நீங்கள் தேடியது "couple"

வடமதுரை:

வடமதுரை அருகே குட்டம் தேவிநாயக்கன்பட்டியைச் சேர்ந்தவர் முத்துப்பாண்டி (வயது 23). அதே பகுதியைச் சேர்ந்தவர் காயத்திரி (19). இவர் பிளஸ்-2 வரை படித்து விட்டு மில் வேலைக்கு சென்று வருகிறார். முத்துப்பாண்டி கோவையில் உள்ள தனியார் நிறுவனத்தில் வேலை பார்த்து வருகிறார்.

கடந்த 40 நாட்களுக்கு முன்பு முத்துப்பாண்டி சொந்த ஊருக்கு விடுமுறையில் வந்திருந்தார். அப்போது காயத்திரியுடன் பழக்கம் ஏற்பட்டது. உடனே இது காதலாக மலர்ந்தது. இருவரும் பல்வேறு இடங்களுக்கு சென்று தங்களது காதலை வளர்த்து வந்தனர்.

மேலும் இருவரும் திருமணம் செய்து கொள்ள முடிவு செய்தனர். ஆனால் இரு வீட்டாரும் இதற்கு கடும் எதிர்ப்பு தெரிவித்தனர். எனவே வீட்டை விட்டு வெளியேறிய காதல் ஜோடி வாடிப்பட்டி முருகன் கோவிலில் திருமணம் செய்து கொண்டு பாதுகாப்பு கேட்டு வடமதுரை அனைத்து மகளிர் போலீசில் தஞ்சமடைந்தனர்.

இன்ஸ்பெக்டர் லட்சுமி பிரபா இருவீட்டாரையும் அழைத்து சமரசம் பேசினார். காதல் ஜோடி மேஜர் என்பதால் அவர்கள் விருப்பப்படியே வாழலாம் என்று போலீசார் கூறி அனுப்பி வைத்தனர்.

மதுரை:

மதுரை சந்தைப்பேட்டை காதர்கான் பட்லா பகுதியை சேர்ந்தவர் செல்வராஜ். இவருடைய மகன் பொன்ராஜ் (வயது 28). தனியார் கார் நிறுவனத்தில் ஒப்பந்த அடிப்படையில் டிரைவராக உள்ளார்.

இவரது உறவுப்பெண் செல்வமீனா (22). இவரும் பொன்ராஜூம் கடந்த 2 ஆண்டுகளாக காதலித்து வந்தனர். இவர்களது திருமணத்துக்கு இரு வீட்டாரும் சம்மதம் தெரிவித்தனர்.

கடந்த 6 மாதத்துக்கு முன்பு திருமண ஏற்பாடுகளும் செய்யப்பட்டன. இதில் இரு குடும்பத்தினர் இடையே திடீர் பிரச்சினை ஏற்பட்ட தால், திருமண பணிகள் நிறுத்தப்பட்டன.

இதனால் காதல் ஜோடி அதிர்ச்சி அடைந்தது. ஆனால் அவர்கள் தங்கள் காதலில் உறுதியாக இருந்தனர். கடந்த 11-ந் தேதி செல்வமீனா வீட்டில் இருந்து திடீரென வெளியேறினார்.

அதன்பிறகு காதலன் பொன்ராஜை சந்தித்தார். அவர்கள் இருவரும் திருச்செந்தூர் சென்று அங்கு கோவிலில் திருமணம் செய்து கொண்டனர்.

ஒரு வாரம் அங்கிருந்து விட்டு புதுமணத் தம்பதியர் பொன்ராஜ்-செல்வமீனா நேற்று மதுரை திரும்பினர். இதுபற்றி செல்வமீனாவின் சகோதரர் பிரபாகரனுக்கு தகவல் கிடைத்தது.

அவர் தனது நண்பர்கள் 4 பேருடன் சந்தைப்பேட்டை பகுதியில் நின்றார். பொன்ராஜ், தனது தாய் மீனாட்சி, காதல் மனைவி செல்வமீனா ஆகியோருடன் அங்கு வந்ததும், பிரபாகரன் வழிமறித்து வாக்குவாதம் செய்தார்.

திடீரென தான் மறைத்து வைத்திருந்த அரிவாளை எடுத்து பொன்ராஜை வெட்டினார். இதனை தடுக்க வந்த செல்வமீனா மற்றும் மீனாட்சிக்கும் அரிவாள் வெட்டு விழுந்தது.

பலத்த காயம் அடைந்த அவர்கள் சிகிச்சைக்காக மதுரை அரசு ஆஸ்பத்திரியில் அனுமதிக்கப்பட்டனர்.

தெப்பக்குளம் போலீசார் வழக்குப்பதிவு செய்து விசாரணை நடத்தி மணிமாறன், கார்த்திக் ஆகியோரை கைது செய்தனர். பிரபாகரன் உள்பட 2 பேரை வலைவீசி தேடி வருகின்றனர்.

தென்காசி:

ஆலங்குளத்தை சேர்ந்தவர் பாக்கியராஜ். இவரது மனைவி பொன் ஏஞ்சல் (வயது35). இவர் பீடி சுற்றும் தொழில் செய்து வந்தார். இவர்களுக்கு 3 மகன்கள் உள்ளனர். இவருக்கும் அதே பகுதியை சேர்ந்த காய்கறி கடைக்காரர் சுதாகர்(35) என்பவருக்கும் இடையே கள்ளத்தொடர்பு இருந்து வந்தது.

சுதாகருக்கும் திருமணமாகி 3 குழந்தைகள் உள்ளனர். இந்த நிலையில் இவர்களது கள்ளத்தொடர்பு அக்கம்பக்கத்தினருக்கு தெரியவந்தது. இதையடுத்து கள்ளக்காதல் ஜோடி கடந்த 4 நாட்களுக்கு முன்பு ஊரை விட்டு ஓட்டம்பிடித்தது.

இது தொடர்பாக சுதாகரின் மனைவி சுமதி தனது கணவரை காணவில்லை என ஆலங்குளம் போலீசில் புகார் செய்தார். போலீசார் சுதாகரை தேடி வந்தார்கள் இதனிடையே ஊரை விட்டு வெளியேறிய கள்ளக்காதல் ஜோடி பல்வேறு இடங்களில் சுற்றி திரிந்துவிட்டு நேற்று குற்றாலத்துக்கு வந்தனர்.

குற்றாலம் ஐந்தருவி செல்லும் சாலையில் ஒரு விடுதியில் அவர்கள் அறை எடுத்து தங்கினர். இன்று காலை அவர்கள் தங்கியிருந்த அறைக்கதவு வெகுநேரமாக திறக்கப்படவில்லை. இதனால் சந்தேகம் அடைந்த லாட்ஜ் ஊழியர்கள் அறை கதவை எட்டி பார்த்தனர்.

அங்கு பொன் ஏஞ்சலும், சுதாகரும் வி‌ஷம் குடித்த நிலையில் வாயில் நுரை தள்ளியபடி மயங்கி கிடந்தனர். உடனே இதுபற்றி குற்றாலம் போலீசுக்கு தகவல் கொடுக்கப்பட்டது. போலீசார் சம்பவ இடத்துக்கு சென்று லாட்ஜ் கதவை உடைத்து உள்ளே சென்றனர். அங்கு பொன் ஏஞ்சல் இறந்து கிடந்தார். சுதாகர் உயிருக்கு போராடிக்கொண்டிருந்தார்.

இதை தொடர்ந்து சுதாகரை போலீசார் மீட்டு தென்காசி அரசு ஆஸ்பத்திரியில் சேர்த்தனர். உயிருக்கு ஆபத்தான நிலையில் அவருக்கு தீவிர சிகிச்சை அளிக்கப்பட்டு வருகிறது.

பொன் ஏஞ்சல் உடலை கைப்பற்றி பிரேத பரிசோதனைக்காக தென்காசி அரசு ஆஸ்பத்திரிக்கு அனுப்பி வைத்தனர். இது தொடர்பாக குற்றாலம் போலீசார் வழக்குப்பதிவு செய்து விசாரணை நடத்தி வருகிறார்கள்.

திண்டுக்கல்:

திண்டுக்கல் அருகே அய்யம்பாளையம் வடக்குத் தெருவைச் சேர்ந்தவர் ஆண்டி மகன் பால்ராஜ் (வயது 22). இவருடைய மனைவி ஈஸ்வரி. இவர்களுக்கும் அவரது உறவினர் மகேந்திரன், சக்தி, தெத்தன் ஆகியோருக்கும் குடும்ப பிரச்சினை காரணமாக முன் விரோதம் இருந்து வந்தது. இதனால் இரு தரப்பினரும் அடிக்கடி சண்டையிட்டு வந்துள்ளனர்.

சம்பவத்தன்று பால்ராஜ், ஈஸ்வரி மற்றும் பால்ராஜின் சகோதரர் தங்கராஜ் ஆகியோர் சாலையில் நடந்து சென்று கொண்டு இருந்தனர். அப்போது அங்கு மோட்டார் சைக்கிளில் வந்த மகேந்திரன், சக்தி, தெத்தன் ஆகியோர் மோட்டார் சைக்கிளை கொண்டு அவர்களை இடித்தனர்.

தவறி கீழே விழுந்த அவர்களை கம்பால் தாக்கினர். மேலும் அரிவாளை காட்டி கொலை செய்து விடுவதாக மிரட்டியுள்ளனர். இதில் படுகாயமடைந்த 3 பேரும் திண்டுக்கல் அரசு ஆஸ்பத்திரியில் சிகிச்சைக்காக சேர்க்கப்பட்டுள்ளனர். இது குறித்து பட்டிவீரன் பட்டி போலீசார் விசாரணை நடத்தி வருகின்றனர்.

தேனி:

தேனி அருகே உள்ள பூதிபுரம் மெயின்ரோட்டை சேர்ந்தவர் ஆண்டவர். இவரது மனைவி பஞ்சு (வயது35). ஆண்டவர் அதே பகுதியில் பெட்டிகடை வைத்து நடத்தி வருகிறார்.

இவரது கடை அருகே அதே ஊரைச் சேர்ந்த பொன்னாங்கன் என்பவரும் கடை வைத்துள்ளார். இருவருக்கும் இடையே தொழில் போட்டி காரணமாக அடிக்கடி தகராறு ஏற்பட்டு வந்துள்ளது.

சம்பவத்தன்று கடையில் இருந்த பஞ்சுவிடம் பொன்னாங்கன், அவரது மகன் தங்கபாண்டி, அல்லிநகரத்தை சேர்ந்த கோபி ஆகியோர் தகராறு செய்து தாக்கினர். இதை தட்டிகேட்ட ஆண்டவரையும் தாக்கி காயம் ஏற்படுத்தினர்.

மேலும் கடையை காலி செய்யாவிட்டால் தீ வைத்து கொளுத்திவிடுவோம் என்று மிரட்டியுள்ளனர். இது குறித்து பழனிசெட்டிபட்டி போலீஸ் நிலையத்தில் ஆண்டவர் புகார் செய்தார். அதன்பேரில் போலீசார் பொன்னாங்கன் உள்பட 3 பேர் மீது வழக்குப்பதிவு செய்து கோபியை கைது செய்து விசாரணை நடத்தி வருகின்றனர்.