மேட்டூர் அருகே சோகம் அரசு பஸ் மோதி வாலிபர் பலி

மேட்டூர்:

சேலம் மாவட்டம் மேட்டூர், சமத்துவபுரம் அருகே உள்ள பாரதியார் நகரை சேர்ந்தவர் சசிகுமார் (வயது 28). கூலி தொழிலாளி. இவர் நேற்று இரவு மொபட்டில் மேட்டூரில் இருந்து நாட்டாமங்கலம் நோக்கி சென்று கொண்டிருந்தார்.

அப்போது ஈரோடு மாவட்டம் பவானியில் இருந்து அரசு பஸ் ஒன்று பயணிகளுடன் மேட்டூரை நோக்கி வந்து கொண்டிருந்தது. இரவு சுமார் 8 மணி அளவில் நாட்டாமங்கலம் காளியம்மன் கோவில் அருகே சென்றபோது சசிகுமார் மொபட்டும், அரசு பஸ்சும் திடீரென நேருக்கு நேர் பயங்கரமாக மோதியது.

இதில் மொபட்டில் இருந்து வாலிபர் சசிகுமார் தூக்கிவீசப்பட்டு பஸ்சின் அடிபகுதியில் சிக்கி பலத்த காயம் அடைந்து, சம்பவ இடத்திலேயே பரிதாபமாக பலியானார்.

விபத்து ஏற்பட்டதையடுத்து பஸ் உடனே அந்த பகுதியில் நிறுத்தப்பட்டது. பின்னர் பயணிகள் அனைவரும் பஸ்சில் இருந்து கீழே இறக்கி விடப்பட்டு, அந்த வழியாக சென்ற வேறு பஸ்களில் அவர்கள் ஏற்றி அனுப்பி வைக்கப்பட்டனர்.

இந்த சம்பவம் குறித்து தகவல் அறிந்ததும் மேட்டூர் போலீசார் சம்பவ இடத்திற்கு விரைந்து வந்து பலியான சசிகுமார் உடலை மீட்டு பிரேத பரிசோதனைக்காக மேட்டூர் அரசு ஆஸ்பத்திக்கு அனுப்பி வைத்தனர். இன்று காலையில் ஆஸ்பத்திரியில் அவரது உடலை பார்த்து பெற்றோர் மற்றும் உறவினர்கள் கதறி அழுதனர்.