நீங்கள் தேடியது "water problem"

பெரியகுளம்:

பெரியகுளம் மற்றும் வடுகபட்டி, மேல்மங்கலம், ஜெயமங்கலம், தாமரைக்குளம், கள்ளிபட்டி உள்பட 20-க்கும் மேற்பட்ட கிராமங்களுக்கு சோத்துப்பாறை அணைப்பகுதியில் இருந்து கூட்டு குடிநீர் திட்டம் மூலம் குடிநீர் வினியோகம் செய்யப்பட்டு வருகிறது.

இந்த குடிநீர் சுத்திகரிக்கப்பட்டு பொதுமக்களுக்கு வழங்கப்பட்டு வந்தது. ஆனால் கடந்த சில நாட்களாக குடிநீர் கலங்கலாக வருவதால் பொதுமக்கள் பீதி அடைந்துள்ளனர்.

இது குறித்து அப்பகுதி மக்கள் தெரிவிக்கையில், பொதுவாக மழை காலத்தில்தான் குடிநீர் கலங்கலாக வரும். தற்போது சுத்திகரிக்கப்பட்டு வருவதால் தண்ணீர் நிறம் இன்றியே வந்துகொண்டிருந்தது. ஆனால் திடீரென சில நாட்கள் கலங்கலாக வருகிறது. குழாயில் ஏதும் உடைப்பு ஏற்பட்டு கழிவு நீர் கலக்கிறதா? என தெரிய வில்லை.

கலங்கலான நீரால் பொதுமக்களுக்கு தொற்றுநோய் பரவும் அபாயம் உள்ளது. பருவநிலை மாற்றத்தால் இப்பதியில் திடீரென காய்ச்சல், சளி ஏற்பட்டு வருகிறது.

கலங்கலான குடிநீரால் பொதுமக்கள் மேலும் அச்சம் அடைந்துள்ளனர். எனவே திட்ட அதிகாரிகள் ஆ ய்வு செய்து சுகாதாரமான குடிநீர் வழங்க நடவடிக்கை எடுக்க வேண்டும் என்றனர்.

பேரையூர்:

மதுரை மாவட்டம், திருமங்கலம் அருகே உள்ள கீழக்கோட்டை பஞ்சாயத்துக்கு உட்பட்டது லட்சுமிபுரம். இங்கு ஆயிரத்துக்கும் மேற்பட்ட குடும்பங்கள் வசித்து வருகின்றன.

கடந்த 6 மாதங்களுக்கு முன்பு மின்மோட்டார் பழுதானதால் குடிநீர் வினியோகம் தடைபட்டது. இதனால் லட்சுமிபுரம் பகுதி பெண்கள் 2 கி.மீ. தூரம் நடந்து சென்று சுடுகாட்டுப் பகுதியில் உள்ள சுகாதாரமற்ற தண்ணீரை எடுத்து வந்தனர்.

குடிநீர் பிரச்சினை தவிர, அடிப்படை வசதிகளும் சரிவர செய்துதரவில்லை. சாலை வசதி, சாக்கடை போன்றவை இல்லாததால் பொதுமக்கள் கடும் அவதியடைந்து வருகின்றனர்.

இது தொடர்பாக லட்சுமிபுரம் கிராம மக்கள் அதிகாரிகளிடம் மனு கொடுத்தனர். அதற்கு அவர்கள் போதிய நிதி இல்லை என தெரிவித்தனர்.

இதை கண்டித்தும், குடிநீர் அடிப்படை வசதிகள் செய்துதர வலியுறுத்தியும் இன்று அந்தப்பகுதியைச் சேர்ந்த 60 பெண்கள் உள்பட 100-க்கும் மேற்பட்டோர் காலிக்குடங்களுடன் திருமங்கலத்தில் உள்ள யூனியன் அலுவலகத்தை முற்றுகையிட்டு போராட்டம் நடத்தினர்.

அப்போது அவர்கள் அரசுக்கு எதிராக கோ‌ஷ மிட்டனர். பொதுமக்கள் திரண்டு பல மணி நேரமாகியும் அதிகாரிகள் அங்கு வரவில்லை. பின்னர் திருமங்கலம் போலீசாரே சமரச பேச்சுவார்த்தை நடத்தினர். இதில் உடன்பாடு ஏற்பட்டதால் கிராம மக்கள் போராட்டத்தை கைவிட்டனர்.

அந்தியூர்:

அந்தியூர் அருகே உள்ள பச்சாம்பாளையம் ஊராட்சி அண்ணாமடுவு, சித்தி ரெட்டிபாளையம், கந்தாம்பாளையம், காட்டூர், பவானி சாலை ஆகிய பகுதி மக்களுக்கு கடந்த சில நாட்களாக சீரான குடிநீர் விநியோகம் இல்லை என்று தெரிகிறது.

இதை கண்டித்து அந்த பகுதி பெண்கள் மற்றும் பொதுமக்கள் இன்று காலை திடீர் போராட்டத்தில் இறங்கினர். சுமார் 50-க்கும் மேற்பட்ட அவர்கள் ஒன்று திரண்டனர்.

கையில் காலி குடங்களுடன் வந்த அந்தியூர்- பவானி-மேட்டூர் செல்லும் 3 வழிச்சாலையில் அவர்கள் குவிந்தனர். திடீரென அவர்கள் சாலையில் அமர்ந்து மறியலில் ஈடுபட்டனர்.

இதனால் அங்கு பரபரப்பும், போக்குவரத்து பாதிப்பும் ஏற்பட்டது. தகவல் கிடைத்ததும் அந்தியூர் போலீஸ் இன்ஸ்பெக்டர் ரவி, சப்-இன்ஸ்பெக்டர் ஆனந்தகுமார் மற்றும் போலீசார் அங்கு வந்தனர்.

அவர்கள் போராட்டத்தில் ஈடுபட்ட பெண்கள் மற்றும் பொதுமக்களிடம் பேச்சுவார்த்தை நடத்தினர். அவர்களிடம் பெண்கள் கூறியதாவது:-

எங்கள் பகுதிக்கு சீரான குடிநீர் விநியோகம் இல்லை. அப்படியே குடிநீர் விநியோகித்தாலும் இரவு 11 மணிக்கு மேல் விநியோகிக்கிறார்கள். அதுவும் வாரத்துக்கு ஒரு முறைதான் வருகிறது.

எனவே 2 நாளுக்கு ஒரு முறை குடிநீர் கிடைக்க நட வடிக்கை எடுக்க வேண்டும். இது தொடர்பாக பேச்சு வார்த்தை நடத்த வட்டார வளர்ச்சி அதிகாரி இங்கு வரவேண்டும்.

இவ்வாறு அவர்கள் கூறினர்.

இதனால் அங்கு பரபரப்பு அதிகரித்தது. எனினும் போலீசார் தொடர்ந்து பேச்சுவார்த்தை நடத்தினர்.

சீரான குடிநீர் விநியோகம் செய்ய நடவடிக்கை எடுக்கப்படும் என்று அவர்கள் உறுதி அளித்தனர். இந்த போராட்டம் காரணமாக அந்த பகுதியில் 1 மணி நேரம் போக்குவரத்து பாதிக்கப்பட்டது. #tamilnews

வத்தலக்குண்டு:

வத்தலக்குண்டு அருகே உள்ள பா.ஊராலிப்பட்டி ஊராட்சி பூவம்பட்டி கிராமத்தில் கடந்த 3 மாதமாக குடிநீர் வினியோகம் செய்யப்பட வில்லை. இது குறித்து ஊராட்சி அலுவலகத்தில் புகார் செய்த போது யூனியன் அலுவலகத்தில் தெரிவிக்குமாறு கூறியுள்ளனர்.

யூனியன் அலுவலகத்தில் புகார் அளித்தும் எவ்வித நடவடிக்கையும் எடுக்கவில்லை. இதனால் நேற்று பூவம்பட்டி கிராம மக்கள் திடீர் சாலை மறியலில் ஈடுபட்டனர்.

இதனால் வத்தலக்குண்டுவில் இருந்த ஆண்டிப்பட்டி செல்லும் சாலையில் இருபுறமும் வாகனங்கள் செல்ல முடியாமல் அணி வகுத்து நின்றன. சம்பவ இடத்துக்கு வந்த அதிகாரிகள் உரிய நடவடிக்கை எடுப்பதாக உறுதியளித்ததின் பேரில் 1 மணி நேர போராட்டம் முடிவுக்கு வந்தது.

திண்டுக்கல்:

திண்டுக்கல் பாரதிபுரம் தீப்பெட்டி காலனி தெரு, சைக்கிள் காலனி தெரு, டிப்போ ரோடு ஆகிய பகுதிகளில் கடந்த 20 நாட்களாக குடிநீர் வினியோகம் இல்லை. இது குறித்து பொதுமக்கள் பல முறை மாநகராட்சி அதிகாரியிடம் புகார் அளித்தும் நடவடிக்கை இல்லை. கடந்த 3 மாதத்துக்கு முன்பு குடிநீர் தட்டுப்பாட்டை போக்க இப்பகுதியில் போர்வெல் அமைக்கப்பட்டது. ஆனால் அதிலும் தற்போது தண்ணீர் வரவில்லை.

இதனால் ஆத்திரமடைந்த அப்பகுதி மக்கள் இன்று பாரதிபுரம் மெயின்ரோடு பகுதியில் காலிக்குடங்களுடன் மறியல் போராட்டத்தில் ஈடுபட்டனர்.

இது குறித்து தகவல் அறிந்ததும் நகர் தெற்கு போலீசார் மற்றும் மாநகராட்சி அதிகாரிகள் அவர்களிடம் சமரசம் செய்தனர். விரைவில் குடிநீர் வழங்க நடவடிக்கை எடுப்பதாக உறுதியளித்ததின் பேரில் மறியல் கைவிடப்பட்டது.

பொது மக்கள் தெரிவிக்கையில், கோடை காலத்தில் தண்ணீர் தட்டுப்பாடு ஏற்பட்ட போது மழை நீரை பயன்படுத்தி வந்தோம். தற்போது மழையும் இல்லாததால் குடிநீருக்கும், வீட்டு உபயோகத்திற்கும் சிரமமான நிலை ஏற்பட்டுள்ளது. தண்ணீர் வழங்கா விட்டால் மீண்டும் மறியல் போராட்டம் நடத்துவோம் என்று தெரிவித்தனர்.

காடையாம்பட்டி:

சேலம் மாவட்டம் காடையாம்பட்டி அடுத்த பண்ணபட்டி ஊராட்சி காங்கியானூரில் சுமார் 500 குடியிருப்புகள் உள்ளன. இந்த பகுதியில் கடந்த 3 மாத காலமாக சரியான முறையில் குடிநீர் வழங்காமல் குடிநீர் தட்டுபாடு நிலவி வந்ததாக கூறப்படுகிறது. இதனால் கடந்த 15 நாட்களுக்கு முன் காடையாம்பட்டி வட்டார வளர்ச்சி அலுவலகத்தை பொதுமக்கள் முற்றுகையிட்டனர்.

அப்போது வட்டார வளர்ச்சி அலுவலர் உடனடியாக குடிநீர் வசதி அமைத்து தரும்படியும், நாள் ஒன்றுக்கு டிராக்டர் மூலம் குடிநீர் வழங்குவதாக கூறபட்ட நிலையில் பொதுமக்கள் கலைந்து சென்றனர். ஆனால் அன்று முதல் இன்று வரை எந்த அதிகாரிகளும் நடவடிக்கை எடுக்கவில்லை. அதனால் ஆத்திரம் அடைந்த பொதுமக்கள் தின்னபட்டி-பண்ணபட்டி செல்லும் சாலையில் காலி குடங்களுடன் மறியலில் ஈடுபட்டனர்.

இந்த சம்பவம் அறிந்த தீவட்டிபட்டி போலீசார் சமரச பேச்சு வார்த்தை நடத்தியதை தொடர்ந்து மறியலை கைவிட்டனர். இதனால் 2 மணி நேரம் போக்குவரத்து பாதிக்கப்பட்டது.

பள்ளிப்பட்டு:

திருத்தணியை அடுத்த பூனிமாங்காடு கிராமத்தில் கடந்த சில நாட்களாக சரிவர குடிநீர் வழங்கப்படவில்லை.

இதனால் அப்பகுதி மக்கள் பல கிலோ மீட்டர் தூரம் நடந்து சென்று வயல்வெளியில் உள்ள கிணற்று நீரை பிடித்து வந்து பயன்படுத்தி வந்தனர். இதனால் கிராம மக்கள் மிகவும் அவதி அடைந்தனர்.

குடிநீர் கேட்டு சம்பந்தப்பட்ட அதிகாரிகளுக்கு கோரிக்கை மனு கொடுத்தும் எந்தவித நடவடிக்கையும் எடுக்கப்படவில்லை.

இதனால் ஆத்திரம் அடைந்த அப்பகுதி பெண்கள் உள்பட சுமார் 50-க்கும் மேற்பட்டோர் இன்று காலை நல்லாத்தூர் - திருத்தணி சாலையில் திடீர் மறியலில் ஈடுபட்டனர்.

அப்போது அவ்வழியே வந்த அரசு பஸ்சை சிறை பிடித்தனர். மறியல் நடந்து கொண்டிருந்த போது மேகலா என்பவர் மயங்கி விழுந்தார். இதனால் பரபரப்பு ஏற்பட்டது. அவரை மீட்டு குனிமாங்காடில் உள்ள அரசு ஆஸ்பத்திரியில் சிகிச்சைக்காக சேர்த்தனர்.

தகவல் அறிந்ததும் தாசில்தார் நரசிம்மன், டி.எஸ்.பி. சேகர், இன்ஸ்பெக்டர் ருக்மாங்கதன் ஆகியோர் மறியலில் ஈடுபட்டவர்களுடன் பேச்சு வார்த்தை நடத்தினர். குடிநீர் கிடைக்க நடவடிக்கை எடுப்பதாக உறுதி அளித்தனர்.

இதையடுத்து மறியலில் ஈடுபட்டவர்கள் கலைந்து சென்றனர். இந்த போராட்டத்தால் அப்பகுதியில் சுமார் 2 மணி நேரத்துக்கும் மேலாக போக்குவரத்து பாதிக்கப்பட்டது.