நீங்கள் தேடியது "slug 106977"

மன்னார்குடி:

திருவாரூர் மாவட்டம் மன்னார்குடி பகுதியான பேரையூர், கருவாக்குறிச்சி, காஞ்சி குடிக்காடு, மேலவாசல், காரிகோட்டை, நெடுவாக்கோட்டை உள்ளிட்ட கிராமங்களில் பொங்கல் பண்டிகைக்காக கரும்பு பயிடப்பட்டிருந்தது.

கடந்த அ.தி.மு.க. ஆட்சி காலத்தில் பொங்கல் பரிசு தொகுப்பு திட்டத்தில் குடும்ப அட்டைதாரர்களுக்கு பச்சரிசி, வெள்ளம்,முழு கரும்பு ஒன்றும் வழங்கப்பட்டது.

இதனை தொடர்ந்து தி.மு.க. ஆட்சியிலும் கடந்த ஆண்டும் பொங்கல் கரும்பு வழங்கப்பட்டது. இதனால் மன்னார்குடி சுற்றுவட்டார பகுதிகளில் சுமார் 300 ஏக்கர் பரப்பளவில் விவசாயிகள் பலரும் நெல்லுக்கு மாற்று பயிராக பொங்கல் கரும்பை பயிரிட்டனர்.

ஆனால் இந்த ஆண்டு பொங்கல் பண்டிகைக்கு தமிழக அரசு கரும்பு கொள்முதல் செய்வது பற்றி எந்த அறிவிப்பும் வெளியிடவில்லை.

இந்நிலையில் பொங்கல் பரிசு தொகுப்பு வழங்க தமிழக அரசு கரும்புகளை கொள்முதல் செய்ய வேண்டும் என வலியுறுத்தி மன்னார்குடி காலவாய் கரை பகுதியில் தஞ்சை - மன்னார்குடி சாலையில் விவசாயிகள் சாலை மறியல் போராட்டம் நடத்தினர்.

இதனால் மன்னார்குடி- தஞ்சை சாலையில் ஒருமணி நேரம் போக்குவரத்து பாதிக்கப்பட்டது. மன்னார்குடி போலீசார் பேச்சு வார்த்தையடுத்து விவசாயிகள் மறியலை கைவிட்டு கலைந்து சென்றனர்.

திருச்செங்கோடு:

திருச்செங்கோடு நகராட்சி தொண்டிக்கரடு முனியப்பன் கோவில் குப்பண்ணன் காடு பகுதியில் இருந்து கடந்த 50 வருடங்களாக தீர்க்கப்படாமல் இருந்த மழைநீர் ரோட்டில் தேங்கும் பிரச்சினைக்குதீர்வு காண சீத்தாராம் பாளையத்தில் இருந்து சுமார் 1.5 கிமீ தூரத்திற்கு ரூபாய் ஒருகோடி மதிப்பில் மழைநீர் கால்வாய் அமைக்க திட்டவரைவு தயாரிக்கப்பட்டு சூரியம்பாளையம் பகுதி வழியாக அதனை கொண்டு செல்ல ஏற்பாடுகள் செய்து நமக்குநாமே திட்டத்தில்ரூ.33 லட்சம் பொதுமக்கள் பங்களிப்பாக நகராட்சியில் செலுத்தப்பட்டது.

இதற்கான பூர்வாங்க ஏற்பாடுகள் நடந்து வந்த நிலையில் இதனை அறிந்த சூரியம் பாளையம்பகுதி பொதுமக்கள் இந்த கால்வாய் அமைவதனால் 4 வார்டுகளில் இருந்த மழைநீர் மற்றும் கழிவு நீர் தங்களது பகுதி வழியாக செல்லும் எனவும் அவ்வாறு செல்வதால் தங்களது குடிநீர் ஆதாரங்கள் பாதிக்கப்பட்டு சுகாதார சீர்கேடு ஏற்படும் எனவும் தங்களது பகுதியாக வழியாக கொண்டு செல்லக் கூடாது என நகராட்சி நிர்வாகத்தை வலியுறுத்தி இன்று திடீர் சாலை மறியிலில் ஈடுபட்டனர்.

திருச்செங்கோடு தேவானங்குறிச்சி சாலையில் நடந்த இந்த மறியலில் 200-க்கும் மேற்பட்டவர்கள் கலந்து கொண்டனர். இது குறித்து தகவல் அறிந்து வந்த போலீஸ் டிஎஸ்பி பொறுப்பு பழனிசாமி, நகர காவல் ஆய்வாளர் செந்தில் குமார், நகராட்சி ஆணையாளர் கணேசன், பொறியாளர் சண்முகம், மேலாளர் குமரேசன் ஆகியோர் பொது மக்களிடம் பேச்சு வார்த்தை நடத்தினார்கள் . உரிய நடவடிக்கை எடுப்பதாக உறுதி அளித்ததன் பேரில் சுமார் ஒருமணி நேரம் நடந்த சாலைமறியல் போராட்டம் கைவிடப்பட்டது. இந்த போராட்டத்தால் சூரியம் பாளையம் பகுதியில் பரபரப்பு ஏற்பட்டது.

புதுக்கோட்டை

கறம்பக்குடி அருகே முள்ளங்குறிச்சி ஊராட்சியை சேர்ந்த கோட்டைக்காடு கிராமம் உள்ளது. இங்குள்ள வடக்கு தெருவில் 70-க்கும் மேற்பட்ட குடும்பத்தினர் வசித்து வருகின்றனர். இவர்களின் குடிநீர் தேவைக்கு 30 ஆயிரம் லிட்டர் கொள்ளளவு கொண்ட மேல்நிலை நீர்தேக்க தொட்டி உள்ளது. இதன்மூலம் அப்பகுதியில் உள்ள அனைத்து வீடுகளுக்கும் குடிநீர் வினியோகம் செய்யப்பட்டு வந்தது.

இந்தநிலையில் கடந்த 4 மாதங்களுக்கு முன்பு வடக்கு தெருவிற்கு குடிநீர் செல்லும் குழாய்களில் உடைப்பு ஏற்பட்டது. மேலும் அப்பகுதியில் பதிக்கப்பட்டிருந்த குழாய்கள் 200 மீட்டர் நீளத்திற்கு நொறுங்கி சேதமாகி இருந்தன. இதனால் அப்பகுதி மக்களுக்கு குடிநீர் வினியோகம் தடைப்பட்டது.

இதையடுத்து, குழாய்களை சீரமைத்து குடிநீர் வழங்க வேண்டும் என அப்பகுதி மக்கள் ஊராட்சி நிர்வாகத்திடம் பலமுறை புகார் செய்தும் இதுவரை எந்தவித நடவடிக்கையும் எடுக்கவில்லை என கூறப்படுகிறது. இதனால் அதிருப்தி அடைந்த அப்பகுதி மக்கள் கோட்டைக்காட்டில் கறம்பக்குடி- ஆலங்குடி சாலையில் காலிக்குடங்களுடன் அமர்ந்து மறியலில் ஈடுபட்டனர். இதனால் அப்பகுதியில் வாகனங்கள் செல்ல முடியாமல் அணிவகுத்து நின்றன. இதுகுறித்து தகவல் அறிந்த கறம்பக்குடி வட்டார வளர்ச்சி அலுவலர் கருணாகரன், துணை வட்டார வளர்ச்சி அலுவலர் கணேசன் மற்றும் போலீசார் சம்பவ இடத்திற்கு விரைந்து சென்று சாலை மறியலில் ஈடுபட்டவர்களிடம் பேச்சுவார்த்தை நடத்தினர். அப்போது சேதமடைந்த குழாய்களை புதுப்பித்து குடிநீர் வழங்க நடவடிக்கை எடுப்பதாக உறுதி அளித்தனர். இதில் சமாதானம் அடைந்த அவர்கள் மறியலை கைவிட்டு அங்கிருந்து கலைந்து சென்றனர். இந்த சம்பவத்தால் அப்பகுதியில் 2 மணி நேரம் போக்குவரத்து பாதிக்கப்பட்டது.

மதுரை

மதுரை மண்டலத்தில் 20-க்கும் மேற்பட்ட நேரடி நெல் கொள்முதல் நிலையங்கள் இயங்கி வருகின்றன. இங்கு பருவகால பணியாளர்களை நியமிக்க நுகர்பொருள் வாணிபக் கழகம் முடிவு செய்தது. இதற்கான அறிவிப்பு வெளியிடப்பட்டது. இதில் 100-க்கும் மேற்பட்டோர் விண்ணப்பித்திருந்தனர்.

விண்ணப்பித்த அனைவருக்கும் நேர்கா ணல் கடிதம் அனுப்பி வைக்கப்பட்டது. அதில் தற்காலிக பருவகால உதவு பவர் பணியிடங்களுக்கு 16ந் தேதி (இன்று) காலை 10 மணி அளவில் நேர்காணல் நடக்கிறது.

விண்ணப்பதாரர்கள் மாற்றுச் சான்றிதழ், சாதி சான்றிதழ், பாஸ்போர்ட் புகைப்படம், ஆதார் அடையாள அட்டை, இருப்பிட சான்றுகளுடன் நேர்காணலுக்கு வர வேண்டும். இதில் கலந்து கொள்வதற்கு பயணப்படி வழங்கப்படமாட்டாது. நேர்காணலுக்கான நாளில் மட்டுமே கலந்து கொள்ள வேண்டும். மற்ற நாட்களில் அனுமதிக்க இயலாது என்று குறிப்பிடப்பட்டு இருந்தது.

இதையடுத்து 50-க்கும் மேற்பட்டோர் குருவிக்காரன் சாலையில் உள்ள நுகர்பொ ருள் வாணிபக் கழக அலுவலகத்துக்கு காலையிலேயே வந்து விட்டனர்.

பணியாளர் தேர்வுக்கான நேர்காணல் திடீரென ரத்து செய்யப்பட்டது. இதனை கண்டித்து

50-க்கும் மேற்பட்டோர் குருவிக்காரன் சாலையில் அமர்ந்து திடீர் மறியலில் ஈடுபட்டனர்.

தகவலறிந்த அதிகாரிகள் சம்பவ இடத்துக்கு வந்து பேச்சுவார்த்தை நடத்தினர். அதன் பிறகு மறியலில் ஈடுபட்டவர்கள் கலைந்து சென்றனர்.

விழுப்பபுரம்:

செஞ்சி அருகே உள்ள வல்லம் ஒன்றிய அ.தி.மு.க. சார்பில் தி.மு.க. அரசை கண்டித்து கண்டன ஆர்ப்பாட்டம் இன்று நடைபெறுவதாக இருந்தது. இதற்காக சுமார் 500-க்கும் மேற்பட்ட அ.தி.மு.க.வினர் நாட்டா மங்கலம் கூட்டு ரோட்டில திரண் டனர். அங்கு ஆர்ப்பாட்டத்திற்காக மேடை அமைக்கப்பட்டு இருந்தது. அதில் அ.தி.மு.க.பிரமுகர்கள் பேசிக்கொண்டு இருந்தனர் .அப்போது நாட்டாமங்கலம் கூட்டு ரோட்டிற்கு வந்த தி.மு.க.வினர் உதயநிதி ஸ்டாலின் அமைச்சராக பொறுப்பேற்று கொண்டதற்கு இனிப்பு வழங்க முற்பட்டனர்.

அவர்கள் அ.தி.மு.க.வினர்ஆர்ப்பாட்டம் செய்ய இருந்த இடத்தில் பட்டாசு வெடித்ததுடன் அவர்கள் ஆர்ப்பாட்டம் செய்ய இருந்த இடத்தை கடந்து சென்று பஸ் நிலையத்தில் இனிப்பு வழங்கினர். இதனால் அங்கு பதட்டமான சூழ்நிலை ஏற்பட்டது. இரு தரப்பினரும் மோதிக் கொள்ளும் சூழ்நிலை உருவானது. நாங்கள் ஏற்கனவே அனுமதி பெற்று ஆர்ப்பா ட்டம் செய்யும் இடத்தில் தி.மு.க.வினருக்கு எப்படி அனுமதி வழங்கலாம் என போலீசாரை கண்டித்து அ.தி.மு.க.வினர் சாலையில் உட்கார்ந்து மறியலில் ஈடுபட்டனர். இதனால் போக்குவரத்து பாதிக்கப்பட்டது . இந்த சம்பவத்தால் அங்கு பரபரப்பு ஏற்பட்டது.

சூளகிரி,

கிருஷ்ணகிரி மாவட்டம் சூளகிரி அருகே சாமல் பள்ளம் சாமல்பள்ளம் அருகே புளியரசியை சேர்ந்தவர் சத்தியராஜ் (வயது 26). இவரது மனைவி சக்தி(23). திருணமாகி 7 மாதம் ஆகிறது. ஒடையனுர் எனுமிடத்தில் அண்ணனுடன் தாபா ஓட்டல் நடத்தி வருகின்றனர்.

தனது தாய் காசியம்மா வுடன் சத்தியராஜ் இரு சக்கர வாகனத்தில் தனது வீட்டிற்கு செல்ல கிருஷ்ணகிரி- ஓசூர் தேசிய நெடுஞ்சாலையை கடக்க முயன்றபோது கிருஷ்ணகிரியில் இருந்து ஓசூருக்கு வந்த லாரி இவர்கள் மீது மோதியதில் தாய் உயிர் தப்பினார்.

சத்தியராஜ் தலை நசுங்கி பலியானார். இதை அறிந்த ஊர் பொதுமக்கள் இறந்தவர் உடலை சாலையில் வைத்து மறியல் செய்தனர். இதனால் 2 மணி நேரம் போக்குவரத்து பாதித்தது.

இதை அறிந்த எஸ்.பி. சரோஜ்குமார் தாகூர்,மற்றும் போலீசார் அங்கு வந்து பேச்சுவார்த்தை நடத்தி இறந்தவர் உடலை ஒசூர் அரசு மருத்துமனைக்கு பிரேத பரிசோதனைக்கு அனுப்பி வைத்தனர்.

இந்த பகுதியின் அருகே அரசு மேல்நிலை பள்ளி உள்ளது. மாணவர்கள் அடிக்கடி விபத்தில் சிக்கி வருகின்றனர். இப்பகுதியில் மேம்பாலம் அமைக்க பல ஆண்டுகளாக அப்பகுதி மக்கள் கோரிக்கை விடுத்து வருகின்றனர். அதிகாரிகள் இப்பகுதியில் உடனே மேம்பாலம் அமைக்க நடவடிக்கை எடுக்க வேண்டும்.

கன்னியாகுமரி:

குமரி மாவட்டம் பேச்சிப்பாறை அணை அருகே சீரோ பாயின்ட் சந்திப்பிலிருந்து கோதையாறு கீழ் தங்கல் செல்லும் சாலை 15 கி.மீ. தூரம் கொண்டதாகும். இந்த சாலையை 17 மலை வாழ் காணியின பழங்குடி குடியிருப்பு மக்கள் பயன்படுத்தி வருகின்றனர். இச்சாலையை சீரமைக்க வலியுறுத்தி பொதுமக்கள் சார்பில் நேற்று காலையில் மோதிரமலை சந்திப்பில் மறியல் போராட்டம் நடைபெற்றது.

போராட்டத்தில் பழங்குடி மக்கள், பள்ளி மாணவ-மாணவியர்கள் என 500-க்கும் மேற்பட்டோர் கலந்து கொண்டனர். போராட்டத்தின் போது அந்த வழி யாக வந்த 5 அரசு பஸ்கள் சிறைபிடிக்கப் பட்டன.

இந்நிலையில் போராட்டம் நடைபெற்ற இடத்தில் பாதுகாப்பிற்காக வந்த குலசேகரம் போலீஸ் நிலைய இன்ஸ்பெக்டர் பாலமுருகன் போராட்டம் நடத்தியவர்களிடம் பேச்சு வார்த்தை நடத்தினார்.

இந்நிலையில் இன்ஸ்பெக்டர் மாவட்ட கலெக்டருடன் செல்போன் வழியாக பிரச்சினை குறித்து பேசினார். இதன் பின்னர் இப்பிரச்சனை குறித்து 10 பேர் கொண்டு குழு அமைக்கப்பட்டு, அதிகாரிகளை சந்தித்து 10 நாள்களில் தீர்வு காண நடவடிக்கை எடுக்கப்படும் என இன்ஸ்பெக்டர் உறுதி அளித்ததை தொடர்ந்து பிற்பகல் போராட்டம் முடிவுக்கு வந்தது. இதன் காரணமாக 6 மணி நேரம் அப்பகுதியில் போக்குவரத்து பாதிக்கப்பட்டது.

இந்த போராட்டத்திற்கு தலைமை தாங்கிய ரெகுகாணி உட்பட 190 பேர் மீது அரசு பஸ்களை சிறைபிடித்தது, அனுமதி இல்லாமல் போராட்டம் நடத்தியது போன்ற பிரிவுகளில் வழக்குபதிவு செய்யப்பட்டது.

கடலூர்:

தமிழ்நாடு அரசுப் பணியாளர் சங்கத்தின் சிறப்பு தலைவர் கு.பாலசுப்பிரமணியன் வெளியிட்டுள்ள அறிக்கையில் கூறியிருப்பதாவது. தமிழ்நாடு அரசுப் பணியாளர் சங்கத்தின் சார்பில், பழைய ஒய்வூதியத்திட்டத்தை அமல்படுத்த வேண்டுமென்ற 10 அம்ச கோரிக்கைகளை வலியுறுத்தி வரும் 9-ந் தேதியன்று, சென்னை, திருச்சி, சேலம், கடலூர், மதுரை ஆகிய இடங்களில் மறியல் நடைபெறும் என்று அறிவிக்கப்பட்டு இருந்தது.

தற்போது தமிழகத்திற்கு புயல் எச்சரிக்கை விடுக்கப்பட்டுள்ளது. இதனால் மிக அதி கனமழை பெய்யுமென வானிலை ஆய்வு மையம் எச்சரித்துள்ளது. ஆகவே, நாளை நடக்க இருந்த மறியல் போராட்டம் தள்ளி வைக்கப்படுகிறது. அதன்படி வரும் 14-ந் தேதி சென்னை, திருச்சி, சேலம், கடலூர் மதுரை ஆகிய இடங்களில்மறியல் போராட்டம் நடக்கும். இவ்வாறு அறிக்கையில் உள்ளது.

சீர்காழி:

சீர்காழி அருகே கதிராமங்கலம் முதல் மயிலாடுதுறை வரை சாலையை அகலப்படுத்தும் பணி நடந்து வருகிறது.

இதையொட்டி சாலையின் இரு புறங்களிலும் மழைநீர் வடிகால் அமைக்கப்பட்டு வருகிறது. இந்த பணியால் சாலை ஓரம் உள்ள குடியிருப்புகள் பாதிக்கப்படுவதாக கூறி பொதுமக்கள் மயிலாடுதுறை சாலை திருநன்றியூர் மாரியம்மன் கோவில் அருகே சாலை மறியலில் ஈடுபட்டனர்.

இந்த போராட்டத்துக்கு பா.ம.க. மாவட்ட செயலாளர் சித்தமல்லி பழனிசாமி தலைமை தாங்கினார்.

அப்போது குடியிருப்பு வாசிகளுக்கு இடையூறாக அமைக்கப்பட்டு வரும் மழைநீர் வடிகால் அமைக்க எதிர்ப்பு தெரிவித்தும், அமைக்கப்பட்ட வடிகாலை அப்புறப்படுத்தக்கோரியும் கோஷங்கள் எழுப்பப்பட்டன.

இதுகுறித்து தகவல் அறிந்த சீர்காழி போலீஸ் இன்ஸ்பெக்டர் புயல் பாலச்சந்திரன் மற்றும் நெடுஞ்சாலைத்துறை அதிகாரிகள் அங்கு சென்று போராட்டத்தில் ஈடுபட்டவர்களிடம் பேச்சுவார்த்தை நடத்தினர். இதையடுத்து சாலை மறியல் கைவிடப்பட்டது.

இந்த போராட்டத்தால் சீர்காழி- மயிலாடுதுறை சாலையில் அரை மணிநேரம் போக்குவரத்து பாதிக்கப்பட்டது.

மதுக்கூர்:

தஞ்சை மாவட்டம், பட்டுக்கோட்டை தாலுகா, மதுக்கூர் அருகே உள்ள சிராங்குடி கிராமத்தில் உள்ள பழைய பயணிகள் நிழற்குடை ஒன்று சேதமானதை அடுத்து அதே இடத்தில் புதிதாக பயணியர் நிழற்குடை அமைப்பதற்காக ஒப்பந்தம் விடப்பட்டு அதற்காக ரூ.8 லட்சம் நிதி ஒதுக்கப்பட்டது.

இந்த நிலையில் அதே ஊரைச் சேர்ந்த தனி நபர் ஒருவர் அந்த இடத்தில் நிழற்குடை அமைக்க கூடாது என நீதிமன்றத்தில் வழக்கு தொடர்ந்ததை அடுத்து ஊராட்சி ஒன்றிய ஆணையர் அந்த ஒப்பந்தத்தை ரத்து செய்து நிதியை திருப்பி அனுப்பியதாக கூறப்படுகிறது. இதனை தொடர்ந்து சிரங்குடி கிராம மக்கள் 100-க்கும் மேற்பட்டோர் சிராங்குடி மெயின் ரோட்டில் சாலை மறியலில் ஈடுபட்டனர்.

இது பற்றி தகவல் அறிந்ததும் பட்டுக்கோட்டை போலீஸ் துணை சூப்பிரண்டு பிரதீப் ராஜ் சவுக்கான், அ.தி.மு.க. கிழக்கு ஒன்றிய செயலாளர் துரை.செந்தில், தி.மு.க. கிழக்கு ஒன்றிய செயலாளர் இளங்கோ ஆகியோர் சம்பவ இடத்திற்கு சென்று சாலை மறியலில் ஈடுபட்டவர்களுடன் பேச்சு வார்த்தை நடத்தினர். இதில் உடன்பாடு ஏற்பட்டதை தொடர்ந்து அவர்கள் சாலை மறியலை கைவிட்டு கலைந்து சென்றனர்.

இந்த சாலை மறியலால் பட்டுக்கோட்டை- மன்னார்குடி போக்குவரத்து ஒரு மணி நேரம் பாதிக்கப்பட்டது.

சிவகங்கை

சிவகங்கை அருகே உள்ள உடைகுளம் கிராமத்தில் தனியாருக்கு சொந்தமான மது மூலப்பொருள் தயாரிக்கும் தொழிற்சாலை செயல்பட்டு வருகிறது. இந்த ஆலைக்கு பின்புறம் உடைகுளம் கிராமத்திற்கு சொந்தமான 160 ஏக்கர் விவசாய நிலமும், அதற்கு நீர்வள ஆதாரமாக திகழும் கண்மாயும் உள்ளது.

மது ஆலையில் இருந்து வெளியேறும் கழிவு நீரை அந்த கண்மாய்க்குள் திறந்து விடுகின்றனர். இதனால் கண்மாய் நீரின் தன்மை மாறுவதுடன் நிலத்தடி நீரும் மாசு பட்டு உபயோகிக்க முடியாத நிலை ஏற்பட்டுள்ளது.

மேலும் பல ஆண்டுகளாக விவசாயமும் கடுமையாக பாதிக்கப்பட்டுள்ளது. கால்நடைகள் இந்த நீரை அருந்தினால் இறந்துவிடுவதால் மேய்ச்சலுக்காக அழைத்து செல்ல முடியாத நிலை யும் ஏற்பட்டுள்ளது. இந்த மது ஆலைக்கு வரும் கனரக வாகனங்களால் இந்த பகுதியில் அமைக்கப்பட்டுள்ள சாலைகள் பழுதாகி வாகனங்கள் செல்ல முடியாத நிலை ஏற்பட்டுள்ளது. இது குறித்து கிராம மக்கள் ஆலை நிர்வாகத்திடம் முறையிட்டும் எந்த நடவடிக்கையும் எடுக்கவில்லை.இதனால் ஆத்திரம் அடைந்த கிராமமக்கள் நேற்று கனரக வாகனங்களை சிறைபிடித்து சாலை மறியல் போராட்டத்தில் ஈடுபட்டனர். தகவல் அறிந்து சம்பவ இடத்திற்கு வந்த காளையார்கோவில் தாசில்தார் கிராம மக்களை சமாதானம் செய்ததுடன், ஆலையில் இருந்து வெளியேற்றப்படும் கழிவுநீரையும் பார்வையிட்டு ஆய்வு செய்தனர்.

மது ஆலை அதிகாரி களிடம் விசாரணை நடத்திய தாசில்தார் இதுகுறித்து நடவடிக்கை எடுப்பதாக உறுதியளித்தார். இதை தொடர்ந்து மறியலில் ஈடுபட்ட கிராம மக்கள் கலைந்து சென்றனர்.

திருச்சி:

திருச்சி வரகனேரி அந்தோணியார் கோவில் தெருவை சேர்ந்தவர் ஆரோக்கியராஜ். இவரது மனைவி ஜெர்மன் மேரி. இவர்களது மகள் பிலோசியா மேரி. இவர் திருச்சியில் உள்ள ஒரு பள்ளியில் 7-ம் வகுப்பு படித்து வருகிறார். சம்பவதன்று பிலோசியா மேரிக்கு மெட்ராஸ் ஐ காரணமாக 2 நாட்கள் பள்ளிக்குச் செல்லவில்லை. இதனை தொடர்ந்து அவர் பள்ளிக்கு சென்ற பொழுது வீட்டுப்பாடம் செய்யவில்லை என்று பள்ளி ஆசிரியர் கண்டித்து கன்னத்தில் அறைந்ததாக கூறப்படுகிறது. இது தொடர்பாக மாணவியின் தாய் மேரி கோட்டை போலீசில் புகார் கொடுத்தனர்.

இந்த நிலையில் புகார் குறித்து போலீசார் நடவடிக்கை எடுக்கவில்லை என்று கூறி மாணவியின் பெற்றோர் இன்று திருச்சி போலீஸ் கமிஷனர் அலுவலகம் முன்பு திருச்சி- புதுகை சாலையில் திடீரென்று திரண்டு சாலை மறியல் போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது.தகவல் அறிந்து அங்கு பாதுகாப்பு பணியில் இருந்த போலீசார் அவர்களை சமாதானம் செய்து போலீஸ் கமிஷனர் அலுவலகத்திற்கு அழைத்து சென்றனர்.