நீங்கள் தேடியது "தர்ணா"

 காரிமங்கலம்,

தருமபுரி மாவட்டம் காரிமங்கலம் ஊராட்சி ஒன்றியம் இண்டமங்கலம் பஞ்சாயத்து தலைவராக அ.தி.மு.க.வை சேர்ந்த ராதிகா காசிராஜன் என்பவரும் துணைத்தலைவராக தி.மு.க.வை சேர்ந்த சங்கர் என்பவரும் இருந்து வருகின்றனர்.

கடந்த 2 ஆண்டுகளாக பஞ்சாயத்து தலைவர் மீதும் நிர்வாகம் மீதும் துணைத் தலைவர் மற்றும் வார்டு உறுப்பினர்கள் தொடர்ந்து பல்வேறு குற்றச்சாட்டுகளை எழுப்பி வருகின்றனர். குறிப்பாக தெரு விளக்கு, சாலை வசதி மற்றும் குடிநீர் உட்பட பல்வேறு அடிப்படை தேவைகளை நிறைவேற்ற வலியுறுத்தி பலமுறை கோரிக்கை மனு கொடுத்தும் எவ்வித நடவடிக்கையும் இல்லை. மேலும் மாதந்தோறும் நடக்க வேண்டிய பஞ்சாயத்து வார்டு உறுப்பினர்கள் கூட்டம் 1½ ஆண்டுகளுக்கு மேல் நடத்தப்படவில்லை. பஞ்சாயத்து வரவு செலவு உட்பட எவ்வித கணக்குகளும் முறையாக பராமரிக்கப்படவில்லை

உட்பட பல்வேறு புகார்களை தி.மு.க., அ.தி.மு.க. கட்சிகளை சேர்ந்த வார்டு உறுப்பினர்கள் புகார் தெரிவித்துள்ளனர்.

இந்நிலையில் நேற்று பஞ்சாயத்து வார்டு கவுன்சிலர்கள் கூட்டம் நடப்பதாக தெரிவிக்கப்பட்டது. துணைத்தலைவர் சங்கர் மற்றும் வார்டு உறுப்பினர்கள் ஜோதிலட்சுமி, மங்கை ராமு, தங்கமணி ரஞ்சித், வாசுகி துரை ஆகியோர் பஞ்சாயத்து நிர்வாகம் மீது பல்வேறு புகார்களை தெரிவித்து கூட்டத்தில் பங்கேற்காமல் பஞ்சாயத்து அலுவலக வாயிலில் தர்ணா போராட்டத்தில் ஈடுபட்டனர்.

அப்போது பஞ்சாயத்து தலைவர் ராதிகா மற்றும் செயலாளர் சரவணன் ஆகியோர் துணைத் தலைவர் மற்றும் வார்டு உறுப்பினர்களை கண்டித்தனர்.

இதற்கு அவர்கள் கடும் எதிர்ப்பு தெரிவித்த நிலையில் இருதரப்பிற்கும் இடையே கடும் வாக்குவாதம் ஏற்பட்டது.

இது குறித்து துணை தலைவர் சங்கர் மற்றும் வார்டு உறுப்பினர்கள் கூறுகையில், இண்டமங்கலம் பஞ்சாயத்து நிர்வாகத்தில் நிலவி வரும் பல்வேறு நிர்வாக சீர்கேடுகள் குறித்து காரிமங்கலம் பிடிஓ, பஞ்சாயத்து உதவி இயக்குனர் மற்றும் மாவட்ட கலெக்டர் அலுவலகத்தில் பலமுறை புகார் தெரிவித்தும் எவ்வித நடவடிக்கையும் இல்லை.

இது குறித்து மாவட்ட நிர்வாகம் உரிய கவனம் செலுத்தி பஞ்சாயத்து நிர்வாகத்தில் நிலவி வரும் சீர்கேடுகளை அகற்றி அடிப்படை வசதிகள் செய்து தருவதுடன் முறைகேடுகள் குறித்து உரிய விசாரணை நடத்த வேண்டும் இவ்வாறு அவர்கள் தெரிவித்தனர்.

பஞ்சாயத்து நிர்வாகத்தை கண்டித்து துணைத் தலைவர் மற்றும் வார்டு உறுப்பினர்கள் செய்த தர்ணா போராட்டம் அப்பகுதியில் பரபரப்பை ஏற்படுத்தியது.

பல்லடம்:

பல்லடம் அருகே உள்ள சுக்கம்பாளையம் ஊராட்சி மன்ற அலுவலகத்தில், ஊராட்சி மன்ற தீர்மான நகல்களை விவசாயிகள் சிலர் நேரில் சென்று வாய்மொழியாக கேட்டதாக கூறப்படுகிறது.இதற்கு ஊராட்சி செயலாளர் ஆவணங்களை கடிதம் அல்லது தகவல் உரிமைச் சட்டம் மூலமாகத்தான் கேட்டு பெற முடியும். வாய் மொழியாக கேட்டால் தர இயலாது என கூறியதாக கூறப்படுகிறது.

இதனால் ஆத்திரமடைந்த விவசாயிகள் ஊராட்சி மன்ற அலுவலகத்திலேயே அமர்ந்து தர்ணா போராட்டத்தில் ஈடுபட்டனர். இது குறித்து தகவல் அறிந்து சம்பவ இடம் சென்ற பல்லடம் போலீசார் இரு தரப்பினரிடையே பேச்சுவார்த்தை நடத்தி ஊராட்சி மன்ற தீர்மானங்களை விவசாயிகள் பார்வையிட ஏற்பாடு செய்தனர். இதையடுத்து தீர்மான விவரங்களை பார்வையிட்ட விவசாயிகள் பின்னர் கலைந்து சென்றனர். இதனால் அந்த பகுதியில் சிறிது நேரம் பரபரப்பு ஏற்பட்டது.

கடலூர்:

கடலூர் கலெக்டர் அலுவலகத்தில் பண்ருட்டி வட்டத்தை சேர்ந்த பொதுமக்கள் கோரிக்கை மனு அளிக்க வந்தனர். இதனையடுத்து கலெக்டர் அலுவலக வளாகத்தில் தர்ணா போராட்டத்தில் ஈடுபட்டனர். அப்போது அங்கிருந்த போலீசார் அவர்களிடம் பேச்சுவார்த்தையில் நடத்தினர். அப்போது அவர்கள் கூறுகையில் , அண்ணாகிராமம் ஒன்றியத்துக்குட்பட்ட அவியனூர் ஊராட்சியில் மகளிர் சுய உதவி குழுவில் முறைகேடு நடந்துள்ளது.

மேலும் வறுமை கோர்ட்டுக்கு கீழ் உள்ளவர்களை இக்குழுவில் சேர்க்காமல் ஒரு சிலர் ஒருதலைபட்சமாக செயல்பட்டு வருகின்றனர். இது சம்பந்தமாக அவர்களிடம் கேட்டபோது எந்தவித நடவடிக்கையும் இல்லை. ஆகையால் சம்பந்தப்பட்ட அதிகாரிகள் இது சம்பந்தமாக விசாரணை நடத்தி நடவடிக்கை எடுக்க வேண்டும்.என கூறினார்கள். இதனை தொடர்ந்து போலீசார் சம்பந்தப்பட்ட அதிகாரியிடம் மனு அளித்து நடவடிக்கை எடுத்துக் கொள்ள வேண்டும் என எச்சரிக்கை செய்து அனுப்பி வைத்தனர்.

முசிறி, 

தும்பலம் பெருமாள் பாளையத்தை சேர்ந்தவர் கலையரசி (வயது 23). இவர் அதே ஊரைச் சேர்ந்த ராஜசேகரன்( 29 )என்பவரை கடந்த ஐந்து வருடங்களுக்கு முன்பு திருமணம் செய்து கொண்டுள்ளார். ராஜசேகர் கலையரசிக்கு தெரியாமல் மூன்று மாதத்திற்கு முன்பு வேறொரு பெண்ணை திருமணம் செய்து கொண்டுள்ளதாக கூறப்படுகிறது. ஆகவே ராஜசேகர் மீது நடவடிக்கை எடுக்க கோரி முசிறி அனைத்து மகளிர் காவல் நிலையத்தில் புகார் செய்தும், புகாரை வாங்கவில்லை என்றும், தனது புகார் மீது நடவடிக்கை எடுக்க வேண்டும் என்றும், மேலும் தன்னை அலட்சியப்படுத்தும் இன்ஸ்பெக்டர் மீதும் உரிய நடவடிக்கை எடுக்க வேண்டும் என கூறி, காவல் நிலைய நுழைவாயில் முன்பு உட்கார்ந்து தர்ணா போராட்டத்தில் ஈடுபட்டார். அவரை சமாதானம் செய்யும் முயற்சியில் போலீசார் ஈடுபட்டனர். காவல் நிலையம் முன்பு பெண் ஒருவர் நடத்திய தர்ணா போராட்டத்தால் அப்பகுதியில் பரபரப்பு நிலவியது.

உடுமலை:

உடுமலை ஒன்றியம் பூலாங்கிணறு மற்றும் ராகல்பாவி ஊராட்சிகளுக்கு திருமூர்த்தி கூட்டுக் குடிநீர் திட்டத்தின் கீழ் குடிநீர் விநியோகிக்கப்பட்டு வருகிறது. ஆனால் தற்போது சீராக குடிநீர் விநியோகிக்கப்படுவதில்லை. கடந்த 20 நாட்களாக குடிநீர் வராததால் இப்பகுதி மக்கள் கடும் அவதி அடைந்து வருகின்றனர்.

இது குறித்து ஊராட்சி ஒன்றிய அதிகாரிகளிடம் முறையிடுவதற்காக பூலாங்கிணறு ஊராட்சி மன்ற தலைவர் ராதிகா, ராகல்பாவி ஊராட்சி மன்ற தலைவர் சுமதி மற்றும் மன்ற உறுப்பினர்கள் உடுமலை ஒன்றிய அலுவலகத்திற்கு வந்தனர். அங்கு அதிகாரிகள் சரிவர பதில் அளிக்கவில்லை என தெரிகிறது.

இதில் அதிருப்தி அடைந்த ஊராட்சி மன்ற தலைவர்களும் உறுப்பினர்களும் ஒன்றிய அலுவலக வளாகத்தில் அமர்ந்து தர்ணாவில் ஈடுபட்டனர். அதிகாரிகள் உரிய பதில் அளிக்கும் வரை இங்கிருந்து செல்ல மாட்டோம் என கூறி தரையில் அமர்ந்து இருந்தனர். தகவல் அறிந்து வந்த போலீசார் அவர்களிடம் பேச்சுவார்த்தை நடத்தினர்.

அப்போது அவர்கள் கூறுகையில், திருமூர்த்தி அணை குடிநீர், பழைய திட்டத்தின்அடிப்படையில் வழங்கப்பட்டு வந்தது. புதிய திட்டத்திற்கு மாற்றிய பிறகு கடந்த 6 மாதங்களாக சரிவர குடிநீர் வருவதில்லை. இதனால் மக்கள் பாதிக்கப்பட்டு உள்ளனர். இது குறித்து மக்கள் எங்களிடம் கேள்வி கேட்கின்றனர்.

வாக்களித்த மக்களுக்கு நாங்கள் என்ன பதில் சொல்வது என்று தெரியாமல் இங்கு வந்து அதிகாரிகளிடம் முறையிட்டால் அவர்கள் அலட்சியம் காட்டுகின்றனர். எனவே போராட்டத்தில் ஈடுபட்டுள்ளோம். ஊராட்சி பகுதிகளில் மக்கள் தொகை பெருகிவிட்டது. எனவே ஒரு நாள் விட்டு ஒரு நாள் கூடுதல் தண்ணீர் வழங்க வேண்டும் என கூறி தொடர் போராட்டத்தில் ஈடுபட்டனர்.

பல்லடம்:

பல்லடம் அருகே உள்ள சின்னிய கவுண்டம்பாளையத்தில், தனியார் ஒருவர் வீடு கட்டி வருகிறார். வீடு கட்டுமான பணிக்காக பொறியாளர் ஒருவரிடம் கட்டுமான பணிகளை செய்வதற்கு, இருவரும் ஒப்பந்தம் செய்து கொண்டதாக கூறப்படுகிறது.

இந்த நிலையில் 90 சதவீத பணிகள் முடிந்த நிலையில், வீட்டின் உரிமையாளர் மேற்கொண்டு பணம் எதுவும் கொடுக்கவில்லை என்று கூறி, நேற்று அவரது வீட்டு முன் பொறியாளர் மற்றும் கட்டுமான தொழிலாளர்கள் தர்ணா போராட்டம் நடத்தினர். இதுகுறித்து தகவல் அறிந்து சம்பவ இடம் சென்ற பல்லடம் போலீசார் அவர்களை போலீஸ் நிலையத்தில் வந்து புகார் கொடுக்குமாறு அறிவுறுத்தினர். இதையடுத்து தர்ணா போராட்டம் முடிவுக்கு வந்தது.

தஞ்சாவூர்:

தஞ்சை அருகே உள்ள ஒரு தனியார் கல்லூரியில் பேராசிரியர் பணி நியமனங்களில் முறைகேடுகள் தொடர்பாக நடைபெற்று வரும் வழக்கை விரைவுபடுத்த வேண்டும்.

மறுபடியும் நேர்காணல் நடத்திட வேண்டும் என்பது உள்ளிட்ட பல்வேறு கோரிக்கைகளை வலியுறுத்தி இந்திய கம்யூனிஸ்ட் கட்சி சார்பில் நாளை மண்டல கல்லூரி கல்வி இணை இயக்குனர் அலுவலகம் முற்றுகை போராட்டம் அறிவிக்கப்பட்டிருந்தது.

இந்த நிலையில் இரண்டு தரப்பினரையும் அமைதி பேச்சு வார்த்தைக்கு அதிகாரிகள் அழைத்தனர்.

அதன் அடிப்படையில் இன்று இந்திய கம்யூனிஸ்ட் கட்சி நிர்வாகிகள் தஞ்சாவூர் வட்டாட்சியர் அலுவலகத்திற்கு வந்தனர்.

ஆனால் கல்வி இணை இயக்குனர் நீண்ட நேரமாக பேச்சுவார்த்தை கூட்டத்திற்கு வரவில்லை என கூறப்படுகிறது.

இதனை கண்டித்து அங்கு காத்திருந்த இந்திய கம்யூனிஸ்ட் கட்சியினர் தர்ணா போராட்டத்தில் ஈடுபட்டனர்.

இதன் பிறகு மண்டல கல்லூரி இணை இயக்குனர் அலுவலகத்தின் பிரதிநிதியாக துணை இயக்குநர் வருகை தந்தார்.

அதன் பிறகு தர்ணா போராட்டம் கைவிடப்பட்டு இரு தரப்பினரிடம் பேச்சுவார்த்தை நடத்தப்பட்டது.

இந்த பேச்சுவார்த்தையில் இந்திய கம்யூனிஸ்ட் கட்சி வடக்கு மாவட்ட செயலாளர் பாரதி தலைமையில் வடக்கு மாவட்ட துணைச் செயலாளர் செந்தில்குமார், தெற்கு மாவட்ட துணை செயலாளர் சக்திவேல், மாவட்ட பொருளாளர் பாலசுப்பிர மணியன், தஞ்சை மாநகர செயலாளர் பிரபாகர், ஏஐடியுசி மாநில செயலாளர் தில்லைவனம், நிர்வாகிகள் சேவையா, துரை.மதிவாணன், முத்துக்குமரன் உள்பட பலர் கலந்து கொண்டனர்.

தொடர்ந்து இரு தரப்பினரிடம் பேச்சுவார்த்தை நடத்தப்பட்டு வருகிறது.

திருப்பூர்:

திருப்பூர் மாவட்டம், ஊத்துக்குளி வட்டம், காவுத்தம்பாளையம் கிராமத்தில் உள்ள குமரிக்கல்பாளையம் பகுதியில் 3 ஆயிரம் ஆண்டுகளுக்கு முற்பட்ட, உயரமான ஒரே கல்லால் ஆன நடுகல் உள்ளது. இந்தக் கல் இங்கு குமரிக்கல் என்று அழைக்கப்படுகிறது.

இந்த நடு கல் தரைக்கு மேல் 30 அடி உயரத்திலும் தரைக்கு கீழ் 15 அடி ஆழத்திலும் உள்ளது. இந்த நடு கல்லை சுற்றியுள்ள கிராமங்களில் இரண்டு கிலோமீட்டர் சுற்றளவிற்கு பல்வேறு தொல்லியல் எச்சங்கள் காணப்படுகிறது. பாறை குழிகள், கல்வெட்டுக்கள், பானை ஓடுகள் காணப்படுகின்றன. இந்த ஊரில் உள்ள குளத்தில் ஆய்வு செய்தால் பல்வேறு தொல் பொருள் ஆய்வுகள் கிடைக்கும். என தெரிய வருகிறது. இது குறித்து தமிழ்நாடு அரசின் தகவல் ஆற்றுப்படை எனும் இணைய தளத்தில் மிகத் தெளிவாக குறிப்பிடப்பட்டுள்ளது.

கீழடி தொல்பொருள் கண்காட்சியில் தமிழ்நாட்டில் தொல்லியல் ஆய்வு செய்யப்பட வேண்டிய 32 இடங்களில் இந்த இடமும் ஒரு இடம் என குறிப்பிடப்பட்டுள்ளது.

இந்த நிலையில் காவுத்தம்பாளையம் வருவாய் கிராமம் மற்றும் குமரிக்கல்பாளையம் ஆகிய ஊர்களில் தற்போது தமிழ்நாடு அரசுக்கு சொந்தமான தமிழ்நாடு மின் தொடர் அமைப்பு கழகம் 142.95 ஏக்கரில், மிகப்பெரிய துணை மின் நிலையம் அமைப்பதற்கு நிலம் எடுப்பு பணிகளை செய்து வருகிறது. துணை மின் நிலையம் அமைய உள்ள இடம் குமரிக்கல்லுக்கு மிக மிக அருகிலேயே இதன் எல்லை அமைகிறது.

எதிர்காலத்தில் மின்மாற்றிகள் வெடித்து விபத்து ஏற்பட்டால், இந்த கல் அழிவதற்கு மிகப்பெரிய வாய்ப்பு உள்ளது. அதோடு தொல்லியல் ஆய்வு செய்யவும் மிகப்பெரிய சிரமத்தை இந்த துணை மின் நிலையம் ஏற்படுத்தி விடும். உயர்மின் கோபுரங்கள் அமைக்கப்பட்டு மின்சாரம் கொண்டு செல்லப்படும் போது மழைக்காலங்களில் இடி, மின்னல் அதிகமாக இருக்கும் சூழல்களில் உயர்மின் கோபுர பாதை களை நோக்கி மின்னல் இடிகளும் ஈர்க்கப்படும். அவ்வாறான சமயத்தில் இந்த கல்லுக்கு மிகப்பெரிய ஆபத்து ஏற்பட்டு கல் அழிந்து விடும்.

எனவே துணை மின் நிலைய திட்டத்தை வேறு பகுதிக்கு மாற்றி அமைக்க வலியுறுத்தி காவுத்தம்பாளையம் பகுதியை சேர்ந்த பொது மக்கள் 200க்கும் மேற்பட்டோர் இன்று திருப்பூர் கலெக்டர் அலுவலகம் முன்பு தரையில் அமர்ந்து தர்ணா போராட்டத்தில் ஈடுபட்டனர். துணை மின் நிலையத்தை வேறு பகுதிக்கு மாற்றி அமைக்க வேண்டும். இல்லாவிட்டால் பல்வேறு கட்ட போராட்டங்களில் ஈடுபட போவதாகவும் தெரிவித்துள்ளனர்.போராட்டத்தில் ஈடுபட்டவர்களுடன் போலீசார் பேச்சு வார்த்தை நடத்தினர்.

ஸ்ரீவில்லிபுத்தூர்

ஸ்ரீவில்லிபுத்தூர் ராமகிருஷ்ணாபுரம் காமராஜர் சிலை அருகே ஒன்றிய செயலாளர் பலவேசம் தலைமையில் இந்திய கம்யூனிஸ்ட் சார்பில் தர்ணா போராட்டம் நடைபெற்றது. நகர செயலாளர் மூர்த்தி முன்னிலை வகித்தார். முன்னாள் எம்.பி அழகிரிசாமி, முன்னாள் எம்.எல்.ஏ பொன்னுபாண்டியன் ஆகியோர் சிறப்பு விருந்தினர்களாக கலந்து கொண்டு கோரிக்கைகளை விளக்கி பேசினர்.

விருதுநகர் மாவட்டத்தில் பல்வேறு நகராட்சிகள், பேரூராட்சிகள் ஊராட்சிகளுக்கு தாமிரபரணி கூட்டு குடிநீர் வழங்கப்படுகிறது. ஆனால் திட்டத்தை முறையாக செயல்படுத்தாததால் குடிநீர் தட்டுப்பாடு ஏற்பட்டுள்ளது. அதே போல் பொது சுகாதாரத்திற்கு முக்கியத்துவம் அளித்து, அனைத்து பகுதிகளிலும் ஆண்கள் பெண்களுக்கு தனி தனியாக சுகாதார வளாகங்கள் அமைத்து, கழிவுநீர் கால்வாய் வசதி ஏற்படுத்த உள்ளாட்சி நிர்வாகம் நடவடிக்கை எடுக்கக் வேண்டும் உள்ளிட்ட கோரிக்கைகளை வலியுறுத்தி போராட்டம் நடைபெற்றது.

சேலம்:

சேலம் மாவட்டம் ஓமலூர் பெரியேரிபட்டி கிராமத்தை சேர்ந்த மாணவர்கள் சஞ்சய் (வயது 17), அவரது தம்பி ஜெயகாந்தன் (13) ஆகியோர் இன்று மாவட்ட கலெக்டர் அலுவலகத்திற்கு வந்தனர்.

பின்னர் அவர்கள் கலெக்டர் அலுவலக வளாகத்தின் முன்பு அமர்ந்து திடீரென தர்ணாவில் ஈடுபட்டனர். தகவல் அறிந்து வந்த காவல் துறையினர் அவர்களை தடுத்து நிறுத்தி சமாதான பேச்சுவார்த்தை நடத்தி விசாரணை மேற்கொண்டனர்.

போலீசாரிடம் மாணவர்கள் கூறுகையில், எனது தந்தை கோபால் உடல் நலம் பாதிக்கப்பட்டு பெங்களூரில் சிகிச்சை பெற்று வருகிறார். அவருக்கு உதவியாக எனது தாயும் அங்கு இருந்து வருகிறார்.

இந்த நிலையில், எங்கள் வீட்டுக்கு செல்லும் வழித்தடத்தை அருகில் வசிக்கும் முருகன், கோவிந்தன் ஆகியோர் அடைத்து முட்களை போட்டுள்ளனர். இதனால் வீட்டுக்கு செல்ல முடியவில்லை.

பால் விற்பனை செய்து தற்போது சாப்பிட்டு வருகிறோம். வீட்டுக்கு செல்ல முற்படும்போது அருகில் உள்ளவர்கள் எங்களை வரக்கூடாது என்று கொலை மிரட்டல் விடுகின்றனர்.

வழித்தட பிரச்சனைக்காக 3 முறை கலெக்டர் அலுவலகத்திற்கு தாய் தந்தை ஆகியோர் வந்து மனு அளித்துள்ளனர். போலீஸ் நிலையத்திலும் புகார் தெரிவித்துள்ளனர். ஆனால் இதுவரை எந்தவித நடவடிக்கையும் எடுக்கவில்லை.

எனவே வீட்டின் முன்பு முட்களை போட்டு வழித்தடத்தை மறைத்த நபர் மீது நடவடிக்கை எடுக்க வேண்டும் என்றும் தற்போது வீட்டுக்கு செல்ல முடியாமல் இருப்பதால் எங்களுக்கு பாதுகாப்பு தந்து காப்பகத்தில் இருக்க அனுமதி வழங்க வேண்டும் என தெரிவித்தனர்.

நாகர்கோவில் :

குழித்துறை நகர காங்கிரஸ் கமிட்டி சார்பில் மத்திய அரசை கண்டித்து மார்த்தாண்டத்தில் மாலை நேர தர்ணா போராட்டம் நடைபெற்றது. போராட் டத்திற்கு குழித்துறை நகர காங்கிரஸ் கட்சி தலைவர் சுரேஷ் தலைமை தாங்கினார். மேற்கு மாவட்டத் தலைவர் டாக்டர்.பினுலால்சிங் முன்னிலை வகித்தார்.

போராட்டத்தில் மத்தியஅரசுக்கு எதிராக கோஷங்கள் எழுப்பப்பட்டது. போராட்டத்தில் சிறப்பு விருந்தினராக கன்னியாகுமரி பாராளுமன்ற உறுப்பினர் விஜய்வசந்த் கலந்து கொண்டு பேசினார்.அப்போது அவர் பேசியதாவது:

பாராளுமன்றத்தில் பல்வேறு மோசடிகள் குறித்து விசாரணை கமிஷன் அமைக்க வேண்டும் என 16 - நாட்கள் தொடர்ந்து கேள்வி எழுப்பினோம்.ஆனால் மோடி அரசுக்கு பயம் ஏற்பட்டுள்ளதால், விவாதத்திற்கே வரவில்லை, கோரிக்கைகள் நிராகரிக்கப்பட்டது. இந்தியா ஜனநாயக நாடு என நாம் கூறிக் கொண்டிருக்கிறோம்.

ஆனால் இங்கு சர்வாதிகார ஆட்சி நடைபெற்றுக் கொண்டிருக்கிறது. நாம் அனைவரும் ஒற்றுமையாக போராட்டம் நடத்த வேண்டும். ராகுல் காந்தியின் எம்.பி பதவி பறிப்பை ரத்து செய்யும் வரை போராட்டம் நடத்த வேண்டும்.2024 -ம் ஆண்டு இந்தியாவின் பிரதமராக ராகுல் காந்தியை கொண்டு வர பாடுபட வேண்டும். இவ்வாறு அவர் பேசினார். நிகழ்ச்சியில் அகில இந்திய செயற்குழு உறுப்பினர் ரத்தினகுமார், மாநில பொதுச் செயலாளர் பால்ராஜ் மற்றும் வட்டார தலைவர்கள், பேரூராட்சி தலைவர்கள், கவுன்சிலர்கள், வார்டு தலைவர்கள் உள்பட பலர் கொண்டனர்.

கடலூர்:

கடலூர் மாவட்டம் சிதம்பரம் அம்பல த்தாடிமடத் தெருவைச் சேர்ந்தவர் ஆஷிக் மகன் பக்கிம்அஸ்லாம் (வயது 25). ஐஸ்கிரீம் கடை நடத்தி வருகிறார். இவரது கடைக்கு வேலைக்காக சென்ற கொத்தங்குடித் தெருவைச் சேர்ந்த சீனிவாசன் மகள் மகேஸ்வரி (22) என்பவரை பக்கிம் அஸ்லாம் காதலித்து திருமணம் செய்து கொள்வதாக கூறி உல்லாசமாக இருந்ததாக கூறப்படுகிறது. இதில் கர்ப்பமான மகேஸ்வரி, தன்னை திருமணம் செய்து கொள்ள வற்புறுத்திய போது வீட்டில் வந்து கேட்குமாறு தெரிவித்துள்ளார், வீட்டில் சென்று கேட்ட போது பக்கிம் அஸ்லாம் தந்தை ஆஷிக் மறுப்பு தெரிவித்தார். இருந்தபோதிலும் மகேஸ்வரி 8 மாத கர்ப்பிணையாக இருந்த போது இஸ்லாமியராக மாற வேண்டும் என தெரிவித்தனர். மகேஸ்வரி இஸ்லாமியராக மதம் மாறி, அவருக்கு ஆயிஷா என்ற பெயரும் வைக்கப்பட்டு கடந்த 01.01.2023 அன்று சிதம்பரம் லப்பை தெருவில் உள்ள பள்ளிவாசலில் நிக்கா நடைபெற்றதாக கூறப்படுகிறது  இதையடுத்து ஜனவரி 16-ந்தேதி மகேஸ்வரி என்கிற ஆயிஷாவுக்கு ஆண் குழந்தை பெற்றெ டுத்தார். இதனையடுத்து ஆயிஷாவின் கணவர் பக்கிங் அஸ்லாம் தலைமறைவானார். தனது கணவரை அவரது தந்தை மறைத்து வைத்திருப்பதாகவும், கணவருடன் தன்னை சேர்த்து வைக்குமாறும் சிதம்பரம் அனைத்து மகளிர் போலீஸ் நிலையத்தில் புகார் அளித்தார்.

புகார் மீது மகளிர் போலீஸார் உரிய நடவடிக்கை எடுக்காததால், திருமணம் நடைபெற்ற லப்பை தெரு பள்ளிவாசல் முன்பு நீதி கேட்டு ஆயிஷா 3 மாத கைக்குழந்தை, உறவினர்களுடன் தரையில் அமர்ந்து தர்ணா போராட்டத்தில் ஈடுபட்டார். பின்னர் சம்பவ இடத்திற்கு வந்த போலீசார் வழக்கு பதிவு செய்துள்ளதாகவும், உரிய நடவடிக்கை எடுப்பதாகவும் தெரிவித்ததை அடுத்து போராட்டத்தில் ஈடுபட்ட ஆயிஷா மற்றும் உறவினர்களை போலீஸ் நிலையம் அழைத்துச் சென்று சமாதானம் செய்து அனுப்பி வைத்தனர்.