நீங்கள் தேடியது "slug 94916"

பெரம்பலூர்,

பெரம்பலூர் மாவட்டம், ஆலத்தூர் தாலுகா, புதுக்குறிச்சி கிராமத்தை சேர்ந்தவர் ரங்கராஜ்(வயது 55). விவசாயியான இவர் கடந்த 27-ந் தேதி பெரம்பலூர் அருகே உள்ள புது நடுவயலூர் கிராமத்தில் நடந்த கோவில் திருவிழாவிற்கு அந்த ஊரை சேர்ந்த தனது உறவினர் வீட்டில் குடும்பத்துடன் தங்கியிருந்தார். இந்த நிலையில் ரங்கராஜ் வீட்டின் பக்கத்து வீட்டைச் சேர்ந்தவர் நேற்று காலை பார்க்கும்போது ரங்கராஜ் வீட்டின் பூட்டு உடைக்கப்பட்டு கதவு திறந்து கிடந்தது.இதுகுறித்து உடனே அவர் ரங்கராஜை தொலைபேசி மூலம் தொடர்பு கொண்டு தகவல் தெரிவித்துள்ளார். தகவலின் பேரில் நேற்று காலை 6 மணி அளவில் ரங்கராஜ் வீட்டிற்கு வந்து உள்ளே சென்று பார்த்தார். அப்போது வீட்டில் இருந்த பீரோ உடைக்கப்பட்டு அதில் இருந்த 7 பவுன் தங்க நகைகள் மற்றும் ரூ.12 லட்சம் ஆகியவை கொள்ளைபோய் இருப்பது தெரிய வந்தது.இதையடுத்து அவர் உடனே பாடாலூர் போலீஸ் நிலையத்திற்கு தகவல் தெரிவித்தார். தகவலின்பேரில், பாடாலூர் போலீசார் சம்பவ இடத்திற்கு விரைந்து வந்து விசாரணை நடத்தினர். மேலும் சம்பவ இடத்திற்கு கைரேகை நிபுணர்கள் வரவழைக்கப்பட்டு தடயங்கள் சேகரிக்கப்பட்டன. தொடர்ந்து மோப்பநாய் வரவழைக்கப்பட்டது.மோப்பநாய் சம்பவ இடத்தில் மோப்பம் பிடித்துவிட்டு சிறிது தூரம் ஓடிச் சென்று நின்று விட்டது. யாரையும் அது கவ்வி பிடிக்கவில்லை. இதுகுறித்த புகாரின் பேரில் போலீசார் இதுகுறித்து வழக்குப்பதிவு செய்து கொள்ளை சம்பவத்தில் ஈடுபட்ட மர்ம நபர்களை வலை வீசி தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

போரூர்:

கோயம்பேடு, பஸ் நிலையம் எதிரே உள்ள ஜெய்நகர் 11-வது தெருவில் சுந்தர விநாயகர் கோவில் உள்ளது.இன்று காலை வழக்கம் போல கோவிலை திறக்க பூசாரி வந்தார்.

அப்போது கோவில் பூட்டு உடைக்கப்பட்டு கதவு திறந்து கிடந்தது. உள்ளே சென்று பார்த்தபோது உண்டியல் உடைக்கப்பட்டு அதில் இருந்த பணத்தை மர்ம கும்பல் கொள்ளையடித்து சென்று இருப்பது தெரிந்தது. இதுகுறித்து கோவில் நிராவாகி ரகுராம் கோயம்பேடு பஸ் நிலைய போலீசில் புகார் செய்தார். போலீசார் வழக்குப்பதிவு செய்து விசாரணை நடத்தி வருகிறார்கள்.

சென்னை:

சைதாப்பேட்டை, சேஷாசலம் தெருவை சேர்ந்தவர் மோகன்ராஜ். இவர் அப்பகுதியில் உள்ள அடுக்குமாடி குடியிருப்பில் 3-வது மாடியில் குடும்பத்துடன் வசித்து வருகிறார்.

நேற்று இரவு அவர் காற்றுக்காக வீட்டின் கதவை திறந்து வைத்து விட்டு தூங்கினார். இந்த நிலையில் நள்ளிரவு மர்ம வாலிபர் ஒருவர் திடீரென மோகன்ராஜின் வீட்டுக்குள் புகுந்தான். அவன் அங்கிருந்த விலை உயர்ந்த செல்போனை திருடிவிட்டு வீட்டுக்குள் வேறு ஏதாவது பொருட்கள் உள்ளதா என்று நோட்டமிட்டான்.

அந்த நேரத்தில் சத்தம் கேட்டு மோகன் ராஜ் எழுந்தார்.வீட்டுக்குள் திருடன் நிற்பதை கண்டு அதிர்ச்சி அடைந்த அவர் கூச்சலிட்டபடி படி திருடனை பிடிக்க முயன்றார்.

இதையடுத்து உஷாரான கொள்னையன் திருடிய செல்போனை வீசி எறிந்து விட்டு அவரிடம் சிக்காமல் இருப்பதற்காக 3-வது மாடியில் இருந்து குதித்தான். அருகில் மரம் இருப்பது தெரியாமல் அவன் குதித்தால் அதில் சிக்கிக் கொண்டான். மேலும் 3-வது மாடியில் இருந்து விழுந்ததால் கொள்ளையன் பலத்த காயம் அடைந்து உயிருக்கு போராடினான்.

இதுகுறித்து தகவல் அறிந்ததும் சைதாப்பேட்டை போலீசார் விரைந்து வந்தனர். அவர்கள் மரக்கிளையில் சிக்கி படுகாயம் அடைந்த திருடனை மீட்டு ராயப்பேட்டை அரசு ஆஸ்பத்திரியில் சேர்த்தனர். அவனுக்கு தீவிர சிகிச்சை அளிக்கப்பட்டு வந்தது. விசாரணையில் அவன் சைதாப்பேட்டை, கோட்டமேடு குடிசை மாற்று வாரிய குடியிருப்பு பகுதியை சேர்ந்த மணிகண்டன் (வயது31) என்பது தெரிந்தது. அவன் மீது ஏற்கனவே பல்வேறு திருட்டு வழக்குகள் மற்றும் கஞ்சாவிற்பனை உள்ளிட்ட வழக்குகள் உள்ளன.

இதற்கிடையே ஆஸ்பத்திரியில் சிகிச்சை பலனின்றி கொள்ளையன் மணிகண்டன் பரிதாபமாக இறந்தான். இதுபற்றி போலீசார் மேலும் விசாரணை நடத்தி வருகிறார்கள்.

திருட சென்ற இடத்தில் 3-வது மாடியில் இருந்து விழுந்து கொள்ளையன் பலியான சம்பவம் அப்பகுதியில் பரபரப்பை ஏற்படுத்தி உள்ளது.

நாகர்கோவில் :

நாகர்கோவில் வேதநகர் மேலப்புது தெருவை சேர்ந்தவர் முகமது உமர்சாகிப் (வயது 53). இவரது மனைவி ஜாஸ்மின். இவர்களுக்கு ஒரு மகள் உள்ளார். கடந்த 26-ந் தேதி ஜாஸ்மின் அவரது மகள் மற்றும் மாமியார் ஆஸ்பத்தி ரிக்கு சென்றிருந்தனர். வீட்டில் முகமது உமர் ஷாகிப் மட்டும் தனியாக இருந்தார். அப்போது பர்தா அணிந்து வந்த 7 பேர் கொண்ட கும்பல் வீட்டுக்குள் புகுந்து முகமது உமர் சாகிப்பை கட்டி போட்டுவிட்டு பீரோவில் இருந்த 20 பவுன் நகையை கொள்ளையடித்து சென்ற னர்.

இதுகுறித்து கோட்டார் போலீசாருக்கு தகவல் தெரிவிக்கப்பட்டது. போலீ சார் சம்பவ இடத்துக்கு விரைந்து வந்து விசாரணை நடத்தினர். முகமது உமர் ஷாகிப் கொடுத்த புகாரின் பேரில் இடலாக்குடி வயல் தெருவை சேர்ந்த அமீர் (47), ரஹீம் (33), அழகிய பாண்டியபுரம் எட்டாம் மடை பகுதியை சேர்ந்த கவுரி (36), சரக்கல்விளையை சேர்ந்த மீரான் (40), கோவில்பட்டியை சேர்ந்த சார்லஸ், இருளப்பபுரத்தை சேர்ந்த ஷேக் முகமது, மைதீன் புகாரி ஆகிய 7 பேர் மீது வழக்குப்பதிவு செய்யப்பட்டது. இந்த கொள்ளை வழக்கு தொடர்பாக கொள்ளை யர்களை பிடிக்க 3 தனிப்படை அமைக்கப் பட்டது. தனிப்படை போலீசார் அமீர், ரஹீம், கவுரி ஆகிய 3 பேரை கைது செய்தனர். கைது செய்யப்பட்ட 3 பேரிடமும் விசாரணை நடத்தப்பட்டது.

விசாரணையில் கடனை அடைப்பதற்காகவும், வீட்டு செலவுக்கு பணம் தேவைப் பட்டதால் திருடியதாகவும் கூறினார்கள். கொள்ளை யடிக்க சென்ற முகமது உமர் ஷாகிப் வீட்டில் 100 பவுன் நகை கிடைக்கும் என்று எதிர்பார்த்து சென்றதாகவும் ஆனால் குறைவான அளவில் பணம் கிடைத்ததாகவும் தெரிவித்தனர்.

இதற்கிடையில் கைது செய்யப்பட்ட கவுரியை தக்கலை ஜெயிலில் அடைத்தனர். ரஹீம் நாகர்கோவில் ஜெயில் அடைக்கப்பட்டார். அமீர் சிகிச்சைக்காக ஆஸ்பத்தி ரியில் அனுமதிக்கப்பட் டுள்ளார். தலைமறைவாகி உள்ள சார்லஸ், மீரான், ஷேக் முகமது, மைதீன் புகாரியை பிடிக்க தனிப்படை போலீசார் தேடுதல் வேட்டையில் ஈடுபட்டுள்ளனர். போலீசார் தேடுவதை அறிந்த 4 பேரும் தலைமறை வாகிவிட்டனர்.

நெல்லை, குமரி மாவட்டங்களில் தேடுதல் வேட்டை நடத்தப்பட்டது. ஆனால் அவர்கள் சிக்க வில்லை. இந்த நிலையில் அவர்கள் கேரளாவில் பதுங்கி இருப்பதாக தனிப்படை போலீசாருக்கு தகவல் கிடைத்துள்ளது. இதையடுத்து தனிப்படை போலீசார் கேரளா விரைந்துள்ளனர்.

திருச்சி,

திருச்சி சஞ்சீவி நகர் அப்துல் கலாம் தெருவை சேர்ந்தவர் சந்திரன். இவர் தனது வீட்டில் நகை பட்டறை வைத்து நடத்தி வருகிறார். நகைக்கடைகளுக்கும், ஆர்டரின் பேரில் பொதுமக்களுக்கும் நகைகள் வடிவமைத்து கொடுக்கும் தொழிலில் ஈடுபட்டுள்ளார்.இந்த நிலையில் சந்திரன், அவரது மனைவி கமலா இருவரும் கடந்த வாரம் காசி புனித யாத்திரை புறப்பட்டு சென்றனர். வீட்டில் அவரது மாமியார் மனோன்மணியம் மற்றும் மகள் பிரதீஷா ஆகியோர் மட்டுமே இருந்தனர். அவர்கள் இருவரும் சம்பவத்தன்று திருச்சி பாபு ரோடு கீழ காசிபாளையம் பகுதியில் உள்ளமனோன்மணியம் மகன் பொன்னம்பலம் வீட்டிற்கு சென்று விட்டனர்.பின்னர் மறுநாள் காலை வீட்டிற்கு வந்து பார்த்தபோது வீட்டின் கதவு பூட்டு உடைக்கப்பட்டு இருப்பதைக் கண்டு அதிர்ச்சி அடைந்தனர். உள்ளே சென்று பார்த்த பொழுது பீரோவின் கதவு உடைக்கப்பட்டு இதில் வைக்கப்பட்டிருந்த நெக்லஸ், ஆரம் தோடு உள்ளிட்ட 20 பவுன் நகை உள்ளிட்ட ரூ.4.50 லட்சம் மதிப்பிலான தங்க நகை திருட்டு போய் இருப்பது தெரிய வந்தது.இது குறித்து உடனடியாக கோட்டை போலீசாருக்கு தகவல் தெரிவித்தனர். தகவல் அறிந்து கோட்டை போலீசார் கைரேகை நிபுணர்கள் மற்றும் மோப்ப நாய் உதவியுடன் சம்பவ இடத்துக்கு விரைந்து சென்று அங்கு சோதனை செய்தனர். இந்த சம்பவம் குறித்து கோட்டை போலீசார் வழக்குப்பதிவு செய்து நகை பட்டறை அதிபர் வீட்டில் நகையை திருடிய மர்ம ஆசாமிகளை வலைவீசி தேடி வருகின்றனர். மக்கள் நெருக்கம் மிகுந்த பகுதியில் நடந்த இந்த துணிகர கொள்ளை சம்பவம் அப்பகுதி மக்களிடையே பெரும் அச்சத்தை ஏற்படுத்தி இருக்கிறது.

கடலூர் 

கடலூர் மாவட்டம் பண்ருட்டி அடுத்த சாத்திப்பட்டை சேர்ந்தவர் ஆரோக்கியராஜ்.இவர் பகுதியில் உள்ள ஒரு தனியார் மெட்ரிகுலேஷன் பள்ளியில் ஆசிரியையாகவேலை செய்து வருகிறார். இவர் கடந்த பிப்ரவரி மாதம் வீ ட்டை பூட்டிக் கொண்டு வேலைக்கு சென்ற பிறகு வீட்டில் இருந்த நகை பணம் கொள்ளை அடிக்கப்பட்டது தெரியவந்தது. இது பற்றி காடாம்புலியூர் போலீசார் வழக்கு பதிவு செய்து தீவிர விசாரணை நடத்தி வந்தனர். இதற்கிடையில் கடலூர் மாவட்ட போலீஸ் சூப்பிரண்டாக புதிதாக பொறுப்பேற்ற ராஜாராம் பழைய வழக்குகளை துப்புத் துலக்கி குற்றவாளிகளை கைது செய்து சிறையில் அடைக்க வேண்டும் என்று போலீசாருக்கு உத்தரவிட்டிருந்தார்.

இதனை தொடர்ந்து பண்ருட்டி துணை போலீஸ் சூப்பிரண்டு சபியுல்லாதலைமையில்காடாம்புலியூர் போலீஸ் இன்ஸ்பெக்டர் ராஜ தாமரை பாண்டியன், சப்- இன்ஸ்பெக்ட ர்பிரேம்குமார்,பண்ருட்டிடி.எஸ்.பி. தனி படை சப்- இன்ஸ்பெக்டர் தங்கவேலு மற்றும் போலீசார் பல்வேறு கோணங்களில் விசாரணையை தீவிரப்படுத்தினர் இதனை தொடர்ந்து பண்ருட்டி அடுத்த விலங்கல்பட்டை சேர்ந்த நடராஜன் மகன் ராஜகுமாரனை (23) அதிரடியாக கைது செய்து அவனிடம் இருந்த நகை பணம் ஆகியவற்றை மீட்டனர். ராஜகுமாரன் பண்ருட்டி நெல்லிக்குப்பம் பகுதியில்பல இடங்களில் கைவரிசை காட்டியது விசாரணையில் தெரியவந்துள்ளது.வீட்டை பூட்டிக் கொண்டு வேலைக்கு செல்பவர்கள்வீட்டு சாவியை எங்கு வைத்து விட்டு செல்கிறார்கள் என்பதை நோட்டமிட்டு அந்த சாவியை எடுத்து வீட்டை திறந்து நகை- பணம் கொள்ளை சம்பவத்தை அரங்கேற்றி மீண்டும் சாவியை அதே இடத்தில் வைத்து விட்டு செல்வது தெரியவந்தது. நீண்ட நாட்களாக துப்பு துலங்காமல் இருந்து வந்த கொள்ளை வழக்கில் துப்புத் துலக்கிய பண்ருட்டி போலீசாரை கடலூர் மாவட்ட போலீஸ் சூப்பிரண்டு ராஜாராம் பாராட்டினார்

பொள்ளாச்சி,

கோவை ஆனைமலை அருகே தர்மராஜ் காலனியை சேர்ந்தவர் கமலம் (வயது 70). இவரது மகள் செல்வி (47). செல்வி மாசாணி அம்மன் கோவில் அருகே உள்ள பொம்மை கடையில் வேலை பார்த்து வருகிறார்.

இந்த நிலையில் செல்விக்கும், அவரது கணவருக்கும் கருத்து வேறுபாடு ஏற்பட்டது. இதையடுத்து செல்வி கடந்த சில மாதங்களாக தனது தாயுடன் வசித்து வருகிறார். இவர்களது வீட்டில் கோவையை சேர்ந்த முத்தம்மாள் (50) என்பவர் வாடகைக்கு குடியிருந்து வந்தார். இவர் ஓட்டலில் வேலை செய்து வருகிறார்.

கமலம் மற்றும் அவரது மகள் செல்வி ஆகியோர் இரவில் மொட்டை மாடியில் படுத்து தூங்குவதை வழக்கமாக வைத்திருந்தனர். நேற்று இவர்களது வீட்டிற்கு முத்தமாள் வந்தார்.

அப்போது அவர் நானும், இன்று உங்களுடன் மொட்டை மாடியில் படுத்து கொள்கிறேன் என தெரிவிக்கவே 3 பேரும் மொட்டை மாடிக்கு சென்றனர்.அங்கு நேரம் போவது தெரியாமலும், தூங்காமலும் வெகுநேரமாக பேசி கொண்டே இருந்தனர். இவர்கள் அதிகாலை 2 மணி வரை பேசிக் கொண்டிருந்தனர்.

அப்போது முத்தம்மாள் நான் டீ போட்டு எடுத்து வருகிறேன் என கூறி விட்டு சென்று மீண்டும் டீயுடன் வந்தார்.

அதனை கமலம் மற்றும் அவரது மகளுக்கு கொடுத்தார். பின்னர் 3 பேரும் சேர்ந்து டீ குடித்து விட்டு தூங்கி விட்டனர்.

இந்த நிலையில் இன்று காலை கமலம் வீட்டிற்கு அருகே வசிக்கும் முத்துராஜா என்பவர் தேங்காய்களை போடுவதற்கு வந்தார். அப்போது வீட்டில் யாரும் இல்லை.

இதையடுத்து மொட்டை மாடியில் சென்று பார்த்தார்.அப்போது செல்வியும், கமல மும் வாயில் நுரை தள்ளியபடி கிடந்தனர். இதை பார்த்ததும் அதிர்ச்சியான அவர் சம்பவம் குறித்து, செல்வியின் கணவருக்கு தகவல் தெரிவித்தார்.

அவர் உடனடியாக இங்கு வந்து 2 பேரையும் மீட்டு ஆம்புலன்ஸ் மூலம் கோவையில் உள்ள தனியார் ஆஸ்பத்திரியில் சேர்த்தார். அங்கு அவர்களுக்கு டாக்டர்கள் தீவிர சிகிச்சை அளித்து வருகின்றனர். இதற்கிடையே கமலம், செல்வி ஆகியோர் கழுத்து மற்றும் வீட்டில் வைத்திருந்த 24 பவுன் நகைகள் மாயமாகி உள்ளதாக செல்வியின் கணவர் ஆனைமலை போலீசில் புகார் அளித்தார்.

இதுதொடர்பாக போலீசார் தீவிர விசாரணை நடத்தி வருகின்றனர். இந்த நிலையில், இவர்களது வீட்டில் இருந்த முத்தம்மாள் திடீரென மாயமாகி விட்டார். இதனால் போலீசாருக்கு அவர் மீது சந்தேகம் எழுந்துள்ளது.

மேலும் இவர் கொடுத்த டீயை குடித்த பின்பு தான் தாயும், மகளும் மயங்கி உள்ளனர். இதனால் அவர் டீயில் ஏதாவது மயக்க மாத்திரை அல்லது வேறு ஏதாவது கலந்து கொடுத்தாரா? என்பது குறித்தும் விசாரித்து வருகின்றனர்.

திருப்பூர்:

திருப்பூர் மண்ணரை பகுதியை சேர்ந்தவர் குப்புசாமி . இவர் சேலத்தில் நகைகளை அடகு வைத்து விட்டு ரூ.1.50 லட்சத்தை பையில் வைத்துக்கொண்டு ஊருக்கு புறப்பட்டார். சேலத்தில் இருந்து திருப்பூர் செல்லும் பஸ்சில் ஏறினார். மண்ணரை வந்ததும் பஸ்சில் இருந்து இறங்கிய போது , ரூ.1.50 லட்சம் பணம் வைத்திருந்த கைப்பையை காணவில்லை.

இதனால் அதிர்ச்சியடைந்த அவர் உடனே இது குறித்து திருப்பூர் வடக்கு குற்றப்பிரிவு போலீசில் புகார் செய்தார். இதையடுத்து திருப்பூர் மாநகர போலீஸ் கமிஷனர் பிரவீன்குமார் அபினபு, இன்ஸ்பெக்டர் ராஜ சேகரன், சப்-இன்ஸ்பெக்டர் செந்தில்முருகன் , போலீஸ்காரர்கள் சரவணன், பாஸ்கர் ஆகியோர் அடங்கிய தனிப்படை அமைத்து உத்தரவிட்டார்.

தனிப்படை போலீசார் குப்புசாமியிடம் பணத்தை கொள்ளையடித்த நபர்கள் யாரென்று விசாரணை நடத்தி வந்தனர். அப்போது குப்புச்சாமி வந்த பஸ், எந்தெந்த பஸ் நிறுத்தத்தில் நின்றது, அங்கு இறங்கியவர்கள் யார் என்பது குறித்து விசாரணை நடத்தினர். பஸ் நிறுத்தம் அருகே இருந்த கண்காணிப்பு கேமராவில் பதிவாகிய காட்சிகளை பார்வையிட்டு ஆய்வு செய்தனர்.

அப்போது மண்ணரைக்கு முன்பாக கருமாரம்பாளையம் பஸ் நிறுத்தத்தில் 2 பெண், ஒரு ஆண் ஆகியோர் இறங்கியதும் அவர்கள் பஸ் நிறுத்தத்தில் இருந்து தெரு வழியாக சென்றதுடன், பின்னர் ஒரு ஆட்டோவில் ஏறி திருப்பூர் தென்னம்பாளையம் மார்க்கெட் பகுதிக்கு வந்திறங்கியதும் தெரியவந்தது. அங்கிருந்து வீரபாண்டி கிருஷ்ணாநகருக்கு மற்றொரு ஆட்டோவில் ஏறி சென்றதும் கண்காணிப்பு கேமராவில் பதிவாகி இருந்தது. இதையடுத்து போலீசார் அங்கு சென்று 3பேரையும் மடக்கி பிடித்து கைது செய்தனர்.

விசாரணையில் அவர்கள் பெங்களூரை சேர்ந்த வாணி, வைதேகி மற்றும் சாய் என்பதும், திருப்பூர் வீரபாண்டி பகுதியில் தங்கியிருந்து பிச்சை எடுப்பது போல் நடித்து திருட்டில் ஈடுபட்டு வந்துள்ளனர். ஓடும் பஸ்சில் பயணிகளிடம் கைவரிசை காட்டியுள்ளனர்.

சேலத்தில் இருந்து குப்புச்சாமி பணத்தை பையில் வைத்து கொண்டு வருவதை நோட்டமிட்டு அதே பஸ்சில் 3பேரும் ஏறியுள்ளனர். அப்போது குப்புச்சாமி அருகே நின்று கொண்டு இடிப்பதாக கூறி குப்புச்சாமியிடம் தகராறு செய்துள்ளனர். பின்னர் அவரை திசை திருப்பி பணத்தை கொள்ளையடித்துள்ளனர். தற்போது போலீசார் விசாரணையில் சிக்கிக்கொண்டனர். 3பேரிடம் இருந்து ரூ.60 ஆயிரத்தை போலீசார் பறிமுதல் செய்தனர்.

நேற்று மதியம் 4மணி அளவில் பணம் கொள்ளையடிக்கப்பட்ட நிலையில் தனிப்படை போலீசார் விரைந்து செயல்பட்டு இரவு 7மணிக்கு கொள்ளை கும்பலை பிடித்துள்ளனர். 3 மணி நேரத்தில் பிடித்த தனிப்படை போலீசாரை மாநகர போலீஸ் கமிஷனர் பிரவீன்குமார் அபினபு பாராட்டினார்.

ஸ்ரீவில்லிபுத்தூர்:

விருதுநகர் மாவட்டம் ஸ்ரீவில்லிபுத்தூர் தன்யாநகரை சேர்ந்தவர் கயத்தம்மாள். இவர் அங்குள்ள ஒரு வங்கியில் காசாளராக பணியாற்றி வருகிறார். சம்பவத்தன்று இவர் மருத்துவ பரிசோதனைக்காக வீட்டை பூட்டிவிட்டு குடும்பத்தினருடன் மதுரைக்கு சென்று விட்டார். இதேபோல் அதே பகுதியை சேர்ந்த சதீஷ்(வயது28) என்பவரும் வீட்டை பூட்டிவிட்டு வெளியே சென்று விட்டார்.

இதை நோட்டமிட்ட மர்ம நபர்கள் நேற்று நள்ளிரவு கயத்தம்மாள் வீட்டின் கதவை உடைத்து உள்ளே புகுந்தனர். பின்னர் பீரோவை உடைத்த மர்ம நபர்கள் அதில் இருந்த 10 பவுன் நகை, பணத்தை திருடினர். அங்கிருந்து வெளியேறிய கும்பல் அருகில் உள்ள சதீஷ் வீட்டுக்குள் புகுந்து 5 பவுன் நகை, ரூ.80 ஆயிரம் ஆகியவற்றை கொள்ளையடித்துக் கொண்டு தப்பினர். மேலும் அதே பகுதியில் பூட்டியிருந்த சில வீடுகளிலும் அந்த கும்பல் கொள்ளை முயற்சியில் ஈடுபட்டுள்ளது. கதவை உடைக்க முடியாததால் அவர்கள் அதனை கைவிட்டனர்.

ஸ்ரீவில்லிபுத்தூர் அருகே உள்ள மல்லி ஹவுசிங் போர்டு பகுதியில் தனியார் நிதி நிறுவனம் உள்ளது. நேற்று இரவு இங்கு வந்த கொள்ளை கும்பல் கதவை உடைத்து அலுவலகத்தில் இருந்த ரூ.3 லட்சம் ரொக்கத்தை கொள்ளையடித்துச் சென்றது. இன்று காலை கொள்ளை சம்பவம் குறித்து தகவல் அறிந்த ஸ்ரீவில்லிபுத்தூர் டி.எஸ்.பி. சபரிநாதன் மற்றும் போலீசார் திருட்டு நடந்த வீடுகள், நிதி நிறுவனத்தில் நேரில் வந்து விசாரணை நடத்தினர். மேலும் மோப்ப நாயும் வரவழைக்கப்பட்டது. தடயவியல் நிபுணர்கள் கொள்ளை நடந்த இடங்களில் கைரேகைகளை சேகரித்தனர்.

ஸ்ரீவில்லிபுத்தூர் பகுதியில் ஒரே நாள் இரவில் 2 வீடுகள், தனியார் நிதி நிறுவனத்தில் நடந்த கொள்ளை சம்பவம் பெரும் அதிர்ச்சியை ஏற்படுத்தியுள்ளது. கொள்ளையர்கள் பல நாட்கள் திட்டம் தீட்டி இதில் ஈடுபட்டிருக்கலாம் என தெரிகிறது. இது தொடர்பாக போலீசார் வழக்குப்பதிவு செய்து கொள்ளையர்களை தேடி வருகின்றனர்.

திருவள்ளூர்:

திருவள்ளூர் அடுத்த காக்களூர் பகுதியைச் சேர்ந்தவர் மணிகண்டன். செங்கல்பட்டு போலீஸ் நிலையத்தில் காவலராக பணியாற்றி வருகிறார். இவர் நேற்று தனது மகளின் பிரசவ செலவிற்காக திருவள்ளூர் ஜே.என்.சாலையில் உள்ள வங்கியில் ரூ.1 லட்சத்து 30 ஆயிரத்தை எடுத்துக்கொண்டு காரில் சென்றார்.

அப்போது காக்களூர் பை பாஸ் சாலையில் மற்றொரு வங்கி எதிரே காரை நிறுத்தி விட்டு வங்கியின் உள்ளே சென்றார். திரும்பி வந்தபோது கார் கண்ணாடி உடைந்து இருந்தது. காரின் உள்ளே வைத்திருந்த ரூ.1 லட்சத்து 50 ஆயிரத்தை மர்ம நபர்கள் கொள்ளையடித்து சென்று இருப்பது தெரிந்தது.

சென்னை:

கோடை விடுமுறையில் சென்னை மற்றும் புறநகர் பகுதிகளில் வசிப்பவர்களில் பெரும்பாலானவர்கள் சொந்த ஊர்களுக்கு சென்று விடுவார்கள்.

சிலர் கோடை விடுமுறை முழுவதையும் சொந்த ஊரில் கழிப்பார்கள். சிலர் சுற்றுலா தலங்களுக்கு சென்று வருவார்கள்.

இதனால் ஆயிரக்கணக்கான வீடுகள் பூட்டி கிடக்கின்றன. அவ்வாறு பூட்டி கிடக்கும் வீடுகளை பகல் நேரங்களில் வியாபாரிகள் போல் சென்று நோட்டம் போட்டு இரவில் பூட்டை உடைத்து கொள்ளையடித்து செல்வதுண்டு. கடந்த ஆண்டு அந்த மாதிரியான சம்பவங்கள் சில இடங்களில் நடந்தன.

இந்த ஆண்டும் அதே போல் நடக்கும் கொள்ளை சம்பவங்களை தடுக்க போலீசார் புதிய திட்டம் ஒன்றை வகுத்துள்ளார்கள். சென்னை, தாம்பரம் மாநகர பகுதியிலும், ஆவடி பகுதியிலும் பூட்டி கிடக்கும் வீடுகளை தினமும் கண்காணிக்க சென்னை போலீஸ் கமிஷனர் சங்கர் ஜிவால், தாம்பரம் போலீஸ் கமிஷனர் அமல்ராஜ், ஆவடி போலீஸ் கமிஷனர் அருண் ஆகியோர் காவல் துணை ஆணையர்களுக்கு உத்தரவிட்டுள்ளார்கள்.

தினமும் பகல், மாலை, நள்ளிரவு ஆகிய 3 நேரமும் பூட்டிய வீடுகளை போலீசார் கண்காணிப்பார்கள். அடுக்குமாடி குடியிருப்புகளில் பூட்டி கிடக்கும் வீடுகள் பற்றி குடியிருப்போர் நலச்சங்கங்களிடம் தகவல் கேட்டு அவற்றையும் கண்காணிப்பார்கள்.

வீடுகளை பூட்டி செல்வது பற்றி அருகில் இருக்கும் போலீஸ் நிலையங்களுக்கு தகவல் தெரிவிக்க வேண்டும் என்று ஏற்கனவே போலீசார் அறிவுறுத்தி இருக்கிறார்கள். ஆனால் பலர் அதை கடைபிடிப்பதில்லை.

பாதுகாப்பில்லாத இடங்களில் பூட்டி கிடக்கும் வீடுகள் பற்றி போலீசார் விசாரித்து போன் நம்பர் வாங்கி எப்போது திரும்பி வருவீர்கள் என்றும் விசாரிக்கிறார்கள்.

பொதுமக்கள் ஜாலியாக சொந்த ஊர்களில் இருக்கும் நிலையில் அவர்களது வீடுகளை கொள்ளையர்களிடம் இருந்து பாதுகாக்கும் பணியில் போலீசார் ஈடுபட்டு வருகிறார்கள்.

மணப்பாறை:

திருச்சி மாவட்டம் மணப்பாறையை அடுத்த கருமலை அருகே உள்ள எஸ்.மேட்டுபட்டி கிராமத்தைச் சேர்ந்தவர் சண்முகசுந்தர ராஜா பெருமாள் (வயது 55). தொழிலதிபரான இவர் புத்தானத்தம் பகுதியில் மின்சாதன பொருட்கள் விற்பனை கடை வைத்து நடத்தி வருகிறார்.

இன்று அவருக்கு திருமண நாள் ஆகும். இதையடுத்து அதனை கொண்டாடுவதற்காக தனது குடும்பத்தினருடன் மைசூர் சென்று விட்டார். இந்த நிலையில் இன்று காலை வழக்கம் போல் அவரது வீட்டை சுத்தம் செய்வதற்காக அங்கு வேலை செய்யும் பெண் சென்றார்.

அப்போது வீட்டின் பின்பக்க கதவு உடைக்கப்பட்ட நிலையில் கிடந்தது. மேலும் வீட்டினுள் இருந்த அறையின் கதவுகளில் இருந்து பூட்டுகளும் உடைந்த நிலையில் கீழே கிடந்தன. அறையில் இருந்த பீரோவும் உடைக்கப்பட்டு திறந்து கிடந்தது. இதனால் அதிர்ச்சி அடைந்த அவர் உடனே வீட்டின் உரிமையாளருக்கு தகவல் கொடுத்தார்.

மேலும் சம்பவம் பற்றி தகவல் அறிந்த மணப்பாறை துணை போலீஸ் சூப்பிரண்டு ராமநாதன் மற்றும் புத்தானத்தம் போலீசார் சம்பவ இடத்திற்கு சென்று விசாரணை நடத்தினர். விசாரணையில் வீட்டின் பீரோவில் வைக்கப்பட்டிருந்த சுமார் 70 சவரன் நகை மற்றும் 2 லட்சம் ரொக்கப்பணம் கொள்ளை போயிருக்கலாம் என்று தெரியவந்துள்ளது.

வீட்டில் உள்ளவர்கள் வெளியூர் சென்றிருப்பதை நோட்டமிட்டு முன்கூட்டியே அறிந்துகொண்ட கொள்ளையர்கள் நள்ளிரவில் வந்து நகை, பணத்தை திருடிச் சென்றுள்ளனர்.

இந்தநிலையில் சம்பவ இடத்திற்கு சென்ற தடயவியல் நிபுணர்கள் கொள்ளையர்கள் விட்டுச்சென்ற தடயங்களை சேகரித்தனர். விரல் ரேகையையும் பதிவு செய்தனர். இதேபோல் மோப்ப நாய் வரவழைக்கப்பட்டு நாய் வீட்டில் இருந்து அருகில் உள்ள தோப்பில் சென்று நின்றது.

கொள்ளை சம்பவத்தில் ஈடுபட்டுள்ள மர்ம நபர்கள் வீட்டின் பின் பகுதியில் இட்லி பொடியை தூவி உள்ளனர். இந்த சம்பவம் பெரும் பரபரப்பை ஏற்படுத்திய நிலையில் மைசூர் சென்றவர்கள் வந்த பின்னரே கொள்ளை போன நகை, பணம் குறித்த முழு விபரம் தெரிய வரும்.