நீங்கள் தேடியது "slug 223386"

புதுக்கோட்டை:

புதுக்கோட்டை மாவட்ட முதன்மைக் கல்வி அலுவலகக் கூட்டரங்கில், மாணவ, மாணவிகளுக்கு விலையில்லா மிதிவண்டிகளை, அமைச்சர்கள் எஸ்.ரகுபதி, சிவ.வீ.மெய்யநாதன் ஆகியோர் வழங்கினார்கள்.இந்நிகழ்ச்சி மாவட்ட கலெக்டர் கவிதா ராமு தலைமையில் நடைபெற்றது.

இந்நிகழ்ச்சியில் அமைச்சர் ரகுபதி பேசும் போது,

தமிழ்நாடு முதலமைச்சர் ஆட்சி பொறுப்பேற்ற நாள் முதல் அரசுப் பள்ளிகளின் தரம் உயர்த்தப்பட்டு வருகிறது. இதன்படி மாணவ, மாணவியர்கள் அரசு பள்ளிகளை தேடி வருகிறார்கள் என்று சொன்னால் அது மிகையாகாது. மாணவர்களின் இடைநிற்றலை தவிர்க்கும் வகையில் இல்லம் தேடி கல்வித் திட்டமும் சிறப்பாக செயல்படுத்தப்பட்டு வருகிறது.

இந்த விலையில்லா மிதிவண்டிகள் மாணவ, மாணவியர்களின் படிப்பிற்கும் மற்றும் உடற்பயிற்சிக்கும் உறுதுணையாக அமைகிறது. எனவே மாணவ, மாணவியர்கள் அனைவரும் கல்வி மற்றும் விளையாட்டில் சிறந்து விளங்க வேண்டும் என ேபசினார்.

இந்நிகழ்ச்சியில் அமைச்சர் மெய்ய நாதன் பேசும் போது, தமிழ்நாடு முதலமைச்சர் எல்லாருக்கும் எல்லாம் என்ற அடிப்படையில் ஏழை, எளிய பொதுமக்களுக்கும் அனைத்து நலத்திட்டங்களை கொண்டு சேர்க்கும் வகையில் செயல்பட்டு வருகிறார். அதனடிப்படையில் மாணவ, மாணவியர்களின் நலனுக்காக பல்வேறு நலத்திட்டங்களை செயல்படுத்தியுள்ளார். அதன்படி இன்றையதினம் புதுக்கோட்டை மாவட்டத்தில் 8,430 மாணவர்களுக்கும், 9,324 மாணவிகளுக்கும் விலையில்லா மிதிவண்டிகள் வழங்கப்படுகிறது.

இந்நிகழ்ச்சியில், எம்.எல்.ஏ. வை.முத்துராஜா, மாவட்ட முதன்மைக் கல்வி அலுவலர் மணிவண்ணன், மாவட்ட ஊராட்சிக் குழுத் தலைவர் த.ஜெயலட்சு மிதமிழ்செல்வன், புதுக்கோட்டை நகர் மன்றத் தலைவர் திலகவதிசெந்தில், நகர்மன்ற துணைத் தலைவர் லியாகத்அலி மற்றும் அலுவலர்கள் கலந்துகொண்டனர்.

வேதாரண்யம்:

நாகை மாவட்டம், வேதாரண்யம் சி.க.சுப்பையா அரசு மேல்நிலைப்பள்ளியில் உயர்கல்வி படித்து வரும் மாணவர்களுக்கு கல்வி உதவித்தொகை வழங்கும் நிகழ்ச்சி பள்ளி பொறுப்பு தலைமையாசிரியர் எழிலரசன் தலைமையில் நடைபெற்றது. நிகழ்ச்சியில்ஆசிரியர்கள் இளஞ்செழியன், தியாகராஜன், நாகராஜன் மற்றும் மாணவர்கள் கலந்து கொண்டனர்.

ராஜாஜிகாட்டை சேர்ந்த கோவிந்தராஜ் உயர்கல்வி பயின்று வரும் 6 மாணவர்களுக்கு தலா ரூ. 3 ஆயிரத்து 600 வீதம் ரூ. 21 ஆயிரத்து 600 ஐ உதவித் தொகையாக வழங்கினார். மாணவர்களின் சார்பில் சீகரன் ஏற்புரை வழங்கினார். ஆசிரியர் ஆதவன் நிகழ்ச்சிகளை தொகுத்து வழங்க, ஆசிரியர் கார்த்திகேயன் வரவேற்றார், அரங்க சுப்பிரமணியன் நன்றி கூறினார்.

திருச்சி :

திருச்சி மாவட்டம் லால்குடி அருகே திருத்தலையூர் கிராமம் அமைந்துள்ளது. இங்கு பழங்குடியின வகுப்பைச் சேர்ந்த மலைக்குறவர்கள் 20-க்கும் மேற்பட்ட குடும்பங்களாக வசித்து வருகின்றனர். மேலும் மாவட்டத்தின் பல்வேறு பகுதிகளில் இந்த சாதியைச் சேர்ந்த 500-க்கும் மேற்பட்டவர்கள் இருக்கிறார்கள். இவர்கள் சாதி சான்றிதழ் வாங்க அலைக்கழிக்கப்படுவதாக புகார் எழுந்துள்ளது.

இவர்களில் ஒரு சிலருக்கு மட்டுமே சாதி சான்றிதழ் வழங்கப்பட்டுள்ளது. மற்றவர்கள் சாதி சான்றிதழுக்காக வருடக் கணக்கில் அலைந்து கொண்டிருக்கின்றனர். இவர்கள் பரம்பரை பரம்பரையாக மூங்கில் கூடை செய்து பிழைப்பு நடத்தி வருகிறார்கள். மேலும் காட்டுக்கு சென்று பன்றிகளை வேட்டையாடி விற்பனையும் செய்யும் தொழிலிலும் ஈடுபட்டு வருகின்றனர்.

இந்த மலைக்குறவர்களின் மூதாதையர்கள் திருச்சி மாவட்டம் பச்சமலை மற்றும் நாமக்கல் மாவட்டம் கொல்லிமலை பகுதிகளில் நூறு ஆண்டுகளுக்கு முன்பு வசித்து வந்தனர். வெள்ளைக்காரர்களின் ஆட்சி காலத்தில் கொண்டு வரப்பட்ட வன சட்ட திருத்த மசோதா காரணமாக வாழ்வாதாரம் இழந்து சமவெளிப் பகுதிக்கு அவர்கள் வரும் நிலைக்கு தள்ளப்பட்டனர்.

இப்போது சாதி சான்றிதழ் வழங்க பல்வேறு ஆதாரங்களை கேட்பதாக குற்றம் சாட்டும் அவர்கள், இதனால் தங்களது எதிர்கால சந்ததியினரின் கல்வி பாதிக்கப்படுவதாக கவலை தெரிவித்துள்ளனர்.

குறிப்பாக தொடக்க, நடுநிலைப்பள்ளி மாணவர்கள் உயர்நிலை மற்றும் மேல்நிலை, கல்லூரி படிப்பை தொடர நினைக்கும் போது பள்ளிக்கூடத்தில் சாதி சான்றிதழ் கேட்பது வழக்கமான ஒன்று. ஆனால் உடனடியாக மாணவர்களின் பெற்றோரால் பிள்ளைகளுக்கு சாதி சான்றிதழை வாங்கி தர முடியவில்லை. இதனால் படிப்புக்கு முழுக்கு போட்டு விட்டு பலர் மாற்றாக தொழிலுக்கு செல்லும் நிலையும் ஏற்பட்டுள்ளது.

இதுபற்றி, தமிழ்நாடு மலைக்குறவன் பழங்குடியின மக்கள் நல சங்க பொறுப்பாளர் ஒருவர் கூறுகையில், நான் பலகட்ட போராட்டத்துக்குப் பின்னர் 2001-ல் சாதி சான்றிதழ் வாங்கினேன். திருச்சி மாவட்டத்தில் இருக்கும் 500 மலை குறவர்களில் 100 பேரிடம் மட்டுமே சாதிச் சான்றிதழ் இருக்கிறது. எனவே அரசின் சலுகைகள் மற்றும் கல்வி எங்கள் மக்களுக்கு கிடைக்காமல் போகிறது. அனைவருக்கும் உடனே சாதி சான்றிதழ் வழங்க மாவட்ட நிர்வாகம் நடவடிக்கை எடுக்க வேண்டும் என்றார்.

அதிகாரிகள் தரப்பில் கூறுகையில், அரசு கெஜட்டில் மலைக்குறவர் ஜாதி இடம்பெறவில்லை. இதனால் சான்றிதழ் கொடுப்பதற்கு முன்பாக அந்த பெயரை பதிவேற்றம் செய்ய வேண்டி இருக்கிறது. இதுவே காலதாமதத்திற்கு காரணம் என்றனர்.

ஆனால் மலை குறவர்கள் இதற்கு மறுப்பு தெரிவித்துள்ளனர். மத்திய அரசு கெஜட்டில் மலைக்குறவன் என இருக்கிறது. இந்த எழுத்து பிழையை வைத்துக்கொண்டு அதிகாரிகள் எங்களை அலைக்கழிக்கிறார்கள். இதில் கலெக்டர் பிரதீப் குமார் தலையிட்டு சாதி சான்றிதழ் தடையின்றி தாமதம் இல்லாமல் கிடைக்க நடவடிக்கை எடுக்க வேண்டும் எனக் கோரிக்கை விடுத்துள்ளனர்.

உடுமலை :

அரசு பள்ளிகளில் ' கல்வியில் பின்தங்கிய மாணவர்களைக்கண்டறிந்து, அவர்களுக்கு அடிப்படை கல்வி மற்றும் பயிற்சி வகுப்பை நடத்த பள்ளிக் கல்வித்துறை அறிவுறுத்தி உள்ளது.அந்த வரிசையில், உடுமலை கல்வி மாவட்ட அரசுப்பள்ளிகளில் இதற்கென, தனி வகுப்பறை ஒதுக்கப்பட்டு 1 முதல் 8 வரையிலான வகுப்புகளில் உள்ள மாணவர்களுக்கு எழுதவும், படிக்கவும் பயிற்சி அளிக்கப்படுகிறது.

குறிப்பாக அவர்களுக்கு, தமிழ் மற்றும் ஆங்கிலத்தில் முழுமையாக வாசிக்கவும், எழுதவும் பயிற்சி அளிக்கப்படுகிறது. அதேபோல அடிப்படை கணிதம் குறித்தும் பயிற்றுவிக்கப்படுகிறது.இதற்கென, ஆசிரியர்கள் சுழற்சி முறையில் பயிற்சி வகுப்பை நடத்த பணியமர்த்தப்பட்டுள்ளனர். இந்த பயிற்சி வகுப்பின் செயல்பாடு குறித்து ஆய்வு நடத்தப்பட்டும் வருகிறது. இது குறித்து கல்வித்துறை அதிகாரிகள் கூறியதாவது:- மாணவர்கள் சிலர் வாசிக்கவும், எழுதவும் தெரியாமல் உள்ளனர். கூட்டல், கழித்தல் என கணிதத்தின் அடிப்படை கற்றலிலும் மிகவும் பின்தங்கி உள்ளனர்.இவர்களுக்கு அடிப்படை பயிற்சி வகுப்பு அவசியமாக உள்ளது.அதன்பேரில் 1 முதல் 8 வரையிலான வகுப்புகளில் கற்றல் திறனில் மிகவும் பின்தங்கிய மாணவர்களுக்கு தனி வகுப்பறை ஒதுக்கி அடிப்படை பயிற்சி வகுப்பு நடத்தப்படுகிறது.

இந்த பயிற்சி வகுப்பின் செயல்பாடு, மாணவர்களின் கற்றல் திறனை கண்டறிய பள்ளித் தலைமையாசிரியர்கள் மற்றும் பட்டதாரி ஆசிரியர் அடங்கிய குழுவினர் ஆய்வு நடத்தி வருகின்றனர்.அதன்படி உடுமலை கல்வி மாவட்டத்தில் தலைமையாசிரியர்கள் மாரியப்பன், ஆர்.பழனிசாமி, கே.பழனிசாமி, உமா, அழகுமலைக்கண்ணன், இந்துமதி, முருகன், நாகேஸ்வரி, ஆசிரியர்கள் வெண்ணிலா, மாலா, லலிதாம்பாள், கிருஷ்ணவேணி, திருநீலகண்டன், எம்.கல்பனா, வி.கல்பனா ஆகியோர் ஆய்வு நடத்துகின்றனர் என்றனர். 

விஸ்காம் என்பது விஷுவல் கம்யூனிகேஷன் என்பதன் சுருக்கமாகும். விஷுவல் கம்யூனிகேஷனில் இளங்கலை அறிவியல் (பி.எஸ்.சி.) என்பது மூன்று வருடப் பட்டப் படிப்பாகும். இந்த இளங்கலை பட்டப்படிப்பானது முழு நேரமுறையில் ஆறு மாதங்களுக்கு ஒரு செமஸ்டர் என்ற வகையில் ஆறு செமஸ்டர்களைக் கொண்டதாகும்.

இது இந்திய மாநிலங்கள் பலவற்றிலும் உள்ள பல்கலைக் கழகங்கள் மற்றும் கல்லூரிகளில் வெகுஜன தொடர்பு படிப்புகளில் ஒன்றாக சிறப்பான முறையில் வழங்கப்படுகின்றது. பி.எஸ்.சி. விஷுவல் கம்யூனிகேஷன் பாடநெறியானது பொது தகவல் தொடர்பு மற்றும் ஊடகத்தில் காட்சி மற்றும் எழுதப்பட்ட அம்சங்களில் கவனம் செலுத்துகிறது.

இந்தப் பாடநெறியானது மாணவர்களுக்கு திரைப்படங்கள் மற்றும் ஊடகத் தயாரிப்பு மற்றும் தயாரிப்புக்கு பிந்தைய செயல்முறைகள் பல்வேறு பட மற்றும் காணொளி தொகுப்பாக்க மென்பொருள், அனிமேஷன் மென்பொருள் மற்றும் எழுதுதல், பிற தகவல் தொடர்பு திறன்களைப் பயன்படுத்துவதற்கு சிறந்த பயிற்சியை அளித்து அவர்களைத் திறமையானவர்களாக உருவாக்குகின்றன.

கல்வித்தகுதி

இந்த மூன்று வருட இளங்கலை பட்டப்படிப்பில் சேருவதற்கு +2வில் அறிவியலை முதன்மை பாடமாகப் படித்து தேர்ச்சி பெற்றிருக்க வேண்டும். சில கல்லூரிகள் இப்பட்டப்படிப்பில் இணைவதற்கு தனியாக நுழைவுத் தேர்வு மற்றும் நேர்காணலை நடத்தி மாணவர்களைத் தேர்ந்தெடுக்கின்றன.

பாடங்கள்

மனித இணைப்பு, காட்சி எழுத்தறிவு, வரைதல், கலை மற்றும் அழகியல், திரைப்படக் கூறுகள், திரைப்படப் பாராட்டு, வானொலி பிரதிநிதித்துவம், விளம்பர அடிப்படைகள், ஸ்கிரிப்ட் எழுதுதல், கிராஃபிக் வடிவமைப்பு, விளம்பர படைப்பாற்றல், ஊடக கலாச்சாரம் மற்றும் சமூகம், விளம்பரத்தில் ஊடக திறன்கள், புகைப்படம் எடுத்தல், காட்சி அழகியல், நடிப்புத் திறன், காட்சி பகுப்பாய்வு, தொடர்பு கோட்பாடுகள், ஊடக ஆராய்ச்சி முறைகள், தொடர்பு மேம்பாடு, தொலைக்காட்சி நிகழ்ச்சி தயாரிப்பு, காட்சிப்படுத்தல் மற்றும் விளக்கம், தொழில்முறை புகைப்படம் எடுத்தல், நகல் எழுதுதல், ப்ராஜெக்ட், ஆய்வு காகிதம் (ஸ்டடி பேப்பர்), கட்டுரைகள், இன்டர்ன்ஷிப், ஊடக விளக்கத்திறன்கள் மற்றும் ஊடக மேலாண்மை இவை அனைத்தையும் இந்த மூன்று வருட பட்டப் படிப்பானது மாணவர்களுக்கு பாடங்களாக வைத்து கற்றுத் தருகின்றது.

பி.எஸ்.சி. விஸ்காம் படிப்பை வெற்றிகரமாக முடித்த பிறகு எம்.எஸ்.சி. வெகுஜன தொடர்பு (மாஸ் கம்யூனிகேஷன்), விஸ்காம், ஒளிபரப்பு, விளம்பரம், சந்தைப்படுத்தல், டிஜிட்டல் ஊடகம் போன்ற துறைகளில் முதுகலை பட்டப்படிப்பை படிக்கலாம். எம்.எஸ்.சி. மட்டுமல்லாமல் முதுகலை டிப்ளமோ படிப்பையும் தேர்ந்தெடுக்கலாம். பி.எஸ்.சி. பட்டதாரிகள் முதுகலை எம்.பி.ஏ. படிப்பை தேர்ந்தெடுத்து படிப்பதற்கு முக்கிய காரணம் எம்.பி.ஏ. முடித்தவர்களுக்கு கிடைக்கும் வேலைவாய்ப்பும் உயர்ந்த ஊதியமுமே ஆகும்.

கற்பனை மற்றும் படைப்பாற்றல் குறைவான மாணவர்களையும் ஊக்குவிக்கும் வகையில் பி.எஸ்.சி. விஸ்காம் பாடத்திட்டமானது வடிவமைக்கப்பட்டுள்ளது. இத்துறை பட்டதாரிகள் கலையை உருவாக்குவதில் மிகவும் திறமை வாய்ந்தவர்களாக இருக்கிறார்கள்.

வேலை வாய்ப்புகள்

* ஊடகத் தொழில் துறை

* திரைப்படத்துறை

* வீடுகளை வடிவமைத்தல்

* ப்ரொடக்ஷன் ஹவுசஸ்

* விளம்பரத்துறை

* தொலைக்காட்சி தயாரிப்பு

* வீடியோ கேமிங்

* வலைத்தளம்

பதவிகள்

* கிராபிக் ஆர்டிஸ்ட் - இவர்கள் காட்சி கருத்துக்களை கையால் அல்லது கணினி மென்பொருளைப் பயன்படுத்தி உருவாக்கி நுகர்வோரை வசீகரிக்கிறார்கள்.

* டெஸ்கிடாப் பப்ளிசர்ஸ் - கணினி மென்பொருளைப் பயன்படுத்தி செய்தித் தாள்கள், பத்திரிகைகள், புத்தகங்கள், சிற்றேடுகள் மற்றும் பிற பொருட்களுக்கான பக்க தாளவமைப்புகளை வடிவமைக்கின்றனர்.

* புகைப்படக் கலைஞர்

* அனிமேட்டர்

* கார்டூனிஸ்ட்

* வெப் டிசைனர்

இதுபோன்ற இன்னும் பல பதவிகள் இளங்கலை விஸ்காம் பட்டதாரிகளுக்கும் காத்துக் கிடக்கின்றன.

இத்துறையில் வேலைக்கு புதியதாக நுழைபவர்களுக்கு துவக்க வருமானம் குறைந்த அளவில் இருந்தாலும் ஆர்வமும், கற்பனைத் திறனும், அனுபவமும் அவர்களுக்கு எதிர்காலத்தில் மிக நல்ல வருமானத்தை ஈட்டித்தரும் என்பதில் சந்தேகம் இல்லை.

கல்விச் செல்வமே, ஒருவருக்கு மிகச் சிறந்த செல்வம் என்பதில் மாற்று கருத்து இல்லை. சில குழந்தைகளுடைய பெற்றோர்கள் நல்ல கல்வி பயின்று உயர்ந்த உத்தியோகம், பதவியில் இருப்பார்கள். ஆனால் குழந்தைகள் பெற்றோருக்கு எதிர்மறையாக இருப்பார்கள். சில பெற்றோர்களுக்கு அடிப்படை கல்வி ஞானம் கூட இருக்காது. ஆனால் பிள்ளைகள் படிப்பில் படு சுட்டியாக, கெட்டியாக இருப்பார்கள்.

குழந்தையின் கல்வி ஞானத்திற்கும் தாய், தந்தையின் கல்வி ஞானத்திற்கும் சம்பந்தம் இருக்காது. அதே போல் எந்த படிப்பு அறிவும் இல்லாத பலர் பன்னாட்டு வணிகத்தில் ஈடுபட்டு சாதனையாளர் பட்டியலில் இடம் பெறுவார்கள். ஆங்கில பள்ளிக் கூடத்தில் படித்தவர்களுக்கு கூட முழுமையாக ஆங்கிலம் பேசவோ, எழுதவோ தெரியாது. அரசாங்க பள்ளியில் பள்ளிப் படிப்பைக் கூட முடிக்காத பலர் இலக்கணப் பிழை இல்லாமல் தெளிவாக ஆங்கிலம் எழுதுவார்கள், பேசுவார்கள். இது போன்ற அனைத்திற்கும் ஒருவரின் ஜாதகத்தில் உள்ள புத ஆதித்ய யோகம் மட்டுமே காரணம்.

எந்த ஜாதகமாக இருந்தாலும் படிப்பில் சாதிக்க கல்விகாரகன், புத்திக்காரகன், புதன் பகவானின் அனுகிரகம் மிக அவசியம். புதன் நல்ல நிலையில் அமைந்தால் மட்டுமே படித்ததை புத்தியில் நிறுத்தி தேவைப்படும் நேரத்தில் சரியாக பயன்படுத்த முடியும். அத்துடன் சுய ஜாதக ரீதியாக 5-ம் பாவகம் எனும் புத்திஸ்தானமும் மனோகாரகன் மற்றும் உடல் காரகனாகிய சந்திரன் மற்றும் ஒழுக்கத்துடன் கல்வியைப் போதித்து, படிப்பில் ஆர்வத்தை ஏற்படுத்தும் கிரகம் குரு வலுப்பெற வேண்டும்.

ஜாதகத்தில் லக்னம் கேந்திரம் மற்றும் திரிகோணம் வலிமை பெற்றவர்கள் படித்து பட்டங்களும் பதக்கங்களுமாக குவிப்பார்கள். கல்விக்கான காரக கிரகம் புதன் தன்னுடைய பயண பாதையில் சுப கிரகங்களை தொடும்போது சிறப்பான கல்வியை கற்க முடியும். அசுப கிரகங்களான ராகு, கேது, சனி, செவ்வாய் இவற்றை தொடும்போது கல்வியில் தடையும் கொடுக்கிறது. சில குழந்தைகள் இளம் வயதில் சரியாக படிக்காமல் மத்திம வயதில் சிறப்பாக படித்து நல்ல மார்க் எடுப்பார்கள். மத்திம வயதில் இயங்கும் தசா புத்திகள் கிரகம் சுபவலிமை பெற்றதாக இருக்கும். சில குழந்தைகள் இளம் வயதில் நன்றாக படித்து மத்திம வயதில் கவனக் குறைவு அடைவார்கள்.

இத்தகையவர்களுக்கு 2-ம் பாவகம் சுபவலிமையாகவும் 4-ம் பாவகம் வலிமை குன்றியும் இருக்கும். ஒருவரின் கல்வியை தீர்மானம் செய்வதில் புதன் 4,5 பாவகத்தின் பங்கு மிக முக்கியமானது. ஜனன ஜாதகத்தில் புதன், ராகு அல்லது புதன், சனி இணைவு, சம்பந்தம் இருந்தாலோ சிறு வயதிலேயே ராகு தசை, சுக்கிர தசை நடந்தாலோ படிப்பில் மந்த தன்மையை உருவாக்கும்.

4, 5-ம் பாவக அதிபதி அல்லது 4,5-ம் பாவகத்தில் நீச, அஸ்தமன , வக்கிர கிரகங்கள் இருந்தாலோ இளம் பருவத்திலேயே படிப்பில் தடை ஏற்படும்.அசுப கிரகங்களை தொடும் போது அந்த காரகத்துவ சம்பந்தப்பட்ட படிப்பை தேர்ந்து எடுத்துப் படிக்கும் போது தடையை தருவதில்லை. உதாரணமாக புதன் கேதுவை தொட்டால் கேதுவின் காரகத்துவம் தொடர்பான ஜோதிடம், ஆன்மீகம் சட்டம் தொடர்பான படிப்பை எடுத்துப் படிக்கும் போது அந்த படிப்பில் தடை ஏற்படாது. அதாவது ஜாதகத்தின் குறையை தனக்கு சாதகமாக மாற்ற முயலும் போது ஜாதகர் அடையும் வெற்றி அளப்பரியது.

புதன் ஒரு ஜாதகத்தில் வலுவான நிலையில் இருந்து, குரு பார்வையில் இருக்கும் பட்சத்தில் நிச்சயமாக நன்றாக படிக்க முடியும்.

புதன், சனியின் தொடர்பை பெற்றால் படிக்கும் ஆர்வத்தை குறைக்கும். பகை கிரகமான செவ்வாயுடன் புதன் இணைந்து, சனியின் பார்வையைப் பெற்றால் கல்வியில் தடை உண்டாகும். ஜாதகத்தில் புதன் ஓரளவு வலுவான அமைப்பில் இருந்து சந்திரன் மற்றும் ஐந்தாம் பாவக அதிபதி, வலு குறைந்த நிலையில் இருக்கும்பொழுது , படித்தவுடன் மறந்து விடும் அல்லது அவர்களது படிப்பு மிகவும் பின் தங்கியே இருக்கும். இது கற்ற கல்வியை நடைமுறை வாழ்க்கையில் பயன்படுத்த முடியாத அமைப்பாகும். மேலும் படிக்கும் வயதில் சுபயோக தசாபுத்திகள் இல்லாவிட்டாலும் கல்வி தடைபடும் அல்லது படிப்பு வாசனையே இல்லாமல் போய்விடும்.

இரண்டு ஆண்டுகளுக்குப் பிறகு பள்ளிகளில் பொது தேர்வு நடந்து முடிவுகள் கடந்த வாரம் வெளியிடப்பட்ட நிலையில் எந்த படிப்பை தேர்வு செய்வது என்ற குழப்பம் பெற்றோர்களையும் மாணவர்களையும் சங்கடத்தில் ஆழ்த்தியுள்ளது. ஒவ்வொரு பெற்றோருக்கும் தன் குழந்தை எந்த வகையான படிப்பு படித்து பிற்காலத்தில் எந்த துறையில் செயல்பட வேண்டும் என்ற சிந்தனையில் இருக்கிறார்கள்.

என் குழந்தை என்ன படிப்பான்? டாக்டரா? என்ஜினீயரா? ஆடிட்டரா? ஐ.ஏ.எஸ்? ஐ.பி.எஸ் ஆ? அரசு அதிகாரியா? போன்ற பல்வேறு கனவுகளை பெற்றோர்கள் சுமந்து வருகிறார்கள். அத்துடன் எந்த படிப்பை தேர்வு செய்து படித்தால் குழந்தைகளின் எதிர்காலம் சிறப்பாக இருக்கும் என்ற மனக் குழப்பமும் நிறைந்து இருக்கிறது. சில பெற்றோர்கள் குழந்தைகளின் விருப்ப கல்வியை தேர்வு செய்து படிக்க உதவுகிறார்கள். ஒரு சில பெற்றோர்கள் தங்கள் படிக்க நினைத்து நிறைவேறாத ஆசையை தாங்கள் பிள்ளைகளிடம் புகுத்தி படிக்க வைக்க விரும்புகிறார்கள்.

குழந்தைகளின் விருப்பமோ, பெற்றோர்களின் விருப்பமோ கல்லூரிப் படிப்பை தேர்ந்தெடுக்கும் நிலையில் அவர்களின் ஜனன ஜாதகத்தில் ஜீவனத்தை குறிப்பிடும் 10-ம் பாவகத்தை முதன்மை படுத்தி கல்வியை தேர்வு செய்வது சிறப்பு. ஒருவன் தான் எவ்வளவு கல்வி கற்றாலும் அதனை செயல் வடிவில் தக்க வைத்துக் கொள்ள வேண்டும். அப்போதுதான் அவன் கற்ற கல்வியின் பயன் அவனுக்கு கிடைக்கும்.

இல்லாவிடில் அவன் கற்ற கல்வியால் பயன் இல்லாமல் போய்விடும்.10ம் வகுப்பில் தேர்ச்சியான மாணவர்கள் தேர்வு செய்யும் பாடத்திட்டம் கல்லூரி படிப்பு முடியும் வரை மாணவர் எந்த துறைசார்ந்த கல்வியில் தன்னை ஈடுபடுத்தப் போகிறார் என்பதை தெரிவிக்கும். +2 முடித்து கல்லூரிக்குள் நுழைய இருக்கும் மாணவர்கள் தேர்வு செய்யும் பட்டப்படிப்பு அவர்களின் வாழ்நாள் முழுவதும் ஜீவனத்தை பெற்றுத் தரக்கூடிய வாழ்வாதாரத்தை உயர்த்தக்கூடிய இருப்பது அவசியம்.

ஒரு ஜாதகத்தில் பத்தாம் அதிபதியின் நிலையை கொண்டும், பத்தாம் இடத்தில் உள்ள கிரகத்தின் நிலையை பொருத்தும், ஆறாம் இடத்தின் வலுவிற்கும் ஏற்ற தொழில் கல்வியை தேர்வு செய்வது சிறப்பு கல்வியில் தடை இருப்பவர்கள் தினசரி விநாயகரையும், சரஸ்வதி தேவியையும் வழிபட்டு வந்தால் கல்வியில் உண்டாகும் தடங்கல்கள் கண்டிப்பாக நீங்கும்.

'பிரசன்ன ஜோதிடர்'

ஐ.ஆனந்தி

செல்: 98652 20406

நாகர்கோவில்:

குமரி மாவட்ட கலெக்டர் அரவிந்த் விடுத்துள்ள செய்தி குறிப்பில் கூறப்பட்டுள்ள தாவது:-

தமிழ்நாட்டில் மத்திய அரசால் சிறுபான்மை யினராக அறிவிக்கப் பட்டுள்ள இஸ்லாமியர், கிறித்துவர், சீக்கியர் புத்த மதத்தினார். பார்சி மற்றும் ஜெயின் மதத்தை சேர்ந்த அரசு, அரசு உதவி பெறும் மற்றும் மத்திய, மாநில அரசால் அங்கீகரிக்கப்பட்ட தனி கல்வி நிலையங்களில் 2022-23 கல்வியாண்டில் ஒன்று முதல் 10-ம் வகுப்பு வரை பயிலும் மாணவ மாணவியர்களுக்கு பள்ளி படிப்பு கல்வி உதவித்தொகையும், 11-ம் வகுப்பு முதல் ஆராய்ச்சி படிப்பு வரை வாழ்க்கை தொழிற்கல்வி, பாலிடெக்னிக் செவிலியர், ஆசிரியர் பட்டயப்படிப்பு இளங்கலை, முதுகலை பட்டப்படிப்புகள் உட்பட) பயில்பவர்களுக்கு பள்ளி மேற்படிப்பு கல்வி உதவித்தொகையும் மற்றும் தொழிற்கல்வி மற்றும் தொழில்நுட்பக் கல்வி பயில்பவர்களுக்கு தகுதி மற்றும் வருவாய் அடிப்படையிலான கல்வி உதவித்தொகை பெறுவதற்கு மத்திய அரசின் www.acholarships.gov.in என்ற தேசிய கல்வி உதவித்தொகை இணையதளத்தில் ஆன்லைன் மூலம் விண்ணப்பங்கள் வரவேற்கப்படுகின்றன.

தகுதியான மாணவ மாணவிகள் பள்ளி படிப்பு கல்வி உதவித்தொகை திட்டத்திற்கு 30.09.2022 வரையிலும், பள்ளி மேற்படிப்பு, தகுதி மற்றும் வருவாய் அடிப்படையிலான கல்வி உதவித்தொகைக்கு 31.10.2022 வரையிலும் மேற்படி இணைய தளத்தின் மூலம் விண்ணப்பிக்கலாம்.

இந்திய அரசின் தேசிய கல்வி உதவித்தொகை இணையத்தில் ஏற்கனவே பதிவு செய்யப்பட்டுள்ள கல்வி நிலையங்கள், தங்களின் கல்வி நிலை யத்திற்கான ஒருங்கிணைப்பு அலுவலரின் ஆதார் விவரங்களை இணைத்த பின்னரே விண்ணப் பங்களை இணையத்தில் சரிபார்க்க இயலும். புதிதாக விண்ணப்பிக்கும் மாணவ மாணவிகல் இணையதளத்தில் எளி தாக விண்ணப்பிக்கும் வகையில் அனைத்து கல்வி நிலையங்களும் தங்களுடைய UDISE/AISHE/NCVT குறியீட்டு எண்ணை மாணவியர்களுக்கு தெரிவிக்க வேண்டும்.

இத்திட்டம் தொடர் பான இந்திய அரசால் வெளி யிடப்பட்ட வழிகாட்டி நெறிமுறைகள் http:www.minorityaffairs gov.in/schemes/ என்ற இணைய தளத்தில் வெளியிடப்பட்டுள்ளது. இத்திட்டம் தொடர் பான கூடுதல் விவரங் களுக்கு மாவட்ட பிற் படுத்தப்பட்டோர் மற்றும் சிறுபான்மையினர் நல அலுவலரை தொடர்பு கொள்ளலாம்.

இவ்வாறு அதில் கூறப்பட்டு உள்ளது.

ஹோம் சயின்ஸ் என்பது வீட்டு அறிவியல் என்று எளிமையாக கூறப்பட்டாலும் அது ஒரு அறிவியல் மட்டுமல்ல ஒரு கலையும் கூட. நம்மில் பெரும்பாலானவர்கள் ஹோம் சயின்ஸ் என்பது வெறும் சமையல், சலவை தையல்வேலை ஆகியவை மட்டுமே என்று நினைக்கிறார்கள். ஆனால், இது இயற்பியல், உயிரியல், சமூக அறிவியல், கலை மற்றும் மனிதநேயம் ஆகியவற்றிலிருந்து பெறப்பட்ட அறிவைக் பயன்படுத்தும் இடைநிலை ஆய்வுத்துறை ஆகும்.இந்தப் படிப்பு நவீன வீட்டு பராமரிப்புடன் மாணவர்களை தொடர்பு படுத்துகிறது.

ஒவ்வொரு நாளும் வீட்டு வேலைகளில் பயன்படுத்தப்படும் அறிவியல் கோட்பாடுகள் (சூடு, குளிர்ச்சி, ஊட்டச்சத்து, பாதுகாத்தல் போன்றவை) குறித்த அறிவை வழங்குவதால் இது ஒரு அறிவியல் சார்ந்த படிப்பு என்று சொல்லலாம். சிறந்த வாழ்க்கைக்கான கல்வி என்று கூறப்படும் இந்த வீட்டு அறிவியலின் அடிப்படை குடும்ப அமைப்பாகும்.

இயற்கையாக அமைந்திருக்கும் குடும்பத்திற்கும், மனிதனால் உருவாக்கப்பட்ட சூழல்களுக்கும் இடையிலான பரஸ்பர உறவுகளை கையாள்வதற்கு இந்தப் படிப்பு பெருமளவில் உதவி செய்கின்றது.இல்லற வாழ்வு, குடும்ப வாழ்க்கை, அறிவார்ந்த சிந்தனை மற்றும் இந்த வளங்கள் அனைத்தையும் பயன்படுத்தி, வீட்டையும் குடும்பத்தையும் சமூகக் கட்டமைப்பின் பயனுள்ள பகுதிகளாக மாற்றி, வாழ்க்கையை மிகவும் அழகாகவும்,பயனுள்ளதாகவும் மாற்றுவதை நோக்கமாகக் கொண்டுள்ள ஒரு நவீன அறிவியல் என்று ஹோம் சயின்ஸ் படிப்பைக் கூறலாம்.

ஹோம் சயின்ஸ் படிப்பிற்கான அடிப்படை தகுதி

இளங்கலை பட்டப்படிப்பை படிப்பதற்கு பன்னிரண்டாம் வகுப்பில் இயற்பியல், வேதியியல் மற்றும் உயிரியல் பாடங்களை முதன்மைப் பாடங்களாக படித்தும் தேர்ச்சி பெற்றிருக்க வேண்டும்.சில கல்வி நிறுவனங்களில் இந்த இளங்கலை பட்டப் படிப்பிற்கு பன்னிரண்டாம் வகுப்பில் எந்த பாடத்திட்டத்தை எடுத்துப் படித்து தேர்ச்சி பெற்ற மாணவர்களுக்கும் சேர்க்கைஅனுமதிக்கப்படுகின்றது .இந்தப் பட்டப் படிப்பின் முதல் வருடத்தில் இயற்பியல், வேதியியல் மற்றும் உயிரியலின்

அடிப்படைகளை கற்க வேண்டி இருப்பதால் சில பல்கலைக்கழகங்கள் மற்றும் கல்லூரிகளில் அறிவியல் பின்னணியில் உள்ள மாணவர்களுக்கு மட்டுமே இத்துறை படிப்பிற்கான சேர்க்கையை அனுமதிக்கிறார்கள்.

கல்லூரிகள்

சண்டிகர், புனே, உதய்பூர், தார்வாட், பங்கா, புது தில்லி மற்றும் தமிழ்நாட்டிலும் பல பல்கலைக்கழகங்கள் மற்றும் கல்லூரிகளில் ஹோம் சயின்ஸ் படிப்புகளை சிறப்பாக வழங்கி வருகிறார்கள்.

பாடநெறிகள்

* பிஎஸ்சி ஹோம் சயின்ஸ்:இது 3 ஆண்டு கால தொழில்முறை பட்டப் படிப்பாகும். ஊட்டச்சத்து, சுகாதாரம் மற்றும் வளர்ச்சி அளவீடுகள் போன்ற அறிவியலின் பல்வேறு துறைகளை இந்தப் படிப்பு உள்ளடக்கி இருக்கின்றது. சுற்றுப்புறம் மற்றும் சுற்றுச்சூழலில் ஏற்படும் பல்வேறு அறிவியல் சிக்கல்களை கையாள்வதும் இதில் அடங்கும். இந்த இளங்கலை பட்டப்படிப்பை முடித்தவர்கள் மேற்கொண்டு படிக்க விரும்பினால் ஊட்டச்சத்து, உடை, குடும்ப உறவுகள், வீட்டு மேலாண்மை, குழந்தை மேம்பாடு போன்ற சிறப்பு பிரிவுகளில் உயர்கல்வியைத் தொடரலாம்.

* பிஏ ஹோம் சயின்ஸ்: இந்தியாவில் உள்ள பல்வேறு பல்கலைக்கழகங்களில் இந்த மூன்று ஆண்டு கால இளங்கலை பட்டப்படிப்பானது மிகவும் சிறப்பாக வழங்கப்படுகின்றது. பல்வேறு வளங்களை திறம்பட நிர்வகிப்பதில் இந்தப் பாடநெறி கவனம் செலுத்துகிறது. ஒருவரது வீட்டு வாழ்க்கை, குடும்ப வாழ்க்கை மற்றும் அறிவுசார் சிந்தனைத் திறனை வளர்ப்பதற்கான அறிவியலும் இதில் அடங்கும். இத்துறை பட்டதாரிகளுக்கு ஆடை விற்பனை, உணவு விடுதிகள், நலன்புரி நிறுவனங்கள் போன்ற தொழில்களில் ஏராளமான வேலை வாய்ப்புகள் உள்ளன..இந்தப் பட்டப் படிப்பில் மாணவர்களுக்கு கோட்பாடு, நடைமுறைப் பயிற்சி மற்றும் ஆராய்ச்சி ஆகியவை கொடுக்கப்படுகின்றன.

* டிப்ளமோ ஹோம் சயின்ஸ் மற்றும் பிஜி டிப்ளமோ ஹோம் சயின்ஸ்: அங்கீகரிக்கப்பட்ட பல்கலைக்கழகத்தில் பட்டம் பெற்றவர்கள் இந்தப் படிப்பில் இணைந்து படிக்க முடியும்.

* எம்எஸ்சி ஹோம் சயின்ஸ்: பிஎஸ்சி ஹோம் சயின்ஸ் அல்லது அதற்கு சமமான இளங்கலை பட்டப்படிப்பை அங்கீகரிக்கப்பட்ட பல்கலைக்கழகத்தில் முடித்தவர்கள் இந்த முதுகலை பட்டப் படிப்பில் இணைந்து படிக்க முடியும்.

தொழில் மற்றும் வேலை வாய்ப்புகள்

ஹோம் சயின்ஸ் படிப்புகள் பொது மற்றும் தனியார் துறைகளில் அதிக வேலை வாய்ப்புகளை வழங்குகின்றன. மாநில அரசுத்துறைகளில் பல்வேறு வேலைகளில் இத்துறை பட்டதாரிகள் பணி அமர்த்தப்படுகிறார்கள்.

உணவு நிபுணராக இருக்கும் இத்துறை பட்டதாரிகளுக்கு இந்தியா மட்டுமல்லாமல் வெளிநாட்டிலும் மிகப்பெரிய அங்கீகாரம் உள்ளது. இந்தத் துறை பரந்த அளவிலான வேலைவாய்ப்புகளை வழங்கிவருகிறது.. கற்பித்தல், உணவுத்தொழில் , சுகாதார பாதுகாப்பு துறை மற்றும் தன்னார்வ தொண்டு நிறுவனங்களிலும் இத்துறை பட்டதாரிகள் பணியாற்ற முடியும். உற்பத்தித் தொழிற்சாலைகள், சுற்றுலா மற்றும் சேவை நிறுவனங்கள், உணவு மற்றும் ஊட்டச்சத்து, ஜவுளித் தொழில் மற்றும் ஆடை நிறுவனங்கள், வள மேலாண்மை, சுய வேலைவாய்ப்பு என பலவிதமான வேலை வாய்ப்புகளை ஹோம் சயின்ஸ் பட்டதாரிகள் பெற முடியும்.

*வகிக்கும் பதவிகள்

ஆடைத் தொழிற்சாலைகளில் உற்பத்தி மேலாளர்கள், வண்ண ஆலோசகர்கள், உணவு ஆலோசகர்கள், பேஷன் டிசைனிங், உட்புற வடிவமைப்பாளர்கள், ஆசிரியர்கள்.

திருப்பூர் :

கல்வியாண்டு துவங்கியுள்ள நிலையில் அரசு ஊராட்சி ஒன்றிய துவக்க, நடுநிலைப்பள்ளிகளில் கடந்த ஆண்டை காட்டிலும் இந்தாண்டு மாணவர் எண்ணிக்கை அதிகரித்திருக்கிறது.குறிப்பாக நகர்ப்புறங்களை ஒட்டிய ஊராட்சிப் பள்ளிகளில் மாணவர் எண்ணிக்கை அதிகரித் திருக்கிறது.

பெரும்பாலான பள்ளிகளில் மாணவர் எண்ணிக்கைக்கு ஏற்ப ஆசிரியர்கள் இல்லை. 70, 80 மாணவர்களுக்கு ஒரு ஆசிரியர் என்ற நிலை கூட, சில பள்ளிகளில் காணப்படுகிறது. சில பள்ளிகளில் மாணவர் எண்ணிக்கைக்கு ஏற்ப வகுப்பறை கட்டடம் இல்லை.இதனால் ஒரே வகுப்பறையில், 60, 70 மாணவர்களை அமர்த்தி பாடம் கற்பிக்க வேண்டியுள்ளது. சில பள்ளிகளில், பள்ளி வளாகங்களில் உள்ள மரத்தடியில் அமர்த்தி பாடம் கற்பிக்கின்றனர்.பாடம் கற்பிக்கும் பணி மட்டுமின்றி, மாணவர்களின் வருகை துவங்கி, பாட போதிப்பு தொடர்பான விவரங்களை அதற்கான பிரத்யேக செயலியில் பதிவேற்றம் செய்ய வேண்டிய பணியையும் ஆசிரியர்கள் கவனிக்க வேண்டியுள்ளது.இதனால் அதிக பணிச்சுமை, நேர விரயம் ஏற்படுகிறது. இதனால் கல்வி போதிப்பில், முழுமையாக கவனம் செலுத்த முடியாத நிலையில் ஆசிரியர்கள் பலர் மன உளைச்சலுக்கு ஆளாகின்றனர். நெருக்கடியான சூழலில் பணிபுரிய விரும்பாத ஆசிரியர்கள் பலர், பணி மாறுதல் பெற்று செல்கின்றனர்.

இதனால் ஏற்கனவே ஆசிரியர் பற்றாக்குறையால் சிரமத்தை எதிர்கொண்டுள்ள பள்ளி நிர்வாகங்களுக்கு கூடுதல் நெருக்கடி ஏற்படுகிறது.எனவே பள்ளிகளில் மாணவர் எண்ணிக்கைக்கு ஏற்ப ஆசிரியர் பணியிடங்களை உருவாக்க வேண்டும் என திருப்பூர் மாவட்ட பெற்றோர் வலியுறுத்தியுள்ளனர்.

சேலம்:

இந்து மக்கள் கட்சி மாநில தலைவர் அர்ஜுன் சம்பத் சேலத்தில் நிருபர்களிடம் கூறியதாவது:-

சிறுபான்மையினர் மாணவர்களுக்கு வழங்குவது போல இந்து மாணவர்களுக்கும் கல்வி உதவித்தொகை வழங்க வேண்டும். கள்ளக்குறிச்சி கலவரம் மாநில உளவுத்துறை தோல்வியையே காட்டுகிறது. இதனால் உளவுத்துறையில் சிறப்பான அதிகாரிகளை நியமிக்க வேண்டும்.

பெரியார் கல்லூரியில் வினாத் தாளில் தாழ்த்தப்பட்ட சாதி எது என்று கேள்வி கேட்கப்பட்டதற்கு காரணமானவர்கள் மீது தீண்டாமை ஒழிப்பு சட்டத்தின் கீழ் நடவடிக்கை எடுக்க வேண்டும். இவ்வாறு அவர் கூறினார். அப்போது மாவட்ட தலைவர் பெரியசாமி உட்பட பலர் உடன் இருந்தனர்.

கோவை:

கோவை காருண்யா தொழில்நுட்பம் மற்றும் அறிவியல் கல்வி நிறுவனத்தின் (நிகர்நிலை பல்கலைக்கழகம்) 26-வது பட்டமளிப்பு விழா பல்கலைக்கழக வளாகத்தில் உள்ள டி.ஜி.எஸ். தினகரன் கலையங்கரத்தில் நடந்தது.

துணைவேந்தர் மன்னார் ஜவஹர் வரவேற்றார். இந்திய விண்வெளி ஆராய்ச்சி நிறுவனத்தின் (இஸ்ரோ) தலைவரும், விண்வெளித்துறைக்கான இந்திய அரசின் செயலாளருமான சோமநாத் சிறப்பு விருந்தினராக கலந்து கொண்டு பட்டமளிப்பு விழா பேரூரையாற்றினார்.

அவர் பேசுகையில் இன்று சவால்கள் நிறைந்த ஒரு புதிய கட்டத்திற்கு உங்கள் வாழ்வு நகருகின்ற தருணம். தைரியமாக, அறிப்பூர்வமாக சவாலான தொழில் வாய்ப்புகளை தேர்ந்தெடுங்கள். தற்போது விஞ்ஞானிகள், பொறியியல் வல்லனுர்களின் சவால்கள் முந்தைய தலைமுறையினரின் சவால்களில் இருந்து வேறுபட்டவை. எனவே அந்தந்த துறையில் நிபுணத்துவம் மற்றும் ஆழ்ந்த ஆராய்ச்சி அனுபவம் பெற்றவர்களால் மட்டுமே பிரச்சிைனகளுக்க தீர்வு காண முடியும்.

எனவே கற்றல் உங்கள் வாழ்நாள் முழுவதும் இருக்க வேண்டும். உங்களிடம் பேரார்வம் இருக்க வேண்டும். எப்போதும் மாணவராகவே இருங்கள். எல்லாவற்றிற்கும மேலாக பணிவோடும், நேர்மையோடும் நடந்து கொள்ளுங்கள். ஆரோக்கியமாக வாழுங்கள். நமது நாட்டை வலிமையாக மாற்றுவதற்கு நீங்கள் கற்ற கல்வியை ஒருங்கிணைத்து பயன்படுத்துவது அவசியம். எதிர்காலத்தை கட்டியெழுப்பும் பணியில் ஈடுபடும் பணிகளை வாழ்த்துகிறேன். இவ்வாறு அவர் கூறினார்.

இணை துணைவேந்தர் டாக்டர் ஜேம்ஸ் ஆண்டறிக்கை வாசித்தார்.

காருண்யா நிகர்நிலை பல்கலைக்கழக வேந்தர் டாக்டர் பால் தினகரன் தலைமை தாங்கி 1698 மாணவ- மாணவிகளுக்கு பட்டங்களை வழங்கினார். அவர் பேசுகையில் தொழில் துறையில் நீங்கள் எதிர்கொள்ள வேண்டிய சவால்கள் நிறைய உண்டு. எனினும் நீங்கள் கற்ற கல்வியும், சிறந்த வாழ்க்கை நெறிமுறைகளும் நீங்கள் வெற்றியடைய வழிகாட்டும். நீங்கள் நமது பாரத தேசத்தை உலகளாவிய அளவில் எல்லா துறைகளிலும் சிறந்த தேசமாக மாற்ற வேண்டும் என்றார். இஸ்ரோ தலைவர் சோமநாத், பேராசிரியர் கொலின் பிரைஸ் ஆகியோரின் சேவையை பாராட்டி கவுரவ டாக்டர் பட்டங்கள் வழங்கப்பட்டது.

விழாவில் இவாஞ்சலின் பால் தினகரன், டிரஸ்டி சாமுவேல் தினகரன், இணைவேந்தர்கள் ரெட்லிங் மார்கரேட் வாலர், இ.ஜே. ஜேம்ஸ் மற்றும் எலிசபெத் உள்பட பலர் கலந்து கொண்டனர். 

வத்திராயிருப்பு

விருதுநகர் மாவட்டம், வத்தி ராயிருப்பு தாலுகா விற்கு உட்பட்ட கீழக் கோட்டையூர் கிராமத்தில் ஆயிரத்திற்கும் மேற்பட்ட குடும்பத்தினர் வசித்து வருகின்றனர். இங்குள்ள அரசு நடுநிலை ப்பள்ளி கடந்த 2018-ம் ஆண்டு உயர்நிலை ப்பள்ளியாக தரம் உயர்த்தப்ப ட்டது. தற்போது 6-ம் வகுப்பு முதல் 10-ம் வகுப்பு வரை 150-க்கும் மேற்பட்ட மாண வர்கள் கல்வி பயின்று வருகின்றனர்.

இந்த பள்ளியில் மேல கோட்டையூர், அக்கனாபுரம் மற்றும் அதன் சுற்றுவட்டார பகுதிகளில் உள்ள கிராமங்களில் இருந்து எண்ணற்ற மாணவர்கள் கல்வி பயின்று வருகின்றனர்.

நடுநிலைப்ப ள்ளியில் இருந்து உயர்நிலைப்பள்ளி யாக தரம் உயர்த்தப்பட்டு 4 ஆண்டுகள் ஆகியும் கூடுதல் பள்ளிக்கட்டிடம் இல்லை. பள்ளியில் உள்ள ஒரு கட்டி டமும் சேதமடைந்து காணப்படுகிறது. அந்த கட்டிடமும் மூடப்பட்டு விட்ட தாலும் மாணவர்கள் வளாகத்தில் உள்ள மரத்தடி யில் அமர்ந்து கல்வி கற்க வேண்டிய நிலை உள்ளது. மழை, வெயில் என்று பாராமல் தரையில் அமர்ந்து மாணவர்கள் கல்வி கற்கவேண்டிய சூழ்நிலை நிலவி வருகிறது.

ஆதலால் இந்த பள்ளிக்கு கூடுதல் கட்டிடம் அமைத்து மாணவர்களின் பாதுகாப்பை உறுதி செய்ய வேண்டும் எனவும், மாணவர்களுக்கு தரமான கல்வியை வழங்க நடவடிக்கை எடுக்க வேண் டும் எனவும் பொதுமக்கள் கோரிக்கை விடுத்துள்ளனர்.