நீங்கள் தேடியது "பொதுமக்கள் முற்றுகை"

திருச்செங்கோடு:

திருச்செங்கோடு அடுத்த பிரிதி கிராமம் இளையாம்பாளையத்தில் தனியாருக்கு சொந்தமான 14 ஏக்கர் நிலத்தில் எடப்பாடியைச் சேர்ந்த கல் குவாரி கம்பெனியினர் கடந்த ஒரு மாத காலமாக அங்குள்ள கற்களை வெடிகள் வைத்தும் கெமிக்கல் பயன்படுத்தியும் எடுத்து வந்ததாக தெரிகிறது.

இதை அறிந்த அப்பகுதி மக்கள் 200-க்கும் மேற்பட்டோர் இன்று பா.ஜ.க தெற்கு ஒன்றிய தலைவர் சசி தேவி, தலைமையில் ஓ.பி.சி பிரிவு மாவட்ட தலைவர் ரமேஷ், ஊடக பிரிவு மாவட்ட துணைத் தலைவர் பூபதி, பா.ஜ.க மாவட்ட துணைத் தலைவர் மகேஸ்வரன், புளியம்பட்டி ஊராட்சி முன்னாள் தலைவர் செல்லகுமார் மற்றும் அ.தி.மு.கவை சேர்ந்த மொளசி ஊராட்சி முன்னாள் தலைவர் வெள்ளி மணி, தெற்கு ஒன்றிய மகளிர் அணி ஈஸ்வரி மற்றும் கூட்டுறவு சங்க தலைவர் ராஜவேல், வரதராஜன் உள்ளிட்டோர் குவாரியை முற்றுகை யிட்டனர். ஆனால் அங்கு டிப்பர் லாரி, கல்லுடைக்கும் எந்திரங்கள் என்று எதுவும் இல்லாமல் 300 மீட்டர் அளவிற்கு நிலம் தோண்டப்பட்டு கற்கள் உடைக்கப்பட்டிருந்தது.

இது குறித்து பொதுமக்கள் கூறியதாவது-

குவாரியில் வெடி வைப்பதால் அருகில் உள்ள வீடுகளில் விரி சல் ஏற்படுகிறது. கெமிக்கல் பயன்படுத்தி கிரானைட் கற்கள் எடுப்பதால் சுற்றியுள்ள கிராமங்களில் நிலத்தடி நீர் மாசுபடுவதோடு விவசாய நிலங்களுக்கு நீர் இல்லாமல் பயிர்கள் வாடி விடுகிறது. இதே போல 10 கிலோமீட்டர் அருகிலுள்ள சித்தம் பூண்டி கிராமத்தில் குவாரிகள் அமைத்து அங்கு நிலத்தடி நீர்மட்டம் குறைந்து கிராம மக்கள் நீர் இன்றி தவித்து வருகின்றனர். அங்கு விவசாய நிலங்கள் பாழடைந்து விட்டது. விவசாய வளம் நிறைந்த இந்த கிராமப் பகுதியில் ஆயிரத்துக்கும் மேற்பட்டவர்கள் வசித்து வருவதால் இந்த பகுதியில் குவாரி அமைக்க தடை கோரி பலமுறை மாவட்ட கலெக்டரிடமும், வட்டாட்சியரிடம் மனுக்கள் கொடுத்தும் எந்த நடவடிக்கையும் இல்லை. கல் குவாரிகள் மீது தமிழக அரசு நடவடிக்கை எடுக்க வேண்டும். இவ்வாறு அவர்கள் கூறினர். இந்த முற்றுகை போராட்டத்தால் பரபரப்பான சூழல் காணப்பட்டது.

ஆண்டிப்பட்டி:

ஆண்டிப்பட்டி அருகே கே.காமாட்சிபுரத்தில் 200-க்கும் மேற்பட்ட குடும்பத்தினர் வசித்து வருகிறார்கள். இவர்களுக்கு குன்னூர் கூட்டுக்குடிநீர் திட்டம், ஆழ்குழாய் கிணறு அமைத்து குடி நீர் வினியோகம் செய்யப்படுகிறது.

கடந்த 1 ஆண்டாக குடிநீர் முறையாக சப்ளை செய்யப்படவில்லை. இதனால் குழந்தைகளுடன் பொதுமக்கள் சிரமம் அடைந்து வருகின்றனர். இதுகுறித்து புகார் அளித்தும் எந்த நடவடிக்கையும் இல்லை.

ஆத்திரம் அடைந்த பொதுமக்கள் காலி குடங்களுடன் ஆண்டிப்பட்டி யூனியன் அலுவலகத்தை முற்றுகையிட்டு போராட்டம் செய்தனர். இதனை அறிந்த அதிகாரிகள் பொதுமக்களிடம் சமரசபேச்சு வார்த்தை நடத்தினர். குடிநீர் வினியோகம் சீராக வழங்கப்படும் என உறுதி அளித்ததால் அவர்கள் கலைந்து சென்றனர்.

இதுகுறித்து பொதுமக்கள் கூறுகையில் நாளை குடிநீர் வினியோகம் செய்யப்படவில்லை என்றால் பாராளுமன்ற தேர்லை புறக்கணிக்கப்போவதாக தெரிவித்தனர்.

குடியாத்தம்:

குடியாத்தம் அடுத்த பட்டு கிராமத்தையொட்டி உள்ள பாலாற்றில் பொதுப்பணித்துறை மற்றும் நீர்வள ஆதாரத்துறை மூலம் மாட்டு வண்டிகளில் மட்டும் மணல் எடுக்க மணல் குவாரி அமைக்கப்பட்டது.

இங்கு உள்ளூர் மட்டுமின்றி வெகு தூரத்தில் இருந்தும் மாட்டுவண்டிகள் வர தொடங்கின. அதிகாலை முதல் நள்ளிரவு வரை தினமும் 2 ஆயிரத்திற்கும் மேற்பட்ட மாட்டு வண்டிகளில் மணல் அள்ளி செல்கின்றனர்.

இதனால் பாலாறு சுரண்டப்பட்டு நிலத்தடி நீர் கடுமையாக பாதிக்கப்படுவ தோடு விவசாயம் முற்றிலும் நாசமாகிறது.

சுடுகாட்டை அழித்தும் மணல் சுரண்டப் பட்டுவிட்டது. இதற்கு எதிர்ப்பு தெரிவித்து மணல் குவாரியை உடனடியாக மூட வேண்டும் என்று அப்பகுதி பொதுமக்கள் கடந்த அக்டோபர் மாதம் மாட்டு வண்டிகளை சிறை பிடித்து ஆர்ப்பாட்டம் செய்தனர்.

அப்போது அதிகாரிகள் மணல்குவாரியை மூட நடவடடிக்கை எடுப்பதாக உறுதியளித்திருந்தனர்.

இந்நிலையில் இதுவரையும் எந்தவித நடவடிக்கையும் எடுக்காததால் ஆத்திர மடைந்த கிராமமக்கள் 100-க்கும் மேற்பட்டோர் இன்று காலை மீண்டும் பாலாற்றில் குவிந்து மணல் குவாரியை முற்றுகையிட்டு மணலை ஆள்ளவிடாமல் போராட்டம் செய்தனர்.

இதனால் அங்கு பரபரப்பு ஏற்பட்டது.

கடலூர்:

கடலூர் திருவந்திபுரத்தை சேர்ந்தவர் தயாளன் (வயது 36), கட்டிட தொழிலாளி. பில்லாளி தொட்டியை சேர்ந்தவர் கிருஷ்ணன் (45), எலக்ட்ரிசியன். இவர்கள் 2 பேரும் இன்று திருவந்திபுரத்தில் இருந்து புதுவைக்கு ஒரே மோட்டார் சைக்கிளில் சென்றனர்.

புதுவையில் உள்ள மதுக்கடையில் 2 பேரும் மது வாங்கி குடித்தனர். பின்னர் அவர்கள் மோட்டார் சைக்கிளில் புதுவையில் இருந்து திருவந்திபுரத்துக்கு புறப்பட்டனர். அவர்கள் கடலூர் நெல்லிக்குப்பத்தை அடுத்த மருதாடு பகுதியில் உள்ள சோதனை சாவடி அருகே வந்து கொண்டிருந்தனர்.

அந்த சோதனை சாவடியின் குறுக்கே தடுப்பு கட்டை வைக்கப்பட்டிருந்தது. இதை கண்டித்து கிருஷ்ணனும், தயாளனும் சத்தம்போட்டபடி மோட்டார் சைக்கிளில் சென்றனர். அப்போது அங்கு பணியில் ஈடுபட்டிருந்த போலீஸ் காரர் செல்வம் மோட்டார் சைக்கிளில் சென்ற தயாளனை தாக்கினார். இதில் அவர் மோட்டார் சைக்கிளில் இருந்து மயங்கி கீழே விழுந்தார். இதில் அவருக்கு காயம் ஏற்பட்டது.

இதைத்தொடர்ந்து கிருஷ்ணன் மற்றும் அந்த பகுதி பொதுமக்களும் போலீஸ்காரர் செல்வத்தை முற்றுகையிட்டு வாக்கு வாதத்தில் ஈடுபட்டனர். அதன்பின்னர் காயமடைந்த தயாளனை மீட்டு சிகிச்சைக்காக கடலூர் அரசு ஆஸ்பத்திரிக்கு கொண்டு சென்றனர். அங்கு அவருக்கு சிகிச்சை அளிக்கப்படுகிறது.

இது குறித்து தகவல் அறிந்த போலீசார் கடலூர் அரசு ஆஸ்பத்திரிக்கு சென்று காயமடைந்த தயாளனிடம் விசாரணை நடத்தினர். அப்போது அவர் மதுவிலக்கு சோதனை சாவடியில் பணியில் ஈடுபட்டிருந்த போலீஸ்காரர் செல்வம் குடிபோதையில் இருந்ததாகவும், அதனால் தன்னை தாக்கியதாகவும் கூறினார்.

இதைத்தொடர்ந்து கடலூர் துணைபோலீஸ் சூப்பிரண்டு லாமேக், பண்ருட்டி மதுவிலக்கு போலீஸ் இன்ஸ்பெக்டர் வள்ளி தலைமையிலான போலீசார் சம்பவ இடத்துக்கு விரைந்து சென்று விசாரணை நடத்தி வருகின்றனர்.