட்டுள்ளன.

திருப்பூர் தெற்கு, வடக்கு, அவிநாசி மற்றும் ஊத்துக்குளி ஒன்றியங்கள் முறையேஇடைநிலை ஆசிரியர் பணிக்கு ஆயிரத்து 407 விண்ணப்பங்களும், பட்டதாரி ஆசிரியர் பணிக்கு 405 விண்ணப்பங்களும், முதுகலை ஆசிரியர் பணிக்கு 401 விண்ணப்பங்களும் பெறபட்டுள்ளன. ஒரு பணியிடத்திற்கு சராசரியாக 10 பேர் வீதம் விண்ணப்பித்துள்ளனர்.இவ்வாறு அவர்கள் கூறினர்.

கன்னியாகுமரி:

கன்னியாகுமரி அருகே உள்ள கொட்டாரம் வள்ளலார் வீதியைச் சேர்ந்தவர் வை. கோபால கிருஷ்ணன் என்ற கோபால் (வயது 67), ஓய்வு பெற்ற ஓவிய ஆசிரியர்.

இவர் பள்ளியில் ஓவிய ஆசிரியராக பணியாற்றும் போது மாணவர்களை வைத்து ஆண்டுதோறும் ஓவிய கண்காட்சிகளை நடத்தி வந்து உள்ளார்.

நல்லாசிரியர் விருதும் பெற்றுள்ள வை. கோபாலகிருஷ்ணன் ஓய்வுக்கு பிறகு வீட்டில் முடங்கி கிடக்க கூடாது என்று ஓவியக்கலையில் சிறப்பு படைப்புகளை படைக்க தொடங்கினார்.

சாதாரணமாக வரையும் ஓவிய படைப்புகளில் இருந்து மாறுபட்டு வண்ண மணலைக் கொண்டு மணல் ஓவியம் வரையும் கலையில் ஆர்வம் காட்டினார். அதன் பயனாக பல்வேறு அரசியல் கட்சித் தலைவர்களின் உருவப்படங்களை மணல் ஓவியமாக வரைந்து சாதனை படைத்து உள்ளார்.

தான் வரையும் மணல் ஓவிய படைப்புகளை கண்காட்சிபடுத்தியும் வருகிறார். இந்த மணல் ஓவியங்களை உருவாக்குவ தற்காக கன்னியாகுமரி கடற்கரையில் கிடைக்கும் கருப்பு, சிவப்பு, ரோஸ், வெள்ளை போன்ற பல வண்ண கலர் மணல்களை சேகரித்து வைத்துள்ளார்.

இந்த பல வண்ண மணல்களைக் கொண்டு மகாத்மாகாந்தி, பாரதியார், பிரதமர் நரேந்திர மோடி, முதல்- அமைச்சர் மு. க. ஸ்டாலின் முன்னாள் முதல்-அமைச்சர்கள் பேரறிஞர் அண்ணா, கருணாநிதி, எம்.ஜி.ஆர்., ஜெயலலிதா ஆகியோரின் முகதோற்ற உருவங்களை மணல் ஒட்டோவியமாக வரைந்து சாதனை படைத்து உள்ளார்.

இது தொடர்பாக அவர் கூறியதாவது:-

அரசியல் தலைவர்களின் மணல் ஓவியங்களை வரை வதற்கு முன்பு பென்சில் மூலம் அட்டையில் "ஸ்கெட்ச்" போட்டு முன் வரைவு செய்து அதன் மேல் பலவண்ண மணல் களை ஒட்டி இந்த மணல் ஓவியத்தை வரைந்து உள்ளேன்.

நான் படைத்த மணல் ஓவியங்கள் மற்றும் செய்தித்தாள் காகித ஒட்டோ வியங்களை காமராஜர் பிறந்த தினமான வருகிற 15-ந்தேதிஅன்று நெல்லை பாளையங்கோட்டையில் உள்ள அரசு அருங்காட்சிய கத்தில் நடைபெறும் கல்வி வளர்ச்சி நாள் கண்காட்சி யில் இடம் பெற உள்ளன.

இவ்வாறு அவர் கூறினார்.

சமீபத்தில் கன்னியாகுமரியில் நடந்தசினிமா படப்பிடிப்புக்கு வந்த நடிகர் சூர்யாவிடம் அவரது தந்தை நடிகர் சிவகுமாரின் உருவத்தை இவர் மணல் ஓவியமாக வரைந்து அவரிடம் நேரில் சென்று கொடுத்து பாராட்டை பெற்றுள்ளார் என்பது குறிப்பிடத்தக்கதாகும்.

திருப்பூர் :

தமிழக அரசு பள்ளிகளில் காலியாக உள்ள ஆசிரியர் பணியிடங்களை தற்காலிகமாக நியமனம் செய்ய தமிழக அரசு புதிய உத்தரவு பிறப்பித்துள்ளது. இதற்கு பல்வேறு தரப்பினர் எதிர்ப்பு தெரிவித்து வருகின்றனர்.

இந்த நிலையில் இன்று திருப்பூர் கலெக்டர் அலுவலகம் முன்பு ஆசிரியர் பயிற்சி முடித்தவர்கள் கண்டன ஆர்ப்பாட்டத்தில் ஈடுபட்டனர். ஆர்ப்பாட்டத்தின் போதுதமிழகம் முழுவதும் தற்காலிக ஆசிரியர் பணிக்கு ஏராளமானோர் விண்ணப்பித்து வரக்கூடிய சூழ்நிலையில் ஏற்கனவே பயிற்சி முடித்த தங்களுக்கு இதுவரை பணி வழங்கப்படவில்லை. தமிழக அரசு உடனடியாக தற்காலிக ஆசிரியர் தேர்வை ரத்து செய்ய வேண்டும்.

ஆசிரியர் பணி நியமனத்தின் போது பழையபடி வயது வரம்பு தளர்வு செய்து பணி நியமனம் செய்ய வேண்டும் என்பது உள்ளிட்ட 4 கோரிக்கையை வலியுறுத்தி இந்த கண்டன ஆர்ப்பாட்டம் நடைபெற்றது.  

சேலம்:

தமிழகத்தில் உள்ள அரசு பள்ளிகளில் மாணவர் சேர்க்கை அதிகரித்துள்ளதால் ஆசிரியர்களின் தேவையும் அதிகரித்துள்ளது. இதனால் முதற்கட்டமாக 13 ஆயிரத்து 331 தற்காலிக ஆசிரியர்களை நியமிக்க தமிழ்நாடு அரசு பள்ளிக்கல்வித்துறை உத்தரவிட்டுள்ளது.

அதன்படி சேலம் மாவட்டத்தில் தற்காலிக ஆசிரியர் பணிக்கான விண்ணப்பங்கள் பெறப்பட்டு வருகின்றன. ஆரம்ப கல்வி பட்டயபடிப்பு, டிப்ளமோ பட்டயப்படிப்பு, பி.எட்., எம்.எட், உள்ளிட்ட பட்டங்களை படித்தவர்கள், ஆசிரியர் தகுதி தேர்வில் தேர்ச்சி பெற்றவர்கள், இல்லம் தேடி கல்வி திட்டத்தின் கீழ் தன்னார்வலர்களாக பணியாற்றுபவர்கள், பள்ளி, கல்லூரிகளில் பணிபுரியும் அனுபவம் வாய்ந்த ஆசிரியர்கள் விண்ணப்பித்து வருகின்றனர்.

விண்ணப்பிப்பதற்கு இன்று கடைசி நாள் என்பதால் சேலம் மாவட்டத்தில் உள்ள 11 சட்டமன்ற தொகுதிகளில் இருந்தும் ஏராளமானோர் சேலம் மாவட்ட கலெக்டர் அலுவலகத்தில் உள்ள முதன்மை கல்வி அலுவலகம் மற்றும் மாவட்ட கல்வி அலுவலகங்களில் குவிந்தனர்.

இதனால் கல்வி அலுவலகங்களில் கூட்டம் அதிக அளவில் காணப்பட்டது. குறிப்பாக பெண்கள் அதிக அளவில் திரண்டிருந்தனர். கலெக்டர் அலுவலக சுவரிலும், நோட்டீசு போர்டிலும் எந்த எந்த பள்ளிகளில் எத்தனை காலியிடங்கள் உள்ளன என்பது குறித்த பட்டியல் ஒட்டப்பட்டிருந்தது. அந்த பட்டியலில் அரசு பள்ளிகளின் பெயர் , பாடம், பணியிடங்களின் எண்ணிக்கைகள் இடம்பெற்றிருந்தன.

அவர்கள் அவற்றை பார்த்து எந்த பள்ளியில் பணியாற்ற விருப்பம் என்பதை தேர்வு செய்து, அவர்கள் அங்கேயே அமர்ந்து விண்ணப்பங்களை பூர்த்தி செய்து, கல்வி சான்றிதழ், பணி அனுபவ சான்றிதழ், புகைப்படம் போன்றவைகளை இணைத்து அதிகாரிகளிடம் வழங்கினார்கள்.

சேலம் மாவட்டத்தில் உள்ள அரசு பள்ளிகளில் இடைநிலை (எஸ்.ஜி.டி.)-193, பட்டதாரி (பி.டி.)-130, முதுகலை பட்டதாரி (பி.ஜி.)-43 என மொத்தம் 366 பணியிடங்கள் காலியாக உள்ளதாக அறிவிக்கப்பட்டுள்ளது. இந்த 366 பணியிடங்களுக்கும் தற்காலிக ஆசிரியர்கள் நியமிக்கப்பட உள்ளனர் என்பது குறிப்பிடத்தக்கது. 

திருப்பூர்:

ஊராட்சி ஒன்றிய, நகராட்சி அரசு பள்ளிகளில் தற்காலிக ஆசிரியர் நியமனத்துக்கு தகுதியானவர்கள் வருகிற 6-ந் தேதிக்குள் விண்ணப்பிக்கலாம் என்று மாவட்ட கலெக்டர் வினீத் அறிவித்துள்ளார். திருப்பூர் மாவட்ட கலெக்டர் வினீத் வெளியிட்டுள்ள செய்திக்குறிப்பில் கூறியிருப்பதாவது:-

பள்ளி கல்வித்துறையின் கட்டுப்பாட்டின் கீழ் இயங்கும் ஊராட்சி ஒன்றியப்பள்ளி, நகராட்சிப்பள்ளி, அரசு தொடக்கப்பள்ளி, நடுநிலைப்பள்ளி, உயர்நிலைப்பள்ளி, மேல்நிலைப்பள்ளியில் 2022-23-ம் கல்வியாண்டில் கடந்த மாதம் 1-ந் தேதி நிலவரப்படி காலியாக உள்ள இடைநிலை, பட்டதாரி, முதுகலை ஆசிரியர் பணியிடங்களில் தற்காலிக ஆசிரியர் நியமனம் மேற்கொள்ளப்பட உள்ளது.

தகுதியான விண்ணப்பதாரர்கள் எழுத்து மூலமான விண்ணப்பங்களை நேரடியாகவோ, மின்னஞ்சல் மூலமாகவோ உயர்கல்வி தகுதிச்சான்றுகளுடன் மாவட்ட கல்வி அதிகாரியிடம் சமர்ப்பிக்க வேண்டும். காலிப்பணியிட விவரங்கள் முதன்மை கல்வி அலுவலகம், மாவட்ட கல்வி அலுவலகம், வட்டார கல்வி அலுவலகங்களில் அறிவிப்பு பலகையில் நேற்று வெளியிடப்பட்டுள்ளது.

அதன்படி திருப்பூர் கல்வி மாவட்டத்தை சேர்ந்தவர்கள், திருப்பூர் கலெக்டர் அலுவலக பெருந்திட்ட வளாகத்தில் அறை எண்.632-ல் உள்ள மாவட்ட கல்வி அலுவலகத்திலும், temporaryteacher.tiruppur@gmail.com என்ற மின்னஞ்சல் முகவரியில் விண்ணப்பிக்கலாம். தாராபுரம் கல்வி மாவட்டத்தை சேர்ந்தவர்கள் தாராபுரம் ஐந்து முக்கு அரசு மேல்நிலைப்பள்ளி வளாகத்தில் உள்ள மாவட்ட கல்வி அலுவலகத்திலும், temporaryteacher.dharapuram@ gmail.com என்ற மின்னஞ்சல் முகவரியிலும் விண்ணப்பிக்கலாம்.

உடுமலை கல்வி மாவட்டத்தை சேர்ந்தவர்கள் உடுமலை ராஜேந்திரா ரோடு அரசு மேல்நிலைப்பள்ளி வளாகத்தில் உள்ள மாவட்ட கல்வி அலுவலகத்திலும், temporaryteacher.udumalpet@gmail.com என்ற மின்னஞ்சல் முகவரியிலும், பல்லடம் கல்வி மாவட்டத்தை சேர்ந்தவர்கள் பல்லடம் மங்கலம் ரோடு அரசு மகளிர் மேல்நிலைப்பள்ளி வளாகத்தில் உள்ள மாவட்ட கல்வி அலுலகத்திலும், temporaryteacher.palladam@gmail.com என்ற முகவரியிலும் விண்ணப்பிக்கலாம்.

விண்ணப்பிக்க கடைசி நாள் வருகிற 6-ந் தேதி மாலை 5 மணி வரை ஆகும். தகவல் பலகையில் வெளியிடப்பட்டுள்ள காலிப்பணியிட விவரங்கள் மாறுதலுக்கு உட்பட்டது. இவ்வாறு அந்த செய்திக்குறிப்பில் கலெக்டர் தெரிவித்துள்ளார்.

நாகர்கோவில் :

தமிழகம் முழுவதும் அரசு பள்ளிகளில் காலியாக உள்ள ஆசிரியர் பணியிடங்களுக்கு தற்காலிகமாக ஆசிரியர்களை நியமனம் செய்ய அரசு உத்தரவு பிறப்பித்துள்ளது. இதை அடுத்து அந்தந்த மாவட்டங்களில் தற்காலிகமாக ஆசிரிய ர்களை தேர்வு செய்வதற்கான பணி நடந்து வருகிறது. குமரி மாவட்டத்தில்

பட்டதாரி ஆசிரியர்கள் 18,முது நிலை ஆசிரியர்கள் 6, இடைநிலை ஆசிரியர்கள் 39 என 63 ஆசிரியர் பணியிடங்கள் காலியாக உள்ளது. காலியாக உள்ள பணியிடங்கள் குறித்த பட்டியல் வெளியிடப்பட்டு உள்ளது.இந்த நிலையில் இன்று நாகர்கோவிலில் உள்ள முதன்மை கல்வி அலுவலகத்தில் பட்டதாரிகள் ஏராளமானோர் குவிந்திருந்தனர்.

எந்தெந்த பள்ளிகளில் இடம் காலியாக உள்ளது என்பதை அறிந்து கொள்ள அவர்கள் வந்திருந்தனர். வந்தவர்களிடம் கல்வித்துறை அதிகாரிகள் காலியிடங்கள் குறித்த விவரங்களை தெரிவித்தனர்.பின்னர் முதன்மைக் கல்வி அதிகாரி புகழேந்தியை சந்தித்தும் அவர்கள் பேசினார்கள்.இதையடுத்து அவர்கள் அங்கிருந்து புறப்பட்டு சென்றனர்.காலியாக உள்ள பணி இடங்கள் அந்தந்த பள்ளியிலேயே நிரப்பப்படும் என்று கல்வித்துறை அதிகாரிகள் தெரிவித்தனர்

திருப்பூர் :

திருப்பூர் ஊராட்சி ஒன்றிய தொடக்க, நடுநிலை மற்றும் உயர்நிலை, மேல்நிலைப்பள்ளிகளில் காலியாக உள்ள பணியிடங்களை பள்ளி மேலாண்மை குழுக்கள் மூலம் தற்காலிகமாக நியமிக்க கல்வித்துறை உத்தரவிட்டுள்ளது.

ஊரடங்குக்கு பிறகு முழுமையான கல்வியாண்டு துவங்கியுள்ளது. மாணவர் சேர்க்கை அதிகரித்தபோதும், போதிய ஆசிரியர்கள் இல்லாதது குறையாகவே உள்ளது.

சமீபத்திய பொதுத்தேர்வு முடிவுகள் தேர்ச்சி விகிதம் குறைய இதுவும் முக்கிய காரணம்.இடைநிலை, பட்டதாரி மற்றும் முதுகலை ஆசிரியர் பணியிடங்களை பள்ளி மேலாண்மை குழு மூலம் தற்காலிகமாக நிரப்ப, கல்வித்துறை நடவடிக்கை எடுத்துள்ளது.

ஆசிரியர் பணிக்கு தகுதியானவர்களைக் கொண்டு, வரும் ஜூலை 1 முதல் நியமிக்க ஏற்பாடுகள் செய்யப்பட்டுள்ளன. இடைநிலை ஆசிரியர்களுக்கு, 7 ஆயிரத்து500 ரூபாய், பட்டதாரி ஆசிரியர்களுக்கு 10 ஆயிரம், முதுகலை ஆசிரியர்களுக்கு 12 ஆயிரமும் தொகுப்பூதியம் வழங்கப்படும்.திருப்பூர் மாவட்டத்தில் 203 இடைநிலை ஆசிரியர், 54 பட்டதாரி ஆசிரியர், 89 முதுகலை ஆசிரியர் என 343 பணியிடங்கள் நிரப்பப்பட உள்ளன. இதற்கான பள்ளி மேலாண்மை குழு ஆலோசனை கூட்டம் அனைத்து தொடக்க, நடுநிலைப்பள்ளிகளிலும் நடத்தப்பட்டு வருகிறது.

திருப்பூர் மாவட்ட கல்வித்துறை அதிகாரிகள் கூறுகையில்,காலியிடங்கள் சம்பந்தப்பட்ட பாடத்திற்கான முழுமையான கல்வித்தகுதி பெற்றவரை கொண்டே நிரப்பப்படும். முதுகலை ஆசிரியர் நிலையில் ஆசிரியர் தேர்வு வாரியத்தால் நடத்தப்பட்ட போட்டித்தேர்வில் தேர்ச்சி பெற்று சான்றிதழ் சரிபார்ப்பில் கலந்து கொண்டவர்களுக்கும், 'இல்லம் தேடி கல்வி' திட்டத்தில் பணிபுரியும் தகுதிவாய்ந்த தன்னார்வலர்களுக்கும் முன்னுரிமை வழங்கப்படும்.பணியிடத்திற்கு பதவி உயர்வு மூலமாகவோ, நேரடி நியமனம் அல்லது மாறுதல் மூலமாகவோ நிரப்பப்படும்போது, பள்ளி மேலாண்மை குழு மூலம் நியமனம் ஆன ஆசிரியர் உடனே பணியில் இருந்து விடுவிக்கப்படுவர் என்றனர்.

15 வேலம்பாளையம் நடுநிலைப்பள்ளி தலைமை ஆசிரியர் ராதாமணி கூறியதாவது:-

பணி மாறுதல், பணி ஓய்வு உள்ளிட்ட காரணங்களால் ஏற்கனவே உள்ள ஆசிரியர் பணியிடங்களே காலிப்பணியிடங்களாக எடுத்துக்கொள்ளப்படுகிறது. இதை நிரப்பவே சமீபத்தில் அரசாணையில் சொல்கிறது. இவற்றை தற்காலிகமாக நிரப்பினால் மட்டும் போதாது.மாணவர் - ஆசிரியர் விகிதாசாரம் அடிப்படையில் புதிய ஆசிரியர் பணியிடங்கள் தேவைப்படுகின்றன. அவை புதிதாக உருவாக்கப்பட வேண்டும். எங்கள் பள்ளியில் 1-ம் வகுப்பு வரை, 1,750 மாணவர்களுக்கு, 28 ஆசிரியர்கள் மட்டுமே உள்ளன.காலிப்பணியிடங்கள் போக மாணவர்களுக்கு கற்பிக்க 7 இடைநிலை, 8 பட்டதாரி ஆசிரியர்கள் தேவை. இதை நிரப்பவும் அரசு அனுமதி வழங்க வேண்டும் என்ற தீர்மானத்தை பள்ளி மேலாண்மை குழு மூலம் நிறைவேற்றியுள்ளோம்.இவ்வாறு அவர் கூறினார்.

ஸ்ரீவில்லிபுத்தூர்

ஸ்ரீவில்லிபுத்தூரில் 4-ம் வகுப்பு முதல் 9-ம் வகுப்பு வரை கற்றுத்தரும் ஆசிரியர்களுக்கு ஸ்போக்கன் இங்கிலீஸ் பயிற்சி நடந்தது.

கிருஷ்ணன்கோவிலில் உள்ள வட்டார வளமையத்தில் இந்த பயிற்சி அளிக்கப்பட்டது. ஆசிரியர் பயிற்சி நிறுவனத்தின் முதுநிலை பேராசிரியர் மகாலிங்கம் தலைமையில், ஆசிரியர்கள் பத்மா, பூமா, சத்யா, ஜஸ்டின் தங்கராஜ், தேரிச்செல்வம், வரமணி ஆகியோர் பயிற்சி அளித்தனர்.

பயிற்சியை ஒருங்கிணைந்த பள்ளிக் கல்வித் திட்டத்தின் உதவி திட்ட அலுவலர் ஜோதிமணிராஜன் பார்வையிட்டார்.

அவர் கூறிகையில், விருதுநகர் மாவட்டத்தில் உள்ள அரசு மற்றும் அரசு உதவி பெறும் 993 பள்ளிகளைச் சேர்ந்த ஆசிரியர்களுக்கு இந்த பயிற்சி அளிக்கப்பட்டுள்ளது.

பயிற்சியை பெற்ற ஆசிரியர்கள் முழுமையாக செயல்படுத்தி, மாணவர்கள் கல்வித் தரம் மேம்படச் செய்ய வேண்டும் என்றார். பயிற்சிக்கான ஏற்பாடுகளை ஆசிரியப் பயிற்றுநர் முத்துராஜ் செய்திருந்தார்.

விருதுநகர்

மதுரை மாவட்டம் திருமங்கலம் அருகே உள்ள சவுடார்பட்டியைச் சேர்ந்தவர் ராணி (வயது 39). இவர் சில ஆண்டுகளுக்கு முன்பு விருதுநகர் பாண்டியன் நகரில் குடியிருந்தார். இந்தநிலையில் அவர் விருதுநகர் மாவட்ட போலீஸ் சூப்பிரண்டு அலுவலகத்தில் புகார் செய்தார். அதில் கூறியிருப்பதாவது:-

பாண்டியன் நகரைச் சேர்ந்த ஆசிரியர் சிவக்குமார் என்பவர் பங்கு சந்தையில் முதலீடு செய்து லாபம் எடுப்பதாக ஆசை வார்த்தை கூறினார். இதை நம்பி அவரது வங்கி கணக்குகளில் பல்வேறு தவணைகள் மூலம் ரூ. 14 லட்சத்து 83 ஆயிரம் செலுத்தினேன். பணத்தை பெற்றுக் கொண்ட அவர் அதன் பின் பங்குச்சந்தை குறித்த நிலவரத்தை எனக்கு தெரியப்படுத்தவில்லை.

எனவே பணத்தை திருப்பித்தருமாறு கேட்டேன். ஆனால் சிவக்குமார் தர மறுத்து விட்டார். இதற்கு உடந்தையாக அவரது சகோதரி ஹேமலதா, கணவர் சந்திரபோஸ் உள்ளனர். உரிய நடவடிக்கை எடுத்து பணத்தை மீட்டுத்தர வேண்டும்.

இவ்வாறு அதில் குறிப்பிட்டிருந்தார்.

போலீஸ் சூப்பிரண்டு உத்தரவின் பேரில் சிவக்குமார் உள்பட 3 பேர் மீதும் பாண்டியன் நகர் போலீசார் வழக்குப்பதிவு செய்தனர்.

கன்னியாகுமரி :

கொட்டாரம் சந்திப்பில்இருந்து பெரியவிளை செல்லும் சாலையில் வசித்து வருபவர் கிறிஸ்டோபர் தங்கராஜ் (வயது58).

இவர் அகஸ்தீஸ்வரம் அரசு மேல்நிலைப் பள்ளியில் ஆசிரியராக பணியாற்றி வருகிறார். இவரது மனைவி ஜெபராணி பிரபா (52) இவர் களக்காட்டில் உள்ள அரசுப் பள்ளி ஒன்றில் ஆசிரியராக பணியாற்றி வருகிறார். இவர்கள் நேற்று வேலைக்குச் சென்று விட்டு வீடு திரும்பியபோது பின்பக்க கதவு உடைக்கப்பட்டிருந்தது கண்டு அதிர்ச்சியடைந்தார். வீட்டின் பீரோ உடைக்கப்பட்டு அதில்இருந்த 12 பவுன் நகை, ரூ.27 ஆயிரம் கொள்ளையடிக்கப்பட்டது தெரியவந்தது.இதனையடுத்து அவர், கன்னியாகுமரிபோலீசுக்கு தகவல் தெரிவித்தார். உடனடியாக கன்னியாகுமரி டி. எஸ்.பி.ராஜா, இன்ஸ்பெக்டர் சாந்தி, சப்-இன்ஸ்பெக்டர் ஹரிகுமார் மற்றும் போலீசார் கொள்ளை நடந்த ஆசிரியரின் வீட்டுக்கு வந்து சோதனை நடத்தினர்.தொடர்ந்து மோப்ப நாய் மற்றும் தடயவியல் நிபுணர்கள் வரவழைக்கப்பட்டு சோதனை நடத்தப்பட்டது. மோப்ப நாய் வீட்டில் சோதனை செய்த பின்னர் அஞ்சுகிராமம் செல்லும் சாலை வழியாக சென்று பொட்டல்குளம் வழியாக சுந்தரபுரம் சந்திப்பு வரை சென்றது.

ஆனால் யாரையும் கவ்வி பிடிக்கவில்லை. எனவே இந்த சம்பவத்தில் உள்ளூர் நபர்கள் ஈடுபட்டிருக்கலாம் என போலீசார் கருதுகின்றனர். அந்த பகுதியில் உள்ள சி.சி.டி.வி. காமிரா பதிவுகளை கைப்பற்றி போலீசார் விசாரணை நடத்தி வருகின்றனர்.

ஆசிரியர் வீட்டில் இருந்து 12 பவுன் தங்க நகை மற்றும்ரூ.27 ஆயிரம்ரொக்க பணம்ஆகியவை கொள்ளையடிக்கப்பட்டது தெரிய வந்து உள்ளது.பட்ட பகலில் நடந்த இந்த கொள்ளை சம்பவம் கொட்டாரம் பகுதியில் பெரும் பரபரப்பை ஏற்படுத்திஉள்ளது.

ஸ்ரீவில்லிபுத்தூர்

விருதுநகர் மாவட்டத்தில் முதல் வகுப்பு முதல் 10- ம் வகுப்பு வரை அரசு மற்றும் அரசு உதவி பெறும் பள்ளிகளில் பணிபுரியும் ஆசிரியர்களுக்கு எமிஸ் (கல்வி தகவல் மேலாண்மை இணையதளம்) குறித்த பயிற்சி 226 மையங்களில் நடந்தது. இதில் 7792 ஆசிரியர்கள் கலந்து கொண்டனர்.

ஸ்ரீவில்லிபுத்தூரில் திரு இருதய பெண்கள் மேல்நிலைப் பள்ளி, நகர்மன்ற ஊரணிபட்டி நடுநிலைப் பள்ளி, நகர்மன்ற திரு.வி.க. மேல்நிலைப் பள்ளிகளில் உள்ள உயர் தொழில்நுட்ப ஆய்வகங்களில் நடந்த இந்த பயிற்சியை, ஒருங்கிணைந்த பள்ளிக் கல்வித் திட்டத்தின் மாவட்ட உதவி திட்ட அலுவலர் ஜோதிமணிராஜன் பார்வையிட்டு ஆய்வு செய்தார்.

பின்னர் அவர் கூறியதாவது:-

ஆசிரியர்களுக்கு, எமிஸ் இணையதளம் மூலம் ஆசிரியர், மாணவர் வருகை பதிவு செய்வது, ஆசிரியர்களின் விடுப்புகளை பதிவேற்றம் செய்வது, தொடர்ந்து எமிஸ் இணைய தளத்தில் வரவிருக்கும் வசதிகள், மாணவர்கள்- ஆசிரியர்களுக்கான மதிப்பீட்டுத் தளம் குறித்த பயிற்சிகள் அளிக்கப்பட்டது. மாணவர்களுக்கான உடல் நல பாதுகாப்பு குறித்த பயிற்சியும் அளிக்கப்பட்டுள்ளது.

அறிவியல் வளர்ச்சிக்கேற்ப தற்போது அரசு, கல்வித் துறையில் பல்வேறு நவீன உயர் தொழில் நுட்ப வசதிகளைப் புகுத்தி வருகிறது. இதனால் கற்றல் மற்றும் கற்பித்தல் செயல்பாடுகள் நவீனமயமாக்கப்பட்டு மாணவர்கள்- ஆசிரியர்கள் பயன்பெற்று வருகிறார்கள். ஆசிரியர்கள் மற்றும் மாணவர்கள் குறித்த தகவல்கள் முழுமையாக எமிஸ் இணையதளம் வாயிலாகவே மேற்கொள்ள நடவடிக்கை எடுக்கப்பட்டுள்ளது. இதனால் ஆசிரியர்கள் மற்றும் மாணவர்களுக்கு காலவிரையம் ஏற்படுவது தவிர்க்கப்படுகிறது என்றார்.

இந்த ஆய்வின் போது மாவட்ட எமிஸ் ஒருங்கிணைப்பாளர் முருகுதிருநாவுக்கரசு, வட்டார வளமைய மேற்பார்வையாளர் மருதக்காளை, ஆசிரியர் பயிற்றுநர்கள் முத்துராஜ், கற்பகம், செல்வம், லிங்கேஸ்வரி உள்ளிட்டோர் உடனிருந்தனர்.