நீங்கள் தேடியது "slug 96042"

கோவை:

கோவை போத்தனூர் அருகே உள்ள ஸ்ரீராம் நகரை சேர்ந்தவர் ஜெயபிரகாஷ். இவரது மகன் ஜான் பிரிட்டோ (வயது 28). பெயிண்டர். இவர் மீது கொலை, அடிதடி உள்ளிட்ட வழக்குகள் உள்ளது.

நேற்று இரவு ஜான் பிரிட்டோ தனது நண்பரான பிரவீன் என்பவருடன் அந்த பகுதியில் உள்ள டாஸ்மாக் கடைக்கு மது குடிக்க சென்றார். அப்போது போதை தலைக்கேறிய நிலையில் அங்கு இருந்த போத்தனூரை சேர்ந்த காட்வின்ராஜ், மில்டன், குட்டி ஆகியோருக்கும், ஜான் பிரிட்டோவுக்கும் இடையே திடீரென தகராறு ஏற்பட்டது. இதில் ஆத்திரம் அடைந்த இவர்கள் ஒருவரை ஒருவர் மாறி மாறி தாக்கி கொண்டனர். ஜான் பிரிட்டோ தாக்கியதில் காட்வின்ராஜூக்கு வயிறு மற்றும் தலையில் பலத்த காயம் ஏற்பட்டது.

பின்னர் அங்கு இருந்தவர்கள் 2 கும்பலையும் சமாதானம் செய்து அனுப்பி வைத்தனர். ஜான் பிரிட்டோவை அவரது நண்பர் பிரவீன் தனது மோட்டார் சைக்கிளில் வீட்டுக்கு அழைத்து சென்றார். அப்போது ஆத்திரம் அடைந்த காட்வின்ராஜ், மில்டன், குட்டி ஆகியோர் இவர்களது மோட்டார் சைக்கிளை பின் தொடர்ந்து விரட்டி வந்தனர். ஜான் பிரிட்டோ மோட்டார் சைக்கிளில் இருந்து இறங்கி வீட்டுக்குள் செல்ல முயன்ற போது விரட்டி வந்த கும்பல் அவரை வயிறு மற்றும் மார்பில் கத்தியால் குத்தி விட்டு மோட்டார் சைக்கிளில் ஏறி தப்பிச் சென்றனர். இதில் நிலைகுலைந்த ஜான் பிரிட்டோ ரத்த வெள்ளத்தில் கீழே சரிந்தார். இதனை பார்த்து அதிர்ச்சியடைந்த அவரது வீட்டில் இருந்தவர்கள் ரத்த வெள்ளத்தில் உயிருக்கு போராடிய ஜான் பிரிட்டோவை மீட்டு கோவை அரசு ஆஸ்பத்திரிக்கு கொண்டு சென்றனர். ஆனால் செல்லும் வழியிலேயே ஜான் பிரிட்டோ பரிதாபமாக இறந்தார்.

இந்த தகவல் கிடைத்ததும் போத்தனூர் போலீசார் சம்பவஇடத்துக்கு விரைந்து சென்று விசாரணை நடத்தினர். மேலும் இது குறித்து வழக்குப்பதிவு செய்து ஜான்பிரிட்டோவை குத்தி கொலை செய்து விட்டு தப்பி ஓடிய காட்வின்ராஜ், மில்டன், குட்டி ஆகியோரை தேடி வந்தனர்

இந்தநிலையில் ஜான் பிரிட்டோ தாக்கியதில் படுகாயம் அடைந்த காட்வின் ராஜ் அந்த பகுதியில் உள்ள தனியார் ஆஸ்பத்திரியில் சிகிச்சை பெற்று வருவது தெரிய வந்தது.மேலும் தலைமறைவாக உள்ள மில்டன், குட்டி ஆகியோரை போத்தனூர் போலீசார் வலை வீசி தேடி வருகிறார்கள்.

கும்மிடிப்பூண்டி:

சிப்காட் தொழிற்பேட்டையில் உள்ள தனியார் தொழிற் சாலையில் பீகார் மாநிலம் சிக்கந்தரா மண்டலத்தைச் சேர்ந்த சச்சின்குமார் (வயது 22). தொழிலாளியாக வேலை பார்த்து வந்தார்.

இவர் புது கும்மிடிப்பூண்டியில் உள்ள ஆஞ்சநேயர் கோவில் தெருவில் வாடகை வீடு எடுத்து தங்கி இருந்தார்.

அவரது வீட்டின் அருகே ஒடிசாவைச் சேர்ந்த அஜய் உள்பட சில தொழிலாளர்களும் வாடகைக்கு வீடு எடுத்து வசித்து வருகின்றனர்.

இந்த நிலையில் அஜய்யின் செல்போன் திருட்டு போனதாக தெரிகிறது. அதனை பக்கத்து வீட்டில் தங்கி இருந்த வடமாநில வாலிபர் ராஜேஷ் திருடியதாக அஜய் தகராறில் ஈடுபட்டார்.

இதனை அறிந்து சச்சின்குமார் அங்கு வந்தார். அவர் ராஜேசுக்கு ஆதரவாக வாக்குவாதம் செய்தார். இதனால் அவர்களுக்குள் மோதல் ஏற்பட்டது.

இதனால் ஆத்திரம் அடைந்த அஜய் மற்றும் அவரது நண்பர்கள் சேர்ந்து சச்சின் குமாரை சரமாரியாக தாக்கினர். இதில் அவர் சம்பவ இடத்திலேயே இறந்தார். அவரது உடல் பரிசோதனைக்காக பொன்னேரி அரசு ஆஸ்பத்திரியில் வைக்கப்பட்டுள்ளது. இது குறித்து கும்மிடிப்பூண்டி சிப்காட் போலீஸ் இன்ஸ்பெக்டர் ஜெயக்குமார் விசாரணை நடத்தி வருகிறார்கள்.

சச்சின்குமார் இறந்தது குறித்து அவரது உறவினர்களுக்கு தகவல் தெரிவிக்கப்பட்டுள்ளது. இது தொடர்பாக அஜய், அவரது நண்பர்கள் அர்ஜுன், ரமித்குமார் உள்பட 7 பேரிடம் போலீசார் விசாரித்து வருகிறார்.

திருச்சி:

திருச்சி ஸ்ரீரங்கம் அருகே உள்ள பிச்சாண்டவர் கோவிலை சேர்ந்தவர் அப்துல்லா (வயது35). ஆட்டோ டிரைவராக இருந்தார். நேற்று திருவானைக்காவலில் உள்ள ஒரு திருமண மண்டபத்தில் நடந்த நிகழ்ச்சிக்கு வந்தவர்களை அப்துல்லா சவாரி ஏற்றிச்சென்றார்.

அப்போது திருவானைக்காவல் டிரங்ரோட்டில் மண்டபத்தின் அருகில் உள்ள ஒரு பிரியாணி கடையில் சவாரிக்கு வந்த ஒரு பெண் 30 பொட்டலம் பிரியாணி வாங்க டோக்கன் வாங்கியுள்ளார். ஆனால் மண்டபத்திற்கு சென்று பார்த்துபோது 28 பொட்டலங்களே இருந்துள்ளது. இதனால் மீண்டும் பிரியாணி கடைக்கு சென்று அந்த பெண் பிரியாணி கடை மேனேஜரிடம் கேட்டுள்ளார்.

அப்போது கடையில் இருந்தவர்களுக்கும் அந்த பெண்ணுக்கும் இடையே வாக்குவாதம் ஏற்பட்டுள்ளது. உடனே வெளியில் நின்றிருந்த ஆட்டோ டிரைவர் அப்துல்லா அந்த பெண்ணுக்கு ஆதரவாக பேசியுள்ளார். இதை கடையில் சாப்பிட்டுக்கொண்டிருந்த அம்பேத்கார் நகரைச் சேர்ந்த நாகராஜ் என்பவர் கடைக்காரர்களுக்கு ஆதரவாக பேசி அப்துல்லாவிடம் தகராறு செய்துள்ளார்.

பிரியாணி பிரச்சினை பெரிதாவதை பார்த்த அந்த பெண் அங்கிருந்து பயந்து கொண்டு சென்றுவிட்டார். இதற்கிடையே நாகராஜூம், அப்துல்லாவும் வாக்கு வாதத்தில் ஈடுபட்டுள்ளனர். அப்போது தனது நண்பர்கள் தயாளன் என்ற ஸ்ரீராம், முன்னா,கோகுல்நாத் என்ற பாரதி ஆகியோரை அழைத்து வந்த நாகராஜ் அப்துல்லாவை சரமாரியாக அடித்து உதைத்துள்ளார்.

இதில் அப்துல்லா மயங்கி விழுந்தார். உடனே 4 பேரும் மோட்டார் சைக்கிளில் ஏறி தப்பிவிட்டனர். அடிபட்டு கிடந்த அப்துல்லாவை அவரது நண்பர் முஸ்தபா அருகில் உள்ள ஆஸ்பத்திரியில் சிகிச்சைக்கு சேர்த்தார். அப்போது முதலில் கீழே விழுந்ததால் காயம்பட்டதாக டாக்டரிடம் கூறும்படி முஸ்தபாவிடம் அப்துல்லா கூறியுள்ளார். இதனால் டாக்டர்கள் உரிய சிகிச்சையை உடனே அளிக்க முடியாமல் போனதாக கூறப்படுகிறது.

ஆனால் 4 பேரும் நெஞ்சில் மிதித்ததால் மோசமாக உடல்நிலை பாதிக்கப்பட்டிருந்த அப்துல்லா பரிதாபமாக இறந்துவிட்டார்.

இதுகுறித்து ஸ்ரீரங்கம் போலீசில் புகார் செய்யப்பட்டது. போலீசார் வழக்கு பதிவு செய்து விசாரணை நடத்தினர். பிரியாணி கடையில் இருந்த கண்காணிப்பு கேமிராவை பார்த்தபோது அதில் நாகராஜூம் அவரது நண்பர்களும் அப்துல்லாவை அடித்து உதைக்கும் காட்சி பதிவாகி இருந்தது. அதன்படி நாகராஜை போலீசார் கைது செய்தனர். மேலும் அவரது நண்பர்களான தயாளன், முன்னா, பாரதி ஆகியோரையும் போலீசார் கைது செய்தனர்.

பிரியாணி பிரச்சினையில் தலையிட்டு கடைசியில் அப்பாவி ஆட்டோ டிரைவர் உயிரை இழக்கும் நிலை ஏற்பட்டுவிட்டது. கொலை செய்யப்பட்ட அப்துல்லாவிற்கு மனைவி, 2 குழந்தைகள் உள்ளனர்.

திண்டுக்கல்:

திண்டுக்கல் சோலைஹால் பகுதியை சேர்ந்தவர் ஆறுமுகம் (வயது45). துப்புரவு தொழிலாளி. நேற்று இரவு இவர் தனது உறவினருடன் நாகல்நகர் பகுதிக்கு வந்தார். பின்பு அவர் தனியாக வீட்டுக்கு திரும்பினார். நாகல்நகர் அரண்மனைக்குளம் அருகே சென்றபோது ஒரு மோட்டார்சைக்கிள் வந்தது. அதில் இருந்து இறங்கிய மர்மநபர்கள் 2 பேர் திடீரென ஆறுமுகத்தை கத்தியால் குத்தினர்.

இதில் பலத்த காயம் அடைந்த ஆறுமுகம் ரத்த வெள்ளத்தில் சம்பவ இடத்திலேயே பரிதாபமாக இறந்தார். உடனே மர்ம நபர்கள் அங்கிருந்து தப்பி ஓடிவிட்டனர். இதுபற்றி திண்டுக்கல் தெற்கு போலீஸ் நிலையத்துக்கு தகவல் கொடுக்கப்பட்டது. இன்ஸ்பெக்டர் சரவணன் தலைமையில் போலீசார் சம்பவ இடத்துக்கு விரைந்து வந்து கொலை செய்யப்பட்ட ஆறுமுகத்தின் உடலை மீட்டு பிரேத பரிசோதனைக்கு திண்டுக்கல் அரசு ஆஸ்பத்திரிக்கு அனுப்பிவைத்தனர்.

ஆறுமுகம் கொலைக்கு காரணம் என்ன? முன்விரோதம் காரணமாக அவர் கொலை செய்யப்பட்டாரா? அல்லது வேறு ஏதும் காரணமா? என போலீசார் விசாரணை நடத்தி வருகிறார்கள். கொலையாளிகளை பிடிக்க இன்ஸ்பெக்டர் சரவணன் தலைமையில் தனிப்படை அமைக்கப்பட்டுள்ளது. தனிப்படை போலீசார் பல்வேறு இடங்களுக்கு சென்று விசாரணை மேற்கொண்டனர்.

விசாரணையில் மது குடிக்கும் தகராறில் நண்பர்களே ஆறுமுகத்தை கொலை செய்தது தெரிய வந்தது. ஆறுமுகத்தின் நண்பர்கள் காளிதாஸ், மாரியப்பன். இவர்களும் ஆறுமுகத்துடன் துப்புரவு தொழிலாளர்களாக வேலை செய்து வருகின்றனர். மதுக்கடை பார்களில் சேகரமாகும் பிளாஸ்டிக் கழிவுகளை விற்பனை செய்து அதில் கிடைக்கும் பணத்தில் 3 பேரும் மது குடிப்பது வழக்கம். சம்பவத்தன்று இது போல் பிளாஸ்டிக் கழிவுகளை விற்று அதில் கிடைத்த பணத்தை வைத்து மது குடித்தனர். அப்போது காளிதாஸ் ஆறுமுகத்திடம் ரூ.20 பணம் கேட்டார். அதற்கு ஆறுமுகம் மறுத்தாராம். இதனால் அவர்களுக்கிடையே தகராறு ஏற்பட்டது. இதில் 3 பேரும் மதுக்கடை பாரில் வைத்து கைகலப்பில் ஈடுபட்டனர். அருகில் இருந்தவர்கள் அவர்களை சமாதானம் செய்தனர். எனினும் காளிதாசுக்கு ஆத்திரம் தீரவில்லை.

இந்நிலையில் பாரை விட்டு வெளியே வந்ததும் ஆறுமுகம் வீட்டுக்கு சென்று கொண்டு இருந்தார். அப்போது காளிதாசும் மாரியப்பனும் வந்து ஆறுமுகத்தை கத்தியால் குத்தி கொலை செய்தனர். மேற்கண்ட தகவல்கள் போலீஸ் விசாரணையில் தெரிய வந்தது.

இதைத் தொடர்ந்து காளிதாஸ், மாரியப்பன் ஆகிய இருவரையும் போலீசார் கைது செய்தனர். கைதான 2 பேரும் போலீசாரிடம் அளித்துள்ள வாக்குமூலத்தில் ரூ.20 பணம் கேட்டதற்கு ஆறுமுகம் தர மறுத்து தங்களை தாக்கியதால் கொலை செய்ததாக தெரிவித்துள்ளனர். அவர்களிடம் தொடர்ந்து விசாரணை நடைபெற்று வருகிறது.

ஆண்டிப்பட்டி:

ஆண்டிப்பட்டி அருகே உள்ள முறுக்கோடை பகுதியைச் சேர்ந்தவர் பொன்னுச்சாமி. இவரது மனைவி பெருமாயி. இவர்களுக்கு பட்டுராஜன் (வயது26), சவுந்தர்ராஜன் (24) ஆகிய 2 மகன்கள் உள்ளனர். இருவருக்கும் திருமணம் ஆக வில்லை.

பட்டுராஜன் குடிப்பழக்கத்துக்கு அடிமையானவர். இதனால் அடிக்கடி குடிக்க பணம் கேட்டு தனது வீட்டில் தகராறு செய்து வந்துள்ளார். மேலும் தனது சேர வேண்டிய சொத்தை பிரித்து எழுதி தரும்படி தகராறு செய்து வந்துள்ளார்.

நேற்று மாலை வழக்கம் போல் போதையில் வந்த பட்டுராஜன் சொத்து கேட்டு தனது தாயிடம் தகராறு செய்தார். சொத்தை எழுதி தராவிட்டால் தாய் மற்றும் தம்பியை கொலை செய்யவும் தயங்க மாட்டேன் என மிரட்டினார்.

பின்னர் வீட்டு திண்ணையில் தூங்கி விட்டார். அதன் பின் வீட்டுக்கு வந்த சவுந்தர்ராஜனிடம் தாய் நடந்த விபரங்களை கூறினார். இதை கேட்டு ஆத்திரமடைந்த அவர் தூங்கிக் கொண்டு இருந்த தனது அண்ணன் பட்டு ராஜன் தலையில் கல்லைப் போட்டார். பலத்த காயங்களுடன் அவரை தேனி அரசு ஆஸ்பத்திரிக்கு கொண்டு வந்தனர்.

ஆனால் வரும் வழியிலேயே பரிதாபமாக இறந்து போனார். இது குறித்து வரு‌ஷநாடு போலீசார் வழக்கு பதிவு செய்து சவுந்தர்ராஜனை கைது செய்தனர்.

பெரம்பூர்:

சென்னை வியாசர்பாடி காந்தி நகரைச் சேர்ந்தவர் குப்புசாமி. குடுகுடும்ப்பைகாரர். இவரது பக்கத்து வீட்டில் வசித்து வருபவர் வெங்கடேசன். ஆட்டோ டிரைவர்.

குப்புசாமிக்கும், வெங்கடேசனுக்கும் அடிக்கடி தகராறு ஏற்பட்டு வந்தது. நேற்று இரவும் அவர்களுக்கிடையே தகராறு ஏற்பட்டது.

அப்போது குப்புசாமி வீட்டில் இருந்த கத்தியை எடுத்துக் கொண்டு வந்து வெங்கடேசனை குத்த முயன்றார். வெங்கடேசன் அவரிடம் இருந்து கத்தியை பறித்து குப்புசாமியை குத்தினார். இதில் பலத்த காயம் அடைந்த குடுகுடுப்பைக்காரர் குப்புசாமி சம்பவ இடத்திலேயே பலியானார்.

இதுகுறித்து வியாசர்பாடி போலீசார் வழக்குப்பதிவு செய்து விசாரணை நடத்தி வருகிறார்கள்.

சேலம்:

சேலம் அம்மாப்பேட்டை பாபு நகர் பகுதியைச் சேர்ந்தவர் ஆறுமுகம் (வயது 60). கொத்தனார். இவருக்கு பெருமாயி, மாதம்மாள் என்ற 2 மனைவிகள் உள்ளனர். மாதம்மாளுக்கு 2 மகன்கள் உள்ளனர். பெருமாயிக்கு குழந்தைகள் இல்லை.

ஆறுமுகத்திற்கு குடிப்பழக்கம் இருந்ததாக கூறப்படுகிறது. குடித்துவிட்டு வீட்டிற்கு வரும் அவர் ஏதாவது பாட்டு பாடிக் கொண்டே இருப்பார். வழக்கம்போல நேற்று இரவும் குடித்துவிட்டு வந்து பாட்டுப் பாடி கொண்டிருந்தார்.

ஆறுமுகம் பாட்டு பாடியது அவரது வீட்டின் அருகில் வசிக்கும் முரளிக்கு (வயது 29)எரிச்சலை ஏற்படுத்தியது. இதனால் முரளி ஆறுமுகத்தின் வீட்டிற்கு சென்று எனது மனைவியை பார்த்து தான் நீ பாட்டு பாடுகிறாய் என்று கூறினார். அப்போது அவர்களுக்கிடையே தகராறு ஏற்பட்டது.

தகராறு முற்றியதும் ஆத்திரம் அடைந்த முரளி, அவரது தம்பி சரவணன், தாய் மாதம்மாள் ஆகிய 3 பேரும் சேர்ந்து ஆறுமுகத்தை உருட்டுக் கட்டையால் சரமாரியாக தாக்கினர். இதில் அவருக்கு காயம் ஏற்பட்டது. அப்போது ஆறுமுகத்தின் மனைவி மற்றும் மகன்கள் தகராறை விலக்கிவிட்டு விட்டு தூங்க சென்றனர். காலையில் ஆறுமுகத்தை மனைவி எழுப்பிய போது அவர் இறந்து கிடந்தார்.

இதனால் அதிர்ச்சி அடைந்த அவர் கதறி அழுதார். பின்னர் சம்பவம் குறித்து அம்மாப்பேட்டை போலீசில் புகார் செய்யப்பட்டது. போலீசார் சம்பவ இடத்திற்கு வந்து விசாரணை நடத்தி ஆறுமுகத்தின் உடலை மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர்.

மேலும் அவரை தாக்கிய முரளி உள்பட 3 பேரையும் காவல் நிலையத்திற்கு அழைத்துச் சென்று தொடர்ந்து விசாரணை நடத்தி வருகின்றனர்.

விசாரணையில் முரளி மீது பல்வேறு வழக்குகள் நிலுவையில் உள்ளதும் அவர் அடிக்கடி அந்த பகுதியில் உள்ள அனைவரிடமும் தகராறில் ஈடுபட்டு வருவார் என்றும் கூறப்படுகிறது.

இந்த சம்பவம் அந்த பகுதியில் பெரும் பரபரப்பை ஏற்படுத்தியது.

கோவை:

மேற்கு வங்காள மாநிலம் பீர்பாரா பகுதியை சேர்ந்தவர் சூரன் மார்க்ஸ் (23). கேரள மாநிலம் எர்ணாகுளத்தில் தங்கி அங்கு உள்ள தனியார் நிறுவனத்தில் வேலை பார்த்து வந்தார். சொந்த ஊராக மேற்கு வங்காளத்திற்கு சென்ற சூரன் மார்க்ஸ் கடந்த 19-ந் தேதி அங்கிருந்து எர்ணாகுளம் புறப்பட்டு உள்ளார். இந்த நிலையில் இன்று காலை எட்டிமடை எல்லை மாகாளியம்மன் கோவில் பின்புறம் உள்ள மரத்தில் பெல்டால் தூக்கில் தொங்கிய நிலையில் சூரன் மார்க்ஸ் பிணமாக கிடந்தார்.

இதனை பார்த்த அப்பகுதி பொதுமக்கள் கே.ஜி. சாவடி போலீசுக்கு தகவல் தெரிவித்தனர். சப்-இன்ஸ்பெக்டர் மனோஜ் குமார் மற்றும் போலீசார் அங்கு விரைந்து சென்றனர்.

பிணமாக கிடந்த சூரன் மார்க்ஸ் உடலை சோதனை செய்த போது அவரது தலை, முதுகு உள்ளிட்ட இடங்களில் காயம் இருப்பது தெரிய வந்தது. அவரது கழுத்து பெல்டால் இறுக்கப்பட்டு இருந்தது. அவரை யாரோ கொலை செய்து பிணத்தை பெல்டால் கட்டி மரத்தில் தொங்க விட்டு சென்று இருப்பது கண்டு பிடிக்கப்பட்டது. அவரை கொலை செய்தது யார்? எதற்காக கொலை செய்யப்பட்டார் ? என்பது குறித்து போலீசார் விசாரணை நடத்தி வருகிறார்கள்.