நீங்கள் தேடியது "slug 225556"

ஊட்டி,

புதிய புயல் நீலகிரி மாவட்ட மாற்றுத்திறனாளிகள் கூட்டமைப்பு சார்பில் ஊட்டி மனநலம் குன்றியோர் இல்லத்தில் மகளிர் தின விழா நடைபெற்றது.

நிகழ்ச்சியில் மாற்றுத் திறனாளிகள் கூட்டமைப்பு தலைவர் சத்தார் பாபு தலைமை வகித்தார். புதிய புயல் ஆறுமுகம் வரவேற்றார். இல்ல காப்பாளர் செந்தில், ஆர்.கே. புரம் பள்ளி தலைமை ஆசிரியர் பரிமளா, உதவும் கரங்கள் அறக்கட்டளை நிறுவனர் உலிகல் சண்முகம், ஆசிரியர் கையேடு தயாரித்த ஓவியா, ஆசிரியர் காந்தல் ஜேம்ஸ், மாற்றுத்திறனாளிகள் கூட்டமைப்பு பிலோமினா மற்றும் தனலட்சுமி, பொறியாளர் விஞ்ஞானி ஆனந்த் ஆகியோர் முன்னிலை வகித்தனர்.

நிகழ்ச்சியில் மகளிர்களுக்கு பாராட்டு விழா மற்றும் விருது வழங்கும் விழாவும், ஆசிரியர்களுக்கு கையேடு வழங்கும் விழா நடைபெற்றது. நிகழ்ச்சி முடிவில் இல்ல பொறுப்பாளர்கள் அருள்மேரி, ரேவதி நன்றி கூறினர்.

ஓசூர், 

கிருஷ்ணகிரி மாவட்டம் ஓசூரில், செயின்ட் பீட்டர்ஸ் மருத்துவக் கல்லூரி மருத்துவமனை மற்றும் ஆராய்ச்சி நிறுவனம் இயங்கி வருகிறது.

இந்த நிறுவனத்திற்கு, " டைம்ஸ் ஹெல்த் எக்சலன்ஸ் விருது " வழங்கப்பட்டுள்ளது. ஓசூர் செயின்ட் பீட்டர்ஸ் மருத்துவக் கல்லூரி மருத்துவமனை மற்றும் ஆராய்ச்சி நிறுவனம், சுகாதார திட்டம், சுகாதார முன் முயற்சி என சுகாதாரத் துறையில் குறிப்பிடத்தக்க பங்களிப்பை சமூகத்திற்கு சிறப்பாக அளித்தமைக்காக "டைம்ஸ் ஹெல்த் எக்சலன்ஸ்" விருது வழங்கப்பட்டது. இந்த விருதினை, சென்னை அயாட் ரீஜென்சி ஓட்டலில் கடந்த 11-ந்தேதி நடந்த விழாவில், மத்திய மந்திரி எல்.முருகன் வழங்க, செயின்ட் பீட்டர்ஸ் மருத்துவக் கல்லூரி மருத்துவமனையின் தாளாளர் டாக்டர் லாசியா தம்பிதுரை பெற்றுக்கொண்டார்.

திருவனந்தபுரம்:

சாதனைக்கு வயது தேவையில்லை... திறமையிருந்தால் எதையும் சாதிக்கலாம் என்பது பல சமயத்தில் பலரால் நிரூபிக்கப்பட்டுள்ளது. அதனை மேலும் உறுதிபடுத்தி உள்ளார் 10 வயது இந்திய சிறுமி.

மேடை ஏற தயங்கும் பலரது மத்தியில் 10 வயதிலேயே மேடையில் அச்சமின்றி தோன்றி, மாநில, தேசிய, ஆசிய அளவில் அழகிப்போட்டியில் விருதுகளை வென்று அசத்தியுள்ளார் இந்த சிறுமி.

துபாயில் நடைபெற்ற 'பிரின்சஸ் ஆப் இந்தியா' பட்டத்தை வென்றுள்ள இவருக்கு பலரும் பாராட்டுகளை தெரிவித்து வருகின்றனர்.

இந்தச் சாதனைக்கு சொந்தக்காரியான சிறுமியின் பெயர் ஆத்யா. கேரள மாநிலம் இடுக்கி மாவட்டம் குரும்பஞ்சோலை பகுதியைச் சேர்ந்த ஜிம்மி-விஜி தம்பதியரின் மகள் ஆவார்.

இவர் வயதையொத்த சிறுமிகள், செப்புச் சாமான்கள் வைத்து விளையாடிய போது, ஆத்யா தொலைக்காட்சிகளில் வரும் பேஷன் ஷோக்களை ஆர்வத்துடன் பார்த்து வந்துள்ளார்.

அதில் வருபவர்களை போல ஆத்யாவும் நடை, உடை, பாவனைகளை காட்டி அனைவரையும் அசர வைத்துள்ளார். இதனை கண்ட அவரது பெற்றோர், மகளை உற்சாகப்படுத்தி உள்ளனர். இதனால் சிறு சிறு போட்டிகளில் பங்கேற்று வந்த ஆத்யா, அடுத்த கட்டத்துக்கு நகர்ந்தார்.

கேரள மாநிலம் மலபாரில் நடந்த அழகிப் போட்டியில், இடுக்கி மாவட்டம் சார்பில் கலந்து கொண்டு பரிசினை வென்றார். தொடர்ந்து திருச்சூரில் நடந்த இண்டர்நேசனல் போட்டியில் பங்கேற்று 2-வது இடத்தை பிடித்தார்.

அதன் பயனாக சமீபத்தில் துபாயில் நடந்த 'பிரின்சஸ் ஆப் ஆசியா' போட்டியில் பங்கேற்க தேர்வானார். இதில் அவரது செயல்பாடு பலரையும் கவர்ந்தது. முடிவில் எதிர்பார்த்தது போல் 'பிரின்சஸ் ஆப் ஆசியா' பட்டத்தை வென்று ஆத்யா அசத்தினார். 10 வயதிலேயே இந்தப் பட்டத்தை வென்ற அவருக்கு பலரும் பாராட்டுகளை தெரிவித்து வருகின்றனர்.

சாதனை சிறுமியின் தாயார் விஜி கூறுகையில், சிறு வயதில் இருந்தே ஆத்யா அழகிப்போட்டிகளை பார்ப்பதில் ஆர்வம் காட்டினாள். அதில் நடந்து வருபவர்களை போல் அவளும் நடந்து காட்டினாள். அவரது ஆர்வத்தை பார்த்து நாங்கள் ஊக்கப்படுத்தினோம்.

அதன் பயனாக இன்று 'ரைசிங் ஸ்டார்', 'பேஸ்புக் ஸ்டார்', 'பிரின்சஸ் ஆப் ஆசியா' என 3 விருதுகளை 10 வயதிலேயே பெற்று சாதனை படைத்துள்ளார் என்றார். 

சீர்காழி:

தமிழ்நாடு முதலமைச்சரின் ஆணைக்கிணங்க கல்லூரி அளவில் தமிழ்க் கனவு நிகழ்ச்சி மயிலாடுதுறை மாவட்டத்தில் வருகிற 10-ம் தேதி நடக்கிறது.

இது தொடர்பாக துறை சார்ந்த அலுவலர்களுடனான முன்னேற்பாடு ஆய்வுக் கூட்டம் மயிலாடுதுறையில் கலெக்டர் மகாபாரதி தலைமையில் நடைபெற்றது.

அப்போது அவர் பேசியதாவது :-

மாபெரும் தமிழ்க் கனவு எனும் பண்பாட்டு பரப்புரை வருகிற 10ஆம் தேதி செம்பனார்கோவில் கலைமகள் கலை மற்றும் அறிவியல் கல்லூரியில் நடக்க இருக்கிறது.

இதில் மயிலாடுதுறை மாவட்டத்தில் உள்ள 10- க்கும் மேற்பட்ட கல்லூரிகள் பங்கேற்க உள்ளன.

புத்தக கண்காட்சி, நான் முதல்வன் திட்டம், வேலைவாய்ப்பு, உயர் கல்வி வழிகாட்டுதல், வங்கி கடன் பெறுதல், மாவட்ட தொழில் மையம் மற்றும் மகளிர் சுய உதவிக் குழுக்கள் உள்ளிட்ட துறை சார்ந்த அரங்குகள் அமைக்கப்பட உள்ளன.

கல்லூரி மாணவ–மாணவிகளின் சிந்தனை மற்றும் திறனை நிரூபிக்கும் வகையில் அவர்களுக்கு பெருமித செல்வன் மற்றும் பெருமித செல்வி ஆகிய 2 வகையான விருதுகள் வழங்கப்பட உள்ளன.

சொற்பொழிவிற்கு பின் கேள்வி எழுப்பும் கல்லூரி மாணவ – மாணவிகளுக்கு கேள்வியின் நாயகன் மற்றும் கேள்வியின் நாயகி ஆகிய 2 விருதுகளும் வழங்கப்பட உள்ளன.

இந்நிகழ்ச்சியில் கல்லூரி மாணவ – மாணவியர் அனைவரும் கலந்து கொண்டு தங்களது திறனையும், சிந்தனையையும் வெளிப்படுத்துவதோடு கேள்விகளையும் எழுப்பி விருதுகளை பெற வேண்டும்.

இவ்வாறு அவர் பேசினார்.

இக்கூட்டத்தில் மாவட்ட வருவாய் அலுவலர்முருகதாஸ், ஊரக வளர்ச்சி துறை இணை இயக்குநர் ஸ்ரீலேகா தமிழ்செல்வன், மாவட்ட ஆட்சியரின் நேர்முக உதவியாளர் (பொது) நரேந்திரன், வருவாய் கோட்டாட்சியர்கள்யுரேகா (மயிலாடுதுறை) , அர்ச்சனா (சீர்காழி) மற்றும் அனைத்து துறை அரசு அலுவலர்கள் கலந்துகொண்டனர்.

தரங்கம்பாடி:

மயிலாடுதுறையில் வடக்குராமலிங்க அக்ரஹாரம் சார்பில் ஆண்டுதோறும் ராதாகல்யாண மகோத்சவம் நடத்தப்பட்டு வருகிறது.

அதன்படி 68-ம் ஆண்டு ராதா கல்யாண மகோற்சவம் மற்றும் ஸ்ரீவாஞ்சியம் ராமச்சந்திர பாகவதர் நூற்றாண்டு விழா கடந்த 24-ந் தேதி தொடங்கியது.

விழாவின் கடைசி நாளில் விஷ்ணுசகஸ்ரநாம பாராயணம், அஷ்டபதிபஜனை, திவ்யநாம பஜனை, மதியம் பலராமகன்பாகவதர், சுப்ரமணிய பாகவதர் ஆகியோருக்கு விருது வழங்கி கவுரவிக்கப்பட்டது.

பின்னர் ஸ்ரீ ராதாகல்யாண மகோற்சவம் நடைபெற்றது.

மாலையில் ஸ்பூர்த்திராவ் குழுவினரின் இன்னிசை நிகழ்ச்சியும், கடையநல்லூர் ராஜகோபால்தாஸ் குழுவினரின் நாமசங்கீர்த்தனம், ஆஞ்சநேய உற்சவம் ஆகியவை நடைபெற்றது.

இதற்கான ஏற்பாடுகளை விழா குழுவினர் செய்தனர்.

தொப்பூர்,

தருமபுரி மாவட்டத்தில் தனியார் நிறுவனத்தின் சார்பாக தமிழகத்தின் நம்பிக்கை நாயகி - 2023 ஆம் ஆண்டிற்கான விருது வழங்கும் விழா மருதம் நெல்லி பாலிடெக்னிக் கல்லூரியில் நிகழ்ச்சி நடைபெற்றது.

இதில் சுமார் நூற்றுக்கு மேற்பட்ட மகளிருக்காண சேவை விருது வழங்கப்பட்டது. அதில் தருமபுரி ஸ்ரீ கிருஷ்ணா பாரா மெடிக்கல் கல்லூரி மாணவிகள் தருமபுரி மக்களுக்காக கொரோனா ஒழிப்பு பணியில் சுமார் 232 நாட்களாக அயராத உழைத்துக் கொண்டிருந்தனர்.

கொரோனா மெகா தடுப்பூசி பணியில் சுமார் 132 நாட்கள் பணியாற்றினார்கள். அதுமட்டுமல்லாமல் தொழுநோய் ஒழிப்பு பணியில் தருமபுரி மக்களுக்காக உணர்ச்சியற்ற தேமல், தோள்கள் தடித்திருத்தல், விரல்கள் மடங்கி இருத்தல், ஊனத்தை தடுக்கும் இது போன்ற பணியில் ஈடுபட்டனர்.

இறுதியாக 2022 ஆம் ஆண்டில் மகப்பேறு மருத்துவ பணியில் சிறப்பாக பணியாற்றிய கவினா, சந்தியா, ரஞ்சனி, கோபிகா, அமுதா, சுபாஷினி, அனிதா ஆகிய 7 மாணவிகளுக்கு 2023ஆம் ஆண்டிற்கான நம்பிக்கை நாயகி விருது வழங்கப்பட்டு கவுரவிக்கப்பட்டது.

மதுராந்தகம்:

மதுராந்தகம் அடுத்த படாளம் கற்பக விநாயகா பொறியியல் மற்றும் தொழில்நுட்பக் கல்லூரியில் உலக மகளிர் தினத்தை முன்னிட்டு பல்வேறு துறைகளில் சாதிக்கும் பெண்களை கவுரவிக்கும் வகையில் மாதரே டி- 23 என்ற தலைப்பில் விருது வழங்கும் விழா நடைபெற்றது.

விழாவுக்கு கல்லூரியின் மேலாண்மை இயக்குனர் டாக்டர். அண்ணாமலை ரகுபதி தலைமை தாங்கினார். நிர்வாக இயக்குனர் டாக்டர். மீனாட்சி அண்ணாமலை முன்னிலை வகித்தார். முதல்வர் காசிநாத பாண்டியன், டீன் சுப்பாராஜ் ஆகியோர் வாழ்த்துரை வழங்கினர். விழாவை சிறப்பு விருந்தினராக பங்கேற்ற நதி தொண்டு நிறுவனத்தின் நிறுவனர் டாக்டர் மது சரண்வேல் தொடங்கி வைத்து சிறப்புரையாற்றினார்.

விழாவில் நடிகை லிஜோ மோல், புத்தக உரையாசிரியர் ஆனந்தி, பின்னணிப் பாடகி மாளவிகா சுந்தர், துணை நடிகை வினோதினி சின்னத்திரை நகைச்சுவை நடிகை சுனிதா கோகை, கார் பந்தய வீராங்கனை ஸ்ரேயா லோகியா, வியாபாரத் துறை வல்லுநர் மினுஅகர்வால், சிலம்பத்தில் உலக சாதனை புரிந்த சுகிதா, உணவு வல்லுனர் ஷர்மிளா , நடிகை கார்த்திகா, சமூக சேவகி சித்ரா தேவி மற்றும் கற்பக விநாயகா பொறியியல் கல்லூரியின் முன்னாள் மாணவியும் தொழில திபருமான பார்வதி ஆனந்த் உள்ளிட்ட பல்வேறு துறைகளில் சாதனை புரிந்த பெண்களுக்கு விருதுகள் வழங்கி பாராட்டி கவுரவிக்கப்பட்டனர்.

விழாவில் கல்லூரி மாணவ - மாணவிகளின் பரதநாட்டியம், மேற்கத்திய நடனம், கிராமிய நடனம் உள்ளிட்ட கலை நிகழ்ச்சிகள் நடைபெற்றது.

மானாமதுரை

சிவகங்கை மாவட்டம் காரைக்குடி அழகப்பா பல்கலைக் கழகத்தில் நடந்த உறுப்பு கல்லூரிகளுக்கு இடையேயான தொழில்முனைவோர் மேம்பாட்டு கழக செயல்பாடுகள் குறித்த கருத்தரங்கில் இளையான்குடியில் உள்ள சாகிர் உசேன் கல்லூரி வணிகவியல்துறை உதவிப்பேராசிரியர் நாசருக்கு சிறந்த தொழில்முனைவோர் மேம்பாட்டு கழக ஒருங்கிணைப்பாளர் என்ற விருது கிடைத்தது.

கல்லூரி தொழில்முனைவோர் மேம்பாடு குறித்த நிகழ்வுகளை சிறப்பாக செய்தமைக்கான சிறந்த கல்லூரியாகவும் சாகிர் உசேன் கல்லூரி தேர்ந்து எடுக்கப்பட்டுள்ளது. அழகப்பா பல்கலைக்கழக துணைவேந்தர் ரவி விருது மற்றும் சான்றிதழை வழங்கி பாராட்டினார். விருது பெற்ற உதவி பேராசிரியர் நாசரை கல்லூரி ஆட்சிகுழு செயலாளர் ஜபருல்லான், ஆட்சிகுழு நிர்வாகிகள், முதல்வர் அப்பாஸ்மந்திரி ,அழகப்பா பல்கலைக்கழக தொழில்முனைவோர் மேம்பாட்டு கழக இயக்குநர் வேதிராஜன், கள ஒருங்கிணைப்பாளர் அருமைரூபன் மற்றும் பேராசிரியர்கள், அலுவலர்கள் பாராட்டினர்.

பெரம்பலூர்

திருநங்கைகளை சிறப்பிக்கும் வகையில் 2022-23-ம் ஆண்டுக்கான சிறந்த திருநங்கைக்கான விருது தமிழக முதல்-அமைச்சரால் வழங்கப்பட உள்ளது. இவ்விருது பெறும் சாதனையாளருக்கு ரூ.1 லட்சத்திற்கான காசோலை மற்றும் பாராட்டு சான்றிதழ் வழங்கப்படும். இந்த விருது பெற விரும்புபவர்கள் அரசு உதவி பெறாமல் தனது வாழ்க்கையை கட்டமைத்து கொண்ட திருநங்கையாக இருத்தல் வேண்டும். மேலும் திருநங்கைகள் நலனுக்காக சிறப்பாக சேவை புரிந்து இருக்க வேண்டும். குறைந்தபட்சம் 5 திருநங்கைகள் தங்களது வாழ்வாதார ஆதரவை பெறவும், கண்ணியமான வாழ்க்கையை நடத்தவும் உதவி செய்திருக்க வேண்டும். மேலும் விருதுக்கு விண்ணப்பிப்பவர் தமிழ்நாடு திருநங்கை நலவாரியத்தில் உறுப்பினராக இருத்தல் கூடாது. இந்த விருது பெற விரும்பும் பெரம்பலூர் மாவட்டத்தை சேர்ந்த தகுதியுடைய திருநங்கைகள் https://awards.tn.gov.in என்ற இணையதள முகவரியில் வருகிற 28-ந் தேதிக்குள் விண்ணப்பித்து விரிவான கருத்துருக்களை மாவட்ட சமூக நல அலுவலகத்தில் அன்றைய தினம் மாலை 5 மணிக்குள் சமர்ப்பிக்க வேண்டும். விருது பெற தகுதியுள்ளவர்கள் இதற்கான தமிழக அரசால் நியமிக்கப்பட்ட தேர்வு குழுவால் தேர்வு செய்யப்படுவர், என்று கலெக்டர் கற்பகம் தெரிவித்துள்ளார்.

பெரம்பலூர்:

பெரம்பலூர் மாவட்டத்தில் கொத்தடிமை தொழிலாளர் முறையை ஒழிப்பதில் சிறப்பாக செயல்பட்ட பெரம்பலூர் எஸ்பிக்கு விருது வழங்கப்பட்டுள்ளது. கொத்தடிமை தொழிலாளர்களை கண்டறிந்து மீட்டு அரசின் வழிகாட்டுதலின்படி அவர்களுக்கு பாதுகாப்பு அளித்தும், கொத்தடிமை ஒழிப்பு எப்படி உருவாகிறது என்பதை கண்டறிந்து அவற்றை முற்றிலும் ஒழிக்கும் வகையில் சிறப்பாக திட்டம் தீட்டி நடைமுறைப்படுத்தியும், குழந்தை தொழிலாள முறை உருவாக காரணமும், பாதுகாப்பும், அரவணைப்பும் இல்லாத குந்தைகளை தங்களது பிழைப்பிற்காக வேலையில் ஈடுப்படுத்தப்படும் .குழந்தைகளை மீட்டு அரசு பரிந்துரைத்த இடங்களில் தங்க வைத்தும், சாலை யோரத்தில் பாதுகாப்பின்றி முறையில் தங்கியிருக்கும் வெளி மாநிலத்தவர்களுக்கு பாதுகாப்பு கொடுத்தும் சிறப்பாகவும், தொழிலாளர் முறையை ஒழிப்பதில் சிறப்பாக செயல்பட்ட பெரம்பலூர் எஸ்.பி. ஷியாம்ளா தேவியை பாராட்டி சென்னையில் நடந்த அரசு விழாவில் தொழிலாளர் நலன் மற்றும் திறன் மேம்பாட்டு துறையின் சார்பில் அதன் முதன்மை செயலாளர் அதுல் ஆனந்த் விருது வழங்கி பாராட்டினார்.

அரியலூர்,

அரியலூர் மாவட்டத்தில் கல்வி மற்றும் கல்வி இணையச் செயல்பாடுகளில் சிறந்து விளங்கிய மாணவ,மாணவிகள் 30 பேருக்கு பெருந்தலைவர் காமராசர் விருது மற்றும் பரிசுத் தொகை வழங்கப்பட்டன. கலெக்டர் அலுவலகத்தில் நடைபெற்ற நிகழ்ச்சியில் கலந்து கொண்ட கலெக்டர் பெ.ரமணசரஸ்வதி, மாணவ, மாணவிகள் 30 பேருக்கு பெருந்தலைவர் காமராசர் விருதும், பரிசுத் தொகையும் வழங்கி பாராட்டினர். மாவட்ட வருவாய் அலுவலர் ம.ச.கலைவாணி, மாவட்ட முதன்மைக் கல்வி அலுவலர் விஜயலெட்சுமி, மாவட்ட ஆட்சியரின் நேர்முக உதவியாளர் பூங்கோதை மற்றும் பள்ளி ஆசிரியர்கள், பெற்றோர்கள், அரசு அலுவலர்கள் உள்ளிட்ட பலர் கலந்துகொண்டனர். நிகழ்வில், அரியலூர் மாவட்டத்தில் 2021-2022 ஆம் கல்வியாண்டில் அரசு மற்றும் அரசு உதவிபெறும் பள்ளிகளில் 10 மற்றும் 12 ஆம் வகுப்பு பொதுத் தேர்வில் தமிழ் வழியில் பயின்று தேர்ச்சி பெற்ற மாணவ, மாணவியர்களில் சிறந்த 30 மாணவ, மாணவியர்களை மாவட்ட அளவில் தேர்ந்தெடுத்து, அம்மாணவர்களுக்கு பாராட்டு சான்றிதழ்கள் வழங்கப்பட்டது. பாராட்டுச் சான்றிதழ் பெற்ற 10 ஆம் வகுப்பு மாணவர்களுக்கு ரூ.10,000 வீதம் 15 மாணவர்களுக்கும், 12 ஆம் வகுப்பு மாணவர்களுக்கு ரூ.20,000 வீதம் 15 மாணவர்களுக்கும் என மொத்த ரூ.4,50,000 ஊக்கத் தொகை வழங்கப்பட்டது.

சேலம்:

சமூக பொறுப்புடன் செயல்படும் தொழில், சேவை மற்றும் வர்த்தக நிறுவனங்களுக்கு 2022-ம் ஆண்டிற்கான விருது வழங்குதல்" தனியார், பொதுத்துறை, கூட்டுத் துறை நிறுவனங்களைச் சார்ந்த தொழில், சேவை, மற்றும் வர்த்தக நிறுவனங்கள் தங்களது சமூகப் பொறுப்பின் ஒரு பகுதியாக தமிழ்நாட்டில் பல்வேறு சமூகப் பொருளாதார மேம்பாட்டுப் பணிகளில் பாராட்டத்தக்க வகையில் ஈடுபடுவதை ஊக்குவித்து சிறப்பிக்கும் வகையில் விருது வழங்கப்படும் என தமிழக அரசால் அறிவிக்கப்பட்டுள்ளது.

இவ்விருதானது 2022-ம் ஆண்டிலிருந்து ஒவ்வொரு ஆண்டும் தகுதி வாய்ந்த நிறுவனங்களுக்கு வழங்கப்படும். ரூபாய் ஒரு லட்சம் பரிசுத் தொகையும், நற்சான்றிதழும் கொண்ட இவ்விருது ஒவ்வொரு வருடமும் மாவட்டத்திற்கு ஒரு விருது வீதம் 37 மாவட்டங்களிலும் சிறப்பாகப் பணிசெய்த தலைசிறந்த தொழில் மற்றும் சிறந்த வணிக நிறுவனங்களுக்கு வழங்கப்படும். பங்கு நிறுவனங்கள், கூட்டாண்மை நிறுவனங்கள் மற்றும் தனிநபர் நிறுவனங்கள், அரசு, அரசு சார்ந்த நிறுவனங்கள், தொழில், சேவை மற்றும் வர்த்தக நிறுவனங்களின் கட்டமைப்புகள் இவ்விருதினைப் பெற விண்ணப்பிக்கலாம். இந்நிறுவனங்கள் நேரடியாகவோ, தங்களின் அறக்கட்டளைகள், தொண்டு நிறுவனங்கள் மற்றும் தங்களது இதர முகமைகள் மூலமாகவோ செயலாற்றலாம். தனித்து வமான அறக்கட்டளைகள், தொண்டு நிறுவனங்கள் மற்றும் மன்றங்கள், சங்கங்கள் இவ்விருது பெற தகுதியற்றவை ஆகும்.

மேற்கண்ட நிறுவ னங்களால் ஊரகப் பகுதிகளில் சேலம் மாவட்டத்தில் மேற்கொள்ளப்பட்ட பணிகளே விருது வழங்கு வதற்கு அடிப்படையாக எடுத்துக்கொள்ளப்படும். விவசாயம், கால்நடை, கல்வி, பொதுச் சுகாதாரம், குடிநீர், மழைநீர் சேகரிப்பு, மரபு சாரா எரிசக்தி, வேளாண்பொருட்கள் சந்தைப்படுத்துதல், சுய உதவிக்குழுக்கள் மற்றும் வாழ்வாதார மேம்பாடு, பெண்கள், குழந்தைகள்,இளைஞர் நலன், மரக்கன்றுகள் நடுதல் ஆகிய சேவைகளில் சிறப்பாக பங்கேற்கும் நிறுவனங்கள் விருதுக்கு பரிசீலிக்கப்படும். மேலும், பல்வேறு சமூக நல மேம்பாட்டுப் பணிகளும் விருது வழங்குவதற்கு பரிசீலிக்கப்படும். நிறுவனங்களின் கடந்த ஒரு நிதி ஆண்டின் செயல்பாடுகள் கணக்கில் எடுத்துக்கொள்ளப்படும்.

இவ்விருதுக்கு தேவையான விண்ணப்பம் www.tnrd.tn.gov.in. என்ற இணைய தளத்தில் பதிவேற்றம் செய்ய இவ்விண்ணப்பம் இன்று முதல் இணையதளத்தில் செயல்பாட்டு நிலையில் இருக்கும். எனவே, தகுதிவாய்ந்த நிறுவனங்கள் தங்கள் விண்ணப்பங்களை இணையதள வழி மட்டுமே தகுந்த ஆவணங்களுடன் இணையதளத்தில் அறிவிப்பு வெளியிடப்பபட்ட 45 தினங்களுக்குள் சமர்ப்பிக்கப்பட வேண்டும் என்று கலெக்டர் கார்மேகம் தெரிவித்து உள்ளார்.