வெளிநாடு செல்போன் அனுப்புவதாக கூறி கோவை பெண்ணிடம் ரூ. 18 லட்சம் மோசடி

கோவை:

கோவையை சேர்ந்தவர் சுவேதா (30). இவர் கோவை மாநகர சைபர் கிரைம் போலீசில் புகார் மனு அளித்தார். அதில் கூறி இருப்பதாவது-

எனது செல்போன் வாட்ஸ் அப்பில் ஒரு தகவல் வந்தது. அதில் அமெரிக்காவில் ரூ. 70 ஆயிரம் மதிப்புள்ள செல்போனை ரூ. 30 ஆயிரத்துக்கு தருவதாக கூறப்பட்டு இருந்தது. அதில் சில போன் நம்பர்களும் குறிப்பிடப்பட்டு இருந்தது. நான் அந்த நம்பருக்கு தொடர்பு கொண்டேன். அப்போது ஒரு ஆண், ஒரு பெண் என மாறி மாறி பேசினார்கள்.

உங்களுக்கு செல்போன் அனுப்புகிறோம். அதற்கான கூரியர் செலவு ரூ. 9 ஆயிரத்து 500 ஆகும். அதனை அனுப்பி வையுங்கள் என கூறினர். அவர்கள் ஒரு அக்கவுண்ட் நம்பரும் கொடுத்தனர். இந்த அக்கவுண்டுக்கு நானும் 9 ஆயிரத்து 500 அனுப்பி வைத்தேன்.

ஆனால் செல்போன் வரவில்லை. மீண்டும் அதே எண்ணுக்கு தொடர்பு கொண்ட போது உங்கள் முகவரிக்கு ஒரு செல்போனுக்கு பதில் 60 செல்போன்கள் அனுப்பி விட்டோம். இந்த செல்போனுக்கு உரிய பணம் மற்றும் கூரியர் செலவு தொகை அனுப்பி வையுங்கள் என கூறி 2,3, அக்கவுண்ட் நம்பர் கொடுத்தனர்.

அதன்படி நான் ரூ. 18 லட்சத்து 73 ஆயிரத்தை 3 வங்கி கணக்கிற்கு அனுப்பி வைத்தேன். ஆனால் போன் வரவில்லை. பணமும் திரும்பி வரவில்லை. என்னிடம் ரூ. 18 லட்சத்தை 73 ஆயிரத்தை மோசடி செய்து விட்டனர்.

இவ்வாறு அதில் கூறி உள்ளார். இது தொடர்பாக மோசடி, தகவல் தொழில்நுட்ப சட்டத்தை தவறாக பயன்படுத்துதல் ஆகிய பிரிவுகளின் கீழ் சைபர் கிரைம் போலீசார் வழக்கு பதிவு செய்து விசாரணை நடத்தி வருகிறார்கள்.