நீங்கள் தேடியது "house damage"

புதுச்சேரி:

வங்கக்கடலில் உருவான மேல் அடுக்கு சுழற்சி காரணமாக புதுச்சேரியில் கடந்த ஒரு வார காலமாக விட்டு விட்டு மழை பெய்து வருகிறது.

புதுச்சேரியில் நேற்று காலை வானம் இருண்டு காணப்பட்டது. ஆனால் பிற்பகல் வரை மழை பெய்யவில்லை. மாலை 3.30 மணிக்கு திடீரென இடியுடன் கனமழை பெய்தது. சுமார் அரை மணி நேரம் மழை கொட்டியது.

கனமழை காரணமாக சாலைகளில் வெள்ளம் பெருக்கெடுத்து ஒடியது. தாழ்வான பகுதிகளில் வெள்ள நீர் தேங்கியது. மழை நின்றதும் வெள்ள நீர் வடிந்தது. தொடர்ந்து இரவிலும் விட்டு விட்டு பரவலாக மழை பெய்தது.

இந்நிலையில் இன்று அதிகாலை 4.30 மணி அளவில் இடி, மின்னலுடன் கனமழை பெய்தது. சுமார் அரை மணி நேரம் மழை கொட்டியது. பெருத்த இடி ஒசையால் வீடுகளில் தூங்கியவர்கள் அச்சமடைந்தனர். குழந்தைகள் இடி சத்தத்தை கேட்டு அரண்டு போனார்கள்.

வீடுகளில் உள்ள மின் சாதன பொருட்களின் இணைப்புகளை துண்டித்தனர். தொடர்ந்து காலை நேரத்தில் வானம் மேகமூட்டத்துடன் இருண்டு காணப்படுகிறது.

தொடர்ந்து மழை விட்டு விட்டு பெய்து வருகிறது. இந்த தொடர் மழையினால் தாழ்வான பகுதிகளில் தண்ணீர் தேங்கியுள்ளன.

குறிப்பாக புதுச்சேரியின் நகர பகுதியான புஸ்சி வீதி, பாரதி வீதி, சின்னசுப்புராய பிள்ளை வீதி, காந்தி வீதி உள்ளிட்ட பகுதிகளில் மழை வெள்ளம் தேங்கியுள்ளது.

கனமழை காரணமாக உழவர்கரை தொகுதி மூலக்குளம் பகுதியில் வசித்து வரும் வசந்தா என்ப வர் வீட்டின் பக்கவாட்டு சுவரின் ஒரு பகுதி திடீரென அதிகாலை 5 மணியளவில் இடிந்து விழுந்தது.

சுவர் இடிந்து விழுந்ததில் அருகில் நிறுத்தி வைக்கப்பட்டிருந்த மோட்டார் சைக்கிள்கள் சேதம் அடைந் தது. வீட்டில் வசிப்போர் யாரும் அருகில் இல்லாததால் காயம் ஏற்படவில்லை.

இதனிடையே கடலில் மீன்பிடிக்க கடலுக்கு சென்றுள்ள மீனவர்கள் கரை திரும்புமாறு புதுச்சேரி மீன்வளத்துறை எச்சரிக்கை விடுத்துள்ளது.

இதுகுறித்து மீன்வளதுறை இயக்குனர் முகமது இஸ்மாயில் வெளியிட்டுள்ள செய்தி குறிப்பில், குறைந்த காற்றழுத்த தாழ்வு பகுதி 29-ந் தேதி தாழ்வு மண்டலமாக வலுப் பெற கூடும் என வானிலை மையம் தெரித்துள்ளது. எனவே ஆழ்கடலில் உள்ள மீனவர்கள் வருகிற 28-ந் தேதிக்குள் கரை திரும்புமாறு கேட்டுக்கொள்ளப்படுகிறார்கள் என்று கூறியுள்ளார்.

மேலும், ஆழ்கடலில் மீன்பிடியில் ஈடுபட்டுள்ள மீனவர்களுக்கு தொலை தொடர்பு உபகரணங்கள் மூலம் புதுவை மீன்வளத்துறை தகவல் தெரிவித்துள்ளது.

அந்தியூர்:

ஈரோடு மாவட்டம் அந்தியூர் அருகே இரட்டை கரடு பகுதியில் மலை அடிவாரத்தில் ஏராளமான வீடுகள் உள்ளன. இந்த மலைப்பகுதியில் பெரிய, பெரிய ராட்சத பாறைகள் உள்ளன.

மலை அடிவாரத்தில் கிருஷ்ணமூர்த்தி (வயது 48) என்பவர் வீடு உள்ளது. கிருஷ்ணமூர்த்தி தனது மனைவி தமிழ்ச்செல்வி, மகன் ஸ்ரீதருடன் வீட்டில் வசித்து வருகிறார். கிருஷ்ண மூர்த்தி கூலி தொழிலாளி.

இந்நிலையில் இரட்டைக்கரடு பகுதியில் கடந்த 2 நாட்களாக இடியுடன் கூடிய கனமழை பெய்து வருகிறது. நேற்று முன்தினம் இரவு கிருஷ்ண மூர்த்தி தனது மனைவி, மகனுடன் வீட்டில் உள்ள அறையில் தூங்கிக் கொண்டிருந்தார்.

பலத்த மழை காரணமாக மண்ணரிப்பு ஏற்பட்டு 2 ராட்சத பாறைகள் திடீரென கிருஷ்ணமூர்த்தி வீட்டின் மீது உருண்டு விழுந்தது.

ஒரு பாறை வீட்டின் சமையல் அறையிலும், மற்றொரு பாறை வீட்டின் ஹாலிலும் உருண்டு விழுந்தது. இதில் சமையல் அறையின் ஒரு பகுதி மற்றும் வீட்டின் ஹால் இடிந்து விழுந்து சேதம் அடைந்தது. சமையலறையில் இருந்த ஸ்டவ், பாத்திரம், குடம் போன்றவை முற்றிலும் சேதமடைந்தது.

இரவில் திடீரென பயங்கர சத்தம் கேட்டதால் கிருஷ்ணமூர்த்தி எழுந்து வந்து பார்த்தார். அப்போது பாறைகள் வீட்டின் மீது உருண்டு விழுந்து கிடப்பதை கண்டு அதிர்ச்சி அடைந்தார்.

நல்ல வாய்ப்பாக பாறைகள் கிருஷ்ணமூர்த்தி தூங்கிக் கொண்டிருந்த அறையில் விழாததால் அவர் குடும்பத்துடன் அதிர்ஷ்டவசமாக உயிர் தப்பினார். எனினும் அப்பகுதி மக்கள் எந்த நேரத்திலும் பாறைகள் உருண்டு விழலாம் என்று பீதி அடைந்து உள்ளனர். 

களியக்காவிளை:

கன்னியாகுமரி மாவட்டத்தில் கடந்த சில நாட்களாக தொடர்ந்து மழை பெய்து வருகிறது. இந்த தொடர் மழை காரணமாக ஆறுகள், குளங்களிலும் வெள்ளப்பெருக்கு ஏற்பட்டுள்ளது. பல்வேறு இடங்களில் மழை நீர் சூழ்ந்ததால் போக்குவரத்து பாதிப்பும் ஏற்பட்டுள்ளது. மேலும் விளைநிலங்களையும் வெள்ளம் சூழ்ந்துள்ளது.

தொடர் மழையால் பல்வேறு இடங்களில் மரங்கள் முறிந்து விழுந்து, மின்கம்பங்களும் சேதம் அடைந்துள்ளது. இந்நிலையில் களியக்காவிளை அருகே உள்ள திருத்துவபுரம் அடுத்த தோப்புவிளை பகுதியில் ஆனந்த் என்பவரது வீட்டில் அருகில் இருந்த பெரிய பாறாங்கல் உடைந்து வீட்டின் மீது விழுந்தது. இதில் வீட்டின் ஒரு பகுதி கடும் சேதம் அடைந்தது.

பாறை உடைந்து விழுந்த நேரத்தில் வீட்டில் ஆனந்த், அவரது மனைவி மற்றும் தாயார் வேறு அறையில் இருந்ததால் அதிர்ஷ்ட வசமாக உயிர் தப்பினர். பாறை விழுந்ததில் வீட்டின் அறை முற்றிலுமாக உடைந்து சேதம் அடைந்துள்ளது.

தஞ்சாவூர்:

தஞ்சை பழைய பஸ் நிலையம் அருகே ஆப்ரகாம் பண்டிதர் சாலை அருகில் அமைந்துள்ளது மேட்டு எல்லையம்மன் கோவில் தெரு. இங்கு சுமார் 300-க்கும் மேற்பட்ட வீடுகள் உள்ளது. அதிகளவில் கூரை வீடுகள் உள்ளன. அனைத்து வீடுகளும் அடுத்தடுத்து நெருக்கமாக அமைந்துள்ளது.

இந்நிலையில் இன்று அதிகாலை 5.30 மணியளவில் அந்த பகுதியில் உள்ள ஒரு வீட்டின் கூரையில் லேசான தீ விபத்து ஏற்பட்டது. பின்னர் தீ மளமளவென கொளுந்து விட்டு எரிந்தது. இதைப் பார்த்து அதிர்ச்சியடைந்த வீட்டின் உரிமையாளர் வீட்டை விட்டு வெளியே ஓடி வந்து கூச்சலிட்டார். பின்னர் காற்றின் வேகத்தில் தீ அருகில் உள்ள வீடுகளுக்கும் பரவத் தொடங்கியது. அப்போது ஒரு வீட்டில் இருந்த சிலிண்டர் திடீரென வெடித்து சிதறியது.

இதனால் அடுத்தடுத்த வீடுகளிலும் குபீரென தீப்பற்றியது. இதனால் தீயை கட்டுப்படுத்த முடியாத நிலை ஏற்பட்டது. அப்போது அடுத்தடுத்த வீடுகளில் உள்ள சிலிண்டர்களும் வெடித்து சிதறியதால் அப்பகுதியே ஒரே களேபரமானது. இதனால் அந்த பகுதியில் பயங்கர சத்தம் கேட்டது.

சத்தம் கேட்டதும் அருகில் உள்ள பகுதி மக்கள் அங்கு வந்து குவிந்தனர். உடனே அங்கு இருந்த இளைஞர்கள், பொதுமக்கள் தண்ணீரை ஊற்றி தீயை அணைக்க முயற்சி செய்தனர். ஆனால் தீ கொளுந்துவிட்டு எரிந்ததால் வீட்டின் அருகே யாராலும் செல்ல முடியவில்லை.

இதனால் பக்கத்து வீட்டுகாரர்கள் உடனடியாக வெளியேறினர். சிலிண்டர்களை வீடுகளில் இருந்து வெளியில் கொண்டு வந்து சாலைகளில் போட்டனர்.

உடனே இது குறித்து தஞ்சை தீயணைப்பு நிலையத்துக்கு தகவல் கொடுக்கப்பட்டது. பின்னர் மாவட்ட தீயணைப்பு அலுவலர் ரவிச்சந்திரன் உத்தரவின் பேரில் உதவி மாவட்ட அலுவலர் இளஞ்செழியன், நிலைய அலுவலர் திலகர் மற்றும் தீயணைப்பு வீரர்கள் 2 வாகனங்களில் சம்பவ இடத்துக்கு விரைந்து வந்தனர்.

உடனே அவர்கள் தண்ணீரை பீச்சி அடித்து சுமார் 2½ மணி நேரம் பேராட்டத்திற்கு பிறகு தீயை கட்டுக்குள் கொண்டு வந்தனர். மேலும் தகவலறிந்து டி.எஸ்.பி. ஜெயச்சந்திரன், தஞ்சை கிழக்கு போலீஸ் இன்ஸ்பெக்டர் ராஜகோபால் மற்றும் போலீசார் விரைந்து வந்து சம்பவ இடத்தை பார்வையிட்டனர்.

பின்னர் அவர்கள் விசாரணை நடத்தியதில் அந்த பகுதியை சேர்ந்த 1.பாலகிருஷ்ணன், 2.பால்ராஜ், 3.நாகராஜ், 4.சண்முகம், 5.ராஜா, 6.ராமகிருஷ்ணன், 7.கேசவன், 8.ராகவன், 9.தேவேந்திரன், 10.சரவணன், 11.ராமு, 12.கணேசன், 13.கிரி, 14.மாரிசாமி ஆகியோரின் வீடுகள் உள்பட 18 வீடுகளில் தீ விபத்து ஏற்பட்டுள்ளது தெரியவந்தது.

இதில் பாலகிருஷ்ணன், பால்ராஜ், சண்முகம், மாரிசாமி, நாகராஜ், ராமகிருஷ்ணன் ஆகியோரின் வீடுகளில் உள்ள பொருட்கள் முழுவதும் எரிந்து நாசமானது. யார் வீட்டில் முதலில் தீ விபத்து ஏற்பட்டது. சிலிண்டர் வெடித்து தீ விபத்து ஏற்பட்டதா? அல்லது மின்கசிவு காரணமாக தீ விபத்து ஏற்பட்டதா? என்று போலீசார் விசாரணை நடத்த வருகின்றனர்.

தீ விபத்து ஏற்பட்ட வுடன் வீட்டில் வசிப்பவர்கள் உடனடியாக வீட்டை விட்டு வெளியே வந்து விட்டதால் எந்த வித உயிர் பலி அசம்பாவிதங்கள் நடக்க வில்லை. ஆனால் தீ கொளுந்து விட்டு எரிந்ததால் வீட்டில் உள்ள பொருட்கள் அனைத்தும் கருகி விட்டன.

இதனால் ரேசன் கார்டு, ஆதார்அட்டை, சான்றிதழ்கள் என முக்கிய ஆவணங்களும் தீயில் எரிந்து சேதமானது. மேலும் பீரோ, துணிகள், பணம் என்று அனைத்தும் தீயில் கருகின. இதனை கண்டு பெண்கள் கதறி அழுதனர். இதனால் அந்த பகுதியே சோகத்தில் மூழ்கியது.

இது குறித்து அப்பகுதி மக்கள் கூறியதாவது:-

இந்த பகுதியில் இன்று காலையில் பயங்கர சத்தம் கேட்டது உடனே தூங்கி கொண்டிருந்த நாங்கள் வெளியே வந்து பார்த்தோம். அப்போது வீடுகள் தீ பற்றி எரிந்து கொண்டிருந்தது.

இதனால் அதிர்ச்சியடைந்த நாங்கள் எங்கள் வீடுகளில் உள்ள தண்ணீரை எடுத்து தீயை அணைக்க முயற்சி செய்தோம் ஆனால் முடியவில்லை. 4 வீடுகளில் சிலிண்டர் வெடித்ததால் தீ பெரிய அளவில் பற்றி எரிந்தது. பின்னர் தான் தீயணைப்பு நிலையத்திற்கு தகவல் கொடுத்தோம். அவர்கள் வந்து தீயை அணைத்தனர்.

இவ்வாறு அவர்கள் கூறினர்.

தீவிபத்தில் பாதிக்கப்பட்ட குடும்பங்களுக்கு டி.எஸ்.பி. ஜெயச்சந்திரன் உணவு வழங்கி ஆறுதல் கூறினார்.

திருத்துறைப்பூண்டி:

காவிரி டெல்டா மாவட்டங்களில் பருவ மழை சரியாக பெய்யவில்லை. இதனால் விவசாயம் பாதிக்கப்பட்டது. மேலும் ஏரிகள், குளங்கள் வறண்டு நிலத்தடி நீர் குறைந்து போனது. ஆடு, மாடுகளுக்கு குடிக்க கூட தண்ணீர் இல்லாத நிலை நிலவியது.

இந்த நிலையில் திருவாரூர் மாவட்டம், திருத்துறைப்பூண்டி மற்றும் அதன் சுற்றுவட்டார பகுதிகளில் நேற்று மதியம் பலத்த காற்றுடன் ஆலங்கட்டி மழை பெய்தது. இதனால் ஆட்டூர், எழிலூர், நுணாக்காடு, கொத்தமங்கலம், விட்டுக்கட்டி, வரம்பியம் உள்ளிட்ட பகுதிகளில் 50-க்கும் மேற்பட்ட மரங்கள் சாய்ந்தன.

ஆட்டூர் பண்டார ஓடை பகுதியில் மரம் முறிந்து மின்கம்பிகளில் விழுந்ததில் மின் கம்பிகள் அறுந்தன. மின்ஊழியர்கள் துரிதமாக செயல்பட்டதால் மின்சாரம் நிறுத்தப்பட்டு உயிரிழப்புகள் தவிர்க்கப்பட்டன. இதேபோல நுணாக்காடு மெயின் ரோட்டை சேர்ந்த விவசாயி சுப்பையன் (வயது 60), சந்தானம் (60), மலர் (40), பாலசுப்பிரமணியன் (29), ஜெகநாதன் (50) ஆகிய 5 பேரின் வீட்டின் கூரைகள் மீது மரம் விழுந்ததால் வீடுகள் சேதமாயின. இதுகுறித்து தகவல் அறிந்த திருத்துறைப்பூண்டி தாசில்தார் மகேஷ்குமார் சம்பவ இடத்திற்கு விரைந்து சென்று பார்வையிட்டு, உரிய இழப்பீடு பெற்று தருவதாக உறுதியளித்தார்.