நீங்கள் தேடியது "slug 224079"

ராமநாதபுரம்

ராமநாதபுரம் மாவட்ட கலெக்டர் அலுவலக கூட்டரங்கில் விவசாயிகள் குறைதீர்க்கும் கூட்டம் நடைபெற்றது. மாவட்ட கலெக்டர் விஷ்ணு சந்திரன் தலைமை தாங்கி விவசாயி களிடம் 53 கோரிக்கை மனுக்களை பெற்றுக் கொண்டு நடவடிக்கை எடுக்கப்படும் என உறுதி அளித்தார்.

தொடர்ந்து கூட்டத்தில் கலெக்டர் பேசியதாவது:-

விவசாயிகளின் பிரதான கோரிக்கையான வரத்து கால்வாய் சீரமைத்தல், வைகை ஆற்றில் கழிவு நீர் கலப்பதை தடுத்தல், கருவேல் மரங்களை அப்புறப்படுத்துதல், விவசாய நிலங்களில் தாழ்வாக செல்லும் மின் வயர்கள் சரிசெய்தல், பழு தடைந்த மின் கம்பங்களை மாற்றி அமைத்தல் போன்ற கோரிக்கைகளுக்கு சிறப்பு கவனம் எடுத்து தொடர்புடைய துறைகள் விரைந்து நடவடிக்கை மேற்கொள்ள அறிவுறுத்தப்பட்டுள்ளது.

பொதுவாக ராமநாதபுரம் மாவட்டம் விவசாயத்தையே பிரதான தொழிலாக செயல்பட்டு வருகிறது. இதை மேலும் சிறப்புடன் செயல்படுத்தும் வகையில் மாவட்ட நிர்வாகம் மூலம் விவசாயிகளுக்கு தேவை யான திட்டங்களை செயல்படுத்திட உறுதுணை யாக இருக்கும். விவசாயி களுக்கு நடப்பாண்டிற்கான வறட்சி நிவாரணத்தொகை விரைவில் பெற்று தர நட வடிக்கை மேற்கொள்ளப் படும்.இவ்வாறு அவர் பேசி னார்.

தொடர்ந்து வேளாண் துறை சார்பில் 50 சதவீத மானிய திட்டத்தில் 5 பயனாளிகளுக்கு ரூ.46.33 லட்சம் மதிப்பிலான டிராக்டர்களை கலெக்டர் விஷ்ணுசந்திரன் வழங்கினார்.

இக்கூட்டத்தில் மாவட்ட வருவாய் அலுவலர் கோவிந்தராஜலு, வேளாண்மைத்துறை இணை இயக்குநர் சரஸ்வதி, மாவட்ட கலெக்டரின் நேர்முக உதவியாளர் (வேளாண்மை) தனுஷ்கோடி, கூட்டுறவு சங்க மண்டல இணைப் பதிவாளர் முத்துக்குமார் உள்பட பலர் கலந்து கொண்டனர்.

கடத்தூர்,

தருமபுரி மாவட்டம், கடத்தூர் ஒன்றியத்தில் உள்ள அரசுப் பள்ளி தலைமை ஆசிரியர்களுடனான பள்ளி செல்லா குழந்தைகளை கண்டறிவதற்கான மீளாய்வுக் கூட்டம் கடத்தூர் தொடக்கப் பள்ளியில் நடைபெற்றது. வட்டார கல்வி அலுவலர் மு.முருகன் தலைமை தாங்கினார்.

மாவட்ட ஒருங்கிணைந்த பள்ளிக் கல்வி உதவி திட்ட அலுவலர் ரவிக்குமார் பேசியதாவது:-

கடத்தூர் ஒன்றியத்தில் பள்ளி செல்லா மற்றும் இடைநின்ற குழந்தைகள் 165 பேர் உள்ளதாக கணக்கெடுப்பில் அறியப்பட்டுள்ள நிலையில் இதுவரை தொடக்க மற்றும் நடுநிலைப் பள்ளி அளவில் 7 மாணவர்கள் மட்டுமே கண்டறியப்பட்டுள்ளனர்.

மீதமுள்ள மாணவர்கள் நத்தமேடு, சில்லாரஅள்ளி, குருபர அள்ளி, உனிசின அள்ளி, சிந்தல்பாடி போன்ற கிராமங்களில் உள்ளனர். மாணவர்களை கண்டறிந்து உடனடியாக பள்ளியில் சேர்க்க தலைமை ஆசிரியர்கள் நடவடிக்கை எடுக்க வேண்டும் என்றார்.

கூட்டத்தில் கடத்தூர் வட்டார வளர்ச்சி அலுவலர் ஜெகதீசன், மேற்பார்வையாளர்கள் விஜய குமார், ஆனந்தராஜ், சம்பத் பர்குணன் மற்றும் மாவட்ட ஒருங் கிணைப்பாளர் மாது, கடத்தூர் ஒன்றிய தொடக்க மற்றும் நடு நிலைப்பள்ளி தலைமை ஆசிரியர்கள் பங்கேற்றனர்.

தொடர்ந்து, கடத்தூர் பாலிடெக்னிக் கல்லூரி அருகில் வடமாநிலத்தைச் சேர்ந்த குடும்பத்தினர் வசித்து வந்த பகுதிகளில் பள்ளி செல்லாத 4 குழந்தைகள் இருப்பது கண்டறியப்பட்டது. அவர்களை பள்ளியில் சேர்க்க பெற்றோரிடம் விழிப்புணர்வு ஏற்படுத்தப்பட்டது.

தொண்டி

ராமநாதபுரம் மாவட்டம் தொண்டி முதல் நிலை பேரூராட்சியில் ஒவ்வொரு மாதமும் முதல் வாரம் செவ்வாய்க்கிழமையும், இறுதி வார செவ்வாய்க்கிழமையும் காலை 11 மணி முதல் மதியம் 2 மணி வரை மக்கள் குறை தீர்க்கும் நாளாக முன்பு அறிவிக்கப்பட்டது. அதன்படி நடந்த குறை தீர்க்கும் முகாமிற்கு பேரூராட்சி மன்ற தலைவர் ஷாஜஹான் பானு ஜவஹர் அலிகான் தலைமை தாங்கினார். செயல் அலுவலர் மகாலிங்கம் முன்னிலை வகித்தார். பொதுமக்கள் தங்களது பகுதி குறைபாடுகளை நிவர்த்தி செய்யக்கோரி பேரூராட்சி மன்ற தலைவரிடம் மனுக்களாக அளித்தனர்.

இந்த மனுக்களை பரிசீலனை செய்து நடவடிக்கை எடுப்பதாக தெரிவிக்கப்பட்டது. இளநிலை உதவியாளர் ரவிச்சந்திரன் உடனிருந்தார்.

தஞ்சாவூர்:

தஞ்சாவூர் மாவட்ட கலெக்டர் அலுவலக கூட்டரங்கில் நடைபெற்ற பொதுமக்கள் குறைதீர்க்கும் நாள் கூட்டத்தில் கலெக்டர் தீபக் ஜேக்கப் தலைமையேற்று பேசியதாவது:-தஞ்சாவூர் மாவட்டத்தில் நடைபெற்ற மக்கள் குறைதீர்க்கும் நாள் கூட்டத்தில் இலவச வீட்டுமனை பட்டா, முதியோர் உதவித்தொகை, குடும்ப அட்டை, பட்டா மாற்றம், கல்வி கடன் உள்ளிட்ட பல்வேறு கோரிக்கைகள் அடங்கிய 365 மனுக்கள் பெறப்பட்டது. இந்த மனுக்களை விசாரணை செய்து உடனடியாக நடவடிக்கை மேற்கொள்ள சம்பந்தப்பட்ட அலுவலர்களுக்கு வழங்கப்பட்டுள்ளது. மேலும் மனுக்கள் மீது மேற்கொள்ளப்படும் நடவடிக்கை குறித்த விவரத்தை உடனடியாக மனுதாரருக்கு தெரிவிக்க சம்பந்தப்பட்ட அலுவலர்களுக்கு அறிவுறுத்தப்பட்டுள்ளது.

இவ்வாறு அவர் பேசினார்.

அதனை தொடர்ந்து அவர் முதலமைச்சரின் விரிவான மருத்துவ காப்பீட்டுத் திட்ட அடையாள அட்டையினை சமூக பாதுகாப்பு துறையின் கீழ் பதிவு பெற்று செயல்படும் டி.இ.எல்.சி நாசரேத் குழந்தைகள் இல்லத்தில் தங்கி பயிலும் குழந்தைகளுக்கு வழங்கினார்.

இக்கூட்டத்தில் கூடுதல் கலெக்டர் (வருவாய்) சுகபுத்ரா, கூடுதல் கலெக்டர் (வளர்ச்சி) ஸ்ரீகாந்த், தனித்துணை ஆட்சியர் (சமூக பாதுகாப்பு திட்டம்) தவவளவன், மாவட்ட குழந்தைகள் பாதுகாப்பு அலுவலர் குளோரி குணசீலி, மாவட்ட திட்ட அலுவலர் விஜய் ஆனந்த் (முதலமைச்சர் விரிவான மருத்துவ காப்பீடு திட்டம்) மற்றும் அனைத்து அரசுத்துறை அலுவலர்கள் கலந்து கொண்டனர்.

ஆலங்குளம்:

தென்காசி மாவட்டம் ஆலங்குளத்திற்கு அதனை சுற்றி அமைந்துள்ள 100-க்கும் மேற்பட்ட கிராம மக்கள் தங்களின் அத்தியாவசிய மற்றும் அவசர தேவைகளுக்கு வந்து செல்கின்றனர்.

குறிப்பாக ஆதார் கார்டு திருத்தம், வருமானச்சான்று, சாதிச்சான்று உள்ளிட்ட பல்வேறு சான்றிதழ்கள், ரேசன் கார்டு, பட்டா விண்ணப்பித்தல் உள்ளிட்டவற்றுக்கும் ஆலங்குளம்-தென்காசி சாலையில் அமைந்துள்ள தாலுகா அலுவலகத்திற்கு தான் மக்கள் தினமும் வந்து செல்கின்றனர்.

இந்த அலுவலகத்தில் மக்களுக்கு தேவையான அனைத்து விதமான சான்றிதழ்கள் விண்ணப்பித்தல் உள்ளிட்ட பணிகளுக்கு அந்த வளாகத்தில் ஆதார் மையம் தொடங்கப்பட்டு செயல்பட்டு வருகிறது. இங்கு பணியாற்றிய ஊழியர்கள் கடந்த ஒரு மாதத்திற்கு முன்பு பணியிடமாற்றம் செய்யப்பட்டதால் ஒரு மாதமாக அந்த மையம் பூட்டியே கிடந்தது. இதனால் பொதுமக்கள் அங்கு வந்து ஏமாந்து திரும்பி சென்றனர்.

இதுதொடர்பாக கடந்த 22-ந்தேதி மாலைமலரில் செய்தி வெளியானது. இதையடுத்து அதிகாரிகள் உடனடியாக நடவடிக்கை எடுத்து ஆதார் மையத்தை திறந்துள்ளனர். இதுதொடர்பாக அந்த மையத்தின் முன்பு ஒரு நோட்டீசையும் ஒட்டி உள்ளனர்.

அதில், நிரந்தர பணியாளர் வரும் வரைக்கும் செவ்வாய், வியாழன், சனி ஆகிய 3 நாட்கள் ஆதார் மையம் தற்காலிக பணியாளர்களை கொண்டு செயல்படும் என்று தெரிவிக்கப்பட்டுள்ளது. முழுமையாக பூட்டிக்கிடந்த நிலையில், தற்போது வாரத்தில் 3 நாட்கள் ஆதார் மையம் செயல்படுவதால் பொதுமக்கள் நிம்மதி அடைந்துள்ளனர். விரைவில் நிரந்தர பணியாளர்களை நியமிக்க வேண்டும் என்று அவர்கள் கோரிக்கை விடுத்துள்ளனர்.

கடலூர்:

கடலூர் அடுத்த காராமணிக் குப்பம் பகுதியை சேர்ந்த பொது மக்கள் கடலூர் கலெக்டர் அலுவலகத்தில் புகார் மனு அளித்தனர். அந்த மனுவில் கூறியிருப்பதாவது-

கடலூர் - பண்ருட்டி மெயின் ரோட்டில் காராமணிக்குப்பம் குளக்கரை குப்பத்தில் மிகவும் பழமை வாய்ந்த சிந்தாமணி விநாயகர் கோவில் உள்ளது. இக்கோவிலை கடந்த 2002 -ம் ஆண்டு புதிதாக கும்பாபிஷேகம் நடைபெற்று பராமரித்து வந்தனர். தற்போது கடலூர் - மடப்பட்டு சாலை விரிவாக்க பணியின் போது கோவிலை இடித்து விட்டு அதனை கட்டித் தருவதாக தெரிவித்தனர். ஆனால் இந்து அறநிலை துறை கட்டுப்பாட்டில் இருப்பதால் அவர்களிடம்இருந்து பணம் வாங்கி தருகிறோம் என தெரிவித்தனர். ஆனால் இது நாள் வரை கோவில் கட்டுவதற்கு பணம் வழங்கவில்லை. இது சம்பந்தமாக விசாரணை நடத்தி உடனடியாக நடவடிக்கை எடுக்க வேண்டும். இவ்வாறு அதில் கூறப்பட்டு இருந்தது.

நாகப்பட்டினம்:

ராமநாதபுர மாவட்ட கலெக்டராக இருந்து வந்த ஜானி டாம் வர்கீஸ் நாகை மாவட்ட கலெக்டராக பொறுப்பேற்று கொண்டார்.

கலெக்டர் அலுவலகம் வந்த புதிய கலெக்டரை கூடுதல் ஆட்சியர் பிரித்விராஜ், மாவட்ட வருவாய் அலுவலர் உள்ளிட்ட அதிகாரிகள் வரவேற்றனர்.

பிறகு ஆட்சியர் அறைக்கு வந்த அவர் கோப்புகளில் கையெழுத்திட்டு மாவட்ட கலெக்டராக பொறுப்பேற்று க்கொண்டார்.

பின்னர் நிருபர்களிடம் நாகை புதிய கலெக்டர் ஜானி டாம் வர்கீஸ் கூறியதாவது:-

கள்ளச்சாராய புழக்கத்தை ஒழிக்க நடவடிக்கை எடுக்கப்படும். மீனவர்கள் மற்றும் விவசாயிகள் பிரச்னை களுக்கு முக்கியத்துவம் கொடுக்கப்படும்.

மேலும் நாகை மாவட்டத்தில் கோடை கால குடிநீர் தட்டுப்பாட்டை போக்க நடவடிக்கை எடுத்து, மக்கள் பிரச்சினைகளுக்கு உடனடி தீர்வு காண நடவடிக்கை எடுக்கப்படும்.

இவ்வாறு அவர் கூறினார்.

பெரம்பலூர்,

பெரம்பலூர் மாவட்டத்தில் உள்ள தனியார் பள்ளி வாகன ஆய்வு மாவட்ட ஆயுதப்படை மைதானத்தில் நடைபெற்றது. பெரம்பலூர் மாவட்ட கலெக்டர் கற்பகம், போலீஸ் சூப்பிரண்டு ஷ்யாம்ளா தேவி, வருவாய் கோட்டாட்சியர் நிறைமதி, முதன்மை கல்வி அலுவலர் மணிவண்ணன், வட்டார போக்குவரத்து அலுவலர் கணேஷ், சரக துணை போலீஸ் சூப்பிரண்டு பழனிசாமி, மோட்டார் வாகன ஆய்வாளர் (பொறுப்பு) ராஜாமணி, கண்காணிப்பாளர் வேலாயுதம், பெரம்பலூர் தீயணைப்பு நிலைய உதவி மாவட்ட அலுவலர் வீரபாகு ஆகியோர் தனியார் பள்ளி வாகனங்களை நேரில் பார்வையிட்டு ஆய்வு செய்தனர்.

வாகனங்களில் அவசரகால வழி, வேக கட்டுப்பாட்டு கருவி, முதலுதவி பெட்டி, தீயணைப்பான் கருவி உள்ளிட்ட உச்ச நீதிமன்றம் மற்றும் அரசு வகுத்துள்ள விதிமுறைகள் சரியாக பின்பற்றப்பட்டுள்ளதா என்று ஆய்வு செய்யப்பட்டது. ஆய்வு குறித்து கலெக்டர் கற்பகம் கூறும்போது, பெரம்பலூர் மாவட்டத்தில் 64 தனியார் பள்ளிகளில், மொத்தம் 380 பஸ்கள் உள்ளன. முதற்கட்டமாக 225 பஸ்கள் ஆய்வு செய்யப்பட்டுள்ளது. இதில் உரிய விதிமுறைகள் பின்பற்றாத, குறைபாடுடைய 16 பஸ்கள் கண்டறியப்பட்டுள்ளது.அதனை சரி செய்ய நோட்டீஸ் வழங்கப்பட்டுள்ளது. குறைபாடு கண்டறியப்பட்ட வாகனங்கள் மறு ஆய்விற்கு உட்படுத்தப்பட்ட பின்னரே மீண்டும் இயக்க அனுமதிக்கப்படும்.

பஸ்களில் முன்புறமும், பின்புறமும் சென்சார், கண்காணிப்பு கேமரா பொருத்த வேண்டும். போக்குவரத்து விதிமுறைகளை மீறி இயக்கப்படும் தனியார் பள்ளி பஸ்கள் மீது கடுமையான நடவடிக்கை எடுக்கப்படும் என்று கூறினார்.முன்னதாக விபத்து போன்ற அவசர காலங்களில் டிரைவர்கள் மேற்கொள்ள வேண்டிய தற்காப்பு நடவடிக்கைகள் குறித்தும், தீ விபத்துகளில் இருந்து பள்ளி குழந்தைகளை பாதுகாக்க மேற்கொள்ள வேண்டிய முன்னெச்சரிக்கை நடவடிக்கைகள் குறித்தும் பெரம்பலூர் தீயணைப்பு நிலைய வீரர்கள் மூலமாக செயல் விளக்கம் செய்து காண்பிக்கப்பட்டது.

புதுச்சேரி:

காரைக்காலை அடுத்த செல்லூர் கிராமத்தில் உள்ள பெரிய பேட் கிராம மக்கள், மாவட்ட கலெக்டர் குலோத்துங்கனை நேரில் சந்தித்து, கோரிக்கை மனு கொடுத்தனர். அந்த மனுவில் அவர்கள் கூறியிருப்பதாவது:-

எங்கள் கிராமத்தில், கடந்த 22 ஆண்டுகளாக சாலை வசதி சரி செய்யப்படாமல், போக்குவரதுக்கு லாயகற்ற நிலையில், குண்டும் குழியுமாக காட்சியளிக்கிறது. அவசர மருத்துவ சிகிச்சை க்கு ஆம்புல ன்ஸ், தீயணை ப்பு வாகனம் கூட வர முடியாத அளவிற்கு சாலை பழுதடைந்துள்ளது. மேலும் பள்ளிக்கு செல்லும் மாணவர்கள், முதியவர்கள் இச்சாலை வழியாக செல்ல பெரும் சிரமத்திற்குள்ளாகி வருகின்றனர். மழைக்காலங்களில், சாலை முழுவதும் மழை நீர் தேங்கி நோய் தொற்று ஏற்படும் அபாய நிலை உள்ளது. எனவே, சாலையை, உடனே சீரமைக்க நடவடிக்கை எடுக்கவேண்டும். இவ்வாறு அந்த கோரிக்கை மனுவில் கூறப்பட்டுள்ளது. இதைத்தொடர்ந்து, கலெக்டர் குலோத்துங்கன் உடனடியாக ஆய்வு செய்து நடவடிக்கை எடுக்கப்படும் என உறுதி அளித்தார்.

தொண்டி

ராமநாதபுரம் மாவட்டம், தொண்டி முதல் நிலை பேரூராட்சி மன்றக் கூட்டம் பேரூராட்சி தலைவர் ஷாஜஹான் பானு ஜவஹர் அலிகான் தலைமையில் நடந்தது. செயல் அலுவலர் மகாலிங்கம் முன்னிலை வகித்தார். வார்டு கவுன்சிலர் கள் கலந்து கொண்டு தங்க ளது பகுதியில் செயல்படுத்த வேண்டிய பணிகள் பற்றி பேசினர்.

அதில், தொண்டி பேரூராட்சிக்குட்பட்ட மேல்நிலை நீர்த்தேக்கத் தொட்டியில் குடிநீர் விநியோ கிப்பதை கண்காணிக்க காமிரா பொருத்த வேண்டும். மேலத்தெருவில் உள்ள தரைமட்டத் தொட்டியை சுற்றி கல்லுக்கால் ஊன்றி வேலி அமைக்க வேண்டும்.

பேரூராட்சிக்குட்பட்ட அனைத்து தெருக்களிலும் ஸ்பீடு நெட் நிறுவனம் மூலம் பைபர் நெட் வயர் கொண்டு செல்ல கம்பங்கள் நடுவதற்கு கொடுக்கப்பட்ட விண்ணப்பத்தின் மீது நடவடிக்கை எடுக்க வேண்டும். தொண்டியில் உள்ள மணிமுத்தாறு பாலம் அருகில் போக்குவரத்து நெரிசலினால் ஏற்படும் விபத்தை தடுக்க பொது மக்கள் நடந்து செல்வதற்கு ஏதுவாக பாலத்தின் அருகி லேயே புதிய நடைமேடை அமைக்க வேண்டும். பேரூராட்சிக்கு உட்பட்ட பகுதிகளில் நாளுக்கு நாள் ஆக்கிரமிப்புகள் அதிகரித்து வருகின்றன. எனவே அதனை அகற்ற தாசில்தார் மற்றும் நெடுஞ்சாலைத்துறை அதிகாரிகள் நடவடிக்கை எடுக்க வேண்டும் உள்பட பல்வேறு கோரிக்கைகளை வலியுறுத்தி தீர்மானங்கள் நிறைவேற்றப்பட்டன.

சிவகங்கை

சிவகங்கை மாவட்டம் மானாமதுரை வட்டாட்சியர் அலுவலகத்தில் வருவாய் தீர்வாணையம் (ஜமாபந்தி) நிகழ்ச்சி நடந்தது. கலெக்டர் ஆஷா அஜீத் தலைமை தாங்கினார். மானாமதுரை வருவாய் கிராமங்களான அரசனேந்தல், கீழப்பசலை, கிளங்காட்டூர், அன்னவாசல், வேதியரேந்தல், தெற்கு சந்தனூர், கால்பிரவு, ராஜகம்பீரம், மானாமதுரை, அரிமண்டபம்,

எம்.கரிசல்குளம், மிளகனூர், சின்னக்கண்ணனூர், தெ.புதுக்கோட்டை ஆகிய பகுதிகளை சேர்ந்த பொதுமக்களிடம் இருந்து மனுக்கள் பெறப்பட்டன.

பட்டா மாறுதல், வீட்டுமனை பட்டாக்கள், இலவச வீட்டுமனைப் பட்டாக்கள், பிறப்பு-இறப்பு சான்றிதழ், சாதி சான்றிதழ், இருப்பிட சான்றிதழ், வருமான சான்றிதழ், குடும்ப அட்டை, மாதாந்திர உதவித்தொகை, கல்வி உதவித்தொகை, விபத்து நிவாரண தொகை, நலிந்தோர் உதவித்தொகை, நிலம் தொடர்பான பல்வேறு கோரிக்கைகள் தொடர்பாக மனுக்களை பெற்று, தகுதியுடைய மனுக்கள் மீது விரைந்து நடவடிக்கை எடுத்து அதன் பயன்களை பயனாளிகளுக்கு வழங்க வேண்டும் என்று அலுவலர்களுக்கு கலெக்டர் அறிவுறுத்தினார்.

சிவகங்கை வட்டத்தில் 30 மனுக்களும், திருப்பத்தூர் வட்டத்தில் 14 மனுக்களும், காளையார்கோவில் வட்டத்தில் 70 மனுக்களும், காரைக்குடி வட்டத்தில் 51 மனுக்களும், தேவகோட்டை வட்டத்தில் 28 மனுக்களும், திருப்புவனம் வட்டத்தில் 70 மனுக்களும், மானாமதுரை வட்டத்தில் 123 மனுக்களும், இளையான்குடி வட்டத்தில் 8 மனுக்களும், சிங்கம்புணரி வட்டத்தில் 135 மனுக்களும் என மொத்தம் 529 மனுக்கள் பொதுமக்களிடம் இருந்து பெறப்பட்டது.

மேற்கண்ட மனுக்களின் மீது அலுவலர்கள் சிறப்புக் கவனம் செலுத்தி, உரிய களஆய்வுகள் மேற்கொண்டு ஒருவாரகாலத்திற்குள் அனைத்து மனுதாரர்களின் மனுக்கள் மீது தீர்வு கண்டு நடவடிக்கை எடுக்குமாறு கலெக்டர் ஆஷா அஜீத் அலுவலர்களுக்கு அறிவுறுத்தினார்.

இதில் மாவட்ட வருவாய் அலுவலர் மணிவண்ணன், வருவாய் கோட்டாட்சியர்கள் சுகிதா(சிவகங்கை), பால்துரை(தேவகோட்டை) மற்றும் பலர் கலந்துகொண்டனர்.

மதுரை

மதுரை கோவில் நகரமாக விளங்குகிறது. இங்கு பல்வேறு மாநிலங்களைச் சேர்ந்தவர்களும் சாமி தரிசனம் செய்யவும், சுற்றுலா இடங்களை பார்வையிடமும் வருகின்றனர். ஆனால் மதுரை நகரை தூய்மையாக பராமரிப்பதில் தொடர்ந்து மெத்தனம் காட்டப்பட்டு வருகிறது. எங்கு பார்த்தாலும் குப்பை மேடுகளும், கழிவுநீர் தேங்கியிருப்பதையும் காணமுடியும். பொதுமக்கள் அதிகம் கூடும் இடங்களான பஸ் நிலையங்கள், பூங்காக்கள் மற்றும் சாலைகளில் சுகாதார சீர்கேடு நிலவுகிறது. குறிப்பாக பஸ் நிலையங்களை தூய்மைப்ப டுத்தும் பணிகள் தினமும் காலையில் தாமதமாகவே தொடங்குகிறது. மக்கள் நடமாட்டம் அதிகரித்த பின் சரியாக பணிகளை மேற்கொள்ளாமல் சென்று விடுகின்றனர். இதனால் ஆங்காங்கே குப்பைகள் தேங்கியும் கழிவுகள் தேங்கியும் கிடக்கின்றன.

நகரின் முக்கிய பகுதிகளை தூய்மை செய்யாமலேயே விட்டு விடுவதாக கூறப்படுகிறது. குறிப்பாக மேம்பாலங்களின் அடிப்பகுதிகளில் சரியான தூய்மைப் பணிகள் நடப்பதில்லை. இதனால் அந்த பகுதிகளில் வசிப்பவர்கள் பல்வேறு சிரமங்களை அனுபவிக்கின்றனர். இதே போல் பெரியார் பஸ் நிலையம் அருகில் உள்ள மேம்பாலம் பகுதிகளிலும் குப்பைகள் பல நாட்களாக அகற்றப்படாமல் உள்ளது.

மேலும் இந்தப் பகுதிகளை சிறுநீர் கழிப்பிடமாக பயன்படுத்தி வருகின்றனர். இந்தப் பகுதியை சுத்தமாக பராமரித்து மரக்கன்றுகளை நட்டால் பயனுள்ளதாக இருக்கும். மேலும் இங்கு மர்ம நபர்களின் நடமாட்டத்தை தடுக்கவும் நடவடிக்கை எடுக்கப்பட வேண்டும் என்று பொதுமக்கள் கூறுகின்றனர். மேலும் பொதுவெளியில் சிறுநீர் கழிப்பதை தடுக்க நகரில் ஆங்காங்கே கூடு தலாக சுகாதார வளாகங்கள் கட்டப்பட வேண்டும் என்று சமூக ஆர்வலர்கள் கோரிக்கை விடுத்துள்ளனர்.

அதுமட்டுமின்றி வரலாற்று சிறப்பு வாய்ந்த திருமலை நாயக்கர் மகாலை சுற்றி குப்பைகள், கழிவுகள் கொட்டும் இடமாக மாறி உள்ளது. மகாலை ஓட்டியுள்ள பந்தடி தெரு வில் அசுத்தம் நிலவுகிறது. தெப்பக்குளத்தில் அண்மையில் பெய்த கோடை மழை மற்றும் வைகையில் திறந்தவிடப்பட்ட நீர் மூலம் மாரியம்மன் தெப்பக்குளம் நிரப்பப்பட்டது. ஆனால் அங்கு நிரம்பிய தண்ணீரில் கடும் துர்நாற்றம் வீசிவருகிறது. குப்பைகள், பிளாஸ்டிக் கழிவுகள் தெப்பக்குளத்தில் தேங்கியிருப்பதால் தண்ணீர் மாசுபட்டுள்ளதோடு, துர்நாற்றம் காரணமாக தெப்பக்குளம் பகுதிக்கு மக்கள் செல்வதை தற்போது தவிர்த்து வருகின்றனர். எனவே தெப்பக்குளத்தில் உள்ள கழிவை அகற்றி தூய்மையாக பராமரிக்க நடவடிக்கை எடுக்க வேண்டும் என்பது பொதுமக்களின் கோரிக்கையாக உள்ளது.