நீங்கள் தேடியது "slug 94568"

புதுச்சேரி:

புதுவையில் பருவமழை காலங்களில் நகர பகுதியில் தொடர்ந்து வெள்ள நீர் சாலைகளில் தேங்குகிறது.

இந்திராகாந்தி, சிவாஜி சிலை சதுக்கம், புஸ்சி வீதி உள்ளிட்ட சாலைகளில் மழைநீர் தேங்குவதால் போக்குவரத்துக்கு பெரும் பாதிப்பு ஏற்படுகிறது.

இதேபோல பல ஆண்டுகளாக பாவாணர் நகர், நடேசன் நகர், கிருஷ்ணாநகர், வெங்கட்டா நகர், ரெயின்போ நகர் உள்ளிட்ட பகுதிகளில் மழைவெள்ளம் தேங்கி வீடுகளுக்குள் வெள்ளம் புகுந்து விடுகிறது.

இதனால் ஒவ்வொரு பருவமழை காலத்திலும் குடியிருப்பு வாசிகள் கடும் அவதிக்கு ஆளாகி வருகின்றனர். மழைநீர் தேங்க வடிகால்கள் தூர்வாரப்படாதது முக்கிய காரணமாக உள்ளது.

அதேநேரத்தில் பல இடங்களில் அரசு இடங்களை ஆக்கிரமித்து கட்டிடங்கள் கட்டப்பட்டுள்ளதும் தண்ணீர் வெளியேற வழியில்லாத நிலையை உருவாக்கி உள்ளது.

இதற்கு நிரந்தர தீர்வு காண வேண்டும் என பொதுமக்கள் தொடர்ந்து கோரிக்கை எழுப்பி வருகின்றனர். இத்தகைய சூழலில் வெள்ள தடுப்பு நடவடிக்கைகள் குறித்து முதல்-அமைச்சர் ரங்கசாமி, அரசு அதிகாரிகளுடன் சட்டமன்ற வளாகத்தில் ஆலோசனை கூட்டம் நடத்தினார்.

அரசு செயலர்கள் வல்லவன், விக்ராந்த்ராஜா, கலெக்டர் பூர்வா கார்க், இயக்குனர்கள் சக்திவேல், முத்துமீனா, பாலாஜி, சப்-கலெக்டர்கள் கந்தசாமி, ரிஷிதாகுப்தா, நகராட்சி ஆணையர்கள் சிவக்குமார், சுரேஷ்ராஜ், சீனியர் போலீஸ் சூப்பிரண்டுகள் லோகேஸ்வரன், ராகுல் அலுவால் மற்றும் அதிகாரிகள் பலர் பங்கேற்றனர்.

கூட்டத்தில் தொடர் மழையால் புதுவை, காரைக்காலில் ஏரி, குளங்கள் நிரம்பியிருப்பது, மழை அளவு ஆகியவை குறித்து அதிகாரிகள் விளக்கினர். அரசு சார்பில் மேற்கொள்ளப்பட்ட நடவடிக்கைகள் குறித்து ரங்கசாமி கேட்டறிந்தார்.

தேங்கியிருந்த மழைநீரை வெளியேற்ற எடுக்கப்பட்ட நடவடிக்கைகள், பயிர் சேதம், சாலைகள் சேதம் குறித்து அதிகாரிகள் தெரிவித்தனர். வழக்கமாக மழைவெள்ளம் தேங்கும் பகுதிகளில் வரும் காலத்தில் தண்ணீர் தேங்காதவாறு நிரந்தரமான தடுப்பு நடவடிக்கைகளை மேற்கொள்ள வேண்டும்.

அனைத்து துறைகளும் ஒன்றிணைந்து இதற்கு நிரந்தர தீர்வு காண வேண்டும். மழை நிவாரணம் பெற புதுவை, காரைக்காலில் ஏற்பட்டுள்ள பயிர், சாலை உட்பட அனைத்து துறையின் சேத விபரங்களை உடனடியாக அறிக்கையாக தயார் செய்ய வேண்டும் என உத்தரவிட்டார்.

பொதுப்பணித்துறை தலைமை பொறியாளர் சத்தியமூர்த்தி பேசும்போது, வெள்ள வடிகால்களை கட்ட ஸ்மார்ட் சிட்டி திட்டத்தின் கீழ் நடவடிக்கை எடுத்துள்ளோம். இதனால் தான் இந்திராகாந்தி சதுக்கத்தில் உடனடியாக தண்ணீர் வடிந்தது. அடுத்த பருவமழைக்குள் நகர பகுதியில் வெள்ள நீர் தேங்காததவாறு அனைத்து பணிகளும் முடிக்கப்படும் என தெரிவித்தார்.

இதையும் படியுங்கள்... சென்னையில் 40 டாஸ்மாக் மதுக்கடைகள் மூடப்பட்டன

பூந்தமல்லி:

சென்னை புறநகர் பகுதியான மாங்காடு பேரூராட்சிக்குட்பட்ட ஜனனி நகர் பகுதியில் பலத்த மழை காரணமாக 100-க்கும் மேற்பட்ட குடியிருப்புகளை மழை நீர் சூழ்ந்துள்ளது.

இதனால் இங்கு வசிக்கும் மக்கள் கடும் அவதி அடைந்து வருகிறார்கள். அவர்கள் தங்கள் வீடுகளில் இருந்து வெளியேற பெரிய ‘டிரம்’களை ஒன்றாக கட்டி அதில் அமர்ந்து வெளியேறி வருகிறார்கள். படகாக அந்த பெரிய டிரம்களை பயன்படுத்தி வருகிறார்கள்.

அதில் அமர்ந்து செல்லும் பொதுமக்கள் அத்தியாவசிய பொருட்களை வாங்கி வருகின்றனர். இது குறித்து அப்பகுதி மக்கள் கூறும்போது, “பலத்த மழை பெய்யும் போதெல்லாம் இந்த பகுதி வெள்ளத்தால் சூழப்படுகிறது. அந்த நேரத்திற்கு வரும் அதிகாரிகள் அதன்பிறகு வெள்ளத்தடுப்பு நடவடிக்கைகளை கண்டு கொள்வதில்லை. எனவே இந்த பகுதியில் மழைநீர் தேங்காமல் இருக்க நிரந்தர தீர்வு காண வேண்டும்” என்றனர்.

தொடர்ந்து பலத்த மழை பெய்யும் என்று எச்சரிக்கை விடப்பட்டுள்ளதால் அந்த பகுதியில் குடியிருந்த ஏராளமானோர் தங்கள் வீடுகளை காலி செய்து விட்டு உறவினர் வீடுகளில் தஞ்சம் அடைந்து இருக்கிறார்கள்.

அங்கு வசித்து வருபவர்களும் மழை நீர் வெள்ளத்தை நினைத்து அச்சத்தில் உள்ளனர்.

மதுராந்தகம்:

செங்கல்பட்டு மாவட்டத்தில் உள்ள மிகப்பெரியது மதுராந்தகம் ஏரி. இதன் மொத்த உயரம் 23.3 அடி. தொடர் மழை காரணமாக மதுராந்தகம் ஏரி முழு கொள்ளளவை எட்டி உள்ளது.

இன்று காலை நிலவரப்படி ஏரியில் 24 அடிக்கு தண்ணீர் உள்ளது. இதன் முழு கொள்ளளவான 694 மில்லியன் கனஅடி நீரை தாண்டி 720 மில்லியன் கனஅடி தண்ணீர் நிரம்பி இருக்கிறது.

ஏரிக்கு 2000 கனஅடி தண்ணீர் வந்து கொண்டிருக்கிறது. இதையடுத்து ஏரியில் இருந்து 2 ஆயிரம் கன அடி நீர் உபரி நீராக தானியங்கி ‌ஷட்டிர் மற்றும் கலங்கள் வழியாக கிளி ஆற்றில் வெளியேறி வருகிறது.

இதனால் கிளி ஆற்றின் கரையோரம் உள்ள வளர்பிறை, முள்ளி, தோட்ட நாவல், ஈசூர், விழுதமங்கலம் உள்ளிட்ட 21 கிராமங்களுக்கு வெள்ள அபாய எச்சரிக்கை விடப்பட்டுள்ளது.

ஏரியை பார்வையிட பொதுமக்களுக்கு தடை விதிக்கப்பட்டு உள்ளது. உபரி நீர் வெளியேறும் கிளி ஆற்றின் கரையோர பகுதிகளில் குளிக்கவோ, மீன் பிடிக்கவும் செல்லக்கூடாது என்று அதிகாரிகள் எச்சரிக்கை விடுத்துள்ளனர்.

செங்கல்பட்டு மாவட்ட கலெக்டர் ராகுல் நாத் உத்தரவுபடி ஏரிக்கரையின் ஆரம்பப்பகுதியில் தற்காலிக மையம் அமைக்கப்பட்டு மதுராந்தகம் போலீஸ் இன்ஸ்பெக்டர் ருக்மாங்கதன் தலைமையிலான போலீசார் பாதுகாப்பு பணியில் ஈடுபட்டு வருகிறார்கள்.

நீர்வள ஆதார துறை பொதுப்பணித் துறையின் செயற்பொறியாளர் நீல் முடியோன், இளநிலை பொறியாளர் குமார் பொதுப்பணித்துறையினர் ஏரியின் நீர் வரத்தை தொடர்ந்து கண்காணித்து வருகின்றனர்.

ஏரிக்கு நீர்வரத்து அதிகரிக்கும் பட்சத்தில் ‌ஷட்டரை திறப்பதற்கான ஏற்பாடுகளை தயார் நிலையில் வைக்கப்பட்டு உள்ளது.

மதுராந்தகம் வட்டத்தில் பொதுப்பணித்துறையின் கட்டுப்பாட்டில் உள்ள 78 ஏரிகளில் அருங்குணம் சிறுகளத்தூர், மாமண்டூர், கிண்டிசேரி உள்ளிட்ட 35 ஏரிகள் முழுவதும் நிரம்பி உள்ளதாக பொதுப் பணித் துறை அதிகாரிகள் தெரிவித்துள்ளனர்.

சென்னை:

சென்னையில் சாலை அகலப்படுத்துவது, நடைபாதை ஆக்கிரமிப்புகளை அகற்றுவது தொடர்பாக தாக்கல் செய்யப்பட்ட பொது நல வழக்கு, தலைமை நீதிபதி சஞ்சீவ் பானர்ஜி மற்றும் நீதிபதி ஆதிகேசவலு அடங்கிய அமர்வில் இன்று விசாரணைக்கு வந்தது.

அப்போது மனுதாரரின் கோரிக்கையை ஏற்க மறுத்த நீதிபதிகள், 2015-ம் ஆண்டு ஏற்பட்ட வெள்ளத்துக்கு பின், உள்கட்டமைப்பு வசதிகளை மேற்கொள்ள பல கோடி ரூபாயில் திட்டங்கள் தீட்டப்பட்ட போதும், தற்போது சென்னை மாநகரமே மழை நீரில் மிதக்கிறது.

2015-ம் ஆண்டு வெள்ளத்துக்கு பின் சென்னை மாநகராட்சி என்ன செய்து கொண்டிருக்கிறது? ஒரு வாரத்தில் நிலைமையை சரி செய்ய வேண்டும். இல்லாவிட்டால் நீதிமன்றம் தாமாக முன் வந்து கோர்ட்டு அவமதிப்பு வழக்கை விசாரணைக்கு எடுக்கும் என எச்சரித்தனர்.

அதேபோல, அரியலூர் மாவட்டம் பெரியதிருக் கோணம் பகுதியில் உள்ள ஏரியில் மேற்கொள்ளப்பட்ட ஆக்கிரமிப்பை அகற்ற கோரிய வழக்கு தலைமை நீதிபதி சஞ்சீவ் பானர்ஜி, நீதிபதி ஆதிகேசவலு அடங்கிய அமர்வு முன்பு இன்று விசாரணைக்கு வந்தது.

சென்னை உள்பட அனைத்து பகுதிகளிலும் நீர்நிலை ஆக்கிரமிப்புகளை உடனடியாக அகற்ற வேண்டும். நீர் வழிப் பாதைகளில் எந்த தடையும் இருக்க கூடாது.

வெள்ளம் வடியும் வகையில் நீழ்வழிப்பாதை ஆக்கிரமிப்புகளை அகற்ற வேண்டும். பாதி நாட்கள் தண்ணீருக்காகவும், மீதி நாட்கள் தண்ணீரிலும் சென்னை மக்கள் வாழ்கின்றனர்.

இந்த மழை வெள்ளம் அதிகாரிகளுக்கு நல்ல பாடத்தைக் கற்றுக்கொடுத்துள்ளது.

இவ்வாறு நீதிபதிகள் கருத்து கூறினர்.

பின்னர், கோரிக்கை தொடர்பாக மீண்டும் மனு அளிக்க மனுதாரருக்கு அறிவுறுத்தியதுடன், அந்த மனு மீது சம்பந்தப்பட்ட அதிகாரிகள் உடனடியாக நடவடிக்கை எடுக்க வேண்டும் என்றும் உத்தரவிட்டனர்.

இதையும் படியுங்கள்... மகாபலிபுரம் முதல் எண்ணூர் வரை சென்னையில் கடல் சீற்றம்

சென்னை:

முதல்- அமைச்சர் மு.க.ஸ்டாலின் வெளியிட்டுள்ள அறிக்கையில் கூறி இருப்பதாவது:-

வடகிழக்குப் பருவமழையையொட்டி முன் கூட்டியே ஆலோசனைக் கூட்டம் நடத்தி அரசு நிர்வாகம் முழு வீச்சில் முடுக்கி விடப்பட்டுள்ள நிலையில், நேற்று இரவு முதல் பெய்துவரும் கனமழை காரணமாகப் பாதிக்கப்பட்டுள்ள பகுதிகளை இன்று நான் நேரில் பார்வையிட்டு உரிய நிவாரண உதவிகள் வழங்கிடத் தேவையான நடவடிக்கைகளை மேற்கொள்ள உத்தரவிட்டு இருக்கிறேன்.

அமைச்சர்களும் இதுபோன்ற நிவாரணப்பணிகளில் ஈடுபட்டு வருகிறார்கள்.

இந்நிலையில் கழக நாடாளுமன்ற, சட்டமன்ற மற்றும் உள்ளாட்சிப் பிரதிநிதிகள் உள்ளிட்ட அனைத்து கழக நிர்வாகிகளும் அவரவர் பகுதிகளில் கனமழையால் பாதிக்கப்பட்டுள்ள மக்களுக்கு உணவு மற்றும் மருந்துகள் அளித்தல், பாதுகாப்பான இடங்களில் தங்க வைத்தல், தேங்கி நிற்கும் தண்ணீரை வெளியேற்றுதல் உள்ளிட்ட பல்வேறு நிவாரணப்பணிகளில் ஈடுபட்டுள்ள அரசு அதிகாரிகளுடன் இணைந்து பணியாற்றி மக்களின் இன்னல்களைப் போக்கிட தீவிரமாகச் செயல்பட வேண்டும் என்று கேட்டுக் கொள்கிறேன்.

இவ்வாறு முதல்-அமைச்சர் மு.க.ஸ்டாலின் கூறி உள்ளார்.

இதையும் படியுங்கள்...மழையால் பாதிக்கப்பட்ட மக்களுக்கு பா.ம.க.வினர் உதவ வேண்டும் - அன்புமணி ராமதாஸ் அறிக்கை

டால்மியாபுரம்:

திருச்சி மாவட்டத்தில் நேற்று முன்தினம் வரை கன மழை பெய்தது. குறிப்பாக புறநகர் பகுதிகளில் பெய்த பலத்த மழையால் தாழ்வான பகுதிகளில் குளம் போல் தண்ணீர் தேங்கியதோடு, பல இடங்களில் குடியிருப்புகளை மழை வெள்ளம் சூழ்ந்தது.

லால்குடி வட்டம் புள்ளம்பாடி ஊராட்சி ஒன்றியம் கோவண்டாகுறிச்சி ஊராட்சி வடுகர்பேட்டை, காமராஜபுரம் பகுதியில் நேற்று முன்தினம் இரவு பெய்த கன மழையால் அப்பகுதியில் உள்ள வீடுகளுக்குள் காட்டாற்று வெள்ளம் புகுந்தது.

இதனால் அப்பகுதி பொது மக்கள் இரவு முழுவதும் பெரிதும் அவதிக்குள்ளாயினர். திருச்சி-சிதம்பரம் தேசிய நெடுஞ்சாலையில் சாலை விரிவாக்கம் பணிகள் நடைபெற்று வருகிறது. காட்டாற்று வெள்ளம் ஓடக்கூடிய இடத்தில் மேம்பாலம் பணி அமைக்கும் பணி நடைபெற்று வருவதால் அப்பகுதியில் இருந்து வெளியேறும் மழைநீர் குடியிருப்புகளுக்குள் புகுந்தது.

அந்த தண்ணீரை வெளியேற்றுவதற்காக பொதுமக்கள் காவல் துறை மற்றும் ஊராட்சி மன்ற நிர்வாகத்திற்கு தகவல் தெரிவித்தனர். சம்பவ இடத்தை ஊராட்சி மன்ற தலைவர் வியாகுல ஈஸ்வரி ஜெயக்குமார் மற்றும் கல்லக்குடி காவல்துறையினர் பார்வையிட்டு தண்ணீர் வடிந்து செல்வதற்கு தேவையான நடவடிக்கை எடுப்பதாக தெரிவித்துள்ளனர்.

இங்கு வசிக்கும் 100-க்கும் மேற்பட்ட குடும்பத்தினர் விவசாய கூலி வேலை செய்து வருகிறார்கள். வாழ்வாதாரம் பாதிக்காத வகையில் போர்க்கால அடிப்படையில் அரசு நடவடிக்கை எடுத்து குழந்தைகளுடன் பாதுகாப்பாக வாழ நடவடிக்கை எடுக்குமாறு அவர்கள் கேட்டுக்கொண்டுள்ளனர்.

இப்பகுதியில் குழந்தைகளுக்கான அங்கன்வாடி மையம் அமைந்துள்ளது என்பது குறிப்பிடத்தக்கது. அடுத்த மழை வருவதற்குள் இப்பகுதியில் மழைநீர் வழிந்தோட தேவையான நடவடிக்கை எடுக்குமாறு அப்பகுதி மக்கள் கோரிக்கை விடுத்துள்ளனர்.